1. ¿Imanirtaq Pabluqa cristiänukunata nirqan imëpitapis mas animanakuyänampaq?

KANANMI imëpitapis masqa animanakunantsik. Apostol Pablum hebreu cristiänukunata kënö nirqan: “Alli reqinakushun, tsënöpa kuyakoq kanapaq y alläpa alli kaq rurëkunata ruranapaq kallpata qonakunantsikpaq, [...] y masraq tsë junaq chëkämunqantana rikëkarqa” (Heb. 10:24, 25). Tsënö ninqantaqa pitsqa watallatanam cumplikaqta rikäyänan karqan. Jesus willakunqan cumplikëkanqanta cuentata qokurirmi Jerusalenpita escapar ëwakuyänan karqan (Hëch. 2:19, 20; Lüc. 21:20-22). Jehoväpa piñakïnin junaqqa 70 watachömi cumplikärirqan, tsë watam romänukuna Jerusalenta ushakäratsiyarqan.

2. ¿Imanirtaq kanan witsanqa alkäbulla këkänantsik animanakunantsikpaq?

² Kananqa imëkam rikätsimantsik ushakë junaq këllachöna këkanqanta (Joel 2:11). Y Sofonïas 1:14 textu ninqanqa cumplikëkanmi.  Kënömi nin: “Jehoväpa jatun piñakïnin junaqqa këllachönam. Këllachönam, rasllanam shamïkan”. Tsëmi Pablu kënö consejamantsik: “Alli reqinakushun, tsënöpa kuyakoq kanapaq y alläpa alli kaq rurëkunata ruranapaq kallpata qonakunantsikpaq” (Heb. 10:24). Kananmi cristiänu mayintsikkunamanqa, mas yarpachakunantsik mana alli sientikuyanqan hörakuna animarinapaq.

3. ¿Ima nirqantaq Pablu animanakïpaq? (Rikäri kë yachatsikïpa qallananchö këkaq dibüjuta).

³ Bibliam kënö nin: “Alläpa yarpachakïqa nunatam alläpa sufritsin, peru alli palabrakunaqa kushiratsinmi” (Prov. 12:25). Awmi, pillapis animaramänantsiktaqa llapantsikmi wanantsik. Hasta animakoqkunapis wanayanmi. Tsëmi Römachö cristiänukunata Pablu kënö nirqan: “Alläpam munëkü qamkunata rikäyënikita, tsënöpa Diospa kaqchö yanapayapteq mas alli tsarakuyänëkipaq; o, juk parlakïchöqa, [...] markäkïnintsikwan kikintsikpura kallpata qonakunapaq” (Rom. 1:11, 12). Rikanqantsiknömi hasta apostol Pablupis animayänantaqa wanarqan (leyi Romänus 15:30-32).

4, 5. ¿Pikunataq animanantsikta wanayan y imanir?

⁴ Mëtsika Testïgukunam, llapan tiempunkunawan Jehoväta sirwiyan. Tsënö yanapakoqkunachöqa këkäyan precursorkuna, misionërukuna, betelïtakuna, congregacionkunata watukaqkuna y warminkuna, y juk idiömaman traduceqkunam. Pëkunam animanantsikta wanayan. Jina llapan tiempunkunawan yanapakushqa kaqkunapis animanantsiktam wanayan.

⁵ Jina, ¿pikunataq animanata wanayan? “Señorllachö” casakuyë nir Biblia mandakunqanta cäsukoq soltërukuna y soltërakuna, y problëmakunapa pasëkaq o alläpa qeshyapäkïkaq cristiänu mayintsikkunam (1 Cor. 7:39; 2 Tes. 1:3-5). Jina casäda warmikunapis wanayanmi kuyayanqanta qowankuna rikätsiyänanta y rurayanqampita agradecikuyänanta (Prov. 31:28, 31). Jehoväwan Jesusqa sirweqninkunata alläpam consolayan (leyi 2 Tesalonicensis 2:16, 17).

6. ¿Ima rurëyoqtaq anciänukuna kayan?

⁶ (Leyi Isaïas 32:1, 2 *). Alläpa mana alli tiempuchömi kawantsik, tsëmi höraqa llakinärintsik o qelanärintsik. Peru Jesusmi ‘dirigeqninkunawan’ o anciänukunawan animamantsik y yanapamantsik. Pëkunaqa Diosnintsikta kushishqa sirwinantsikta munarmi shumaq yanapamantsik, y manam markäkïnintsikpa duëñuntsu kayan (2 Cor. 1:24).

