¿Imaraq pasakunqa shamoq tiempuchö noqawan y familiäwan? ¿Imëkayoq y alli tratashqatsuraq kayäshaq? O ¿necesidäpatsuraq pasayäshaq y japalläkunatsuraq sientikuyäshaq? ¿Atska watakunatsuraq kawakuyäshaq o rastsuraq wanuriyäshaq? Unëpita patsëmi nunakunaqa tsënö tapukuyashqa.

Kananqa, mëtsikaq estudiösukunam ima pasakïkanqanta cuentaman churarnin shamoq tiempuchö ima pasakunampaq kaqta niyan. Wakinqa cumplikashqam, peru wakinqa manam. Radiupanö parlëta puëdiyänampaq inventaq Guglielmu Marcöni nunam, 1912 watachö kënö nirqan: “Radiupanö parlëta puëdiyanqanqa guërrakuna mana kanampaqmi yanapakunqa”. Y 1962 watanam grabayänan emprësachö trabajaq juk nuna, Beatles nishqan grüpu grabananta munarqantsu. Porqui guitärrawan tocaq grüpukunaqa fracasayänampaq kaqtam pensarqan.

Y wakinkunanam ima pasakunampaq kaqta musyayänampaq qoyllurkuna estudiaq nunakunata tapuyan. Horoscopupis mëtsika revistakunachö y periödicukunachömi yarqamun. Y wakinnam curiösukunaman ëwayan, “cartakunata y makikunata rikëkurmi ima pasakunampaq kaqta musyayä” niyaptin.

Ima pasakunampaq kaqta musyëta munarmi, unëqa mana alli dioskunapa sacerdötinkunata tapukuyaq. Tsëtam Lidia kinrëta gobernaq Crësupis rurarqan. Persia nacionpa reynin Cïruwan manaraq pelyarmi, Delfos sitiuchö mana alli dioskunapa sacerdötinman alläpa väleq ofrendakunata mandarqan. Y tsë sacerdötiqa, Cïruwan pelyarqa juk nacionta ushakätsinampaq kaqtam nirqan. Tsëta creirmi Cïruwan pelyaq ëwarqan, peru kikin gobernanqan markakunallatam Crësuqa ushakäratsirqan.

Tsë sacerdötiqa manam clärutsu ima pasakunampaq kaqta willakurqan, mëqan ganaptimpis tsëqa cumplikänanmi karqan. Crësu reyta tsënö willayanqanqa mana allichömi usharqan. Y kananqa ¿musyëta puëdiyanku shamoq tiempuchö ima pasakunampaq kaqta?