1, 2. Juk wawqi willakunqannö, ¿imatataq cada ünu ruranantsik?

¿TEYTËKIKUNAQA Jehoväpa testïgunkunaku kayan? Tsënö kaptinqa, Dioswan alli amïgu këta herencia cuentata mana chaskinqantsikta yarpë. Teytantsikkuna Jehoväta sirwiyaptin o mana sirwiyaptimpis, cada ünum kallpachakunantsik Pëwan alli amïgu kanapaq.

² Testïgu familiayoq winashqa juk wawqipaq parlarishun. Jövin karqa, manam Diospa amïgunnötsu sientikoq. Kënömi nin: “Familianölla rurëta munarmi, Jehovätaqa sirweq kä”. Peru tsëpitaqa, Bibliata leyinampaq y leyinqanman pensanampaqmi churapakarqan, jina mas seguïdum Diosman mañakur qallëkurqan. Tsëpita ima pasakunqantam kënö willakun: “Kuyashqa Teytä Jehoväta reqirlla pëpa amïgun kanäpaq kaqtam cuenta qokurirqä”. Kë wawqita tsënö pasanqanqa, ishkë tapukïmanmi pensatsimantsik: Jehoväpita wakin wakinllata musyanqantsikwan pëta alli reqiwanqa, ¿imachötaq jukläya kayan? Y ¿imata rurartaq Jehovätaqa alli reqishwan?

3. Jehoväpita wakin wakinllata musyanqantsikwan pëta alli reqiwanqa, ¿imachötaq jukläya kayan?

³ Itsa Jehoväta reqinqantsikta pensantsik, ima jutin kanqanta musyar o imanö kanqampita wakin wakinta musyarnin. Peru Jehoväta reqiqa manam tsëllatsu. Pëpita yachakunapaq y imanö kanqanta musyanapaqmi tiemputa rakinantsik. Tsëta rurashqaran imatapis imanir parlanqanta y ruranqanta entiendishun. Y tsëqa, imata pensanqantsik y ruranqantsikkuna pëta gustanqanta o mana gustanqantam musyashun. Y noqantsikpita  Jehovä imata shuyaranqanta entiendirirqa, tsëta ruranapaqmi kallpachakunantsik.

4. ¿Imanötaq yanapamäshun Bibliachö willakunqan wakin nunakunapita yachakunqantsik?

⁴ Itsa wakin nunakunaqa Jehoväta sirwita munashqa noqantsikpita burlakuyanqa, y itsa reunionkunaman ëwar qallëkushqaqa michämënintsikta munayanqa. Peru Diosman confiakushqaqa, pëqa manam dejaramäshuntsu. Tsëman confiakurmi, Jehoväwanqa imëyaqpis amïgu kashun. ¿Rasumpaku Jehovätaqa tsëläya reqita puëdishwan? Awmi. Jehoväwan tsënö amïgu këman chaq wakin nunakunaqa, Moiseswan Rey Davidmi kayarqan, pëkunapis noqantsiknöllam imallachöpis pantareq kayarqan. Qateqnin kaq pärrafukunachömi, imata rurayanqampita y Jehoväta alli reqiyänampaq ima yanapanqampita yachakushun, jina pëkunanö Jehoväpa amïgun imanö kanapaq kaqtam yachakushun.

5. ¿Imatataq Moises rurarqan?

⁵ Moisesqa yachakunqanmannömi kawarqan. 40 watayoqnö këkarmi, “Egiptupa reynimpa warmi wamrampa wamrannö reqishqa” kanampa rantin, Jehoväta sirweqkunata, juk parlakïchöqa, hebreu nunakunata yanapanampaq churapakarqan (Heb. 11:24). Moisesqa precisaq nuna kanampaq kaqtaqa, mana kaqpaqmi churarirqan. Egiptu nacionchö esclävu kayanqan hebreu nunakunaman qaqaptin, diostanö rikäyanqan faraon chipyëpa chikinampaq kaqtaqa musyarqanmi. Tsënö karpis, pëkunamanmi qaqarqan, y tsënömi Jehoväman alläpa markäkunqanta y pëman chipyëpa confiakunqanta rikätsikurqan. Jehoväman tsënö confiakunqantsikmi, imëyaqpis amïgun kanapaq yanapamäshun (Prov. 3:5).

6. ¿Imatataq Moisespita yachakuntsik?

