Llakipäkoq këqa, imakunapa pasëkäyanqanta entiendi y sufriyanqanta rikar llakipëmi. Juk doctormi nirqan nunakunaqa yurikuyanqampita patsë ankupäkoq kayanqanta rikätsikïta puëdiyanqanta.

KËMAN PENSARI: ¿Imanirtaq nunakunalla llakipäkoq kantsik, peru animalkunaqa mana? Bibliachömi willakun Diosqa kikin niraqta kamamanqantsikta (Genesis 1:26). Tsëmi pënölla llakipäkoq këta puëdintsik. Juk nuna llakipäkoq kanqanta rikätsikurqa, Jehovänölla kanqantam rikätsikïkan (Proverbius 14:31).

Diosqa alläpa llakipäkoqmi y manam munantsu nunakuna sufriyänanta. Egiptuchö israelïtakuna esclävu karnin alläpa sufriyanqampaq y tsunyaqchö puriyanqampaq parlarmi, Bibliachöqa kënö willakun: “Pëkuna alläpa sufriyaptinmi, pëpis alläpa llakikurqan. Y mandanqan willakoqninmi salvarqan” (Isaïas 63:9). Diosnintsikqa markanchö kaqkuna sufriyanqantam musyarqan. Y alläpam llakiparqan, tsëmi “allim musyä nanatsikur imanö sufrikäyanqanta” nirqan (Exodu 3:7). Jina nirqanmi: “Qamkunata yatayäshoqnikikunaqa, nawi niñätam yatëkäyämun” (Zacarïas 2:8). Tsëmi noqantsikta sufritsimashqaqa, Diosnintsikta sufritseq cuenta këkäyan.

Shonquntsik traicionëkämanqantsikta o Diosnintsik manana llakipämänapaq kaqta pensashqapis, Palabranmi nin “Diosqa shonquntsikpitapis mas jatunmi y llapantam musyan” (1 Juan 3:19, 20). Diosqa kikintsikpitapis masmi musyan imanö kanqantsikta. Musyanmi imapa pasëkanqantsikta, imata pensëkanqantsikta y imanö sientikunqantsikta y entiendimantsikmi.

 Bibliam kënö nimantsik:

• “Qayakuptikiqa, kikin Jehovämi wiyashunki; yanapashunëkipaq rogakuptikiqa: ‘¡Këchömi këkä!’ nishunkim” (ISAÏAS 58:9).

• “Jehovämi kënö nin: ‘Porqui qamkunapaq imatapis pensëkanqätaqa kikïmi musyä, yamë kawakï pensamientukunata y manam sufritsikoq kaqtatsu, shamoq tiempuchö alli kawakïta y shuyäkïta qoyänaqpaq. Qamkunam qayayämanki y shayämunki, y mañakayämunkim y noqam wiyayashqëki” (JEREMÏAS 29:11, 12).

• “Weqïta churëkullë qarapita rurashqa poronguïkiman. ¿Manaku librïkichö këkan?” (SALMUS 56:8).

¿Diosnintsik entiendimanqantsikta musyëqa shoqamantsiktsuraq? Marïa jutiyoq warmita pasanqanta rikärishun.

“18 watayoq wamrä ishkë watapa cancerwan alläpa sufrinqanta rikar y wanoqta rikarmi alläpa llakikurqä. ¿Imanirtaq tsëqa noqata pasaman? Nirqämi, wamrata mana yanapanqampitam Jehoväwan piñashqa këkarqä.

Jehoväqa manachi kuyamantsu nirqämi. Tsëpita joqta watakuna pasariptinnam religionnïchö këkaq yanasäta willarirqä imanö sientikunqäta. Unëpa shumaq wiyaramarmi Bibliachö këkaq juk textuta yarpäratsimarqan. Tsëmi alläpa yanapamarqan 1 Juan 3:19, 20, textum karqan ‘Diosqa shonquntsikpitapis mas jatunmi y llapantam musyan’. Tsëpitanam nimarqan Jehoväqa entiendimanqantsikta.

Tsëta musyëkarpis, piñashqallam sïguirqä. Tsënam, Salmus 94:19 textuchö ninqanta leyirirqä: ‘Imëka yarpachakïkuna alläpa llakitsimaptinmi, qamqa kuyakïwan shumaq shoqamarqëki’. Tsëtam justus musyëta munëkarqä. Tsëmi pëqa entiendimanqanta musyar y wiyamänampaq kaqman confiakurnin, imanö sientikunqäta willarirqä. Y yamënam sientikurirqä”.

¡Imanö shumaqmi Diosnintsik entiendimanqantsikta musyë y lugarnintsikman churakanqanta musyëqa! Peru ¿imanirtaq sufrintsik? ¿Diosnintsiktsuraq jutsata ruranqantsikpita castiguëkämantsik? ¿Imëllapis sufrimientukunata ushakätsinqatsuraq? Tsë tapukïkunapa respuestantam qateqnin kaqchö yachakurinki.