Jesus ninqannömi, Diospa Gobiernun imata ruramunampaq kaqta më tsëchö yachatsikïkäyan (Mateu 24:14). Bibliachö këkaq Daniel librum, tsë Gobiernuta Dios patsätsinqanta willakun. Tsë librupa ishkë kaq capïtulunchömi, unë witsan alläpa puëdeq Babilonia nacionpaq y tsëpita patsë mas nacionkuna y mandakoqkuna kanqanta willakun. Y 44 kaq versïculuchönam tsëpita ima pasakunampaq kaqta willakun:

“Ciëluchö këkaq Dios[mi], juk mana ushakaq gobiernuta patsätsinqa. Tsë gobiernuqa manam ni pipa makinman pasanqatsu. Y chipyëpam ushakätsinqa tsë llapan gobiernukunata, y tsë gobiernullanam imëyaqpis kanqa”.

Bibliachö këkaq tsë willakï y mas willakïkunam, nunakunapa gobiernunkunapa rantin shamoq tiempuchö Diospa Gobiernun gobernamunampaq kaqta rikätsikun. Y tsë Gobiernuchöqa tranquïlu y segürunam kawakushun. ¿Ima maskunataraq tsë Gobiernu ruramunqa? Imakunata ruramunampaq kaqta rikärishun.

• GUËRRAKUNA KANQANATSU

  Salmus 46:9. Diosqa, “Patsapa juk kuchumpita hasta juknin kuchunyaqmi guërrakunata ushakätsimunqa. Flëchatam pakikacharkun y lanzatapis taksha takshallamanmi roqukacharkun y guërra cärrukunatapis ninachö kayarmi ushakäratsin”.

  Armakunata rurayänanllapaqmi yachaq këninkunata y imëkakunata utilizäyan. Peru nunakunata yanapayänampaq tsëkunata utilizäyaptinqa, mas shumaqchi kawakushwan. ¡Diospa Gobiernunchöqa mananam guërrakuna kanqanatsu!

• QESHYAKUNA KANQANATSU

  Isaïas 33:24. “Manam ni pï ninqanatsu: ‘Qeshyämi’”

  Cancer, diabetis y mas qeshyakunapis manana kaptinqa alläpa kushishqachi kawakushwan y mananachi hospitalkunata ni jampikunatapis wanashwannatsu. Shamoq tiempuchöqa llapan nunakunapis alli saloryoqllanam kayanqa.

• MALLAQË KANQANATSU

  Salmus 72:16. “Chakrakunachöqa mëtsika gränu mikïmi kanqa, hasta jirkakuna jananchömi alläpa atska kanqa”.

  Chakrakunachöqa atska mikïmi wayunqa y llapampaqmi tinkunqa. Mallaqë y tsërëkur qeshyakunapis mananam kanqanatsu.

• LLAKIKÏ, SUFRIMIENTU NI WANÏPIS KANQANATSU

  Revelacion (Apocalipsis) 21:4. Diosqa, “nawinkunapitam llapan weqita pitsanqa, y wanïqa mananam masqa kanqanatsu, ni manam alläpa llakikï ni waqakï ni nanatsikï kanqanatsu. Unë kaq cösaskunaqa pasarishqanam”.

   Nunakunaqa jutsannaqmi kayanqa y Shumaq Patsachömi mana wanushpa kawakuyanqa. Tsëtam alläpa kuyakoq Jehovä Diosnintsikqa änimantsik.

Itsa tsëkuna mana cumplikänampaq kaqta pensanki. Mëtsikaq nunakunam Biblia änikunqankunaqa alläpa shumaq kanqanta niyan. Peru mana wanushpa kawakoqta pitapis mana rikashqa karmi, imëyaqpis kawakunapaq kaqmanqa creiyantsu.

Unëpita patsëmi nunakunaqa jutsasapa karnin wanuyan, tsëmi sufrinapaq yurishqa kanqantsikta pensayan. Peru Diosnintsikqa manam tsënö kawanatatsu munarqan.

Diosnintsik änimanqantsikkunaman mas markakunapaqmi, pëqa Palabranman kënö qellqatsirqan: “Mana rurakarqa manam noqaman kutimunqatsu, tsëpa rantinqa munanqänöllam rurakanqa, y llapan ninqäkunam chipyëpa cumplikanqa” (Isaïas 55:11).

Bibliachömi nin Diosqa ‘ulikïta mana puëdinqanta’ (Tïtu 1:2). Diosnintsik tsëkunata änimashqantsik kaptinmi, kënö tapukunqantsikqa mas alli kanman: “¿Rasumpatsuraq Shumaq Patsachö imëyaqpis kawakïta puëdishun? ¿Imatataq ruranantsik Diosnintsik änimanqantsikkuna cumplikaptin tsëchö kawakïta munarqa?”. Qateqnin kaq yachatsikïkunachömi tsë tapukïkunapa respuestanta musyarinki.