1, 2. (1) ¿Imanirtaq apostol Pablu kawanqan witsan nunakuna yarpachakuyaq esclävu këpaq y libri këpaq? (2) Pablu ninqannö, ¿mëpitataq rasumpa libri këqa shamun?

ROMÄNUKUNAQA leykunata, alli rurëkunata y libri këta respetatsirmi orgullösu sientikuyaq. Peru tsë nacionqa puëdeq këta lograrqan esclävukunapa trabäjunkunawanmi. Juk tiempunäqa cäsi pullanmi nunakuna esclävu kayarqan. Tsëmi humildi nunakuna y hasta cristiänukunapis tsë asuntupaqqa yarpachakuyaq.

² Libri këpaqqa mëtsika kutim apostol Pablu parlarqan. Peru manam tsë tiempuchö nunakuna logrëta munayanqan kaqpaqtsu parlëkarqan. Sinöqa jutsapita Dios imanö libramanqantsikpaqmi parlëkarqan. Corintuchö cristiänukunatam entienditsirqan rasumpëpa libri këqa mëpita shamunqanta. Kënömi nirqan: “Jehoväpa santu espïritun këkanqanchöqa, libri këmi kan” (2 Cor. 3:17). Pablupis y wakin cristiänukunapis tsëtam nunakunata yachatsiyarqan.

3, 4. (1) ¿Imapitataq Pablu parlëkarqan 2 Corintius 3:17 textupa punta kaq versïculunkunachö? (2) ¿Imatataq rurashwan Jehovä qomanqantsik libri këta shumaq provechanapaq?

 ³ Jina Pabluqa parlarqanmi, Sinaï jirkachö Jehoväpa juk angelninwan parlarirnin bajaramuptin Moisespa cäran alläpa chipapanqanta, y tsëta rikëkurnin israelïtakuna mantsakäyaptin juk vëluwan tsapakunqanta (Ex. 34:29, 30, 33; 2 Cor. 3:7, 13). Y nirqanmi Jehoväman kutiyaptin tsë vëlu jorqakanqanta (2 Cor. 3:16). ¿Ima nitataq munëkarqan?

⁴ Punta kaq yachatsikïchö rikanqantsiknöpis chipyëpa libriqa Jehovällam. Y tsëmi santu espïritun këkanqanchöqa libri këqa kan. Peru tsë libri këta tarinapaqqa Jehovämanmi kutinantsik, juk parlakïchöqa pëwanmi alli amïgu kanantsik. Desiertupa viajëkarnin israelïtakunaqa manam Diosnintsik rikanqannötsu imatapis rikäyarqan. Pensëninkunata y shonqunkunata juk vëlu tsaparaqnömi karqan, tsëmi libri këninkunataqa munëninkunata rurakuyänanllapaq utilicëta munayarqan (Heb. 3:8-10).

5. (1) ¿Imapitataq Jehoväpa santu espïritun libramarquntsik? (2) Esclävu këkaqkuna o carcelchö këkaqkunaqa, ¿Jehovä qomanqantsik libri këta logrëta puëdiyanku? (3) ¿Imapitataq yachakurishun?

⁵ Santu espïritu qomanqantsik libri këqa mas alli kaqmi. Porqui tsëqa libramantsik jutsapa, wanïpa, mana alli religionpa y mana alli costumbrinkunapa esclävun këpitam. Nunaqa manam kikinllapitaqa tsëkunapita librakïta puëdintsu (Rom. 6:23; 8:2). Tsënö libri këtaqa, hasta esclävu këkaqkuna o carcelchö këkaqkunapis tarita puëdiyanmi (Gen. 39:20-23). Y tsënö libri këtam tariyarqan panintsik Nancy Yuen y wawqintsik Harold King. Pëkunaqa Jehovä ninqanta rurayanqanrëkurmi carcelashqa kayarqan. Pëkunapita willakïtaqa rikëta puëdinki JW Broadcasting nishqan canalchömi (VIDEUKUNA > TAPUPÄYANQAN Y WILLAKUYANQANKUNA > PRUËBAKUNAPA PASAYAN). Peru ¿imanötaq rikätsikushwan libri kënintsikta valoranqantsikta y imatataq rurashwan alli utilizänapaq? Rikärishun.

6. ¿Imanötaq israelïtakuna rikätsikuyarqan Jehovä qonqan libri këta mana valorayanqanta?

⁶ Jehoväqa Egiptuchö esclävu kayanqampita jorqamurmi israelïtakunata librita tikraratsirqan, peru pëkunaqa manam valorayarqantsu. Juk ishkë killakuna pasariptinllam Egiptuchö mikuyanqanta y upuyanqanta llakir qallëkuyarqan, y Jehovä qoykanqankunapitam quejakuyarqan. Hasta Egiptuman kutikïtam munayarqa. Pëkunapaqqa pescädu, pepïnu, sandïya, pöru, cebölla y äjusmi masqa precisarqan, peru libri këtaqa manam valorayarqantsu. Tsëchi Jehoväqa alläpa piñakurqan (Nüm. 11:5, 6, 10; 14:3, 4). ¿Imatataq tsëpita yachakuntsik?

