1. ¿Imatatan Jehoväqa kuyanqan nunakunachö rikan?

¡ALLÄPAM kushikuntsik, ‘kuyashqan nunakunata rikarnin Teyta Dios kushikunqampita’! (Sal. 149:4). Pëqa imanö kanqantsikta y imata rurëta puëdinqantsiktam musyan, y Pëwan amïgu kanatam permitimantsik. Pëta sirwir sïguishqaqa manam dejamäshuntsu (Juan 6:44).

2. ¿Imanirtan wakin wawqi panikunaqa Jehovä kuyanqanta creiyantsu?

² Itsa pillapis kënö niman: “Noqaqa musyämi sirweqninkunata Jehovä kuyanqanta, peru ¿imanötan noqata kuyamanqantaqa musyä?”. ¿Imanirtan wakin wawqi panikunaqa tsënö tapukuyan? Wamra këninchö imëka mana allikunapa pasaq Oksäna * jutiyoq panintsikmi kënö nin: “Bautizakurir y tsëpita presursöra tikrarirmi, alläpa kushikurqä. Peru 15 watakuna pasariptinmi, unë pasanqäkunata yarparnin alläpa llakikur qallëkurqä. Jehoväpa rikëninchö mana alli kanqätam pensarqä y imanir kuyamanqantaqa manam creeqtsu kä”. Wamra këninchö imëkapa pasashqa Yua jutiyoq precursörapis kënömi nin: “Jehovä kushishqa kanampaqmi pëta sirwinäpaq churapakarqä, peru imëpis mana kuyamänampaq kaqtaqa segürum këkarqä”.

3. ¿Ima tapukuykunatatan këchö contestashun?

³ Itsachi kë ishkan panintsiknöpis, Jehovätaqa llapan shonquntsikwan kuyantsik, peru pë kuyamanqantsiktaqa mana creintsiktsu. Këchöqa, kë ishkë tapukuykunatam contestashun: ¿imanirtan Jehovä kuyamanqantsikta creishwan? y kuyamänantsikpaqnö mana kanqantsikta pensarqa, ¿imatatan rurashwan?

4. ¿Imanirtan Jehovä mana kuyamanqantsikman pensëqa mana alli kanman?

⁴ Jehovä kuyamanqantsikta creirqa, imapa pasarpis pëllata sirwinapaqmi kallpachakushun. Peru mana kuyamanqantsikman pensarqa, kallpantsikmi pishinqa (Prov. 24:10). Y, Jehovä mana kuyamanqantsikta creirnin llakikushqaqa, manam Satanas tentamashqa tsarakushuntsu (Efes. 6:16).

5. ¿Imatan pasashqa Dios mana kuyanqanta creeq wawqi panikunata?

⁵ Jehoväta mana dejëpa sirweq wakin wawqi panikunapis, pë mana kuyanqantam pensar qallëkuyashqa. Tsëmi Jehovämanqa unënönatsu markäkuyan o yärakuyan. Creikoqkunata rikaq James wawqim kënö nin: “Betelchö y juk idiömata parlaq congregacionchö yanapakurpis, ruranqäkunapita Jehovä kushikunqanta o mana kushikunqantam tapukurqä. Juk kutikunachöqa, mañakunqäta Jehovä mana wiyanqantam pensarqä”. Llapan tiempunwan yanapakoq panintsik Ëvapis kënömi nin: “Jehovä mana kuyamanqantsikta pensëqa, pëta sirwinqantsikchömi qelanätsimantsik y manam kushishqa kantsiknatsu. Tsëllamannam yarparäkur qallëkuntsik”. Y precursor regular y creikoqkunata rikaq wawqintsik Michaelmi, kënö nin: “Qamman Dios mana yarpachakunqanta creirqa, ichikllapa ichikllapam pëpita rakikäkurinki”.

6. ¿Imatatan rurashwan Jehovä mana kuyamanqantsikta pensarqa?

⁶ Wakin wawqi panintsikkuna tsëta niyanqanmi, Jehovä mana kuyamanqantsikman pensëqa mana alliman chätsimanqantsikta rikätsimantsik. ¿Imatatan rurashwan tsënö pensarqa? Jehovänö yamë kanapaq, y shonquntsikta y pensënintsikkunata cuidanampaqmi mañakunantsik (Sal. 139:23; Filip. 4:6, 7). Y, yarpäshun, tsënö mana pensayänampaqmi wakin wawqi panintsikkunapis kallpachakuykäyan. Jehoväta unë witsan sirweq wakin nunakunapis tsënömi pensayarqan. Pablupita imata yachakunqantsikta rikärishun.

