PUNTA TEYTANTSIKKUNA mana cäsukoq kayanqanrëkurmi wanuntsik y jutsa ruraq kantsik. Tsënö kaptimpis, Diosnintsikqa nunakuna mana wanushpa kawakuyänanta munëkanllam. Y tsëta munanqantaqa, Palabran Bibliachömi kutin kutin nimantsik.

• “Patsachöqa alli kaqta ruraq nunakunallam täräyanqa, y tsëchömi imëkamayaqpis kawayanqa” (Salmus 37:29).

• “Pëqa rasumpam wanïta chipyëpa ushakäratsinqa, y Llapan Autoridäyoq Señornintsik Jehovämi weqinkunata nawinkunapita pitsarapunqa” (Isaïas 25:8).

• “Ushanan kaq chikimaqnintsik wanïmi, chipyëpa ushakätsishqa kanqa” (1 Corintius 15:26).

• “Wanïqa mananam masqa kanqanatsu, ni manam alläpa llakikï ni waqakï ni nanatsikï kanqanatsu” (Revelacion [Apocalipsis] 21:4).

¿Imataraq Diosnintsik ruranqa wanïta chipyëpa ushakätsinampaq? Rikärinqantsiknömi, Bibliaqa nimantsik alli kaqta ruraq nunakunaqa Patsachö mana wanushpa kawayänampaq kaqta. Peru kënöpis ninmi: “Kë Patsachöqa manam kantsu allikunata rurëkarpis mana jutsallakoq nunaqa” (Eclesiastes 7:20). Tsëqa, ¿jutsata ruraq nunakuna mana wanushpa kawayänantatsuraq Diosqa jaqinqa? Manam tsëtaqa ruranmantsu. Mandakunqanta cäsukoq nunakunalla mana wanushpa kawayänampaq kaqtam Diosqa nishqa, y pëqa ninqanta imëpis cumplinmi (Tïtu 1:2). Tsënö këkaptinqa, ¿imatataq ruranqa nunakunapaq munanqanta cumplinampaq?

Diosnintsik Jehoväqa alläpa kuyakoq karmi, wanïpita libramänapaq chaninta pagakurqan. Palabranchöqa nimantsik, ima mana allitapis rurarninqa chaninta pagakunapaq kaqtam, y tsë chaninqa oqranqantsikpita igualmi kanan. Nunakunaqa llapantsikpis jutsata ruraq y wanoqllam kantsik, tsëmi Bibliaqa kënö nin: “Manam pillapis imanöpa wawqinta salvëta puëdintsu, y manam përëkur juk salvakoqta Diosman apamïta puëdintsu (y pëkunapa kawëninta salvanampaq kaqpa chaninqa alläpa valoryoqmi y tsëqa manam kantsu imëyaqpis)” (Salmus 49:7, 8).

Jutsata ruraq nuna wanurninqa, kikimpa mana alli rurëninkunallapitam pagakun. Peru manam puëdintsu kikinta ni juk nunata salvëtaqa (Romänus 6:7). Tsëmi jutsapita y wanïpita libramänapaqqa, juk jutsannaq nunaraq wanunan karqan (Hebrëus 10:1-4).

Tsëtam Diosqa rurarqan. Kuyashqa tsurin Jesucristutam Patsaman mandamurqan, pëqa jutsannaq nunam karqan (1 Pëdru 2:22). Jesusqa, “kawëninwan chaninta pagakur mëtsikaqta libranampaqmi” shamurqan (Marcus 10:45). Y wanunqanwanmi wanïta ushakätsirqan y imëyaqpis kawakïta tarinapaq yanapamarqantsik (Juan 3:16).

Diospa Palabranchöqa nimantsik ‘ushanan junaqkunachöna’ kawëkanqantsiktam, tsëmi imëka  mana allikunapa pasantsik (2 Timoteu 3:1). Kë ushanan junaqkunaqa usharinqa, juiciu junaqchö Diosta mana respetaq nunakuna chipyëpa ushakäriyaptinmi (2 Pëdru 3:3, 7). Peru Diosnintsik mandakunqanta cäsukoq nunakunaqa manam ushakäyanqatsu, sinöqa ‘imëyaqpis kawëtam’ tariyanqa (Mateu 25:46).

Unëpita patsëmi mëtsika nunakuna wanuyashqa. ¿Imataq pëkunawan pasanqa? Imëyaqpis kawakïta puëdiyänampaqmi Jesus kawaritsimunqa. Nain markachö juk viudapa japallan wamranta kawaritsimurninmi, Jesusqa rikätsikurqan wanushqakunata kawaritsimïta puëdinqanta (Lücas 7:11-15). Diospa sirweqnin apostol Pablupis, kënömi nirqan: “Alli kaqta ruraqkuna y mana allita ruraqkuna kawariyämunampaq kaqtam Diosman markäkur shuyäkïkä”. Diosqa nunakunata alläpa kuyarninmi, wanushqakuna kawariyämunampaq änikushqa (Hëchus 24:15).

Mana yupëtapis puëdipaq nunakunam, imëyaqpis kawakïta puëdiyanqa. Diospa Palabranmi kënö nin: “Patsachöqa alli kaqta ruraq nunakunallam täräyanqa, y tsëchömi imëkamayaqpis kawayanqa” (Salmus 37:29). Kë willakï cumplikäriptinqa, alläpa kushishqam apostol Pablunöpis kënö niyanqa: “Wanï, ¿mëchötaq vencikoq këniki këkan? Wanï, ¿mëchötaq tukshikoqniki këkan?” (1 Corintius 15:55). Tsë witsanqa, manam pï nunapis wanunqatsu.