⁶ ¿Imatataq yachakuntsik? Moisesnömi llapantsik decidinantsik Diosta sirwinapaq o mana sirwinapaq. Jehoväta sirwiqa manam fäciltsu kanqa, itsa imëkantsikta dejashun y pëta mana reqeqkuna chikimäshun. Peru Teytantsik Jehoväman confiakushqaqa, pëqa yanapamäshunmi.

7, 8. ¿Imata yachakurtaq Moisesqa sïguirqan?

⁷ Moisesqa Dios imanö kanqampita yachakurnin y voluntäninta rurarmi sïguirqan. Këllaman pensarishun: Egiptupita israelïtakunata libranampaq Jehovä niptinmi, Moisesqa mantsarqan y tsëta rurëta mana puëdinampaq kaqta Jehoväta atska kuti nirqan. Tsëmi Jehoväqa ankuparqan (llakiparqan) y yanaparqan (Ex. 4:10-16). Tsëmi Moisesqa, mana mantsakushpa Dios ninqankunata Faraonta willarqan. Tsëpitanam, israelïtakunata salvanqanta y Faraonta y tröpankunata Puka lamarchö poderninwan Jehovä ushakätsinqanta rikarqan (Ex. 14:26-31; Sal. 136:15).

⁸ Egiptupita israelïtakunata Moises librita jorqarishqa kaptimpis, pëkunaqa kutin kutinmi quejakurnin kayarqan. Esclävu këpita jorqanqan sirweqninkunata tsë witsankuna alläpa pacienciakur Jehovä tratanqantam Moisesqa rikarqan (Sal. 78:40-43). Jina ninqannö mana ruranampaq mañakuptin Jehovä cambiariptinmi, alläpa humildi kanqanta Moises rikarqan (Ex. 32:9-14).

9. ¿Jehoväwan Moises imanö amïgu kayanqantataq Hebrëus 11:27 textu rikätsikun?

⁹ Egiptupita yarqurirqa,  Teytan Jehoväta imëka rikëkaq cuentam Moisesqa pëwan mas alli amïgu këman charqan (leyi Hebrëus 11:27). Tsëmi Bibliachöqa kënö nin: “Nunapura parlayanqannömi Jehoväqa Moisesta parlapaq” (Ex. 33:11).

10. Jehoväta alli reqinapaqqa, ¿imatataq ruranantsik?

¹⁰ ¿Imatataq tsëpita yachakuntsik? Jehoväta alli reqinapaqqa, manam imanö kanqanllapitatsu yachakunantsik, sinöqa munënintapis ruranantsikmi. Y kanan witsanqa, ¿imataq pëpa munëninqa? Bibliachömi kënö nin: “Pëpa munëninqa llapan tukïläya nunakuna salvakuyänan y rasumpa kaqta alleq musyayänanmi” (1 Tim. 2:3, 4). Juknöpaqa Jehoväpa munëninta rurantsik, pëta reqiyänampaq nunakunata yachatsirninmi.

11. ¿Imanirtaq Jehovätaqa mas alli reqintsik pëpita nunakunata yachatsirnin?

¹¹ Jehoväpita wakin nunakunata yachatsirninmi, pëtaqa mas alli reqintsik. Këllaman pensarishun: alli shonquyoq nunakunata yachatsinapaq yanapamashqam, alläpa ankupäkoq kanqanta rikantsik (Juan 6:44; Hëch. 13:48). Bibliapita estudiëkätsinqantsik nunakuna mana alli costumbrinkunata jaqiyaptin y Dios munanqannö kawayaptinmi, Diospa Palabran cambiatsita puëdinqanta rikantsik (Col. 3:9, 10). Jina Pëta reqiyänampaq y salvakuyänampaq yachatsinapaq nunakunaman kutin kutin ëwanapaq mandamanqantsikchömi, Jehovä alläpa pacienciakoq kanqanta rikantsik (Rom. 10:13-15).

12. Exodu 33:13 textuchö ninqannö, ¿imatataq Moises mañakurqan, y imanir?

¹² Jehoväwan amïgu kënintaqa Moisesqa alläpa precisaqpaqmi churarqan. Diospa jutinchö mëtsika milagrukunata rurashqa karpis, pëta mas reqinampaqmi Moisesqa alläpa respetarnin yanapëkunampaq Jehoväta mañakurqan (leyi Exodu 33:13 *). Tsë witsampaqqa, Moisesqa 80 watapitapis masyoqnam karqan, tsënö karpis alläpa kuyakoq Teytan Jehoväpita masraq yachakunan pishinqantaqa musyarqanmi.

