Mana wanushpa kawakunapaqmi rurashqa kantsik
LLAPANTSIKMI mas watakuna y kushishqa kawakïtaqa munantsik. Mana qeshyapäkushpa y kushishqalla kawakïqa ima shumaqraq kanman. Këkunatachi rurashwan: kuyashqa kastantsikkunawanchi mas tiempu kashwan, më tsëtachi reqipakoq ëwashwan, imëka rurëkunatachi yachakushwan y mas yachakurninchi imëkatapis alli musyashwan.
¿Kënö kawakïta munëqa mana alliku? Manam. Bibliachöqa nimantsik, Diosqa imëyaqpis kawakï munëta shonquntsikman churamushqa kanqantam (Eclesiastes 3:11). Jina ‘Diosqa kuyakoq’ kanqantam nin (1 Juan 4:8). Imëyaqpis kawakïta mana puëdikashqa y Diosnintsik kuyakoq këkarninqa, ¿imanirtaq tsë munëyoqta kamamarqantsik?
Diospa Palabranqa nin wanïqa juk “chikimaqnintsik” kanqantam, tsëmi ni mëqantsikpis wanïta munantsiktsu (1 Corintius 15:26). Wakintsikqa jövinllam wanuntsik, peru wakintsikqa awkinran. Wakinkunaqa wanïta alläpam mantsayan. Tsëqa, ¿imëllapis mana wanushpa kawashuntsuraq?
MANA WANUSHPA KAWANAPAQMI DIOSQA KAMAMARQANTSIK
Diosnintsikqa manam nunakuna wanuyänanta munarqantsu. Diospa Palabranchö Genesis librum, Patsachö imëyaqpis kawakunata Dios munanqanta nimantsik. Teytantsik Jehoväqa * kë patsata alläpa shumaqtam rurarqan. Adanta manaraq kamarmi, Diosqa juk shumaq huertata rurarqan y tsëmanmi churarqan. “Tsëpitanam Dios rikarqan llapan ruranqanta y, ¡rikë!, alläpa allim karqan” (Genesis 1:26, 31).
Diosqa kikin niraqtam Adanta kamarqan, tsëmi Adanqa jutsannaq nuna karqan (Deuteronomiu ). Tsënöllam warmim Ëvapis karqan. Pëkunatam Jehovä kënö nirqan: “Wamrëkikuna katsun y atskaqyäyë y patsa juntanqanyaq mirayë y dominayë, jina lamarchö pescädukunata, volaq animalkunata y patsachö llapan pureq animalkunatapis dominayë” ( 32:4Genesis 1:28).
Patsataqa manam rastsu wamrankunawan mirar juntayänan karqan. Diosnintsik mandakunqan cumplikänampaqqa, Ëvam wamrayoq kanan karqan, y wamrankunapapis wamrankunam kanan karqan Patsa juntanqanyaq (Isaïas 45:18). Adanwan Ëvaqa manam Dios mandakunqan cumplikaqta rikäyarqantsu, sinöqa wamrankunatawan willkankunallatam rikäyarqan. Tsëqa, ¿imanirtaq Diosqa tsëta rurayänampaq mandarqan?
Kananqa këman pensarishun, Adanqa animalkunapa jutinkunam churanan karqan. Tsëtaqa manam juk ishkë watakunallatsu rurëta puëdinman karqan (Genesis 2:19). Jina llapan animalkunata cuidanampaqqa imanö kayanqantam alli reqinan karqan, tsëpaqqa atska watakunaran pasanan karqan.
Mas watakuna kawayänanta munarmi, Diosqa Adantawan Ëvata mandarqan animalkunata cuidayänampaq y Patsa juntanqanyaq mirayänampaq. Awmi, Adanqa noqantsikpita masmi kawarqan.
DIOSQA MANA WANUSHPA Y JUK SHUMAQ PATSACHÖ KAWAYÄNAMPAQMI NUNAKUNATA KAMARQAN
MËTSIKA WATAKUNAM KAWAYARQAN
Adanqa 930 watam kawarqan
Matusalenqa 969 watam kawarqan
Noëqa 950 watam kawarqan
Kananqa 70 o 80 watakunallam kawantsik
Diospa Palabranchöqa nimantsik, manaraq Apäkï Tamya kaptinqa nunakuna mas unëpa kawashqa kayanqantam. Genesis 5:5 textum kënö nin: “Adanqa isqun pachak kima chunka watakunam kawarqan”. Jina Set, Enos, Quenan, Jared y Matusalenqa isqun pachak watapitapis masmi kawayarqan. Noëpis Apäkï Tamya chämunqan witsanqa, joqta pachak watayoqnam karqan (Genesis 5:6-27; 7:6; 9:29). ¿Imanirtaq alläpa unë kawayarqan?
Adanwan Ëva kawayanqampitaqa, kë nunakunaqa manam alläpa unëtatsu kawayarqan. Tsëmi mas watakuna kawayarqan. ¿Mas watakuna kawëqa jutsannaq këpitaku? ¿Imaraq pasanqa wanïwan? Kë tapukïkunapita alli musyanapaqqa, puntata kë tapukïpita yachakurishun: ¿imanirtaq awkinyantsik y wanuntsik?
^ par. 6 Diospa jutin Jehovä kanqantam Bibliaqa yachatsikun.