1. ¿Imanötaq Jehoväqa nunakunata animarqan?

ADANWAN Ëva jutsata rurayanqanllachönam, Jehoväqa Genesis 3:15 textuchö këkaq profecïata parlarqan. Tsëchömi änikurqan Satanasta y mana alli rurëninkunata ushakätsinampaq kaqta. Tsë profecïata nunakuna tiempuwan alleq entiendirninmi alli vïdata kushishqa shuyaräyänan karqan (1 Juan 3:8; Rev. 12:9).

2. ¿Imanötaq Jehoväqa Noëta animarqan?

² Noëpa tiempunchö nunakunaqa maqanakurlla y rakchakunata rurakurllam kakuyaq (Gen. 6:4, 5, 11; Jüd. 6). Itsa tsëqa Noëqa llakishqa sientikunman karqan. Noëwan familianllam Jehovätaqa sirwiyaq (Gen. 6:9). Peru Jehoväqa animarninmi willarqan, tsë nunakunata  ushakätsinampaq kaqta, y salvakuyänampaq familianwan imata rurayänampaq kaqta (Gen. 6:13-18). Tsëqa alläpachi animarqan.

3. ¿Imanötaq Josuëta Jehovä animarqan? (Rikäri kë yachatsikïpa qallananchö këkaq dibüjuta).

³ Tiempu pasariptinnam, Dios Änikunqan Patsaman israelïtakunata yëkatsinampaq carguta Josuë chaskirqan. Tsëpaqqa, alläpa puëdeq tröpakunawanmi pelyanan karqan. Y Josuë mantsapakunqanta musyarninmi Jehoväqa Moisesta kënö nirqan: “Josuëta churë y valienti kanampaq animë, porqui pëmi Israel markata diriginqa, y pëmi rikänëkipaq kaq patsata chaskiyänampaq yanapanqa” (Deut. 3:28). Jina kikin Jehoväpis Josuëta kënö nirmi animarqan: “¿Manaku noqa mandarqoq? Kallpata tsari y valienti kë. Ama karkaryëtsu ni mantsakëtsu, porqui Jehovä Diosnikiqa qamwanmi këkan mëpa ëwaptikipis” (Jos. 1:1, 9).

4, 5. (1) ¿Imanötaq Jehovä unë tiempuchö markanta animarqan? (2) ¿Imanötaq Jehoväqa Tsurinta animarqan?

⁴ Jehoväqa manam juk ishkë sirweqninkunallatatsu animarqan, sinöqa llapan markantapis animarqanmi. Këllaman pensarishun, Babiloniachö prësu këkaq markantam shoqarnin kënö nir animarqan: “Noqam qamwan këkä. Ama wakman këman rikachakïtsu, porqui noqam Diosniki kä. Noqam kallpayoqta tikratsishqëki, awmi, noqam yanapashqëki. Noqam puëdeq derëcha kaq makïwan sinchi tsararashqëki” (Is. 41:10). Punta cristiänukunapis tsëmanmi confiakuyarqan, y noqantsikpis tsënöllam confiakuntsik (leyi 2 Corintius 1:3, 4).

⁵ Jehoväqa Jesustapis animarqanmi. Bautizakurirmi, ciëlupita kënö neqta wiyarirqan: “Këmi Tsurï, kuyë Tsurï, pëpitam alläpa kushikü” (Mat. 3:17). Tsënö ninqanqa Jesustaqa alläpachi yanaparqan yachatsikur purinqan witsan.

6. ¿Imata ruranapaqtaq animamantsik talentupaq willakïqa?

⁶ Talentupaq willakïwanmi Jesuspis discïpulunkunata animarqan Jehoväta mana jaqipa sirwiyänampaq. Tsë willakïchöqa juk patronmi alli sirweqninkunata kënö nirqan: “¡Allitam rurarqunki markäkïpaq y alli sirwipakoq! Juk ishkë cösaskunallachöpis markäkïpaqmi karqunki. Atska cösaskunata rikänëkipaqmi churashqëki. Patronnikiwan kushishqa kë” (Mat. 25:21, 23).

7. (1) ¿Imanötaq Jesusqa apostolninkunata animarqan? (2) ¿Y imanötaq Pëdruta animarqan?

⁷ Apostolkuna mas precisaq këta munar pleytuyaptimpis, Jesusqa pacienciawanmi animarqan humildi kayänampaq y yanapanakuyänampaq (Lüc. 22:24-26). Pëdruqa atska kutim Jesusta llakitsirqan (Mat. 16:21-23; 26:31-35, 75). Tsënö kaptimpis Jesusqa manam rechazarqantsu, tsëpa rantinqa animarqanmi y wakinkunatapis animanampaqmi nirqan (Juan 21:16).

8. ¿Imanötaq Ezequïasqa tröpa mandaqkunata y llapan nunakunata animarqan?

