Leyeqkuna tapukuyanqan

KICHË

Juk asuntu cläru kanampaqqa, ishkë testïgukuna tsë asuntuta rikäyashqa kayänan precisanqantam Bibliachöqa nin (Nüm. 35:30; Deut. 17:6; 19:15; Mat. 18:16; 1 Tim. 5:19). Tsënö kaptimpis, juk nuna comprometikushqana shipashta chakrakunachö këkaqta tarïkur qaparikaptimpis violashqa kaptinqa, tsë nuna mana majanwan oqllanakï jutsaman ishkishqa kanqantam Leychöqa neq, peru shipashqa manam. Pillapis tsëta rikashqa mana këkaptinqa, ¿imanirtaq Leychöqa tsënö neq?

Deuteronomiu 22:25 a 27 textuchö ninqanqa, manam tsë nuna jutsayoq kanqanta o mana kanqanta rikätsikunampaqtsu karqan, jutsata rurashqa kanqanqa clärum këkarqan. Tsë textuchö leyqa, tsë shipash jutsayoq o mana jutsayoq kanqanta rikätsikunampaqmi karqan. Qepa kaq versïculukunachö ima ninqanta rikärishun.

Qepa kaq versïculukunachöqa, markachö këkar juk comprometikushqa warmiwan juk nuna oqllanakunqampaqmi parlëkan. Juk comprometikushqa warmitaqa casakushqatanönam rikäyaq, tsëmi pëwan oqllanakoq nunaqa jukpa majanwan oqllanakï jutsaman ishkeq. Y warmiqa, ¿jutsayoqku kaq? ‘Markachö këkarmi qaparishqatsu’ (qayarishqatsu). Qaparishqa kaptinqa, tsë markachö wiyaq kaqkunachi defendiyanman karqan. Peru mana qaparishqa kaptinmi, mana majanwan oqllanakï jutsaman ishkishqa karqan. Tsëmi ishkankuna jutsata rurashqa kayarqan (Deut. 22:23, 24).

Qateqnin kaq versïculuchönam, juknöpa pasakunqampaq parlan, kënömi nin: “Tsënö kaptimpis, sitsun tsë nuna comprometikushqana shipashta chakrakunachö këkaqta tarïkur mälas violashqa kanman, tsëqa violaq nunallam wanunan; shipashtaqa manam imananëkitsu. Pëqa manam wanunampaqnö ima jutsatapis rurashqatsu. Kë asuntuqa, juk nunata nuna mayin maqar wanutseqnömi. Tsë shipashta violaq nunaqa, chakrakunachö këkaqtam tarishqa, y comprometikushqana shipashqa qaparirqanmi, peru manam ni pillapis yanapëkurqantsu” (Deut. 22:25-27).

Tsënö pasakushqa kaptinqa, juezkunaqa tsë warmi willakunqantam creiyaq. ‘Comprometikushqana shipash qaparishqa’ kanqantam creiyaq, “peru manam ni pillapis yanapëkurqantsu”. Tsëmi mana majanwan oqllanakï jutsaman ishkishqatsu karqan. Peru tsë nunaqa, ‘mälas violanqampita’ y mana majanwan oqllanakï jutsapitam culpayoq kaq.

Tsëmi, tsë warmi jutsannaq kanqanta rikätsikunampaq tsë leyqa kaq. Peru ollqu kaq tsë warmita violashqa kanqan y mana majanwan oqllanakï jutsaman ishkishqa kanqanqa clärum këkarqan. Tsë asuntuta juezkuna llutalla mana rikäyanqampitaqa segürum këkantsik, pëkunaqa alliraqchi musyapakuyaq y Dios atska kutichö mandakunqanmannöchi imata rurayänampaqpis patsätsiyaq (Ex. 20:14; Deut. 13:14; 17:4).