“¿AGRADECIKOQ nunaku kä?” Tsëtaqa llapantsikmi tapukunantsik. Kanan witsankuna mëtsika nunakuna mana agradecikoq kayänampaq kaqtam Bibliachöqa willakun (2 Tim. 3:2). Itsa derëchunkuna kaptin imankunapis kayäpunqanta y tsërëkur pitapis mana agradecikuyänan precisanqanta pensaq nunakunata reqintsik. Tsënö nunakunawanqa manam pipis juntakïta munantsu.

Peru Jehovä Diosqa, sirweqninkunatam ‘agradecikoq kayanqanta rikätsikuyänampaq’ nin (Col. 3:15). Rasumpa kaqchöqa, agradecikoq kanqantsikqa alläpam yanapamantsik. ¿Imanirtaq tsëta nintsik? Wakin wakinllata rikärishun.

Imëpis agradecikunqantsikqa, kushishqa kanapaqmi yanapamantsik. Agradecikoq kaq y agradecikunqan kaq nunam kushishqa kayan. ¿Imanötaq tsëqa? Këllaman pensarishun: pipis noqantsikrëkur imallatapis ruranampaq listu këkaqqa, noqantsikpaq tsëta ruranan precisanqantam pensan y kuyamanqantsiktam rikätsikun. Tsëqa alläpam kushitsimantsik. Tsënöchi Rutpis sientikurqan. Cosëchachö ëllïkanqanta Rut-ta atskata qararmi, Boazqa pëman yarpachakunqanta rikätsikurqan, y tsëqa Rut-ta alläpachi kushitsirqan (Rut 2:10-13).

Masqa Diostam agradecikunantsik (1 Tes. 5:18). Pëta sirwinqantsikchö y kawënintsikchö bendicimashqa imëkata chaskinqantsikman y chaskir sïguinqantsikmanqa, höra höraqa yarparquntsikchi (Deut. 8:17, 18; Hëch. 14:17). Peru Dios alläpa alli kanqantaqa, ama rasllaqa yarpärishuntsu. Noqantsikta y kuyashqa kastantsikkunata imanö yanapashqa kanqanman pensanapaq tiemputa rakishun. Tsëta rurashqaqa, alläpa kuyamanqantsikta y precisaqpaq churamanqantsiktam següru kashun (1 Juan 4:9).

Jehovä alläpa alli kanqanman y bendicimanqantsikman pensarpis, alläpa kuyakoq kanqampita agradecikushun (Sal. 100:4, 5). Pitapis agradecikunqantsik kushishqa kanapaq yanapakunqantam niyan.

Jina agradecikoq kanqantsikqa, alli amïgukunayoq kanapaqmi yanapamantsik. Kuyamänataqa llapantsikmi munantsik. Pipis noqantsikrëkur ruranqampita imallatapis shonqupita patsë agradecikunqantsikqa, pëwan mas alli amïgu kanapaqmi yanapamantsik (Rom. 16:3, 4). Jina agradecikoq nunakunaqa, itsa wakinkunata yanapayänampaqpis mas listu këkäyanqa. Pëkunapaq rurayanqanta rikarmi, pëkunapis jukkunata kuyëpa tratayänampaq yanapan. Y nuna mayinkunata yanapëqa alläpam kushitsin, Jesus ninqannömi, “imatapis qokïmi imata chaskipitapis mas kushikïtaqa apamun” (Hëch. 20:35).

California markachö juk universidächö yachatsikoq profesormi kënö nin: “Agradecikoq kanapaqqa, alläpam precisan nunakuna imanö tratanakuyanqanta rikänantsik; höraqa noqantsikpaqmi imallatapis pipis rurarin, y juk kutichönam wakinkunapaq noqantsik imallatapis rurarintsik”. Awmi, alli y kushishqa kawakunapaqqa, wakinkunam imallachöpis yanapamantsik.  Itsa mikïnintsik qaramarnintsik o doctorkunapis jampimarnintsik (1 Cor. 12:21). Agradecikoq kaqkunaqa, pëkunapaq wakinkuna imallatapis rurayanqantam cuentaman churayan. Tsënö kaptinqa, ¿agradecikoq nunaku kantsik?

