1. Efesius 6:10-13 textuchö ninqannö, ¿imanötaq Jehoväqa alläpa kuyamanqantsikta rikätsimantsik?

SATANASWAN demoniunkunaqa alläpam chikïkamantsik, peru Teytantsik Jehoväqa alläpa kuyamarnintsikmi, tsë chikimaqnintsikkunata vencinapaq yanapamantsik. Pëmi willamantsik Satanaswan demoniukunaqa alläpa peligrösu kayanqanta, tsëmi vencinantsikta munar willamantsik imata ruranantsikpaq kaqta (leyi Efesius 6:10-13). Diosnintsikman confiakur y yanapamänata permitirqa, manam Diablu engañamänantsikta permitishuntsu. Y apostol Pablunömi kënö nishun: “Noqantsikwan Dios këkaptinqa, ¿piraq noqantsikpa contrantsikchö këkanqa?” (Rom. 8:31).

2. ¿Imapitataq kë yachatsikïchö yachakushun?

² Noqantsikqa manam musyëta munantsiktsu Satanaswan demoniunkuna imanö kayanqanta. Tsëpa rantinqan Jehoväpitam masta yachakïta munantsik y pëllatam sirwintsik (Sal. 25:5). Tsënö kaptimpis Satanas engañakunqanta mana creikurkunapaqqa, imanö engañakunqantam musyanantsik (2 Cor. 2:11). Satanaswan demoniunkunaqa, tukïnöpam engañakuyan, peru kë yachatsikïchöqa jukllëllatam rikäshun nunakunata imanö engañayanqanta. Jina rikäshunmi, engañakuyanqanta mana creikurkunapaq imakunata ruranantsik precisanqanta.

3, 4. (1) ¿Imanötaq demoniukuna yachëllapa creitsikuyan? (2) ¿Demoniukuna yachëllapa creitsikuyanqanqa mëkunayaqtaq chashqa?

³ Satanaswan demoniunkunaqa, juknöpaqa nunakunata engañayan, espiritismu nishqan rurëkunawan yachëllapa creitsirninmi.  Demoniukuna rurayanqankunata qateq nunakunaqa pensayan, wakin nunakuna rurëta mana puëdiyanqanta pëkuna rurëta puëdiyanqantam. Këllaman pensarishun, wakinkunaqa niyan qoyllurkunata rikärirlla o imatapis rikärirlla imapis pasakunampaq kaqta musyëta puëdiyanqantam. Y wakinkunanam brüjukunaman ëwëkur wanushqa kastankunawan parlëta puëdiyanqanta niyan. Y wakinnam brujerïata rurayan, brüjukunaman jampikoq ëwayan o wakinkunata brüjatsiyan. *

⁴ Demoniukuna rurayanqankunamanqa entëru Patsachö nunakunam creiyan. Tsë asuntupaq Latinoamëricachö y Carïbichö këkaq 18 nacionkunachö nunakunata tapuyaptinmi, cada 100 nunapita 30 mas niyarqan brujerïaman creiyanqanta. Jina cada 100 nunakunapita 30 masmi niyarqan wanushqakunapa almankunawan parlëta puëdiyanqanta. Y Africapa 18 nacionninkunachö tapukuyaptinnam, pullampitapis mas nunakuna niyarqan brujerïaman creiyanqanta. Tsëmi mëchö kawarnimpis, Satanas engañamänataqa permitinantsiktsu, porqui pëqa entëru patsachö nunakunatam engañëkan (Rev. 12:9).

5. ¿Imanötaq Jehoväqa rikan demoniukuna rurayanqankunata?

⁵ Jehoväqa rasumpa kaqllata parlakoq Diosmi (Sal. 31:5). Y alläpam chikin brujerïa rurëkunata y demoniukuna tukïnöpa creitsikuyanqankunata. Tsëmi israelïtakunata kënö nirqan: “Manam qamchö kanmantsu, ollqu o warmi tsurinta ninapa pasatseq, ni adivinaq, ni magia ruraq, ni suerti qateq, ni hechicëru, ni brüjakoq, ni brüjuta tapoq, ni shamoq tiempupaq willakoq ni wanushqakunata tapukoq. Kë llapan ruraqkunataqa alläpam Jehovä chikïkun” (Deut. 18:10-12). Noqantsikqa manam israelïtakunata Jehovä qonqan Leyta cäsunapaq obligädunatsu kantsik, tsënö kaptimpis clärum entiendintsik demoniukuna rurayanqankunataqa kanampis Jehovä chikinqanta (Mal. 3:6).

