Llapan nunakunata ankupäshun
DIOSPITA yachatsikuyänampaq qateqninkunata Jesus mandarninqa, musyarqanmi wakin nunakunaqa mana chaskikuyänampaq kaqta (Lüc. 10:3, 5, 6). Y kanampis yachatsikoq yarqushqaqa, wakin nunakunaqa mana allipam tratamantsik o hasta maqamënintsiktapis munayan. Nunakuna tsënö kayaptinqa, höraqa ankupäkoq (kuyapäkoq) këqa manam fäciltsu kanman.
Ankupäkoq nunaqa, wakinkuna imata wanayanqanta y imakunapa pasëkäyanqantam cuentachö katsin, tsëmi yanapëta procuran. Ankupäkoq mana karqa manam gänas gänastsu nunakunata Diospita yachatsishun, y manam shonqunkunamampis chäshuntsu. Tsëmi nina mana upinampaq mas yamtata churapaqnöpis, ankupäkoq kanapaq mas kallpachakunantsik. Tsënöpam imëpis gänas gänaslla yachatsikushun (1 Tes. 5:19).
Peru höraqa manam fäciltsu ankupäkoq këqa. Tsëqa, ¿imaraq yanapamäshun mas ankupäkoq kanapaq? Tsëpaqqa yachakurishun, Jehoväpita, Jesuspita y apostol Pablupita.
JEHOVÄNÖ ANKUPÄKOQ KASHUN
Jehoväqa mëtsika waranqa watakunapa pëpaq alläpa mana allikunata parlëkäyaptimpis, “mana agradecikoqkunata y alläpa mana alli” nunakunataqa ankupëkanllam (Lüc. 6:35). Y ankupäkoq kanqantaqa rikätsikun pacienciakoq karninmi, porqui Pëqa munan “tukïläya nunakuna” salvakuyänantam (1 Tim. 2:3, 4). Mana alli rurëkunata alläpa chikirnimpis, nunakunataqa alläpam valoran y manam ushakäyänanta munantsu (2 Pëd. 3:9).
Jehoväqa musyanmi mana creikoq kaqkunataqa Satanas engañashqa kanqanta (2 Cor. 4:3, 4). Wakinkunataqa wamra kayanqampita patsëmi mana kaqkunata Diospita creitsiyashqa, tsëmi Biblia ninqanman creiyänampaqqa fäciltsu. Peru Jehoväqa pëkunata yanapëtam munan. ¿Imanötaq musyantsik yanapëta munanqanta?
Nïnivi markachö tärashqa nunakunaman pensarishun. Pëkunaqa alläpa mana allikunata ruraqmi kayarqan. Peru tsënö kayaptimpis, Jehoväqa kënömi Jonasta nirqan: “¿Manaku noqaqa llakipäman Nïnivi jatun markachö täraqkunata, pachak ishkë chunka waranqapitapis (120.000) mas tsëchö täraqkunata, derëcha kaq makinkunapita izquierda kaq makinkuna imachö jukläya kanqanta mana musyaqkunata[?]” (Jon. 4:11). Jehoväqa musyarqanmi tsë nunakunaqa pëpita mana wiyashqa kayanqanta. Tsëmi ankupäkoq karnin, ushakätsita pensëkanqanta willakunampaq Jonasta mandarqan.
Noqantsikpis Jehovänöllam nunakunataqa alläpa precisaqpaq churantsik. Tsëmi Jehoväpa testïgun mana tikrayänan kaptimpis, Diospita yachatsishqa wiyamaqnintsik kaqkunataqa yanapëta procurantsik.
JESUSNÖ ANKUPÄKOQ KASHUN
Jesuspis Teytannöllam nunakunataqa ankuparqan. Bibliam pëpaq kënö nin: “Mëtsikaq nunakunata rikëkurmi alläpa ankuparqan, porqui mitseqninnaq üshakunanömi sufritsir ushashqa y ramakashqa këkäyarqan” (Mat. 9:36). Jesusqa, imanir tsënö këkäyanqantam cuentata qokurirqan. Tsë nunakunataqa, pushakoq religiösukunam alläpa mana alli tratashqa kayarqan y mana rasumpa kaqkunatam yachatsishqa kayarqan. Peru Jesusqa, problëmakunapa pasarnin wakinkuna qateqnin mana tikrayänampaq kaqta musyëkarnimpis, ‘imëkakunatam yachatsir qallëkurqan’ (Mar. 4:1-9).