Jina agradecikoq kanqantsikqa, imapis alliyänampaq kaqman pensanapaqmi yanapamantsik. Peqantsikqa wakin wakintam yarpätsimantsik peru wakintaqa manam. Agradecikoq nunakunaqa, alliyänampaq kaqkunamanmi mas pensayan y problëmakunamanqa manam alläpa yarparäkuyantsu. Mas agradecikoq karqa, masmi alli cösaskunata rikäshun y tsëqa mas agradecikoqraq kanapaqmi yanapamäshun. Kawënintsikchö imapis pasakunqanta tsënö rikanqantsikmi, Pablu kënö ninqanta ruranapaq yanapamantsik: “Señor-rëkur imëpis alläpa kushikuyë” (Filip. 4:4).

Agradecikoq karqa, manam imapis kanqannölla kakunampaq kaqmantsu yarparäkushun. Jina manam wakinta chikipäshuntsu, llakikushuntsu o piwampis resentikushuntsu. Agradecikoq nunakunaqa, kayäpunqanllawanmi kushishqa kayan y manam imëkayoq këta ashiyantsu (Filip. 4:12).

Kë ushanan junaqkunachö problëmakuna qelanätsimänata y llakitsimänata Satanas munanqantaqa, Diosta sirweqkunaqa musyantsikmi. Imapis mana alliyänampaq kaqta pensanata y imapitapis quejakunqantsikqa alläpam kushitsinman. Tsënö kanqantsikqa, manam Diospita shumaq yachatsikunapaq yanapamäshuntsu. Rasumpa kaqchöqa, agradecikoq kanqantsikqa Dios kanqannö kanapaqmi yanapamäshun. Këllaman pensarishun: Diospita chaskinqantsik cösaskunaqa, alläpam kushitsimantsik y tsëqa llapan änikunqankunata cumplimunampaq kaqman confiakunapaqmi yanapamantsik (Gäl. 5:22, 23).

Agradecikoq këpaq këchö yachakunqantsik rasumpa kanqantaqa Diosta sirweqkunaqa segürum kantsik. Tsënö karpis, kikintsikllapita mana agradecikoq kanqantsikta y imapis alliyänampaq kaqman mana pensanqantsiktaqa cuentata qokuntsikmi. Peru ama llakikur qelanäkurishuntsu. Imëpis agradecikoq kanapaq kallpachakïtaqa puëdintsikmi. Tsëpaqqa, imakunapita agradecikunapaq kaqta cada junaq yarpachakunapaq tiemputa rakishun. Tsëman mas yarpachakushqaqa, mas fäcilmi kanqa agradecikoq kanantsikpaq. Y kawëninkunachö problëmankunallaman yarparäkoqkunapitaqa, mas kushishqam kashun. Kushishqa kanapaq yanapamaqnintsik kaqkunaman y kallpayoqta tikratsimänapaq Diosnintsik y juk nunakuna rurayanqanman yarpäshun. Y imapita agradecikunapaq juk cuadernuman kimallata qellqarinqantsikqa alläpa allim kanman.

Cientïficukunaqa tsëllaran musyariyashqa, pitapis agradecikïqa peqantsik mas alli kanampaq y imapis altsakärinampaq kaqman pensanapaq yanapakunqanta. Agradecikoq nunakunaqa mas kushishqam kawakuyan. Kapamanqantsik cösaskunaman yarpäshun, kawënintsikchö allikunapa pasanqantsikman pensashun y agradecikoq kashun. Imatapis kikintsik tarinqantsikman pensanapa rantinqa, Bibliachö kënö ninqanta rurashun: “Jehoväta agradecikuyë, pëqa alläpa allim”, “agradecikoq kayanqëkita rikätsikuyë” (1 Crön. 16:34; Col. 3:15).