Bibliaqa manam jampi asuntukunapaq parlaq librutsu, peru tsënö karpis alläpa llakikur y yarpachakur qeshyëkaqkunataqa consëjunkuna yanapanmi. Wakinllata rikärishun.

“Sänu këkaqkunaqa manam doctorta wanayantsu, peru qeshyëkaqkunam sïqa” (MATEU 9:12).

Bibliachöqa ninmi doctorkuna yanapamänata necesitanqantsikta. Mëtsikaqmi alläpa llakikurnin qeshyayanqanta musyarir y tsë qeshyata rikaq doctorkuna yanapayaptin mas allina sientikuyashqa.

‘Ejerciciuta rurëqa yanapakunmi’ (1 TIMOTEU 4:8).

Tiempuntsikta y kallpantsikta alli utilizanqantsikqa sänu kanapaqmi yanapamäshun. Tsëpaqqa ejerciciutam ruranantsik, sänu mikuykunatam mikunantsik y allim pununantsik.

“Shonqunkunachö kushishqa kayanqanqa jampi cuentam. Peru shonqunkunachö llakishqa kayanqanqa qeshyanätsinmi” (PROVERBIUS 17:22).

Bibliachö textukunata leyinqantsik y rurëta puëdinapaq kaqkunata ruranqantsikmi mas kushishqa kanapaq yanapamäshun. Imapis alli yarqunampaq kaqta pensarqa, llakikurpis mas alli kanapaqmi yanapamäshun.

 “Humildi nunaqa Teyta Dios yachaq kanqantam alli entiendin” (PROVERBIUS 11:2).

Capaz höraqa imallatapis ruranëkipaq jukkuna yanapashunëkitaraq necesitanki, tsëmi pipis yanapashuynikita munaptinqa chaskikunëki. Amïguykikuna y familiëkikunaqa yanapayäshuynikita munayanmi, peru capaz musyayantsu imanö yanapashuynikita. Tsëmi imachö yanapayäshunëkipaq kaqta cläru willanëki, peru munanqëkinö imatapis mana rurayaptinqa ama cölerakuytsu, sinöqa yanapayäshunqëkipita agradecikuy.

Nicolemi kënö nin: “Mana alli sientikurmi doctorman ëwarqä. Tsëchömi doctöraqa nimarqan ima qeshyawan kanqäta, tsëta musyanqämi yanapamarqan imata ruranäpaq kaqta, y ima jampikuna yanapamänampaq kaqtam nimarqan” (Nicoleqa a transtorno bipolar qeshyawanmi qeshyan).

Petermi kënö nin: “Warmïwan cada junaq Bibliata leyinqämi yanapamashqa, cada warë o qoya alli kaqman pensanäpaq. Y mas llakishqa kanqä junaqmi Bibliachö leyinqäpita juk versïculu shonqüyaq chan” (Peterqa depresion qeshyawanmi qeshyan).

Ji-yoomi kënö nin: “Imapa pasëkanqäta jukkunata willëtaqa penqakoqmi kä. Peru juk amïgäqa entiendimaqmi y shumaq kuyëpa tratamarmi mas alli sientikunäpaq yanapamarqan, tsënöpam cuentata qokurqä japallä mana këkanqäta” (Ji-yooqa trastorno alimentario niyanqan qeshyawanmi qeshyan).

Timothym kënö nin: “Bibliachö yachakunqämi yanapamashqa trabäjullachö mana kakunäpaq y alli descansanäpaq. Bibliachö consëjukunaqa llakikunqä höra controlakunäpaqmi yanapamashqa” (Timothyqa trastorno obsesivo compulsivo qeshyawanmi qeshyan).