Juk nuna qallananchö wiyakïta mana munaptinqa, ama pensashuntsu imëpis manana wiyakunampaq kaqtaqa
Nunakunaqa imëka problëmakunapam pasarëkäyan, y tiempuwanqa hasta Diospita wiyakïtapis munariyanmanmi
Jesusnöllam noqantsikpis ruranantsik. Diospita yachatsikushqa nunakuna mana chaskikuyaptinqa, imanir wiyakïta mana munayanqanmanmi pensanantsik. ¿Imanirtaq wakinkunaqa yachatsikunqantsikta chaskikïta munayanmantsu? Itsa rikäyashqa wakin religiösukuna mana alli portakoqta, o Testïgukunapaq imëka mana allikunata willapäyashqa. O wakinkunaqa, itsa vecïnunkuna o familiankuna pëkunapita burlakuyänanta mantsakuyan.
Y wakinkunaqa itsa mana alli tratamashwan, imëka mana allikunapa pasashqa karnin. Kim jutiyoq misionëram kënö nir willakun: “Yachatsikuyanqä juk markachöqa, guërra kashqa kaptinmi nunakuna alläpa sufriyashqa y imëkankunata oqrayashqa. Y imëllapis alli kawakï kanampaq kaqtaqa manam shuyaräyantsu. Tsëmi imapitapis raslla piñakuyan y manam pimampis confiakuyantsu. Tsë markachöqa, Diospita wiyakïta mana munaqkunataqa seguïdum tariyä, y juk kutinäqa yachatsikïkaptïmi maqayämarqan”.
¿Imatataq Kimqa ruran ankupäkoq (kuyapäkoq) këta mana jaqinampaq? Kënömi willakun: “Nunakuna mana alli tratayämaptinqa, Proverbius 19:11 textuchö kënö ninqantam yarpëta procurä: ‘Alli pensëta yachaq nunaqa manam rasllaqa piñakuntsu’. Tsë nunakuna imakunapa pasëkanqanman pensanqämi, ankupäkoq kanäpaq yanapaman. Jinamampis, manam llapan nunakunatsu mana alli tratakoqqa kayan. Tsë markachöqa, wakin nunakunaqa Bibliapita yachatseq kutiyaptï shumaqmi chaskiyäman”.
Tsëmi noqantsikpis kënö tapukunantsik: “Testïgukunapaq kutin kutin mana allikunata parlapäyämashqa kaptinqa, ¿noqaqa chaskikümantsuraq karqan Testïgukuna parlapäyämaptin?”. Itsa yachatsinqantsik nunakuna pasayanqampa pasashqa karninqa, noqantsikpis pëkunanölla mana allipa tratashwan karqan, y ankupämänatachi wanashwan karqan. Jesusmi kënö mandamantsik: “Imanömi nunakuna tratayäshunëkita munayanki, tsënölla qamkunapis pëkunata tratayë”. Tsëta yarpanqantsikmi yanapamäshun, mana alli tratamaqnintsikkunata shumaq tratanapaq (Mat. 7:12).
PABLUNÖ ANKUPÄKOQ KASHUN
Apostol Pabluqa, manam qonqarqantsu Diospa sirweqnin manaraq tikrarnin imanö nuna kashqa kanqanta, tsëmi pasëpa chikeqninkunatapis ankuparqan. Kënömi nirqan: “Puntata Diosta ofendeq, markanta chikir imëkata ruraq y mana respetakoq nuna kashqa kaptïpis [...] ankupämarqanmi, porqui noqaqa mana musyar y mana markäkïyoq karmi tsëkunata rurarqä” (1 Tim. 1:13). Pabluqa manam qonqarqantsu Jehoväwan Jesus ankupäyanqantaqa. Itsa yachatsikunqanta mana chaskikoq nunakuna imanö portakuyanqan yarpätseq, pë imanö kashqa kanqanta.
