1. ¿Imatatan ruranantsik piwampis amïgu këta munarqa?

PIWAMPIS amïgu këta munarqa imanö kawanqampita y imanö sientikunqampitam maslla parlakunantsik. Tsënö kaptinmi Jesuswan amïgu kë fäcil mana kanqanta pensashwan. Imanir tsënö pensanqantsikta rikärishun.

2. ¿Imanirtan Jesuspa amïgun këqa fäciltsu kanman?

² Jukqa, Jesusta kikintsik mana rikanqantsikmi. Jesus kawanqan witsanqa manam llapan wawqi panikunatsu rikäyarqan. Tsënö kashqa kaptinmi apostol Pëdruqa pëkunata kënö nirqan: “Pëta ni imëpis mana rikashqa këkarpis, qamkunaqa kuyayankim. Kanan mana rikëkarpis, pëman markäkuyanqëkitam rikätsikuyanki” (1 Pëd. 1:8). Awmi, Jesusta mana rikarpis amïgun këtaqa puëdintsikmi.

3. ¿Imanir mastan Jesuspa amïgun këqa fäciltsu?

³ Ishkëqa, Jesuswan parlëta mana puëdinqantsikmi. Mañakurninqa Jehovätam parlapantsik. Jesuspa jutinchö mañakurpis manam Jesustatsu parlapëkantsik. Awmi, Jesusqa manam pëman mañakunata munantsu, pëqa Jehoväman mañakunatam munan (Mat. 4:10). Tsënö kaptimpis Jesus kuyanqantsiktaqa rikätsikuyta puëdintsikmi.

4. (1) ¿Imanir mastan Jesuspa amïgun këqa fäciltsu? (2) ¿Imatatan kë yachatsikuychö yachakushun?

 ⁴ Kimaqa, Jesus ciëluchö kaptinmi pëwan rikänakuytaqa puëdintsiktsu. Pëta mana rikarnimpis, imanö kanqantaqa yachakuyta puëdintsikmi. Kë yachatsikuychömi yachakushun, imanö Jesuswan amïgu kanapaq. Tsëpaqqa puntata rikärishun, imanir Jesuswan alli amïgu kanapaq kaqta.

5. Jesuspa amïgun kanapaqqa, ¿imatatan ruranantsik? (Rikäri “ Jehoväwan amïgu këta munarqa Jesuswanmi amïgu kanantsik” y “ ¿Imanötan Jesusta rikashwan?” neqta).

⁵ Jehovä Diosnintsik kuyamänapaqqa, Jesuswanmi alli amïgu kanantsik. Imanir tsënö ninqantsikta rikärishun. Jesusmi qateqninkunata kënö nirqan: “Kikin Teytam kuyayäshunki, porqui qamkunaqa noqatam kuyayämarqunki” (Juan 16:27). Y kënöpis nirqanmi: “Mana noqawanqa, manam ni pipis Teytaman shamïta puëdintsu” (Juan 14:6). Jehoväpa amïgun kanapaqqa, Jesuspa amïgunran puntataqa kanantsik. Tsëta musyatsikunampaqmi Jesusqa “üshakunapaq punkum kä” nirqan (Juan 10:7). Jesus Patsachö kawanqan witsanqa Teytampa imanö kënintam rikätsikurqan. Tsëmi qateqninkunata kënö nirqan: “Noqata rikämashqa kaqqa, Teytatapis rikashqam” (Juan 14:9). Awmi, Jehoväta maslla reqinapaqqa Jesustam reqinantsik. Jesuspita mas yachakurqa masmi pëta y Teyta Jehovätapis kuyashun.

6. ¿Imanir mastan Jesuspa amïgun kanantsik?

