¿Imanirtan wakin mañakuyanqantaqa Teyta Dios wiyantsu?
Shonqupita patsë mañakushqaqa Teyta Diosqa wiyamantsikmi. Tsënö kaptimpis manam llapan mañakuyanqantatsu wiyan. ¿Imakunatatan cuentachö katsishwan? Y ¿imanir? Tsëpaq Bibliachö ima ninqanta rikärishun.
‘Diosta mañakurqa, ama kaqllata kutin kutin ninkitsu’ (Mateu 6:7).
Teyta Diosqa manam munantsu kaqllata kutin kutin mañakunata o juk librupita leyinallataqa. Pëqa shonqupita patsë mañakunatam munan. Noqantsiktapis manachi gustamashwantsu kaqllata kutin kutin juk amïguntsik parlapämashqaqa. Rasumpa amïgukunaqa imëkatam cuentanakuyan. Tsënöllam, Teyta Diosta imanö këkanqantsikta willarninqa, amïguntsiktanö rikäshun.
“Mañakurpis, manam chaskiyankitsu, porqui mana allipaqmi mañakuyanki” (Santiägu 4:3).
Teyta Dios mana munanqankunata mañakurqa, manam shuyaränantsiktsu mañakunqantsikta pë wiyananta. Këllaman yarpärishun, juk nuna qellëpaq pukllarnin alli suertiyoq kanampaq Teyta Diosta mañakuptin, ¿wiyanmantsuraq? Manam (Isaïas 65:11; Lücas 12:15). Teyta Dios mañakunqantsikta wiyanampaqqa Palabran Bibliachö ninqannömi mañakunantsik.
“Teyta Diospa leyninkunata mana cumpliq nunataqa mañakushqantapis Teyta Dios manam yaskinqatsu” (Proverbius 28:9).
Unë witsankunapis Teyta Dios ninqankunata mana cäsukuyaptinqa, manam mañakuyanqankunata wiyaqtsu. Tsënö kaqllam kanan witsampis, ninqankunata mana wiyakuyaptinqa mañakuyanqanta wiyantsu (Isaïas 1:15, 16; Malaquïas 3:6). Teyta Dios mañakunqantsikta wiyananta munarqa pë nimanqantsikkunatam cäsukunantsik. Unë witsan jutsata rurashqantsikrëkurtsuraq, ¿Diosnintsikqa wiyamantsikku? Tsë jutsantsikpita arrepentikur pë munanqantana rurashqaqa, Teyta Diosnintsikqa perdonamantsikmi y mañakunqantsiktapis wiyamantsiknam (Hëchus 3:19).
