Manatsunchi. Diabluqa, manam Dios michäkunqan frütata mikurqa cuerpunlla wanunampaq kaqta y mana rikakoq imampis kawëkänampaq kaqtatsu nirqan (tsëtam wakinqa alma mana wanunqanta niyan). Satanasqa, culebrata parlatsirmi imampis mana wanunampaq kaqta Ëvata nikarqan. Diospa mandädunchö mana karnin Patsachö kushishqa kawakur sïguinapaq kaqtam nikarqan (Gen. 2:17; 3:3-5).

Alma mana wanunqan creencia Eden huertachö mana yurishqa këkaptinqa, ¿imëpitataq nunakunaqa tsëman creir qallëkuyarqan? Imë qallashqa kanqantaqa manam segürutsu kantsik. Noë kawanqan witsan Apäkï Tamya mana alli religionyoq kaqkuna wanushqa kayanqantaqa musyantsikmi. Diosta sirweqkunalla, juk parlakïchöqa, Noëwan familianlla kawëkar quedashqa kayaptinmi, mana alli creenciakunaqa ushakäriyarqan.

Tsëmi kanan witsan alma mana wanunqanta creiyanqanqa, Apäkï Tamya pasanqanchö qallarqan. Babel markachö nunakunata Jehovä tukïläya idiömakunata parlatsirmi, “më tsëpa witsikäratsirqan”, y ëwakurqa, mana wanoq almayoq kayanqan yachatsikïtachi tsë nunakunaqa më tsëman chätsiyarqan (Gen. 11:8, 9). Tsëmi tsë mana alli yachatsikï imë qallanqantaqa mana musyantsiktsu. Peru ‘ulikoqkunapa teytan’ Satanas tsë mana rasumpa kaq yachatsikïta yuritsinqanta y më tsëman chanqampita kushikunqantaqa segürum këkantsik (Juan 8:44).