⁸ Diospa unë sirweqninkunapis cuentatam qokuyarqan wakinkunata animëqa alläpa precisanqanta. Rikärishun rey  Ezequïas ruranqanta. Asiriukuna Judäta ushakätsita munayaptinmi, tröpa mandaqkunata y llapan nunakunata qayëkatsirnin shumaq animarqan (leyi 2 Crönicas 32:6-8 *).

9. ¿Imatataq Jobpita yachakuntsik?

⁹ Kananqa parlarishun Jobpita. Pëqa alläpa llakishqam këkarqan, peru animayänampaq ëwaqkunaqa mas peormi llakitsiyarqan. Tsënö kaptimpis, tsë nunakunataqa pëmi yachatsirqan shumaq animakoq kayänampaq (Job 16:1-5). Jobtaqa Elihüwan kikin Jehovämi animayarqan (Job 33:24, 25; 36:1, 11; 42:7, 10).

10, 11. (1) ¿Imanirtaq Jeftëpa warmi wamranqa animayänanta wanarqan? (2) ¿Pikunatataq kanan tiempuqa felicitänantsik y animanantsik?

¹⁰ Jeftëpa warmi wamrampis animayänanta y shoqayänantam wanarqan. Jeftëqa Jehovätam änirqan ammonïtakunata guërrachö ganarninqa, chaskeqnin punta yarqamoq kaqta qoykunampaq. Peru chaskeqnin yarqoqqa warmi wamranmi karqan. Jeftëqa alläpam llakikurqan, porqui manam mas tsurinkuna karqantsu. Tsënö karpis änikunqanta cumplirninmi, Diospa carpa wayinchö imëyaqpis sirwinampaq wamranta apëkurqan (Juëc. 11:30-35).

¹¹ Tsëta rurananqa Jeftëpaqqa manam fäciltsu karqan, masran warmi wamrampaqnäqa. Tsënö kaptimpis pëqa teytan änikunqanta ruranampaqmi decidïdu këkarqan (Juëc. 11:36, 37). Tsëmi casakïta y wamrayoq këta munarpis casakurqannatsu. Tsëqa shoqayänanta y animayänantaqa alläpachi wanarqan. Bibliaqa kënömi nin: “Kë costumbrim Israel nacionchö karqan: Israel nacionchö shipashkunaqa cada watam chusku junaq ëwayaq Jeftëpa warmi wamranta animaq” (Juëc. 11:39, 40). Kanan witsampis ‘Señorpa kaqkunapaq yarpachakoq’ kaq soltëru cristiänukunataqa, animanantsik y felicitänantsikmi (1 Cor. 7:32-35).

12, 13. ¿Imanötaq Pëdruqa animarqan cristiänu mayinkunata?

¹² Jesusqa manaraq wanurmi Pëdruta kënö nirqan: “Satanasmi nishqa llapëkikunata trïgutanö cerniyäshunëkipaq katsiyäshïnikita munanqanta. Peru noqaqa qampaqmi rogakurqö markäkïniki mana ushakärinampaq; y qamqa, arrepentikurir wawqikikunata kallpata qonki” (Lüc. 22:31, 32).

¹³ Pëdruqa congregacionchö juk columna cuentam karqan (Gäl. 2:9). Imëkachöpis valienti kanqanqa cristiänu mayinkunata alläpam animarqan. Y wanukunampaqna këkarnam kënö nir qellqarqan: “Wallka palabrakunallawan[mi] qamkunaman qellqamurqö, kallpata qoyänaqpaq y Diospa rasumpa alläpa alli këninta chaskishqa kayanqëkita alleq cläru musyatsiyänaqpaq. Tsëchö  tsarakuyë” (1 Pëd. 5:12). Tsënö nir cartakunqanqa mëtsika watakunapam cristiänukunata shoqashqa y animashqa. Y Jehovä änikunqan cumplikanqanyaqqa tsënö animamänataqa noqantsikpis wanantsikmi (2 Pëd. 3:13).

14, 15. Apostol Juan qellqanqanqa, ¿imanirtaq cristiänukunata mëtsika watakunapa yanapashqa?

¹⁴ Apostol Juanpis congregacionchö columna cuentam karqan. Jesus yachatsikunqampita qellqanqanqa, mëtsika watakunapam cristiänukunata animashqa y noqantsiktapis animëkämantsikllam. Pëllam qellqarqan Jesus kënö ninqantapis: ‘Llapankunam musyayanqa qateqnïkuna kayanqëkita, jukniki juknikikuna kuyanakuyaptikiqa’ (leyi Juan 13:34, 35).