13. Jehoväwan amïgu kënintsikta precisaqpaq churanqantsiktaqa, ¿imanötaq juknöpaqa rikätsikuntsik?

¹³ ¿Imatataq tsëpita yachakuntsik? Mëtsika watapana Jehoväta sirwikashqapis, pëwan amïgu kënintsiktaqa alläpa precisaqpaqmi churanantsik. Y tsëtaqa juknöpaqa rurashun, pëta imëpis mañakurninmi.

14. Jehoväta mas alli reqinapaqqa, ¿imanirtaq alläpa precisan pëman imëpis mañakunantsik?

¹⁴ Piwampis alli amïgu këmanqa chantsik, imëpis parlapänakurninllam. Tsëmi Jehovätaqa imëpis mañakunantsik y mana mantsakushpam imata pensanqantsikta y imanö këkanqantsikta willanantsik (Efes. 6:18). Turquïa nacionpita Krista jutiyoq panim kënö nin: “Imata pensanqäta Jehoväta willarqa, imanö yanapamanqantam cuentata qokurï, tsëmi pëta mas kuyä y pëman mas confiakü. Mañakunqäta imanö contestamunqanta rikarmi, pëtaqa masraq Teytätanö y Amïgütanö rikä”.

15. ¿Imatataq Jehoväqa rey Davidpaq nirqan?

¹⁵ Rey Davidqa Dios akranqan nacionchömi yurikurqan. Tsënö kaptimpis, manam familiankuna Diosta sirwiyaptinllatsu pëpis sirwirqan. Tsëpa rantinqa, kikinmi Dioswan amïgu kanampaq kallpachakurqan, tsëmi Jehoväqa pëta alläpa kuyarqan. Pëpaqmi kënö nirqan: “Davidtam shonqüpaqtanö tarirqö; pëmi llapan munanqäta ruranqa” (Hëch. 13:22). ¿Imanötaq Davidqa Jehoväwan alli amïgu tikrarqan?

16. ¿Imatataq Jehoväpita David yachakurqan kamanqankunata rikarnin?

 ¹⁶ Jehovä kamanqankunata rikarmi Davidqa pëta mas reqirqan. Jövin kanqan witsanqa, teytampa üshankunata mitsirmi karqan. Tsëchi Jehovä kamanqankunata rikar pëman mas pensarqan. Këllaman pensarishun: paqaskunapa ciëluta rikarqa, manam mëtsika estrëllakunallatatsu rikaq, sinöqa tsë estrëllakunata kamaq imanö kanqanmanmi pensaq. Tsëmi kënö qellqarqan: “Ciëlukunaqa Diospa jatun kënintam willakïkäyan. Y makinwan rurashqankunallapitam tsëchö llapan këkaqkunapis willëkämantsik” (Sal. 19:1, 2). Jina nunakuna imanö kamashqa këkäyanqanman pensarmi, Jehovä alläpa yachaq këninman pensaq (Sal. 139:14). Dios kamanqankunata entiendita procuranqanchömi mana kaqnölla sientikurqan (Sal. 139:6).

17. ¿Imatataq yachakushun Dios kamanqankunaman pensarqa?

¹⁷ ¿Imatataq tsëpita yachakuntsik? Dios kamanqankunata rikapakushun. Ama Dios kamanqan shumaq sitiuchö kawanqantsikllapitaqa kushikushuntsu, sinöqa alläpa shumaq cösaskunata kamanqanta rikäshun. Cada junaq rurënintsikkunata rurarqa, jiruroqnintsikchö këkaq plantakunata, animalkunata y nunakunata rikar Diosnintsikpita imata yachakunqantsikman pensashun. Tsëta rurarqa, cada junaqmi kuyakoq Teytantsikpita imëkata yachakushun (Rom. 1:20). Y cada junaq pasanqanmannömi pëta mas kuyashun.

18. Salmus 18 kaq capïtuluchöqa, ¿David imata cuentata qokunqantataq rikantsik?

¹⁸ Davidqa Jehovä yanapanqantam cuentata qokurqan. Këllaman pensarishun: teytampa üshankunata defendirnin juk leonta y juk ösuta wanuratsirmi, tsë mikukoq animalkunata Jehoväpa yanapakïninwan wanutsishqa kanqanta nirqan. Y alläpa jatun Goliat nunata wanuratsirqa, Jehovä yanapëkanqantam rikarqan (1 Sam. 17:37). Jina chikeqnin rey Saulpa makimpita Jehovä yanapaptin escapashqa kanqantapis cuentatam qokurqan (rikäri Salmus 18 kaq capïtulupa jananchö këkaq nötata). Juk orgullösu nunaqa tsë llapanta kikin lograshqa kanqantam ninman karqan. Peru Davidqa humildim karqan, tsëmi imëkapa pasëkanqanchö Jehovä yanapëkanqanta cuentata qokurqan (Sal. 138:6).

