Punta nunata kamanqampitam Diosnintsikqa angelninkunawan y akranqan nunakunawan imata ruramunampaq kaqta musyatsikurqan. Y manam tsëllatsu, sinöqa willakunqankunata y imata ruramunampaq kaqkunata nunakuna qellqayänantam permitishqa. Y ichikllachöna kushishqa kawanapaq kaqtapis änimantsikmi, ¿mëchötaq tsënö qellqarëkan?

Diospa Palabran Bibliachömi (2 Timoteu 3:16). ¿Imanötan Teyta Diosqa Bibliata qellqatsirqan? Kikin Diosmi akranqan nunakunata musyatsirqan imata qellqayänampaq kaqta (2 Pëdru 1:21). Tsëta maslla entiendirinapaq pensarishun juk patron trabajaqninta juk cartata qellqanampaq ninqanman. Tsë cartata trabajaqnin qellqashqa kaptimpis, patronninmi imata qellqanampaq kaqta nishqa. Tsënöllam Diospa Palabranta qellqaq nunakunapis manam kikinkuna pensayanqantatsu qellqayarqan, sinöqa Teyta Dios ninqantam.

Teyta Diosqa, Palabran Bibliachömi musyatsimantsik ichikllachöna imakuna pasakunampaq kaqta, tsëmi tsëkunata musyanapaq Bibliata leyinantsikta munan. Kananqa Diospa Palabranta leyita puëdintsik tres mil idiömapitapis maschömi. Biblianöqa manam ni ima librupis kantsu, tsëmi “llapan nacionkunapita, kastakunapita, idiömakunapita y markakunapita” nunakuna leyita puëdiyan (Revelacion 14:6).