6. (1) ¿Imanötaq Satanasqa nunakunata mana alliman chätsin? (2) Eclesiastes 9:5 textu ninqannö, wanurishqaqa ¿imataq pasamantsik?

⁶ Jehoväqa clärum nimantsik espiritismuta chikinantsikpaq, porqui musyanmi mana allikunaman Satanas chätsimänapaq kaqta. Këllaman pensarishun, tsë yachëllapa rurayanqankunawanmi Satanasqa nunakunata creitsita munan, juk nuna wanurirqa juk vïdachö kawëkar sïguinqanta (leyi Eclesiastes 9:5 *). Jina tsënö yachëllapa creitsikurninmi nunakunata mantsatsin y Diospita rakikätsin. Porqui Satanasqa munan, tsëman creeq nunakuna demoniukunaman confiakuyänantam y manam Jehoväman confiakuyänantatsu.

7. ¿Jehoväqa imatataq nimantsik?

⁷ Satanaswan demoniunkuna engañakuyanqanta mana creikurkunapaqqa, Jehovämi nimantsik imata ruranantsikpaq kaqta. Juk ishkëllata rikärishun imakunata ruranantsik precisanqanta.

8. (1) ¿Imataq yanapamäshun Satanaswan demoniunkuna engañakuyanqanta mana creinapaq? (2) ¿Imatataq Salmus 146:4 textuqa wanushqakunapaq rikätsikun?

⁸ Diospa palabrantam leyinantsik y yachakunqantsikmanmi alli pensanantsik. Tsëta rurarmi Satanaswan demoniunkuna engañakuyanqantaqa creishuntsu. Diospa Palabranqa alli  afilashqa espädanömi, tsëmi yanapamantsik Satanaspa engäñunkunaman mana ishkinapaq (Efes. 6:17). ¿Manaku Bibliaqa cläru nimantsik wanushqakunawan parlëta manana puëdinqantsikta? (leyi Salmus 146:4 *). Jina, ¿manaku nimantsik ima pasakunampaq kaqtapis Jehovälla musyanqanta? (Is. 45:21; 46:10). Tsëmi Bibliata seguïdu leyirninqa y yachatsikunqanman alli pensarninqa, Satanaswan demoniunkuna rurayanqanta chikishun, y manam imanöpapis creishuntsu.

9. ¿Imakunatataq evitanantsik?

⁹ Demoniukuna engañakuyanqan creenciakunata o espiritismutaqa evitashun. Jehoväpa testïgunkunaqa manam brüjukunaman qatitsikoq ëwantsiktsu y ni manam brüjukunaman ëwëkur wanushqa kastantsikkunawan parlantsiktsu. Pasaq kaq yachatsikïchö rikanqantsiknöpis, manam nuna wanuriptin wakin nunakuna rurayanqan costumbrikunata qatintsiktsu, porqui tsë costumbrikunaqa tsë wanushqa nuna juk vïdachö kawar sïguikanqantam rikätsikun. Ni manam shamoq tiempuchö ima pasakunampaq kaqta musyëta munar horoscuputa leyintsiktsu o brüjukunata tapukuntsiktsu (Is. 8:19). Noqantsikqa tsënö costumbrikunaman ni creenciakunamanqa manam ni ichikllapis mëtikuntsiktsu, porqui Satanaswan y demoniunkunawan parlëmanmi chäratsimashwan. Tsë costumbrikuna y creenciakunaqa alläpa peligrösum kayan.

10, 11. (1) ¿Ëfesuchö wakin nunakunaqa, ¿imatataq rurayarqan Biblia yachatsikunqanta musyarirqa? (2) 1 Corintius 10:21 textu ninqannö, ¿imatataq Ëfesu markachö nunakunapita yachakuntsik y imanötaq tsëta rurashwan?