7, 8. ¿Imanö mastaq anciänukunaqa cristiänu mayinkunata animayanman?

⁷ Anciänukunaqa apostol Pablupitam yachakïta puëdiyan. Pëmi Tesalönicachö mana allikunapa pasëkaq cristiänu mayinkunata kënö nirqan: “Listu këkäyarqä, [...] kawënïkunatapis qamkunarëkur qoyänäpaqmi, porqui noqakunapaqqa qamkunaqa alläpa kuyashqa këmanmi chäyarqëki” (1 Tes. 2:8).

 ⁸ Pabluqa wanayanqankunachöpis yanaparqanmi. Ëfesuchö anciänukunatam kënö nirqan: “Rikätsiyarqoq [...] kallpannaq kaqkunata yanapayänëkipaq[mi], y Señor Jesus kënö ninqantam imëpis yarpäyänëki: ‘Imatapis qokïmi imata chaskipitapis mas kushikïtaqa apamun’” (Hëch. 20:35). Pëqa manam shimillapatsu animarqan, sinöqa ‘llapan puëdinqantam’ rurarqan y imëkantapis gastarqan (2 Cor. 12:15). Tsëmi anciänukunaqa cristiänu mayinkunata wanayanqankunachöpis yanapayänan. Tsënömi rikätsikuyanqa rasumpa kuyakoq kayanqanta (1 Cor. 14:3).

9. ¿Imaraq anciänukunata yanapanqa cristiänu mayinkunata animar shumaq consejayänampaq?

⁹ Höraqa precisanqam cristiänu mayinkunata anciänukuna consejayänan o corregiyänan. Y consejayanqan animanampaqqa, Biblia ninqantam cuentaman churayänan. Jesuspis tsënömi rurarqan. Ëfesu, Pergamu y Tiatïra congregacionkunata manaraq consejarninmi puntataqa allikunata rurayanqankunapita felicitarqan (Rev. 2:1-5, 12, 13, 18, 19). Y Laodicëa congregaciontanam kënö nirqan: “Llapan kuyanqä kaqkunatam noqaqa imachö mana alli këkäyanqanta rikätsï y alli portakuyänampaq yachatsï. Tsëmi, llapan puëdinqëkimannö kallpachakï y arrepentikï” (Rev. 3:19). Y tsënömi anciänukunapis cristiänu mayinkunata Jesusnö shumaq consejayänan.

10. ¿Imatataq llapantsikpis rurëta puëdintsik?

¹⁰ Manam anciänukunallatsu wakinkunata animëta puëdiyan. Apostol Pabluqa, llapantsiktam nimantsik wakinkunata animanapaq (Efes. 4:29). Llapantsikmi alkäbu këkänantsik cristiänu mayintsikkuna imapa pasëkäyanqanta y imata wanayanqanta. Apostol Pablum hebreu cristiänukunata kënö nirqan: “Mana tsarakoq  makikunata y dëbil këkaq qonqukunata sinchiyätsiyë, y chakikikuna alli kaq nänipa imëpis purirnin sïguitsun, tsënöpa dañashqa kaq moqu mana mukllikärinampaq, antis tsëpa rantinqa, kachakärinampaq” (Heb. 12:12, 13). Hasta jövinkunapis wakinkunata animëtaqa puëdiyanmi.

11. ¿Ima yanapakïtataq juk pani chaskirirqan llakishqa kanqan höra?

¹¹ Rikärishun Marthe * jutiyoq panita pasanqanta, pëqa alläpa llakitsikoq qeshyawanmi qeshyaq, y kënömi nin: “Juk junaqmi Jehoväta alläpa mañakurqä. Y tsëpitanam juk mayorlla nanawan tinkurirqä. Y alläpa kuyakïwanmi tratëkamarqan, jina nimarqanmi pasëkanqäpa pëpis pasashqa kanqanta. Tsëqa alläpam yanapamarqan”. Kë mayorna paniqa manachi ichikllapis pensarqantsu tsënö yanaparinampaq kaqtaqa.

12, 13. ¿Imanötaq wiyakushwan Filipensis 2:1-4 textuchö consëjuta?

¹² Filïpuschö cristiänukunatam Pablu consejarqan animanakuyänampaq, shoqanakuyänampaq, ankupänakuyänampaq, tsë pensëyoqlla y juknölla kayänampaq. Y kënöpis nirqanmi: “Ama contrakïta munar ni alläpa precisaq tukur imatapis rurayëtsu, tsëpa rantinqa qollmi shonqïkikunawan wakinkunata qamkunapita mas precisaqtanö rikäyë, ama kikikikunapa biennikikunallataqa ashiyëtsu, sinöqa wakinkunapa bienninkunatapis” (Filip. 2:1-4).

