1. ¿Imatatan llapantsik ruranantsik?

QESHYAPÄKUR y pishiparqa manachi llallinakur ëqita puëdishwantsu. Tsënö kaptimpis, apostol Pabluqa llapantsik llallinakur ëqikanqantsiktam nirqan (Heb. 12:1). Jehoväpa munënin cumplikanqanyaqmi, jövin o edäna karpis llapantsik tsarakur sïguinantsik (Mat. 24:13).

2. 2 Timoteu 4:7, 8 Bibliachö ninqannö, ¿imatatan Pabluqa wanunqanyaq rurarqan?

² Pabluqa wanunqanyaqmi llallinakur ëqirqan, tsëmi tsënö ruranapaq parlarqan (leyi 2 Timoteu 4:7, 8). ¿Imapaqtan Pabluqa parlëkarqan?

3. ¿Imanö ëqipaqtan Pabluqa parlëkarqan?

³ Apostol Pabluqa Diospita yachatsikoq, Grecia nacionchö pukllakunata rurayanqanwanmi (1 Cor. 9:25-27; 2 Tim. 2:5). Atska kutim wawqi panikunapa kawënintaqa igualatsirqan, llallinakur ëqitawan (1 Cor. 9:24; Gäl. 2:2; Filip. 2:16). Juk nuna tsënö kanampaqqa, Jehovällapaqna kawanampaq änikurmi bautizakunan (1 Pëd. 3:21). Jehovä änikunqan kawëman chanqanyaqmi, juk cristiänuqa ëqir sïguinan (Mat. 25:31-34, 46; 2 Tim. 4:8).

4. ¿Imakunatatan yachakushun?

⁴ Jehovä munanqannö kawëman y ganëta munar llallinakur ëqiqa igualnöllam kayan. Juk, kawëman chätsikoq nänipam ëwanantsik. Ishkë, mana wanushpa kawëta tarinqantsikyaqmi ëqinantsik. Y kima,  mana allikuna pasamashqapis ëqir sïguishun.

5. ¿Imatatan ruranantsik mana wanushpa kawanapaq?

⁵ Imatapis ganayänampaq ëqeqkunaqa, mëpa ëwayänampaq niyanqanllapam ëqiyan. Tsënöllam, mana wanushpa kawanapaqqa, Jehoväta cäsukur y munanqannö kawanantsik (Hëch. 20:24; 1 Pëd. 2:21). Peru Diabluwan qateqninkunaqa “pëkunawan juntu” mana allita rurar kawakunatam munayan (1 Pëd. 4:4). Pëkunaqa pantashqa këkarpis, mas alli kawakuyanqantam creitsimënintsikta munayan (2 Pëd. 2:19).

6. ¿Imatatan Brian pasanqampita yachakuntsik?

⁶ Diablu munanqannö kawaq nunakunaqa, ichikllachönam musyariyanqa mana alli nänipa ëwëkäyanqanta (Rom. 6:16). Wawqi Brian pasanqanta rikärishun. Wamra kanqan witsanqa teytankunam Dios munanqannö kawanampaq yachatsiyarqan. Peru pëqa winanqanmannömi, Diablu munanqannö kawakur qallëkurqan. Tsëtam wawqi Brian willakun: “Munanqänö kawakuy mana alli kanqantaqa manam ichikllapis pensarqätsu”. Pëqa machakur y lluta kawakurmi qallëkurqan. Tsëtam willakun: “Watakuna pasanqanmannömi tukuyläya drögakunaman ishkirqä. Y drögata rantikurmi qallëkurqä”. Tiempuwannam teytankuna yachatsiyanqanta yarparnin Jehovä munanqannö kawëta munarqan. Tsëpaqmi, imanö kawanqanta dejëkur 2001 watachö bautizakurqan. Kananqa kushishqam kawëman chätsikoq nänipa ëwëkan. *

7. Mateu 7:13, 14 ishkë nänipaq parlarqa, ¿imatatan yachatsimantsik?

⁷ Kawëman chätsikoq nänitam akranantsik. Diabluqa manam munantsu “kawëman chätsikoq”nänipa ëwanata, pëqa munan anchu nänipa ëwanatam. Tsë näniqa “ushakëmanmi chätsikun” (leyi Mateu 7:13, 14). Kawëman chätsikoq nänipa ëwanapaqqa Jehovä nimanqantsiktam cäsukunantsik.

8. Imatapis ganayänampaq ëqeqkuna ishkirqa, ¿imatatan rurayan?

⁸ Imatapis ganayänampaq ëqeqkunaqa, ëwayanqan nänitam alli rikäyan. Tsënö karpis kikinkuna pura tsaktanakur ishkirpis, sharkurmi ëqir sïguiyan. Pëkunaqa ganëta munarmi, ima ishkitsinqanmanqa yarparäyantsu.