¹⁰ Espiritismuta rikätsikoq cösaskunataqa ama imatapis katsishuntsu. Apostolkuna kawayanqan witsan Ëfesu markachö wakin nunakunaqa brujerïa cösaskunatam creiyaq y rurayaq. Peru, ¿imatataq rurayarqan Biblia yachatsikunqanta musyarirqa? Diospa Palabranmi kënö willamantsik: “Magia ruraqkunam  librunkunata ëlluyarqan, y llapankunapa nöpanchömi kayëkuyarqan” (Hëch. 19:19). Rikanqantsiknöpis pëkunaqa Satanastawan demoniunkunatam vencita munayarqan. Tsëmi tsë librukuna alläpa chaniyoq këkaptimpis kayëkuyarqan. Porqui Jehoväta kushitsitam munayarqan, tsëmi tsë librukunataqa ni qarakuyarqantsu ni rantikuyarqantsu.

¹¹ Y, ¿noqantsikqa imatataq rurashwan, suertipaq niyanqan cösaskunata o mana alli espïritukunapita tsapäkoq niyanqan cösaskunata katsirqa? Ëfesu markachö nunakunanömi ushakätsinantsik. Porqui tsëkunaqa engañakuyänampaq demoniukuna utilizäyanqan cösaskunam kayan (leyi 1 Corintius 10:21).

12. ¿Ima tapukïkunata rurakunantsiktaq alläpa precisan?

¹² Ama llutallaqa imatapis leyishuntsu, rikäshuntsu ni wiyashuntsu. Tsëmi kënö tapukunantsik: “¿Leyinqä librukuna y Internetchö rikanqäkunaqa, demoniukuna rurayanqankunapitaku parlan? ¿Y wiyanqä müsicakuna, rikanqä pelïculakuna o televisionchö rikanqä progrämakuna y pukllanqä videu juëgukunaqa demoniukuna mana creipaqtanö rurayanqankunataku rikätsikun? ¿Vampïrukunata, sombikunata o imatapis espantëpaqkunata rikätsikoq pelïculakunataku rikä?”. Peru wakin cuentukunaqa manam espiritismu rurëkunata rikätsikuntsu. Tsënö kaptimpis alleqmi cuidakunantsik, imakunata wiyëkanqantsikta, rikëkanqantsikta y leyikanqantsikta, porqui tsëmi yanapamäshun Diosnintsik chikinqan rurëkunata mana ruranapaq. Masqa munantsik limpiu concienciayoqta Diosnintsik rikämänatam (Hëch. 24:16). *

13. ¿Imakunatataq cuentakunantsiktsu?

 ¹³ Demoniukunapaq cuentukunata ama cuentakushuntsu. Jesuspa ejempluntam qatinantsik (1 Pëd. 2:21). Pëqa ciëluchö këkarnin musyarqanmi, Satanaswan demoniunkunaqa imëkakunata rurayanqanta. Peru Patsaman shamurqa, manam pëkuna rurayanqankunapitatsu cuentakur purirqan. Sinöqa nunakuna Jehoväta reqiyänantam munarqan, manam Satanasta reqiyänantatsu. Y noqantsikpis Jesusnömi rasumpa kaqllata parlakunqantsikwan kushishqa kanqantsikta rikätsikunantsik, y manam demoniukuna rurayanqankunatatsu cuentakur purinantsik (Sal. 45:1).

14, 15. (1) ¿Imanirtaq Satanastawan demoniunkunataqa mantsanantsiktsu? (2) ¿Imanötaq musyantsik sirweqninkunata Jehovä cuidëkanqanta?

¹⁴ Ama Satanastawan demoniunkunata mantsashuntsu. Kë mana alli tiempuchöqa, imëka mana allipis rasllam pasëkamashwan, itsa accidentakurishwan, fuertipa qeshyarishwan o hasta wanurishwampis. Peru tsëkunapa pasarqa manam demoniukuna mana allita rurëkämanqantsiktatsu pensanantsik, porqui Bibliaqa clärum nimantsik mana pensanqantsik hörakuna imapis pasëkamanqantsikta (Ecl. 9:11). Jina yarpänantsikmi Satanaspita y demoniukunapitaqa, Jehovä mas puëdeq kanqanta. Tsëmi Jobta Satanas wanutsinanta permitirqantsu (Job 2:6). Jina Moisespa tiempunchöpis, Egiptuchö brüjukunapita mas poderösu kanqantam Jehoväqa rikätsikurqan (Ex. 8:18; 9:11). Y tsëpita tiempuwannam, Jehoväqa Jesusta poderta qoykurqan Satanasta y demoniunkunata ciëlupita Patsaman qarqaramunampaq. Y ichik tiempullachönam Jesusqa alläpa fondu uchkuman Satanasta y demoniunkunata jitarkunqa, y mananam nunakunata imanëta puëdiyanqanatsu (Rev. 12:9; 20:2, 3).

