Qallananchömi parlarquntsik Delfoschö këkaq sacerdöti engañariptin rey Crësu Persiapa reyninwan pelyanqanta y guërrata perdinqanta. Peru Bibliaqa unëpitanam willakurqan Persiapa reynimpaq, y willakunqannöllam llapampis cumplikarqan.

Persiapa reynin yurinampaq 200 watakuna pishïkaptinmi, Diospa willakoqnin Isaïasqa nirqan tsë reypa jutin Cïru kanampaq kaqta. Y Babiloniata imanö ushakätsinampaq kaqtapis willakurqanmi.

Isaïas 44:24, 27, 28: “Këtam Jehovä nishqa, [...] Hondu yakukunata kënö neq Kaq: ‘Tsakiri; y llapan mayïkikunatam tsakiratsishaq’; “Cïrupita kënö neq Kaq: ‘Mitseqnïmi, y noqata llapan kushitsimanqan kaqtam chipyëpa ruranqa’; Jerusalenpaq kënö parlanqätapis: ‘Yapëmi perqashqa kanqa’, y templupaq: ‘Simientïkim churashqa kanqa’”.

Babiloniapa pasaq Eufratis mayutam, Cïrupa tröpan juk lädupa tumaratsir tsë markaman yëkuriyarqan. Tsëpitanam Cïruqa judïukunata librarqan y Jerusalenman kutir yapë sharkatsiyänanta jaqirqan, porqui tsë markata ushakätsiyanqampitaqa 70 watanam pasarishqa karqan. Tsë llapantam unë pasakunqanta willakoq Greciapita Herodötu nuna willakurqan.

Isaïas 45:1: “Jehoväqa këtam nishqa akrashqan Cïruta, derëcha kaq makimpita tsarinqä kaqta, pëpa puntanchö nacionkunata juzganäpaq, reykunapa armankunata qochirinäpaq; ishkë höjayoq punkukunata pëpa puntanta kichanäpaq, tsënöpa punkukuna mana llawiräyänampaq”.

Cïrupa soldädunkunaqa, Babilonia nunakuna ishkë höjayoq jatun portonninkunata kicharëkaqta jaqishqa kayaptinmi tsëpa yëkuriyarqan. Cïrupa tröpankuna ëwayänampaq kaqta musyarninqa, mayu lädumpa këkaq llapan punkunkunatachi segurapakuyanman karqan. Peru manam tsëta rurayarqantsu tsëmi defendikïta puëdiyarqantsu.

Manam tsë willakïllatsu cumplikashqa. Biblia ninqannöllam llapampis cumplikashqa. a Adivinacionqa mana alli dioskunapitam shamun, peru Bibliachö këkaq willakïkunataqa rasumpa kaq Diosmi qellqatsishqa. Y kikimpaq parlarninmi kënö qellqatsirqan: “Pëqa puntallapitanam willakun ushanan kaqta, y unë witsankunapitam willakun manaraq rurakashqa kaqkunata” (Isaïas 46: 10).

Jehovä, rasumpa kaq Diosllam tsënö nitaqa  puëdin. Jehovä jutiqa, “Pëmi Rurakänampaq Ruran” ninanmi, tsëmi pëqa shamoq tiempuchö ima pasakunampaq kaqtapis musyëta puëdin y munënin cumplikänampaqmi imatapis rurëta puëdin. Tsëta musyarmi, llapan änikunqankunata cumplimunampaq kaqta confiakuntsik.

Kanan witsan imakuna pasakunampaq kaqtam Bibliaqa willakun. ¿Tsëta musyëta munankiku? ‘Ushanan junaqkunaqa’ alläpa mana alli y sasa tiempukuna kanampaq kaqta Biblia willakunqampitaqa 2000 watakunanam pasarishqa. Peru ¿imapa ushanan junaqpaqtaq parlëkan? Manam kë täranqantsik Patsapaqtsu ni tsëchö täraqkunapaqtsu, sinöqa mana alli rurëkunapaqmi parlëkan. “Ushanan junaqkunachöqa” imakuna pasakunampaq kaqta rikärishun.