9. Mana allikunaman ishkirqa, ¿imatatan ruranantsik?

⁹ Kawëman chätsikoq nänipa ëwarqa, mana allita rurarnin o wawqi panikuna mana allita rurayaptinmi ishkirishwan. Tsënö wawqi panintsikkunawan kanapaq kaqtam Pabluqa nimarqantsik. Tsëmi höraqa llapantsik imallachöpis llakitsinakuntsik. Tsënö pasakuptinqa, llapantsik kawëman chätsikoq nänipa ëwaqkuna jutsa ruraq kanqantsikta yarpäshun (Col. 3:13). Noqantsikqa ama ishkinqantsikman yarparäkushuntsu, tsëpa rantinqa mana wanushpa kawëman ëwar sïguishun. Tsënö rurarqa, wawqi panintsikkunawan juntum mana wanushpa kawëta tarishun.

10. Wawqi panintsikkunata mana ishkitsinapaqqa, ¿imatatan ruranantsik?

¹⁰ Noqantsikqa manam wawqi panintsikkuna ishkitsitaqa munantsiktsu, tsëmi munanqantsikllamanqa yarparäkushwantsu (Rom. 14:13, 19-21; 1 Cor. 8:9, 13). Noqantsikqa manam imatapis ganëta munaqkunanötsu ëqikantsik. Pëkunaqa kikinkunapura gananakurmi, jukkunata ima pasaptimpis llallirir ëqir sïguiyan. Peru noqantsikqa manam wawqi panintsikkunawan gananakuntsiktsu (Gäl. 5:26; 6:4). Noqantsikqa mana wanushpa kawëman chätsikoq nänipam, llapantsik yanapanakur ëwëta munantsik. Tsëmi Pablu ninqannö, llapantsik kallpachakuntsik ‘wakinkunapa bienninkuna’ imatapis ruranapaq (Filip. 2:4).

11. ¿Imamantan gananakur ëqeqkunaqa yarparäkuyan?

 ¹¹ Imatapis ganëta munar ëqeqkunaqa, ganayänampaq kaqllamanmi yarparäkuyan. Tsëta rikëta mana puëdirpis, ëqiyänampaq kaq höraman y ganarishqana kayanqanmanmi yarparäkuyan.

12. ¿Imatatan Jehoväqa änimantsik?

¹² Jehoväqa kuyamarnintsikmi ciëluchö kar o kë Patsachö mana wanushpa kawëta chaskinapaq kaqta nimarquntsik. Bibliallachömi mëchö y imanö kawanapaq kaqtaqa nimantsik. Tsëmi Jehovä änimanqantsik kawëtaqa kushishqa shuyarantsik. Awmi, Jehovä änimanqantsikman yarparanqantsikmi ima ishkitsimashqapis mana qelanänapaq yanapamäshun.

13. Gananakur ëqeqkunapitaqa, ¿pitan noqantsiktaqa yanapamantsik?

¹³ Grecia nacionchö gananakur ëqeqkunaqa nanapäkur y pishiparpis sïguiyaqmi. Pëkunaqa tsënö rurayänampaqqa alli unëpam yachakuyaq. Tsë ëqeqkunatanömi noqantsiktapis mana wanushpa kawëman chänapaq yachatsimantsik. Noqantsikqa Jehovä yanapamashqam kawëman chätsikoq nänipa mana qelanashpa ëwantsik. Awmi, Jehovällam mas alli yanapakoqqa (1 Pëd. 5:10).

14. ¿Imanötan 2 Corintius 12:9, 10 ninqan yanapamantsik?

¹⁴ Apostol Pabluqa imëka mana allikunapam pasarqan. Pëqa mana alli tratayanqanta, wanutsita munar qatikachäyanqanta y kallpannaq sientikunqantaqa kasha tukseqnö kanqantam nirqan (2 Cor. 12:7). Qelanäkurinampa rantinmi, pëqa kallpachakurqan Jehovä munanqannö kawanampaq (leyi 2 Corintius 12:9, 10). Tsënö kaptinmi Jehoväqa yanaparqan.

15. ¿Imanötan Pablu ruranqan yanapamäshun?

¹⁵ Apostol Pablutanömi, Diospita yachatsikunqantsikrëkur noqantsiktapis chikimarnintsik qatikachämashwan. Y qeshyapäkurmi ima rurëtapis pishipashwan. Tsënö pasamashqam, Pabluta kuyarnin Jehovä yanapanqannölla noqantsiktapis yanapamäshun.

16. Qeshyapäkoq wawqi panikunaqa, ¿ima rurëtatan puëdiyan?

¹⁶ Wakin wawqi panintsikkunaqa qeshyapäkuyan, rikäyannatsu y purita puëdiyannatsu. Pëkunaqa, ¿mana wanushpa kawëman chäyanqatsuraq? Awmi. Atskaq edäna y qeshyapäkoq wawqi panikunam, Jehovä yanapaptin kawëman chätsikoq nänipa ëwëkäyan. Pëkunaqa reunionkunata wiyayan celularpam y wakinnam Internetpa rikäyan. Y Diospitaqa familiankunata, doctorkunata y watukaqninkunatam yachatsiyan.