Höraqa, mana alli yachatsikïkunaman alläpa creeq nunakunatam Pabluqa yachatsikunqanchö tareq. Peru ¿imatataq ruraq? Hëchus 17:16 textum kënö nin: “Atënas markachö Pablu shuyarëkar[mi], [...] mëtsika imäginkunawan junta kanqanta rikärir shonqunchö piñakur llakikurqan”. Peru Pabluqa, tsë rikanqan cösaskunatam utilizarqan Diospita shumaq yachatsikunampaq (Hëch. 17:22, 23). Pabluqa imanö kayanqanta y imakunaman creiyanqanta cuentaman churarmi, wakinllapis salvakuyänanta munarnin tukïnöpa yachatsikurqan (1 Cor. 9:20-23).
Yachatsikunqantsikchö mana alli tratamashqa o mana alli yachatsikïkunaman chipyëpa creeqkunata tarirqa, apostol Pablunömi ruranantsik. Imakunaman creiyanqanta cuentaman churëkurmi, Diosnintsik änikunqampita yacharatsinantsik (Is. 52:7). Dorothy jutiyoq panim kënö nin: “Mëtsika nunakunatam yachatsiyashqa Diosqa alläpa feyupa castigakunqanta. Tsëmi pëkunawan parlarqa, puntataqa Diosman creinqampitaraq felicitäri. Tsëpitanam Bibliawan rikäratsï Jehoväqa alläpa kuyakoq kanqanta y shamoq tiempuchö ruramunampaq kaqkunatapis”.
“MANA ALLITA, ALLI KAQWAN VENCIRNIN SÏGUI”
Kë “ushanan junaqkunachöqa”, tiempu pasanqanmannömi nunakunaqa mas mana alli tikrayanqa (2 Tim. 3:1, 13). Peru nunakuna tsënö kayanqampitaqa, manam ankupäkoq (kuyapäkoq) këta o kushishqa yachatsikïta jaqirinantsiktsu. Jehovämi kallpata qomantsik “mana allita, alli kaqwan” vencir sïguinapaq (Rom. 12:21). Jëssica jutiyoq precursöram kënö nin: “Yachatsikoq ëwarninqa Testïgukunata chikeq y Diospa willakïninkunata wiyakïta mana munaq orgullösu nunakunatam seguïdu tarï. Y mana alli tratamashqaqa rasllam piñakurishwan. Tsëmi parlapar qallaptï pipis mana alli tratamaptinqa, shonqüllachö Jehoväman mañakurï tsë nunata shumaq yacharatsinäpaq. Tsënöpam mana alli tratamanqanmanqa pensänatsu, sinöqa imanö yanapanäpaq kaqmanmi”.
Diospita yachakïta munaqkunataqa ashikantsikllam
Jehoväpita yachatsikurnin sïguishqaqa, tiempuwanqa wakin nunakunaqa wiyakïtam munariyanqa
Jina yachatsikoq yarqushqa yanaqintsikta mana alli tratayaptin yanapanapaqpis listum këkänantsik. Jëssicam kënö nin: “Yanaqïta o noqata mana alli tratayämaptinqa, manam pasakunqanmanqa alläpa pensänatsu. Tsëpa rantinqa, alli sientikuyänäpaqmi juk cösaskunapita o Diospita yachatsikï alläpa yanapakunqanta parlëta procurä”.
Jehoväqa pëpita yachatsikurnin imëka mana allikunapa pasanqantsiktaqa alleqmi musyan, y alläpam kushikun nunakunata ankupashqa (Lüc. 6:36). Tsënö kaptimpis, Diosnintsikqa manam nunakunata imëyaqpis ankuparllaqa kakïkanqatsu. Pëqa musyannam, mana wiyakoq kaqkunata imë ushakätsinampaq kaqta. Peru tsëta manaraq ruramunqanyaqqa, alläpam precisan nunakunata yachatsirnin sïguinantsik (2 Tim. 4:2). Tsënö këkaptinqa, imëpis gänas gänaslla yachatsikushun y llapan nunakunata ankupäshun.
