Publicacionnintsikkunaqa llapampis grätisllam, itsa tsërëkur wakintsikqa pensashwan Internetman o redes sociales nishqanman copiëkur churëta puëdinqantsikta. Peru tsëta rurarqa päginantsikta Utilizänëkipaq Conträtu * nishqantam respetëkantsiktsu y tsëqa problëmakunamannam chätsikushqa. Tsë conträtuchöqa clärum nimantsik päginantsikpita dibüjukunata, publicacionkunata, cancionkunata, videukunata o maskunatapis jorqarir juk päginakunaman o redes sociales nishqanman churanapaq mana permïsuyoq kanqantsikta. ¿Imanirtaq tsënö ninqanta cäsukïqa alläpa precisan?

Päginantsikchö yarqamoq publicacionkunapa duëñunqa Jehoväpa markanmi y tsëtaqa leypis amparanmi. Diospa contran tikrashqakuna y chikimaqnintsikkunam, kikinkunapa päginankunaman churayashqa Testïgukunata pantatsinampaq yachatsikïkunata. Y tsëman Testïgukuna y wakin nunakunapis yëkuyänanta munarmi publicacionnintsikkunata päginankunaman churayashqa (Sal. 26:4; Prov. 22:5). Wakin nunakunanam publicacionnintsikkuna parlanqan yachatsikïkunata o jw.org päginantsikpa simbolunta propagandankunaman, rantikuyänampaq cösaskunaman, celularkunapaq y tablëtakunapaq aplicacionkunaman churayashqa. Diospa markanqa derëchunta välitsirmi Internetchö päginankunata mana allipa utilizaqkunataqa demandëta puëdin (Prov. 27:12). Peru tsënö utilizäkuyänanta permitishqa o Testïgu kaqpis tsënö utilizäkushqaqa, autoridäkunaqa manam cäsumäshuntsu chikimaqnintsikkuna o emprësakuna publicacionnintsikkunata utilizäyaptin demandashqa.

Publicacionnintsikkunata juk päginakunapita jorqëqa alläpa peligrösum kanman. Jehoväqa  “alli juiciuyoq y markäkïpaq” sirwipakoqllatam churashqa Diospita yachatsimänapaq (Mat. 24:45). Y tsë sirwipakoqqa tsë yachatsikïkunata churamun Jehoväpa testïgunkunapa päginankunallamanmi. Tsë päginakunaqa kayan jw.org^®, tv.pr418.com^® y wol.pr418.com^® päginakunallam, y telëfunupaq y tablëtapaq aplicacionkunaqa JW Language^™, JW Library^® y JW Library Sign Language^™ nishqankunallam kayan. Kë aplicacionkunallam confiakïpaq kayan, porqui manam Satanaspa makinchö këkaq nunakunapa propagandankunawan rakchatashqatsu këkan. Peru sitsun juk päginakunachö këkaq publicacionkunata utilizantsik tsëqa alläpa peligrösum, porqui manam musyantsiktsu imakunata cambiayashqa kayanqanta (Sal. 18:26; 19:8).

Jinamampis, wakinkuna comentayänanta permiteq päginakunaman pipis publicacionnintsikkunata churarninqa, permitikan Diospa contran churakashqakuna y chikimaqnintsikkuna Jehoväpa markampaq mana allita parlayänantam. Wakin cristiänukunaqa hasta tsë päginakunapam discutiyan, y tsënöpam Diosnintsikpa jutinta mana allichö quedatsiyashqa. Comentëta puëdiyänanta permiteq päginakunaqa manam yanapakuntsu nunakunata Diospita shumaq entienditsinapaq, masqa discutimanmi chätsikun (2 Tim. 2:23-25; 1 Tim. 6:3-5). Jina Jehoväpa markampa jutinchö o Jehoväpa Testïgunkunata Pushaqkunapa jutinchömi juk päginakuna yurimushqa. Peru Jehoväpa Testïgunkunata Pushaqkunapaqa manam kikinkunapa päginankuna kayäpuntsu ni redes sociales nishqankunatapis utilizäyantsu wakinkunata parlapäyänampaq.

Jw.org päginaman yëkuyänampaq nunakunata yanaparninqa Diospa Gobiernumpita yachakuyänampaqmi yanapakïkantsik (Mat. 24:14). Nunakunata yachatsinapaq päginantsikkunataqa seguïdum mejorëkäyämun. Y tsë päginantsikta nunakuna utilizäyänantam munantsik. Y Utilizänëkipaq Conträtu ninqannöpis, publicacionkunataqa puëdintsikmi corrëupa mandëta o jw.org päginapita kikin jorqakunampaq direccionta mandëtapis. Diospita yachakïta munaq nunakunata jw päginaman yëkuyänampaq yanaparninqa, Jehovä churanqan “alli juiciuyoq y markäkïpaq” sirwipakoqpita yachatsikïninta chaskiyänampaqmi yanapëkantsik.