Unë willakoqnin Abrahantam Diosqa nirqan, pëpa tsurinkunapita ‘kë patsachö llapan nunakunata’ bendicinampaq kaqta (Genesis 22:18). Tsë nuna pï kanqantam yachakurishun.

Jesus kë patsachö kanqan witsanmi mëtsika milagrukunata rurarqan, tsëmi musyantsik unë sirweqnin Abrahanta Diosnintsik äninqankunata Jesus cumplimunampaq kaqta (Gälatas 3:14).

Jesus ruranqan milagrukunata rikarmi, nunakuna cuentata qokuyarqan Teyta Dios änikunqankunata cumplimunampaq, Jesusta akrashqa kanqanta. Y shamoq tiempuchöpis tsënöllam tsurin Jesusta utilizanqa llapan nunakunata bendicinampaq. Jesus milagrukunata ruranqanqa rikätsikun kuyakoq, ankupäkoq y alli kanqantam.

Kuyakoq karmi, qeshyëkaqkunata alliyätsirqan.

Juk kutichömi leprayoq nuna Jesusta rogakurqan alliyëkatsinampaq, y Jesusqa kuyakoq karmi ‘¡Munämi alliyänëkita!’ nirqan, y tsë höram tsë nunaqa alliyärirqan (Marcus 1:40-42).

Ankupäkoq o llakipäkoq karmi, wanushqakunata kawaritsirqan.

Juk junaqmi juk viuda warmipa jukllëlla wamran wanukuykurqan y pïnimpis cuidanampaq mana kaptinmi Jesusqa alläpa llakiparqan, tsëmi wanushqa wamranta kawaritsirqan (Lücas 7:12-15).

Alli nuna karmi, mëtsikaqta mikuyninkuna qararqan.

Jesusqa manam munarqantsu nunakuna mallaqlla kayänanta, tsëmi Diospa poderninwan juk ishkë tantallawan y pescädullawan mëtsikaq nunakunata pachan qararqan (Mateu 14:17-21; 15:32-38). Y llapankunam pacha junta mikuyarqan y mikuypis sobrarqanmi.