7. (1) ¿Imanötaq Pabluqa 2 Corintius 6:1 textu ninqanta cumplirqan? (2) ¿Y imanötaq noqantsikpis pënölla rurashwan?

⁷ Jehoväqa wamran Jesucristuwanmi libri këta qomarquntsik, y tsëta valorayänampaqmi apostol Pablu cristiänukunata nirqan (leyi 2 Corintius  6:1). Pabluqa jutsapa y wanïpa esclävun karninmi mana alli sientikoq. Peru kikin ninqantam cumplirqan y kënömi nirqan: “¡Diostam agradecikü! ¡Pëmi Señornintsik Jesucristurëkur libramanqa!”. ¿Imanirtaq tsënö nirqan? Kikinmi kënö nin: “Porqui Cristu Jesusrëkur kawëta qokoq santu espïritupa leyninqa, jutsapa leynimpita y wanïpitam librashurqunki” (Rom. 7:24, 25; 8:2). Jutsapita y wanïpita Jehovä libramanqantsiktaqa ama mana kaqpaqqa churashuntsu. Porqui wamran Jesus wanunqampitam limpiu concienciawan Jehoväta sirwita puëdintsik (Sal. 40:8).

8, 9. (1) ¿Imatataq apostol Pëdru consejakurqan libri kënintsikpaq parlarnin? (2) ¿Kanan witsanqa ima peligrukunataq kan?

⁸ Libri kënintsikpita agradecikurpis, manam llutaqa utilizänantsiktsu. Apostol Pëdrum cläru consejamantsik libri kanqantsikrëkur munënintsikkunata mana rurakunapaq (leyi 1 Pëdru 2:16). Kë consëjuqa yarpätsimantsik desiertuchö israelïtakuna rurayanqantam. Kananqa pëkunapitapis masmi cuidakunantsik, porqui Satanaswan makinchö këkaq nunakunaqa vistikïta, mikïta, upyëta, kushikuyänampaq rurëkunata y maskunata mas precisaqpaq churanatam munayan. Y tsëkunata munapätsimänapaqqa mas shumaqllan nunakunatam akrayan. Mana cuidakurqa, rasllam niyanqanta creirishwan y libri kënintsikta mana allipa utilizärishwan.

⁹ Apostol Pëdru consejakunqanqa, estudiu asuntuchö y trabäju asuntuchömi alläpa yanapamantsik. Kanan witsan jövinkunataqa, alli trabäjuyoq kayänanta y mëtsika qellëta ganayänanta munarmi alläpa exigiyan universidäkunachö estudiayänampaq. Y tsëta creitsiyänampaqqa universidäkunachö estudiashqakuna mëtsikata ganayanqantam niyan. Tsëta wiyarninqa jövinkunaqa itsa tsënö universidäkunachö estudiëta munayanqa. Peru ¿imatataq pëkuna y teytankunapis cuentachö katsiyänan?

10. ¿Imatataq cuentaman churanantsik imatapis decidirninqa?

¹⁰ Wakinkunaqa itsa niyanman concienciankuna permitiptinqa imata y mëchö estudiëta decidiyänampaq libri kayanqanta. Itsa tsëtaqa pensayan Pablu kënö ninqampita: “¿Imanirtaq libri kënï juk nunapa conciencianrëkur juzgashqa kanman?” (1 Cor. 10:29). Awmi, imata estudianapaq y mëchö trabajanapaq kaqtaqa kikintsikmi akrakïta puëdintsik. Peru yarpänantsikmi imatapis decidinapaq chipyëpa libri mana kanqantsikta y decidinqantsikkunaqa alliman o mana allimampis chätsikunqanta. Tsëmi Pablu kënö nirqan: ‘Llapan imëkapis allillam kayan, peru manam llapantsu allipaq kayan, ni llapantsu kallpata qokuyan’ (1 Cor. 10:23). Pablu tsënö ninqanmi yanapamäshun munënintsikta mas precisaqpaq mana churanapaq.

11. ¿Imanirtaq jutsapita y wanïpita Jehovä libramarquntsik?

¹¹ Jina Pëdruqa nirqanmi libri kënintsikta Jehoväta sirwinapaq utilizanqantsik  mas alli kanqanta. Porqui Jehovämi Jesus wanunqanrëkur jutsapita y wanïpita libramarquntsik, tsënöpa llapan kawënintsikchö pëllatana sirwinapaq.

12. ¿Imatataq yachakuntsik Noëpita y familiampita?

¹² ¿Imatataq ruranantsik libri kënintsikta mana allipa mana utilizänapaq y munënintsikkunapa esclävun yapë mana kanapaq? Diosta sirwirninmi chipyëpa ocupädu kanantsik (Gäl. 5:16). Rikärishun Noëwan familian imata rurayanqanta. Lluta kawakoq y alläpa lïsu nanakunawan këkarnimpis, manam tsë mana alli nunakunanö pensar qallëkuyarqantsu. Tsëpaqqa yanaparqan arcata rurarnin, kikinkunapaq y animalkunapaq mikïkunata ëllupakurnin y ushakë shamunampaq kaqta nunakunata willarnin ocupädu kayanqanmi. Biblia ninqannöpis, Dios llapan mandanqantam rurayarqan (Gen. 6:22). Tsënöpam salvakuyarqan (Heb. 11:7).

