Wakin nunakunaqa pensayan Diospa Palabran unë kanqannölla manana kanqanta. ¿Tsënö niyanqanqa rasumpatsuraq? Manam. Diospa unë willakoqninmi kënö nirqan: “Teyta Diosnintsikpa palabranqa imëyaqpis këkanqam” (Isaïas 40:8).

Diosqa manam permitishqatsu Palabranta cambiayänanta. Unë witsan Diospa Palabrampita makillapa copiaqkunaqa kanqantanöllam qellqayarqan y manam imatapis yapayarqantsu ni jipiyarqantsu. Tsënö karpis nunakunaqa pantantsikmi, tsëmi wakin wakinchöqa Bibliata copiaqkunaqa ichik pantayarqan.

Unë qellqayanqan mëtsika copiakunatam tariyashqa, tsë copiakunawanmi wakin copiakunachö juknöpa niptinqa igualatsiyan, tsënöpa Dios unë ninqannölla Bibliaman churayänampaq (maslla yachakuyta munarqa, internetchö jw.org päginaman yëkuy, y tsëpitana “¿Se ha cambiado o manipulado la Biblia?” neqta leyiri).

1947 watachömi, Wanushqa qochapa amänunchö këkaq machëkunachö (tsëpa pureq Arabiapita nunakuna), unë copiakunata tariyarqan. Tsëtam reqiyan Wanushqa qochachö tariyanqan röllukuna nir. Y dos mil watapitapis masnam pasashqa tsë röllukunata qellqayanqampitaqa. Kanan kapamanqantsik Bibliawanmi tsë röllukunachö qellqarëkaqta igualatsiyarqan.

Tsë igualatsiyanqanchömi yachaq nunakuna rikäyashqa unë röllukunachö ninqannölla Bibliachö ninqanta. * Y tsënöllam mas unë tariyanqan copiakunatawampis Bibliata igualatsiyashqa. Tsëmi cläru rikätsimantsik Dios qellqatsinqan witsanchönölla kananyaq Palabran Biblia këkanqanta. Tsëkunam rikätsimantsik kikin Diosnintsik tsëta munanqanta.

Tsëmi musyantsik Bibliachö ninqanqa Diospa Palabran kanqanta. Tsëman yarpar kananqa yachakurishun Diosta cäsukoq nunakuna Diospaq ima niyanqanta.