Trabajador nunaqa manam trabäjuta mantsantsu, sinöqa trabajë gustanmi. Tsëmi kikinta mantenikunampaq y jukkunata yanapanampaq imëkata rurapakur trabajan.

Kanan witsan alli kawakuyta munarqa, trabajadormi kanantsik. Wakin nunakunaqa qelam kayan, tsëmi trabajador kashqaqa pï më kuyamantsik (Eclesiastes 3:13).

Raulmi nin: “Trabajador karmi kushishqa kä, tsëmi imëkachöpis trabajë gustaman. Y imëkatapis alli patsätsipakur alli trabajador kanqantsikpitam reqishqa kashun”.

BIBLIACHÖ YACHAKUNQANTSIK: “Uryakuq nunapaqa imëkanpis kanmi” (Proverbius 14:23).

Trabajador kanëkipaqmi këkuna yanapashunki:

Imëkatapis alli ruranëkipaq yachakuy. Wayikichö, escuëlachö, o juk trabäjuchö këkarqa ama juk rurëmanqa yarparëtsu. Y imatapis rurëta yacharnaqa, mas alli ruranëkipaq y raslla o saslla ruranëkipaq kallpachakuy. Tsënö rurarqa mas kushishqam kanki.

BIBLIACHÖ YACHAKUNQANTSIK: “Alli uryakuq nunaqa mandakuqkunapa yanapaqninmi kanqa. Manam lluta nunakunapa munëninchötsu kanqa” (Proverbius 22:29).

Jukkunaman yarpë. Alli trabajador kanqëkiqa wakinkunatapis yanapanmi. Këllaman pensarishun, wayikichö imëka rurapakuywan yanapakuptikiqa, familiachöqa ankash ankashllam imatapis rurapakuyanki.

BIBLIACHÖ YACHAKUNQANTSIK: “Imatapis qokïmi imata chaskipitapis mas kushikïtaqa apamun” (Hëchus 20:35).

Ama janan jananlla rurëtsu. Niyäshunqëkipita masta ruranëkipaq kallpachakuy. Tsëta rurarqa kushishqam kanki. Tsëpaqqa masmi trabajanki, peru manam jukkuna niyäshuptikillatsu, sinöqa kikiki munarmi (Mateu 5:41).

BIBLIACHÖ YACHAKUNQANTSIK: “Alli rurëniki kikikipa munënikipita kanampaq, y mana mälasqa” (Filemon 14).

Trabäjullachö kakuytsu. Trabajador kanqantsikqa allim. Tsënö kaptimpis, juk rurëkunata ruranapaqmi tiempuntsikta rakinantsik.

BIBLIACHÖ YACHAKUNQANTSIK: “Atskata ganar mana jamashpa uryanantsikpa rantinqa wallkallata ganarpis jamashqantsikmi mas alli këkan” (Eclesiastes 4:6).