13. ¿Imatataq Jehovä mandamarquntsik?

¹³ Y noqantsiktaqa, ¿imatataq Jehovä mandamarquntsik? Gobiernumpita yachatsikunapaqmi (leyi Lücas 4:18, 19). Kanan witsan nunakunataqa cäsi llapantam Satanas engañashqata katsin. Tsëmi mana alli religionkunapa y jatun negociukunapa esclävun kayan (2 Cor. 4:4). Pëkunatam Diosnintsikta sirwiyänampaq yanapëta puëdintsik (Mat. 28:19, 20). Tsëta rurëqa manam fäciltsu, porqui wakin sitiukunachöqa manam Diospita wiyakïta munayantsu y wakinchöqa hasta piñakuyanmi. Tsëmi kënö tapukunantsik: “¿Libri kënïta utilicëta puëdïku Diospa Gobiernumpita maslla yachatsikunäpaq?”.

14, 15. ¿Ima rurëtataq decidiyashqa Jehoväpa mëtsikaq sirweqninkuna? (Rikäri kë yachatsikïpa qallananchö këkaq fötukunata).

 ¹⁴ Alläpam kushitsikuntsik ushakë këllachöna kanqanta musyarnin, mëtsikaq Testïgukuna llapan tiempunkunawan Diospita yachatsikuyaptin (1 Cor. 9:19, 23). Wakinkunaqa markankunachömi yanapakïkäyan, wakinkunanam mas wanayanqan markakunaman ëwakuyashqa. Pasaq pitsqa watakunachöqa 250 milpitapis masmi llapan tiempunkunawan yanapakur qallayashqa. Kananqa 1.100.000 Testïgukunam llapan tiempunkunawan yachatsikuyan. ¡Alläpa shumaqmi libri këninkunata Diosta sirwiyänampaq utilizäyanqanqa! (Sal. 110:3).

¹⁵ ¿Imataq yanapashqa tsënö yanapakuyänampaq? Johnwan Judith rurayanqanta rikärishun. Pëkunaqa 1977 watachömi Precursorkunapaq Escuëlaman ëwayarqan, tsëchömi animayarqan Testïgukuna mana kanqan markakunaman yachatsikoq ëwayänampaq. Johnqa Diospa markanchö maslla yanapakunanrëkurmi atska kutipa trabäjunta cambiarqan. Tiempuwanqa juk naciontam yachatsikoq ëwakuyarqan. Y juk idiömata y juk costumbrita, alalëta y achachëta yachakäyänampaqqa Jehoväman mañakuyanqan y pëman confiakuyanqanmi yanaparqan. ¿Y ima niyantaq Jehoväta tsënö sirwiyanqampita? Tsë watakunaman yarparninmi Johnqa kënö nin: “Mas alli kaq rurëchömi yanapakurqö. Kananqa alläpa kuyakoq teytatanömi Jehoväta rikä. Y Santiägu 4:8 textuchö, ‘Diosman witiyë, y pëqa qamkunamanmi witimunqa’ ninqantam maslla entiendï. Ashinqä shumaq kawakïtam tarirqö”. Pëkunaqa 30 watakunapam atska nacionkunachö yanapakuyashqa.

16. ¿Imanötaq mëtsikaq Testïgukuna libri këninkunata utilizäyashqa?

¹⁶ Wakinkunaqa juk tiempullapam yanapakïta puëdiyan. Peru mëtsikaqmi Diosta adorana wayikunata rurëchö yanapakuyänampaq decidiyashqa. Këllaman pensarishun, Warwickchö Jehoväpa testïgunkunapa principal oficïnanta rurëchöqa 27 milnömi yanapakuyarqan. Tiempunkuna permitinqanmannömi ishkë semänapa, atska killapa, juk watapa o wata maspis yanapakuyashqa. Wakinkunaqa trabäjunkunata jaqirirmi yanapakuyashqa. Libri këninkunata Jehoväta alabayänampaq utilizarninqa, ¡alläpa allitam rurayashqa!

17. ¿Ima bendiciontataq chaskishun libri kënintsikta shumaq utilizarninqa?

¹⁷ Jehoväta reqinqantsikpita y adorarnin libri kanqantsikpita agradecikushun. Decidinqantsikkunawan rikätsikushun libri kënintsikta valoranqantsikta. Mana allipa utilizänantsikpa rantin o perditsinantsikpa rantinqa, Jehoväta sirwinapaq utilizäshun. Tsënö rurarqa, ‘ushakaq këpa esclävun këpitam librashqa kashun y Diospa tsurinkunapa alläpa shumaq libri kënintam chaskishun’ (Rom. 8:21). ¿Manaku tsëqa Jehovä änimanqantsik shumaq bendicion?