19. ¿Imatataq Davidpita yachakuntsik?

¹⁹ ¿Imatataq tsëpita yachakuntsik? Yanapamänapaq Jehoväman mañakurnimpis, imanö y imë yanapëkämanqantsiktam rikëta procuranantsik. Humildi karnin y llapanta rurëta mana puëdinqantsikta cuentaman churarqa, mas fäcilmi rikäshun Jehovä imanö yanapamanqantsikta. Y yanapamanqantsikta cada rikarmi, Pëwan mas alli amïgu këman chäshun. Tsënömi pasarqan mëtsika watapana Jehoväta sirweq Fiyi nacionpita Isaac jutiyoq wawqita. Pëmi kënö nin: “Kawënï imanö kashqa kanqanman yarparqa, Bibliata estudiar qallanqäpita patsë Jehovä yanapamanqantam cuentata qokurï. Tsëmi lädüchö këkanqantanö rikänäpaq yanapaman”.

20. ¿Imanötaq Davidta yanaparqan Dioswan alli amïgu kanqan, y imatataq tsëpita yachakuntsik?

²⁰ Jehovänö kanampaqmi Davidqa kallpachakurqan. Diosqa pënö këta puëdinapaqmi kamamarqantsik (Gen. 1:26). Imanö kanqampita mas yachakurqa, masmi pënö këta puëdishun. Davidqa Teytan Jehoväta alli reqirmi, pë tratanqannölla wakinkunata tratarqan. Kë reypa kawëninchö juk pasakunqanta rikärishun. Bat-Sëbawan oqllanakur y qowanta wanutsiyänampaq mandakurmi,  Davidqa Jehoväpa rikëninchö jutsallakurqan. Peru Jehoväqa pëta ankuparqanmi (2 Sam. 11:1-4, 15). ¿Imanir? Diosnö kanampaq kallpachakushqa kaptin y wakin nunakunata ankupashqa kaptinmi. Jehoväwan alläpa alli amïgu kanqampitam, rey Davidta alläpa kuyayarqan y wakin reykunatam Diosqa pëtawan igualatseq (1 Rey. 15:11; 2 Rey. 14:1-3).

21. Efesius 4:24 y 5:1 textukunachö ninqannö, ¿imachötaq yanapamantsik Diosnö kanapaq kallpachakunqantsik?

²¹ ¿Imatataq tsëpita yachakuntsik? Diosnö kanapaq kallpachakunantsik alläpa precisanqantam. Tsëqa manam mas alli kanallapaqtsu yanapamäshun, sinöqa Diosta mas reqinapaqmi. Diosnö kanapaq kallpachakushqaqa, pëpa tsurinkuna kanqantsiktam rikätsikuntsik (leyi Efesius 4:24; 5:1).

22, 23. Jehoväpita yachakunqantsikmannö kawashqaqa, ¿imataq pasakunqa?

²² Yachakurinqantsiknöpis, kamanqankuna y Palabran Bibliam Jehoväta mas reqinapaq yanapamantsik. Tsë libruchöqa, Moisespaqnö y Davidpaqnöpis mëtsikaq nunakunapaqmi willakun y pëkunapitaqa imëkatam yachakïta puëdintsik. Pëta reqinapaqqa Jehoväqa imëkatam rurashqa. Kananqa noqantsikmi llapan puëdinqantsikmannö reqita procuranantsik.

²³ Jehoväpita yachakïtaqa manam imëpis ushashuntsu (Ecl. 3:11). Peru manam Jehoväpita imëkata yachanqantsiktsu masqa precisan, sinöqa pëpita yachakunqantsikwan imata ruranqantsikmi. Yachakunqantsikmannö kawanapaq y kuyakoq Diosnintsiknö kanapaq kallpachakushqaqa, pëmi noqantsikwan mas alli amïgu tikranqa (Sant. 4:8). Palabran Bibliachöqa, pëta asheqkunata mana ni imëpis dejarinampaq kaqtam nimantsik.