¿Imanirtan nunakunaqa alläpa chikinakuyan?
Më tsëchömi nunakunaqa alläpa chikinakuyan. ¿Imanirtan nunakuna tsëläya chikinakuyan? Tsëpaqqa këkunatam entiendinantsik: ¿imatan chikinakuy?, ¿imanötan nunakunaqa chikinakur qallayan? y ¿imanirtan mas nunakuna chikikoq tikrëkäyan?
¿Imatan chikinakuyqa?
Pitapis alläpa chikipë y rikëtapis mana munëmi. Y tsëqa manam juk rätu piwampis piñashqa o ajashqa këllatsu.
¿IMANÖTAN NUNAKUNAQA CHIKINAKUR QALLAYAN?
Imëkakunarëkurmi nunakunaqa chikinakuyan. Pitapis chikiyan manam imata ruranqampitatsu sinöqa mëpita o imanö kanqampitam. Capaz pensayan mana alli kayanqanta, peligrösu kayanqanta, imëpis mana cambiayänampaq kaqta, mana väliyanqanta y culpankunarëkur imëka problëmakuna kanqanta. Y mëtsikaq nunakunanam jukkunata chikiyan kikinkunata chikiyashqa o mana alli tratayashqa kayaptin.
¿IMANIRTAN MAS NUNAKUNA CHIKIKOQ TIKRËKÄYAN?
Höraqa mana reqiyanqankunatam chikiyan. Këllaman pensarishun capaz juk nuna amïgunta o pitapis chikir qallëkunman jukkuna mana allita parlayanqanta wiyashqa karlla. Tsënölla pensarmi jukkunapis chikikur qallëkuyan.
Pitapis chikikoq kë llapankunaman ras imanö chärinqanta musyanqantsikmi yanapamantsik, imanir mëtsikaq nunakuna chikikoq kayanqanta entiendinapaq. Tsëmi pitapis imanir chikinqantsikta musyanantsik, chikikuyta ushakätsinapaq. Bibliachömi tsëpaq willakun.
BIBLIACHÖMI CHIKINAKUY IMANÖ QALLANQANTA WILLAKUN
MANAM NUNAKUNATSU PITAPIS CHIKIR QALLAYASHQA. Puntataqa ciëluchö juk angelmi chikikur qallëkurqan, y tsë angelqa Satanas Diablum. Tsënömi tsë mana alli angelqa wanutsikoq tikrarqan. Diabluqa “kikin imanöpis kanqanmannömi parlan, porqui pëqa ulim, y ulikoqkunapa teytanmi”, y pëqa tsënöllam nunakunatapis chikikoq y wanutsikoq kayänampaq inkitan (Juan 8:44; 1 Juan 3:11, 12). Bibliachömi willakun Diabluqa alläpa mana alli, chiki y cölerashqa këkanqanta (Job 2:7; Revelacion 12:9, 12, 17).
IMANIRTAN CHIKIKOQ TIKRANTSIK. Punta teytantsik Adanmi Diablu ruranqanta rurarnin jutsa ruraq tikrarqan, tsëmi llapan nunakunapis jutsayoq y mana alli ruraq yurintsik (Romänus 5:12). Y Adanpa mayor kaq wamran Cainmi wawqin Abelta alläpa chikirnin wanutsirqan (1 Juan 3:12). Llapantsikmi kuyakoq y llakipäkoq karnimpis jutsayoq yurishqa kar ras kikintsikllam pensantsik, jukkunapa imantapis munapantsik y orgullösu kantsik. Tsëmi pitapis chikir qallëkuntsik (2 Timoteu 3:1-5).
RAS CÖLERAKURMI PITAPIS CHIKIYAN. Nunakunaqa mana alli ruraq y llakipäkoq mana karmi chikikoq tikrayan. “Mana cäsukoq nunakunaqa Satanaspa makinchömi këkäyan”. Tsëmi nunakunaqa ras cölerakuyan, juk nacionpita kaqkunata chikiyan, insultanakuyan, wakinkunapita burlakuyan o maqayan y grüpu grüpu juntakëkurmi imëkata ushakätsiyan y suwakuyan. Tsëkunatam cada junaq rikantsik (1 Juan 5:19).
Bibliachö imanir chikinakuy kanqanta willakurpis, mana chikikoq kanapaq imata ruranantsikpaq kaqtapis nimantsikmi.