¹³ Kë textu ninqannö alkäbu këkäshun cristiänu mayintsikkunata llakipar shoqarinantsikpaq, animarinantsikpaq y kuyakïwan yanaparinantsikpaq.

14. ¿Imanötaq wakinkunata animarishwan?

¹⁴ Unë animanqantsik cristiänu mayintsikkuna Jehoväta sirwirnin sïguiyanqanta rikëqa alläpam kushitsimantsik. Apostol Juanpis alläpam kushikurqan yachatsinqan nunakuna Jehoväta sirwirnin sïguiyaptin (3 Juan 4). Mëtsikaq precursorkunam niyan, Bibliapita yachatsiyanqan nunakuna Jehoväta sirwirnin sïguiyanqanta y hasta precursor kayanqanta rikëqa alläpa kushitsikunqanta. Tsëmi alli kanman llakinashqa këkaq precursorta nunakunata unë imanö yanapanqanta yarpäratsinqantsikqa.

15. ¿Imanö mastaq wakinkunata animarishwan? Willakaramï.

¹⁵ Congregacionkunata mëtsikaq watukaqkuna y warminkunam niyan, watukayanqampita agradecikurnin tarjëtata qoyanqanqa alläpa animanqanta. Y tsënöllam animan misionërukunata, anciänukunata, betelïtakunata y precursorkunata agradecikuyanqampis.

16. ¿Pitapis animëqa alläpa sasaku?

¹⁶ Tïmidu o alläpa mana parlakoq karnimpis, wakinkunata animëtaqa puëdintsikmi y manam sasatsu. Tsëpaqqa, pitapis saludarninqa kushi kushillam saludëta procuranantsik. Seriulla chaskimarnintsikqa itsa problëmakunayoq këkäyan y pillatapis willarita wanëkäyan. Shumaq wiyarinqantsikwanqa itsa alli sientikunampaq yanaparishwan (Sant. 1:19).

17. ¿Ima yanapakïtataq chaskirqan juk Testïgu jövin?

¹⁷ Henri jutiyoq jövinmi alläpa llakishqa sientikoq familiankuna y hasta  anciänu kashqa teytampis Jehoväta jaqiyashqa kayaptin. Y yanapanampaqmi congregacionkunata watukakoqqa cafë upoq invitarqan, y tsëchömi imanö sientikunqanta waqarëkar willaptin shumaq wiyarqan. Y Henriqa entiendirirqanmi familianta yanapëta munarninqa Jehoväta mana jaqipa sirwinan precisanqanta. Jina alläpam yanaparqan Salmus 46, Sofonïas 3:17 y Marcus 10:29, 30 textukunata leyinqampis.

18. (1) Rey Salomonqa, ¿ima nirqantaq? (2) Y apostol Pabluqa, ¿ima nirqantaq?

¹⁸ ¿Imatataq yachakuntsik Henrita y Martheta pasanqampita? Llapantsikpis wakinkunata animëta puëdinqantsiktam. Rey Salomonmi kënö nirqan: “Tiempunchö shumaq animanakur parlapänakuriqa, ¡imanö shumaqmi!” y “juk alli willakïqa tullukunatapis chukruyäratsinmi” (Prov. 15:23, 30). Pitapis llakinashqata rikarninqa, itsa leyipärishwan Täpakoq revistata o jw päginachö këkaq publicacionkunata. Y apostol Pablu ninqantapis rurashwanmi, kënömi nirqan: “Diosta adorana cancionkunawan agradecikurnin cantar jukniki juknikikuna kallpata qonakurnin sïguiyë, shonqïkikunapita patsë Jehoväpaq cantarnin” (Col. 3:16; Hëch. 16:25). Rikanqantsiknömi Jehoväpaq cantanqantsikkunaqa alli sientikunapaq yanapamantsik.

19. ¿Imanirtaq animanakunantsik masraq precisanqa y imatataq ruranantsik?

¹⁹ Ushakë junaq mas sercämunqanmannömi alläpa precisanqa cristiänu mayintsikkunawan animanakunantsik (Heb. 10:25). Y Pablu kënö consejamanqantsiktam cäsukunantsik: “Kallpata qonakurnin y [...] sharkatsinakurnin këkäyë, kanan rurëkäyanqëkinölla” (1 Tes. 5:11).