Shoqëta munarninmi, juk yanasan tsënö nirqan. Bebeqa teytantam alläpa kuyarqan, tsëmi tsënö niyanqanqa shoqanampa rantin mas llakinätsirqan. “¿Imanirtaq mas alli kaqqa kanqa?” nir tapukoq. Tiempuwannam tsë niyanqanta juk libruman qellqarqan, tsëqa rikätsikurqan teytanta manaraq qonqanqantam.

Kë pasanqanqa rikätsikun pipis wanupakur llakikïninta qonqanampaqqa atska tiemputaraq wananqantam, masran kastampita kaptinnäqa. Tsëchi Bibliaqa nin, wanïqa ‘ultimucag chiquicoq’ kanqanta (1 Corintius 15:26, NTCN). Wanïqa illaqpitam alläpa llakikïta chäratsimun, mas kuyanqantsik kaqtam qochiramantsik. Wanïpitaqa manam pipis qeshpita ni salvakïta puëdintsiktsu.

Itsa kënö tapukurqunki: “¿Ëka tiemputataq wanantsik llakikïnintsikta qonqanapaq? ¿Imataraq ruräman aguantanäpaq? ¿Imanötaq yanapashwan wanupakur llakishqakunata? Wanukushqa kuyë kastantsikkunaqa, ¿kawariyämunqatsuraq?”.