17. Qeshyapäkoq wawqi panikunataqa, ¿imanötan Jehovä rikan?

¹⁷ Qeshyapäkurnin o ima mana alli pasamashqapis ama pensashuntsu kawëman chätsikoq nänipa mana ëwëta puëdinqantsikta. Kënö pensanqantsik höram yarpänantsik, Jehovällata sirwinapaq kallpachakunqantsikpita y pëman markäkunqatsikpita o yärakunqantsikpita kuyamanqantsikta  (Sal. 9:10). Qeshyapäkoq panintsikmi kënö willakun: “Qeshyapäkurmi unënöqa Diospita yachatsikuyta puëdïnatsu. Tsënö karpis musyämi yachatsikunäpaq kallpachakunqäpita Jehovä kushikunqanta”. Noqantsiktapis, Jehoväqa yanapamäshunmi. Tsëpaqmi Pablu ninqan yanapamantsik: ‘Kushikümi Cristurëkur pishipaq këpita [...]. Pishipashqa kanqä höram alläpa kallpayoq tikrarï’ (2 Cor. 12:10).

18. Wakin wawqi panikunaqa, ¿ima mana allikunapatan pasayan?

¹⁸ Kawëman chätsikoq nänipa ëwëqa wakimpaqqa manam fäciltsu. Wakin wawqi panikuna mana alli kayanqantaqa manam rikëta puëdintsiktsu, pëkunaqa imapaqpis llakikurllam kakuyan. Pipapis makin pakishqa o purita mana puëdiptinqa rasllam yanaparita puëdintsik. Peru imapaqpis llakikurlla kakoq wawqi panikuna imanö kayanqantaqa, manam raslla musyëta puëdintsiktsu. Tullun pakishqa nanatsikoqnöran, tsë wawqi panikunapa nanatsikuyninkunaqa. Tsënö kayanqanta mana rikarmi rasllaqa yanaparita puëdintsiktsu.

19. Mefiböset-ta pasanqankunapita, ¿imatatan yachakuntsik?

¹⁹ Ima pasamanqantsik y imanö sientikunqantsik llakitsimashqaqa, Mefiböset-ta pasanqanmi yanapamäshun (2 Sam. 4:4). Pëqa purita mana puëdikarpis, rey David mana alli tratanqantam aguantarqan. Mefibösetqa manam tsënö pasanqanman pensartsu llakikur kakurqan. Tsëpa rantinqa, David yanapanqanman yarpanqanmi kushishqa kanampaq yanaparqan (2 Sam. 9:6-10). Tsëmi David mana alli tratëkaptimpis Mefibösetqa pëwan nï Jehoväwan piñakurqantsu. Tsëpa rantinqa, puëdinqanmannömi Davidta yanaparqan (2 Sam. 16:1-4; 19:24-30). Tsëchi noqantsikta yanapamänapaq, Jehoväqa Palabran Bibliaman Mefiböset ruranqankunata churatsirqan (Rom. 15:4).

20. Imapaqpis llakikur kakoqkunataqa, ¿imanötan Jehovä yanapan?

²⁰ Imapaqpis llakikurlla kakoq wawqi panikunapaqqa, piwampis parlëqa manam fäciltsu. Pëkunaqa manam munayantsu atskaq nunakunawan këtaqa, tsënö kaptimpis reunionkunaman,  asamblëakunaman y Diospita yachatsikoqpis ëwayanmi. Tsënö pasamashqaqa ama mantsakushuntsu, manam noqantsikllatatsu tsënöqa pasamantsik. Puëdinqantsikmannö y mana qelanashpa rurashqaqa, Jehoväqa kushishqam bendicimäshun * (Filip. 4:6, 7; 1 Pëd. 5:7). Jehoväqa kushikunmi qeshyapäkur y imapaqpis llakikur pëta sirwinapaq kallpachakunqantsikpita.

21. Jehovä yanapamashqaqa, ¿imatatan tarishun?

²¹ Yachakurinqantsiknö, imatapis ganëta munar ëqiwan Pablu ninqanqa jukläyam. Grecia nacionchö gananakur ëqeqkunachöqa jukllaqllam ganëta puëdeq. Peru mana wanushpa kawëman chätsikoq nänipaqa, wawqi panintsikkunawan juntum ëwëta puëdintsik (Juan 3:16). Imatapis ganëta munar ëqeqkunaqa, seguïdum kallpachakuyaq ganayänampaq. Peru noqantsikqa qeshyapäkur y ima mana alli pasamashqapis tsarakurmi sïguintsik (2 Cor. 4:16). Jehovä yanapamashqallam kawëman chätsikoq nänipaqa chanqantsikyaq ëwashun.