7. ¿Imakunapatan Pablu pasarqan?

⁷ Imëka rurëyoq karku, ¿llapanta rurëta mana puëdinqantsikta pensantsik?  Tsënömi apostol Pablupis karqan. Pëqa manam juk congregacionllapaqtsu yarpachakoq, sinöqa llapan cristiänukunapaqmi (2 Cor. 11:23-28). ¿Qeshyapäkurku llakishqalla kakunki? Apostol Pablupis, qaranchö imëka kashayoqnö karmi llakikoq, itsa tsëqa qeshyanqan karqan (2 Cor. 12:7-10). ¿Imachöpis raslla pantareq karku llakikuntsik? Hörataqa Pablupis tsënömi karqan. Cada junaq alli kaqta ruranampaq kallpachakurninmi, alläpa llakipëpaq kanqanta nirqan (Rom. 7:21-24).

8. Mana allikunapa pasëkarpis, ¿imatan Pabluta yanaparqan Jehoväta sirwir sïguinampaq?

⁸ Imëka mana allikunapa pasëkarpis, Pabluqa manam Jehoväta sirwita dejarqantsu. ¿Imanötan kallpayoqqa karqan? Pantanqankunaman yarparpis, përëkur Jesus wanunqanmanmi markäkoq o yärakoq. Jina Jesusman llapan markäkoqkuna imëyaqpis kawëyoq kayänampaq kaqmanmi yarparaq (Juan 3:16; Rom. 6:23). Alläpa jutsallakushqa këkarpis, arrepentikoqkunata Jehovä perdonanqantaqa allim musyaq (Sal. 86:5).

9. Gälatas 2:20 ninqanchö Pablu qellqanqampitaqa, ¿imatatan yachakuntsik?

⁹ Përëkur wanunampaq Jesusta Patsaman Dios mandamushqa kaptinmi, Pabluqa Dios kuyanqanman markäkoq. Gälatas 2:20 (leyi) versïculupa ushananchö ninqanta rikärishun. Pablum kënö nirqan: Diospa Tsurinqa, “kuyamarqanmi y noqarëkurmi kawëninta qorqan”. Pabluqa manam wakin wakinllata Dios kuyanqantatsu pensaq. Manam kënö neqnötsu kaq: “Musyämi wawqi panïkunata imanir Jehovä kuyanqanta, peru noqataqa, ¿imapitaraq kuyamanman?”. Römachö cristiänukunatam këta yarpätsirqan: ‘Jutsasapallaraq këkashqam noqantsikrëkur Cristu wanurqan’ (Rom. 5:8). Awmi, Diosqa cada ünutam kuyamantsik.

10. ¿Imatatan yachakuntsik Romänus 8:38 y 39 ninqampita?

¹⁰ (Leyi Romänus 8:38, 39). Pabluqa segürum këkarqan Diosnintsik kuyamanqantsikta. Tsëmi, imapis “Diospa kuyakïnimpita rakimënintsikta mana puëdinampaq kaqta” nirqan. Y Israel nacionta pacienciakur tratashqa kanqanta y pëtapis llakipashqa kanqantam musyarqan. Juk parlakuychöqa, kënömi nikarqan: “Noqarëkur wanunampaq Tsurinta Jehovä mandamushqa këkaptinqa, ¡manam mana kuyamanqantaqa pensämantsu!” (Rom. 8:32).

11. 1 Timoteu 1:12 a 15 ninqannö, mana allikunata rurashqa këkarpis, ¿imanirtan Pabluqa següru këkarqan Dios kuyanqanta?

 ¹¹ (Leyi 1 Timoteu 1:12-15). Pabluqa itsachi unë ruranqankunapita llakikoq. Jutsallakoqkunapita mas mana alli kaq kanqantam nirqan. Diospita rasumpa kaqta manaraq yachakurqa, mëtsika cristiänukunatam chikirnin qatikacharqan, wakintam carcelatsirqan y wakintanam wanutsiyänampaq nirqan (Hëch. 26:10, 11). ¿Imanöraq apostol Pabluqa karqan, wanutsiyänampaq mandakunqan cristiänukunapa wamranta reqirqa? Unë ruranqankunapitam Pabluqa llakikoq, peru musyaqmi altsanampaq ima rurëtapis manana puëdinqanta. Përëkur Jesucristu wanunqanman yarparmi kënö qellqarqan: “Diospa alläpa alli këninrëkurmi kanan kanqäqa kä” (1 Cor. 15:3, 10). Këpitaqa yachakuntsik, cada ünupaq Jesucristu wanunqanta creinapaq y tsërëkur Jehoväwan alli amïgu kanqantsiktam (Hëch. 3:19). Diosqa manam Testïgu o mana Testïgu këkar unë ruranqëkikunamantsu yarparan, sinöqa kanan y shamoq tiempuchö ruranëkipaq kaqkunamanmi (Is. 1:18).