¹⁵ Jehoväqa kanampis sirweqninkunata cuidëkanmi. Tsënöpam entëru patsachö Diosnintsikpita rasumpa kaqta yachatsikïta puëdintsik (Mat. 28:19, 20). Y tsëta rurarninmi Diablu engañakoq kanqanta cläru rikätsikuntsik. Tsëta rurashqaqa, Diabluqa mëraq munan yachatsikunantsikta michämënintsikta, peru manam puëdintsu. Tsëmi Satanastawan demoniunkunataqa mantsanantsiktsu. Porqui Jehoväqa “entëru patsapam rikarëkan pëllata llapan shonqunkunawan kuyaqkunata kallpanwan yanapanampaq” (2 Crön. 16:9). Jehovä Diosnintsikta llapan shonquntsikwan sirwishqaqa, manam  Satanaswan demoniunkunaqa imanamënintsikta puëdiyanqatsu.

16, 17. ¿Ima pasakunqantaq rikätsikun Satanasta y demoniunkunata vencinantsikpaqqa valienti kanantsik precisanqanta? Willakaramï.

¹⁶ Satanasta y demoniukunata vencinapaqqa valientim kanantsik. Porqui amïguntsikkuna y familiantsikkuna demoniukuna creitsikuyanqan costumbrikunata ruranantsikpaq nimashqaqa, itsa tsarakunantsikpaq fäciltsu kanqa. Peru valienti kaqkunataqa Jehoväqa bendicinmi. Rikärishun Ghäna nacionpita Ërica jutiyoq panintsikta pasanqanta. Bibliapita yachakur qallarqa 21 watayoqmi karqan. Papäninqa brüjum karqan, tsëmi familiankunaqa papänimpa diosninkunapaq rurayanqan mikïkunata mikunanta y mas costumbrinkunachö participänanta munayaq. Tsëta rurëta Ërica mana munaptinmi familiankunaqa niyarqan dioskunapa contran churakëkanqanta, y tsë dioskunaqa llapan familiata tukï qeshyëwan castiganampaq kaqta.

¹⁷ Tsë costumbrikunata ruranampaqmi pasëpa obligayarqan, peru Ëricaqa manam imanöpapis munarqantsu. Tsënöpam hasta wayipitapis ëwakurqan. Peru Testïgukunam wayinkunachö quedatsiyarqan y shumaqmi tratayarqan. Tsënömi Jehoväqa bendicïkarqan (Mar. 10:29, 30). Familiankuna alläpa despreciëkäyaptin y cösasninkunata kayëkäyaptimpis, Ëricaqa manam Jehoväta dejarqantsu, y bautizakurirqanmi. Kananqa precursöra regularmi, y manam demoniukunata mantsantsu. Familiampaqmi kënö nin: “Llapan junaqkunam Diosnintsikman mañakü, pëpita yachakuyänampaq y sirweqnin tikrar rasumpa libri kayänampaq”.

18. Jehovä Diosnintsikman confiakurqa, ¿ima bendicionkunatataq chaskishun?

¹⁸ Manam llapantsiktsu imëka problëmakunapa pasashun. Peru imam sïqa, Satanastawan demoniunkunaqa llapantsiktam engañamënintsikta munayanqa. Tsëmi llapantsik alli tsarakunantsik y Jehoväman confiakunantsik. Tsëta rurarqa mëtsika bendicionkunatam chaskishun. Por ejemplu, manam Satanas engañakunqanta creishuntsu, ni manam demoniukunata mantsarnin Diosnintsikta sirwita dejashuntsu. Y tsëpitapis masqa, Jehovä Diosnintsikwanmi mas amïgu tikrashun. Tsëmi Diosnintsikpa Palabran kënö nimantsik: “Diospa makinman churakäyë; peru Diablupa contran churakäyë, y pëqa escaparmi qamkunapita ëwakunqa. Diosman witiyë, y pëqa qamkunamanmi witimunqa” (Sant. 4:7, 8).