 ⁶ Mañakuynintsikta Jehovä wiyamänapaqqa Jesuspa amïgunmi kanantsik. Këqa manam “Jesuspa jutinchö” mañakuyllatsu. Jehovä wiyamänapaqqa allim musyanantsik imanir Jesuspa jutinchö mañakunqantsikta. Tsëtam Jesusqa apostolninkunata kënö nirqan: “Jutïchö qamkuna mañakuyaptikiqa, tsëtam rurashaq” (Juan 14:13). Jehovämi mañakunqantsiktaqa wiyan y tsëmannömi wamran Jesuswan yanapamantsik (Mat. 28:18). Tsëpaqqa Jesus kënö ninqantam cäsukunantsik: “Qamkunapa contrëkikuna mana allikunata ruraq nunakunata perdonayaptikiqa, ciëluchö këkaq Teytëkikunapis mana alli rurënikikunapita perdonayäshunkim; peru qamkunapa contrëkikuna mana allikunata ruraq nunakunata mana perdonayaptikiqa, Teytëkikunapis mana allita rurayanqëkikunapita manam perdonayäshunkitsu” (Mat. 6:14, 15). Awmi, Jehoväwan Jesusnöllam noqantsikpis perdonakoq kanantsik.

7. Mana wanushpa kawanapaqqa, ¿imatatan ruranantsik?

⁷ Jesuspa amïgun kaqkunallam mana wanushpa kawëtaqa chaskiyanqa. Tsënöqa kanqa, “amïgunkunarëkur” Jesus wanunqampitam (Juan 15:13). Jesus manaraq shamuptin Jehoväta sirweq nunakunapis, Jesuspa amïgun kayanampaqmi puntataqa pëpita yachakuyänan. Tsënö nunakunaqa kayan Abrahan, Sära, Moises y Rahabmi. Pëkunapis mana wanushpa kawayänampaqqa Jesuspa amïgunran kayänan (Juan 17:3; Hëch. 24:15; Heb. 11:8-12, 24-26, 31).

8, 9. Juan 15:4, 5 Bibliachö ninqannö, ¿imatatan rurashun Jesuswan amïgu kanqantsikrëkur? Y ¿imanirtan Jesuswanqa juknölla kanantsik?

⁸ Noqantsikqa Jesuswanmi Diospa Gobiernumpita yachatsikur këkantsik. Kikin Jesusmi Patsachö kanqan witsan Teytampita yachatsikurqan. Ciëluta kutiriptinnam, Jehoväqa kë llapan rurëta cargunman churashqa. Pëqa puëdinqantsikmannö Teytampita yachatsikushqaqa kushikunmi. Awmi, noqantsikqa yachatsikuyta puëdintsik Jehoväwan Jesus yanapamashqallam (leyi Juan 15:4, 5).

⁹ Jesusta kuyanapaqmi Bibliaqa yachatsimantsik, tsënöpa Jehoväpa amïgun kanapaq. Tsëmi, Jesuspa amïgun kanapaq yachakurishun.

10. ¿Imanötan Jesuswan amïgu këta puëdintsik?

¹⁰ Juk, Jesusta reqishun. Tsëpaqqa leyishun Mateu, Marcus, Lücas y Juan librukunata. Leyinqantsikchöqa kuyakuywan nunakunata rikanqanmanmi pensanantsik, tsënö rurarqa masmi Jesusta kuyashun y respetashun. Jesusqa manam qateqninkunata mana allipatsu tratarqan. Tsëpa rantinqa, amïgunkunatanömi ima pensanqanta y sientinqanta musyatsirqan (Juan 15:15). Pëkunawanqa llakir y waqarpis kayarqanmi (Juan 11:32-36). Y chikeqnin nunakunapis musyayarqanmi, pëta creeq nunakunawan amïgu kayanqanta (Mat. 11:19).  Noqantsikpis Jesusnö wakinkunata shumaq tratashqaqa, mas alli y mas kushishqam pëkunawan juntu Cristuta respetakur kawakushun.

11. ¿Imanö mastan Jesuswan amïgu këta puëdintsik? Y ¿imanirtan tsënö ruranantsik?

