Costa Rica nacionpa Puertu Limon markanchömi winarqä. Teytäkunaqa puwaq wamrayoqmi kayan y noqaqa ultimu kaqpa puntanmi kä. Teytäqa puwaq watayoq këkaptïmi wanukurqan, tsëmi mamänïllana llapäkunata wätayämarqan.

Wamra kanqäpitam beisbol pukllëqa alläpa gustamaq. a Mözu këkarmi juk equïpuman yëkurqä. Tsë witsanqa 20 watayoqmi karqä y juk alli pukllaqkunata rikaq nunam, Nicaragua nacionchö juk equïpupaq pukllanäpaq invitamarqan. Peru mamänï alläpa qeshyapäkuptinmi pëta cuidanä kaptin, pukllanäpaq invitamaq nunata mana ëwanäpaq kaqta nirirqä. Peru tiempuwanqa yapëmi pukllanäpaq invitarayämarqan, peru Costa Rica nacionpaqnam, tsë equïpuchö pukllaqkunaqa manaraq reqishqa equïpupitam akrashqa kayarqan. Kë kutichöqa anirirqämi. 1949 watapita 1952 watayaqmi tsë equïpuchö karqä, y Cüba, Mëxicu y Nicaragua nacionkunawanmi atska kuti pukllayarqä. Tsë pukllachöqa pelötata tsareq kaqmi karqä, y allim pukllaq kä. 17 kutim mana pantëpa pukllarqä y sinchipa jutïta niyanqanmi alläpa gustamaq.

Peru llakinëpaqqa, juk warmiwan këkarpis, jukwan jukwanmi purikoq kä. Jinamampis, alläpam washkuta upyaq kä. Juk junaqmi alläpa upyashqa karnin wayïman imanö chanqätapis cuentata qokurqätsu, jinamampis dominö nishqan pukllata pukllë y apuestakunata rurëmi alläpa gustamaq.

Tsë witsanmi mamänïqa Jehoväpa testïgun tikrarirqan. Pëqa, Jehoväpa testïgun kanätam munarqan, peru pukllakuna alläpa gustamaptinmi munarqätsu. Pukllata practikanqä höraqa, manam pachä mallaqanqantapis mäkoqtsu kä. Beisbol puklla alläpa gustamaptinmi, tsëllamanna yarparäkoq kä.

Pukllëkarninmi 29 watayoq këkar feyupa dañakurqä. Kachakärishqana këkarpis, pukllanqä equïputaqa jaqirirqämi. Tsënö kaptimpis, taranqäpa amänunchö këkaqkunatam juk equïpuman yëkuyänampaq beisbol pukllëta yachatseq kä.

Jehoväpa testïgunkuna rurayanqan asamblëamanmi 1957 watachö ëwarqä, tsëqa karqan unë witsan beisbolta pukllanqä estadiuchömi. Tsë asamblëachö këkarmi, Jehoväpa testïgunkuna imanö portakuyanqanta rikar alläpa espantakurqä; porqui pëkunaqa manam pukllata rikaq shamoqkunanötsu portakuyaq. Tsë asamblëachö imanö portakuyanqanta rikarmi, Bibliapita yachakïta y reunionninkunaman ëwëta munarirqä.

Bibliachö yachakunqäkunam alläpam gustamaq. Jesus ninqantam yachakurqä ushanan junaqkunachö Diospa gobiernumpita alli willakïkunata entëru Patsachö, qateqninkuna yachatsikuyänampaq kaqtam pëqa willakurqan (Mateu 24:14). Jina yachakurqämi, rasumpa kaq cristiänukunaqa grätislla Diospita yachatsikuyanqanta. Porqui Jesusmi kënö nirqan: “Debaldillam chaskiyarqunki; debaldilla qoyë” (Mateu 10:8).

Bibliapita yachakunqämannömi, Jehoväpa testïgunkuna imanö kawakuyanqanta igualatseq kä. Entëru Patsachö Diospa alli willakïninkunata gänas gänaslla yachatsikuyanqanta rikanqämi alläpa gustamaq. Alli nuna kayänampaq Jesus ninqanta cäsukuyanqantam cuentata qokurirqä. Tsëmi Marcus 10:21 textuchö Jesus “shamï, qatimaqnï kë” ninqanta leyirir, Jehoväpa testïgun këta munarirqä.

Peru tsënö kaptimpis, gustamanqanta jaqiqa manam fäciltsu karqan. Atska watapam gananäpaq kaqta pensar, suertita qomaq nümeruwan apuestata rurar cada semäna pukllaq kä. Peru Bibliachömi yachakurirqä, ‘Alli Suerti diosta’ adorë y imatapis ërayëpa munëqa mana alli kanqanta (Isaïas 65:11; Colosensis 3:5). Tsëmi tsë pukllata jaqirirqä. Tsë domingullam, suertita qomaq nümeruqa, ¡akrashqa karqan! Nunakunaqa tsë semänachö mana pukllanqärëkurmi noqapita burlakuyaq, y kutin kutinmi yapë pukllanäpaq exigiyämaq, peru noqaqa manam munarqätsu. Tsëpita witsëpaqa mananam apostarqänatsu.

Alli kaqta ruranäpaq kaqtaqa musyaqmi kä, peru bautizakunqä junaqqa sasaran karqan (Efesius 4:24). Tsë paqasmi këkanqä hotelman kutirirnin, punta kaq noviäta punkuchö shuyarëkämaqta taririrqä, pëqa noqawan këta munarmi kënö nimarqan: “Sammy cuartïkiman yëkurishun” peru noqaqa “¡manam!” nirqämi. Biblia yachatsikunqannöna kawanqätam nirirqä (1 Corintius 6:18). Tsëmi kënö nimarqan: “¡¿ima ninkim?!” Pëqa, manaraq casakurnin oqllanakur ruranakïpaq Biblia imata yachatsikunqanta mana kaqpaq churarmi, pëwan yapë kayänäta munarqan. Peru noqaqa cuartüman yëkurirmi, punkuta alleq llawirirqä. Kananqa alläpa kushishqam këkä, porqui 1958 watachö bautizakunqäpita patsëmi, Dios munanqannö kawanäpaq imëpis kallpachakurqö.

Bibliapita yachakunqäqa alläpam yanapamashqa. Kananqa, alli amïgukunayoqmi kä y shamoq tiempuchö kushishqa kawakunäpaq kaqta musyarmi, kushishqa sientikü.

Beisbolta pukllëqa gustëkämanllaran, peru mas precisaqqa Diospa kaqta puntaman churanqämi. Beisbolta pukllarqa atska qellëtam ganaq kä y pï mëmi reqimaq, peru tsëkunaqa pasareqllam kayan. Peru Dioswan y cristiänu mayïkunawan amïgu kayanqäqa manam imëpis ushakanqatsu. Bibliaqa kënömi nin: “Mana cäsukoq nunakunaqa pasarëkäyanllam, y munëninkunapis pasarëkanmi, peru Diospa munëninta ruraq kaqqa, imëyaqpis këkanqam” (1 Juan 2:17). Kananqa, Jehovä Diosta sirwï y markanchö këmi alläpa gustaman. Porqui tsëmi kawënïchöqa mas precisan.