Rosim kënö willakun: “Problëmäkuna mas peorakurkunampaq kaqta pensarmi, tsëllaman imëpis yarparäkoq kä”. ¿Bibliapa mëqan textunkunataq yanaparqan? Mateu 6:34 textum jukqa karqan, y tsëchöqa kënömi nin: “Ama imëpis yarpachakuyëtsu waränin kaq junaqpaqqa, porqui waränin junaqchöqa juk yarpachakïkunanam kanqa. Cada junaqpaqmi problëmakunaqa kan”. Rositaqa, warë warätin ima pasakunampaq kaqman mana yarpachakunampaqmi kë textu yanaparqan. Jina kënömi nin: “Atska problëmayoqnam karqä, manaraq pasakunqankunaman yarpachakunäpaq. Itsapis tsëqa imëpis pasanqatsu”.

Yasminqa alläpa llakikurninmi, ni imatapis rurëta mana puëdinqanta pensarqan. Kënömi willakun: “Cada semänam waqakoqlla kä y manam punïtapis puëdeqtsu kä. Tsënö yarpachakunqämi alläpa llakishqata katsimaq”. ¿Ima textutaq Yasminta yanaparqan? 1 Pëdru 5:7 textu yanapanqantam nin, tsëchömi kënö nin: “Llapan yarpakachënikikunata pëman churarkuyë, porqui pëqa alläpam qamkunapaq yarpachakun”. Jina Yasminqa kënömi nin: “Jehoväman mañakurmi sïguirqä, y pëqa contestamarqanmi. Imëka lasaq qepita janäpita jorqariyanqantanömi sientirirqä. Höra höraqa yarpachakïkällaraqmi, peru kananqa musyanan imata ruranäpaq kaqta”.

Isabella jutiyoq shipashmi kënö willakun: “Imatapis höranchö mana rurëqa familiapitatsunchi shamun, porqui papänïpis tsënöllam ruran. Höraqa precisaq rurënïkunata jaqirïkurmi, jamakurlla y televisionta rikaräkurlla kakü. Imatapis höranchö mana rurëqa mana allim, porqui tsëpitaran löcuyëpa ruranki y ruranqëkikunapis mana allim yarqun”. Isabellataqa 2 Timoteu 2:15 textum alläpa yanaparqan, tsëchöqa kënömi nin: “Llapan puëdinqëkimannö kallpachakï Diospa rikëninchö alli rikashqa kanëkipaq, imapitapis mana penqakushpa trabajaq”. Jina Isabellaqa kënömi nin: “Imatapis höranchö mana ruranqärëkur noqapita Jehovä penqakunantaqa manam munätsu”.

Kelly jutiyoq warminam kënö willakun: “Ima trabäjuta ruranäpaq niyämanqantaqa, ultimu hörataraq ruranäpaqmi shuyaraq kä. Tsërëkurmi waqaq kä, wallka hörallana punoq kä y tsëllamannam yarparäkoqpis kä”. Kellytaqa Proverbius 13:16 textum yanaparqan, tsëchömi kënö nin: “Yachaq [o puntallapitana ruraq] nunaqa musyëwanmi imatapis ruran, peru upa nunaqa imëkatapis llutam ruran”. Kë textu imanö yanapanqantam kënö willakun: “Puntallapitana imatapis alistanqëkiqa alläpa allim. Kananqa rurënïkunata mana qonqanäpaqmi apuntarätsï, y tsëmi yanapaman imatapis alli patsätsinäpaq y ultimu hörapaqraq mana jaqirinäpaq”.

Cristïna jutiyoq warmim kënö willakun: “Qowämi jaqiramarqan y chusku pishi wamräkunatawanmi japalläta jaqiramarqan”. ¿Ima textutaq yanaparqan? Proverbius 17:17 textum, tsëchöqa kënömi nin: “Llapan tiempuchömi rasumpa amïguqa kuyakun. Y llakikï tiempuchö yanapamänapaq yurishqam”. Cristiänu mayinkunapa yanapakïnintam Cristïnaqa ashirqan. ¿Imanötaq pëkunaqa yanapayarqan? Kënömi willakun: “Amïgükunaqa tukïnöpa yanapayämänampaqmi imëkata rurayarqan. Wakinkunaqa mikïnïkuna y wëtatam wayïman apayämurqan. Y kima kutim, noqatawan wamräkunata juk wayiman ëwakuyaptï atskaq amïgükuna ashtapakurnin yanapayämarqan. Jina juk kaqnam trabäjuta tarinäpaq yanapamarqan. Llapan amïgükunam yanapayämänampaq listu këkäyarqan”.

Punta kaq yachatsikïchö parlarinqantsik Diänapis japallanmi sientikoq. Pëqa wamranta, qowanta y kapunqanta oqrarirnin imanö sientikunqantam kënö willakun: “Wakinkuna kushishqa këkäyanqantam rikaq kä, peru noqaqa japallällam sientikoq kä”. Diänataqa Salmus 68:6 textum yanaparqan, tsëchömi kënö nin: “Diosqa japallan këkaqkunatam wayin qon”. Diänaqa kë textupaqmi kënö nin: “Kë textuchö wayi nirqa, manam juk wayillapaqtsu parlëkan. Diosnintsikqa juk familiatanölla markanchö katsimanqantsikpaq parlëkanqantam entiendirirqä. Tsëchöqa Jehoväta kuyaqkunawanmi següru, cuidashqa y juntu këkantsik. Peru Jehoväman manaraq witirqa, pëkunawan juntu këta mana puëdinqätam cuentata qokurirqä. Tsëta ruranäpaqmi Salmus 37:4 textu yanapamarqan, tsëchömi kënö nin: ‘Jehovärëkur imëpis kushishqa kë, y pëqa shonqïki mañakunqankunatam qoshunki’”.

Diänaqa kënö nirmi willakur usharin: “Noqaqa Jehovällaman mas markäkïta wananqätam cuentata qokurirqä; porqui pënöqa manam pipis kantsu. Noqanö Diospa kaqta puntaman churaqkunapa amïgun kanäpaqqa, pëkunawan imakunata ruranäpaq kaqtam apuntarqä. Pëkunachö alli kaqkunata rikëta y pantayanqankunata qonqëtam yachakurqä”.

Awmi, Diosta sirweqkunapis jutsasapam kayan. Jehoväpa testïgunkunaqa wakinkunanöllam imëka problëmakunayoq kayan. Peru Biblia yachatsikunqanta cäsukoqkunaqa, wakinkunatam llapan puëdiyanqanmannö yanapayan. Tsënö amïgukunayoq këqa alläpa shumaqmi. Peru ¿Bibliapa consëjunkunaqa yanapamënintsikta puëdinmantsuraq mana kachakaq qeshyawan kashqa o kuyashqa kastantsik wanukïkuptin?