JUK ALLÄPA reqishqa cantanti nunapaq parlaq videuta rikëkanqëkiman pensari. Tsë videuqa qallëkamun wamra kanqan witsanta rikätsikurmi, tsëpitanam cantanti kanampaq estudianqanta y yachakunampaq imëkata ruranqanta rikätsikamun. Tsëpitaqa rikanki, jinantin nacionkunapa cantar ëwanqanta y më tsëchö alläpa reqishqa tikranqantam. Y videu ushanampaqqa, awkintana y imanö wanunqantam rikanki.

Parlarinqantsik nuna wanushqana kaptimpis, llapan videuchö rikanqantsiktam pëqa rurarqan. Y tsënöllam llapan reqishqa nunakunawan pasan. Kawayanqan witsankuna imëkata rurayashqa kayaptinmi kënö tapukuntsik: “Mana awkinyarnin y mana wanurninqa, ¿imakunataraq rurëta puëdiyanman karqan?”.

Mana munëkashqapis llapantsikmanmi wanïqa chämun (Eclesiastes 9:5). Imëkata rurëkashqapis llapantsikmi awkinyantsik y wanuntsik. Y mana pensanqantsik höram, wakintsikqa juk desgracia pasaramashqa o alläpa qeshyarninmi wanurintsik. Rasumpa kaqchöqa, “juk rätulla yurirkoq y tsëpita ushakäreq pukutënöllam” kantsik (Santiägu 4:14).

Wakin nunakunaqa imapaq kawanqantsikta mana musyarmi, kënö niyan: “Mikushun y upushun, porqui warëmi wanukushun” (1 Corintius 15:32). Tsënö niyanqanchöqa cuentata qokuntsik, wanuyänampaq kaqta alli musyayanqantam. Imë höra karpis, llapantsikmi kënö tapukuntsik: ¿imapaqraq kawantsik? Y masqa mana allikunapa y llakikïkunapa pasarmi. Tsëqa, ¿mëchöraq kë tapukïpita yachakushwan?

Estudiashqa nunakuna yanapamänapaq kaqtam, mëtsikaq nunakunaqa creiyan. Estudiashqa nunakuna y doctorkunaqa, mas watakuna kawanapaq imëkatanam rurayashqa y wakinkunaqa tsëta rurarmi sïguiyan. Tsënö kaptinqa, ¿imanirtaq awkinyantsik y wanuntsik? ¿Imëllapis mana wanushpa kawakushuntsuraq? nirqa tapukïkantsikllam. Kë revistachömi kë tapukïkunapita yachakushun, jina imapaq kawanqantsiktam alli musyatsimäshun.