¹⁵ Kiman cartankunaqa alläpam animamantsik. Jutsallakurir llakikunqantsik hörakunaqa, “Jesuspa yawarninmi llapan jutsapita limpiamantsik” ninqanqa alläpam yanapamantsik (1 Juan 1:7). Shonquntsik condenamashqaqa, “Diosqa shonquntsikpitapis mas jatunmi” ninqanmi alläpa shoqamantsik (1 Juan 3:20). Juanllam, “Diosqa kuyakïmi” nir qellqarqan (1 Juan 4:8, 16). Ishkë y kima kaq cartankunachönam, ‘rasumpa kaq nänichö purikäyanqampita’ cristiänu mayinkunata felicitan (2 Juan 4; 3 Juan 3, 4).

16, 17. ¿Imanötaq Pabluqa punta cristiänukunata animarqan?

¹⁶ Itsa apostol Pabluchi cristiänu mayinkunata masqa animarqan. Jesusta sirwir qallanqan witsanqa, wakin apostolkunaqa Jerusalenchömi këkäyarqan (Hëch. 8:14; 15:2). Judëachö këkaq  cristiänukunaqa jukllëlla Diosman creeq judïukunatam Cristupita parlapäyaq. Peru apostol Pablutaqa santu espïritum pusharqan mëtsika dioskunaman creeq griëgukunata y romänukunata Jehoväpita yachatsinampaq (Gäl. 2:7-9; 1 Tim. 2:7).

¹⁷ Pabluqa jinantimpam viajarqan; Italia, Grecia y kanan Turquïa nishqan sitiukunapa, y mëtsika congregaciontam patsätsirqan. Tsë mushoq cristiänukunataqa marka mayinkunam alläpa chikiyaq, tsëmi animayänanta wanayarqan (1 Tes. 2:14). 50 wata witsankunam, Tesalönicachö congregacionman cartakurnin Pablu kënö nirqan: “Qamkunapaq mañakurqa, Diostam imëpis agradecikuyä, porqui manam ni imëpis qonqayätsu Teyta Diospa rikëninchö markäkurnin rurayanqëkita” (1 Tes. 1:2, 3). Jina kënöpis consejarqanmi: “Jukniki juknikikuna kallpata qonakurnin y jukniki juknikikuna sharkatsinakurnin këkäyë” (1 Tes. 5:11).

18. ¿Imanötaq cristiänukunata dirigeqkuna Felïpita animayarqan?

¹⁸ Jehoväqa unë cristiänukunatapis animarqanmi, tsëpaqqa utilizarqan cristiänukunata dirigeqkunatam. Cristupita Felïpi parlapäriptinmi Samaria nunakunaqa creikuyarqan, tsëmi cristiänukunata dirigeqkunaqa yanaparnin pë kaqman apostol Pëdrutawan Juanta mandayarqan y pëkunanam Jehoväman mañakuyarqan mushoq cristiänukuna santu espïrituta chaskiyänampaq (Hëch. 8:5, 14-17). Tsënö yanapayanqanqa Felïpita y mushoq cristiänukunataqa alläpachi animarqan.

19. Cristiänukunata pushaqkuna qellqayanqan cartaqa, ¿imanötaq yanapakurqan?

¹⁹ Tiempuwannam, cristiänukunata dirigeqkunata tapukuyarqan mana judïu kaq cristiänukuna ley ninqanmannö penqënikikunachö señalakuyänan precisanqanta o manana precisanqanta (Hëch. 15:1, 2). Y pëkunanam Diosta santu espïritunta mañakurir y Diospa Palabran ninqanman alleq pensëkur decidiyarqan señalakuyänan manana precisanqanta. Y decidiyanqanta musyatsikuyänampaqqa juk cartata qellqarirmi congregacionkunaman apatsiyarqan. Y tsë cartata congregacionkunachö leyirirnam, ‘alläpa kushikuyarqan tsëwan kallpata chaskiyanqampita’ (Hëch. 15:27-32).

20. (1) ¿Imanötaq kanan tiempu Jehoväpa Testïgunkunata Pushaqkunaqa jinantin Patsachö cristiänukunata animayan? (2) Y qateqnin kaq yachatsikïchöqa, ¿imatataq yachakushun?

²⁰ Kanampis Jehoväpa Testïgunkunata Pushaqkunaqa Betelchö këkaqkunata, llapan tiempunkunawan sirweqkunata y jinantin Patsachö Testïgukunatam animayan. Punta cristiänukunanömi animamanqantsiktaqa alläpa agradecikuntsik. Jinamampis Testïgukunata Pushaqkunaqa 2015 watachömi qelanashqa këkaqkunata animayänampaq jorqayämurqan, Kutikamunëkitam Jehoväqa munan nishqan follëtuta. Peru ¿congregacionchö carguyoq kaqkunallaku Jehovänö wakinkunata animëta puëdiyan? Qateqnin kaq yachatsikïchömi tsëta yachakushun.