¹¹ Ishkë, Jesusnö rurashun y pensashun. Jesusta mas reqinqantsikmannömi, pënö pensashun y amïgun këtapis puëdishun (1 Cor. 2:16). Jesusqa kikimpitapis masqa, nunakuna alli kayänantam munarqan (Mat. 20:28; Rom. 15:1-3). Ima niyaptimpis Jesusqa manam rastsu piñakoq, tsëmi pëkuna alli kayänanta munar jutsankunata perdonaq (Juan 1:46, 47). Jesusqa manam nunakuna imanö kashqa kayanqanta pensartsu mana kaqpaq churaq (1 Tim. 1:12-14). Pë ruranqannö ruranapaqmi, kënö nimantsik: “Këta rurayaptikim llapankuna musyayanqa qateqnïkuna kayanqëkita, jukniki juknikikuna kuyanakuyaptiki” (Juan 13:35). Tsëmi tapukunantsik: “Jesus ruranqannöku, ¿wawqi panikunawan alli kanäpaq kallpachakü?”.

12. ¿Imanö y imata rurartan Jesuswan amïgu këta puëdintsik?

¹² Kima, Jesuswan mandakamoq wawqi panikunata yanapashun. Tsëta rurashqaqa kikin Jesusta yanapëkaq cuentam kanqa (Mat. 25:34-40). Jesustawan ciëlupaq akrashqakunataqa yanapantsik, bautizakuyänampaq Diospita yachatsirninmi (Mat. 28:19, 20; Hëch. 10:42). Patsachö kawaqpaq kaq wawqi panikunapa yanapakuyninwanran, ciëluta ëwaqkunaqa Diospita yachatsikur ushayanqa (Juan 10:16). Jesuswan mandakamoq wawqi panikunata kuyanqantsikqa rikakunqa, Diospita yachatsikunqantsikchömi.

13. Lücas 16:9 Jesus ninqantaqa, ¿imanötan rurëta puëdintsik?

¹³ Juknöpaqa, Jehoväpawan Jesuspa amïgun kashun qellënintsikwan yanapakurmi (leyi Lücas 16:9). Qellënintsikwan yanapakuytaqa puëdintsik Diospita yachatsikuy më tsëman chänampaq, Diospita yachakunqantsik wayita rurar o altsar y ima mana allikuna pasakuptimpis yanapakurmi. Y Diospa wayinchö juntakarpis, qellënintsikta churakur y wawqi panintsikkunata yanaparmi (Prov. 19:17). Tsënömi Jesuswan mandakamoq wawqi panikunata yanapantsik.

14. Efesius 4:15, 16 Bibliachö ninqannö, ¿imanö mastan Jesuswan amïgu këta puëdintsik?

¹⁴ Chusku, carguyoq wawqikuna niyämunqanchö yanapakushun. Jesuswan mas alli amïguqa kashun, carguyoq wawqikunata yanaparmi (leyi Efesius 4:15, 16). Tsënö kanampaqmi, Testïgukunata pushaq wawqikunaqa yanapakuykäyämun. Kanan witsanqa wakin Diospa wayinchö ichiklla juntakäyaptinmi, ishkë wayichö juntakäyänampa rantin jukllëllamanna juntakäyänampaq niyashqa. Tsëqa manam fäciltsu kashqa wakin wawqi panikuna yachakäyänampaq. Peru tsënö rurayanqanmi alläpa mana gastakuyänampaq yanapakushqa. Jesusqa kushikunmi, carguyoq wawqikunata llapantsik yanapashqa.

15. Jesuswan amïgu kanqantsikqa, ¿imanötan shamoq tiempuchö kanqa?

¹⁵ Ciëluta ëwaq cristiänukunaqa Jesuswan juntum mandakayämunqa. Pëkunaqa Jesusta rikäyanqa, parlapäyanqa y imëpis juntum kayanqa (Juan 14:2, 3). Kë Patsachö kawaqpaq kaqkunatapis Jesusqa kuyakuywanmi cuidanqa. Rikëta mana puëdirpis kuyayanqam, y Jehovätawan Jesusta cäsukurqa mas alli amïgum pëkunawan kayanqa (Is. 9:6, 7).

16. Jesuspa amïgun karninqa, ¿ima bendicionkunatatan chaskishun?

¹⁶ Jesuspa amïgun karninqa atska bendicionkunatam chaskintsik. Tsëtaqa rikantsik, kanan witsan kuyakuywan yanapamanqantsikchömi. Tsëpitapis masqa Teytan Jehoväwan amïgu kanapaqmi Jesusqa yanapamantsik. Awmi, Jesuswan amïgu këqa kushikuypaqmi.