2 Timoteu 3:1-5: “Ushanan junaqkunachöqa [...] nunakunam kayanqa kikinkunallata kuyakoq, qellëta kuyaq, alabakoq, precisaq tukoq, Diospa contran churakaq, teytankunata mana wiyakoq, mana agradecikoq, jaqikoq, mana kuyakoq, ima acuerdumampis chëta mana munaq, chikikur tumpakoq, peqanta tsarëta mana yachaq, alläpa lïsu, alli kaqta mana kuyaq, nuna mayinta rantikoq, munëninta rurakoq, pasëpa alli tukoq, Diosta kuyanampa rantin kikimpa munëninllata asheq, llapan shonqunwan Diosta sirweq tukïkar rurëninkunachö tsëta mana rikätsikoq”.

Tiempu pasanqanmannömi tsënö nunakunaqa mas mirëkäyan. ¿Manaku orgullösu, kikinkunallaman yarparäkoq y qellëllapaq ërayäkoq nunakunata rikantsik? ¿Manaku nunakunaqa kikinkunallam yarpararnin wakinkuna niyanqantaqa cuentam churayantsu? Jina rikarqunkichi wamrakunaqa teytankunata mana cäsukuyanqanta y Diosta kuyayänampaq rantin munëninkunallata mas ashiyanqanta. Tsënömi mas mana alliman chäkïkantsik.

Mateu 24:6, 7: “Amänuchö guërrakuna këkanqantam wiyayanki y karuchö guërrakuna këkanqampaq willakuyanqantam wiyayanki [...] juk nacionmi juk nacionpa contran sharkunqa y juk gobiernum juk gobiernupa contran sharkunqa”.

Tukï guërrakunarëkur y pelyar illapanakuyanqanrëkurmi, 1914 watapita patsë 100 millonpitapis mas nunakuna wanuyashqa. Tsëqa juk nacionchö täraq nunakunapitapis masmi. Mëtsikaqraq waqayashqa y sufriyashqa tsëtsikaq nunakuna wanuyanqanrëkur. Tsëta musyarpis gobiernukunaqa manam guërrata ushakätsiyashqatsu.

Mateu 24:7: “Më tsëchömi mikï pishinqa”.

Programa Mundial de Alimentos nishqampitam kënö niyarqan: “Entëru Patsachö llapan nunakunapaq atska mikï kaptimpis, 815 millon nunakunaqa mallaqllam punuriyan. Y entëru Patsachö cada kima nunakunapitam juk kaqqa mallaqëpita qeshyawan sufrin”. Jina kima millonpitapis mas wamrakunash cada wata mallaqëpita wanuyan.

Lücas 21:11: “Patsam feyupa kuyunqa”.

Cada watam 50.000 kutikunapa patsa ichik kuyurin y 100 kutipanam mas fuerti patsa kuyuptin edificiukunapis juchuyashqa. Jinamampis cäsi llapan watakunam patsaqa alläpa feyupa kuyun. 1975 watapita 2000 watayaqshi terremötu kaptin 471.000 nunakuna wanuyashqa.

Mateu 24:14: “Y llapan nacion nunakuna musyayänampaqmi, Gobiernupita alli willakïkuna entëru patsachö willakushqa kanqa, y tsëpitanam, ushakë chäramunqa”.

8 millonpitapis mas Testïgukunam 240 nacionkunachö Diospa alli willakïninta yachatsikïkäyan. Jatusaq markakunachö, ichisaq markakunachö, selvakunachö y jirkakunachömi yachatsikïkäyan. Bibliachö këkaq willakï ninqannömi, tsëyaqllana yachatsikuyänampaq Dios niriptin “ushakë chäramunqa”. ¿Ima ninantaq tsëqa? Llapan gobiernukunam ushakätsishqa kayanqa y Diospa Gobiernunllanam kanqa. Y ¿imataraq tsë Gobiernuqa ruramunqa? Tsëta musyarinëkipaqqa, qateqnin yachatsikïkunata leyirnin sïgui.