12. 1 Juan 3:19 y 20 ninqannö, ¿imatatan rurashwan imapaqpis mana välinqantsikta o kuyamänantsikpaqnö mana kanqantsikta pensarqa?

¹² Höraqa, imapaqpis mana välinqantsikta, o kuyamänantsikpaqnö mana kanqantsiktam pensashwan (leyi 1 Juan 3:19, 20). Tsëmi jutsantsikrëkur Jesus wanushqa kaptimpis, noqantsiktaqa jutsantsikkunapita Dios mana perdonamänapaq kaqta pensashwan. Tsënö pensarqa, Diosnintsik alläpa kuyamanqantsikta yarpäshun. Diosnintsik mana kuyamanqantsikta ni perdonamanqantsikta pensarqa, yarpäshun, Pëqa alläpam  kuyamantsik y perdonamantsikmi. Tsëta creinapaqqa, llapan junaqkunam Bibliata estudianantsik, imëpis mañakunantsik y wawqi panintsikkunawanmi juntu kanantsik. Tsë kimanta imanir ruranapaq kaqta rikärishun.

13. ¿Imanötan Bibliata estudianqantsik yanapamantsik? (Rikäri, “ ¿Imanötan Diospa Palabran yanapamantsik?” neqta).

¹³ Diospa Palabrantam cada junaq estudianantsik. Tsëta rurarqa, Jehovätam mas reqishun y alläpa kuyamanqantsiktam rikäshun. Bibliapita yachakunqantsikman cada junaq pensanqantsikmi, pensënintsikchö y shonquntsikchö mas alli kanapaq yanapamäshun (2 Tim. 3:16). Unë witsan imapaqpis mana sirwinqanta pensaq creikoqkunata rikaq wawqi Këvinmi, kënö nin: “Salmus 103 ninqanta leyinqä y tsëman yarpachakunqämi yanapamashqa, imata pensanqäta Jehoväta willanäpaq y imanö rikämanqanta musyanäpaq”. Pitsqa kaq pärrafuchö parlanqantsikpaq pani Ëvam kënö nin: “Jehovä kuyakoq kanqanman pensanäpaqmi, paqas hörakunachö tiempüta patsätsishqä. Tsëmi yamë kanäpaq y markäkur o yärakur sïguinäpaq yanapaman”.

14. ¿Imanötan Diosman mañakunqantsik yanapamantsik?

¹⁴ Diosman imëpis mañakushun (1 Tes. 5:17). Alli amïgukunaqa, imanö këkäyanqampitam imëpis parlëkäyan, tsënöllam Jehoväwampis. Imanö këkanqantsikta, imaman pensanqantsikta y imapaq yarpachakunqantsikta willarninmi, Pëman y kuyamanqantsikman confiakunqantsikta rikätsikuntsik (Sal. 94:17-19; 1 Juan 5:14, 15). Ishkë kaq pärrafuchö Yua jutiyoq panipaq parlanqantsikmi, kënö nin: “Jehoväman mañakurqa, manam tsë junaq ruranqällatatsu willä, llapan imanö këkanqätam willä. Mandakoqtanö rikänapa rantinmi, wamrankunapaq yarpachakoq alläpa kuyakoq Teytatanö Jehoväta rikä”. (Rikäri “ ¿Leyirqunkiku?” neqta).

15. ¿Imanötan Jehoväqa rikätsimantsik cada ünupaq yarpachakunqanta?

¹⁵ Wawqi panintsikkunawan juntu kashun. Pëkunaqa, Jehoväpa qarënin cuentam kayan (Sant. 1:17). Teytantsik Jehoväqa, imapa pasashqapis kuyamaqnintsik wawqi panikunayoq kanantsiktam permitimantsik (Prov. 17:17). Colösaschö cristiänukunaman cartakurmi, apostol Pabluqa nirqan, wakin cristiänukuna alläpa yanapashqa y shoqashqa kayanqanta (Col. 4:10, 11). Kikin Jesucristupis necesitarqanmi y agradecikurqanmi, amïgunkuna nunakuna kar o angelkuna  karnimpis, yanapayanqampita (Lüc. 22:28, 43).

16. ¿Imanötan wawqi panintsikkunaqa Jehoväwan mas alli amïgu kanapaq yanapamantsik?

¹⁶ ¿Mañakuntsikku y permitintsikku wawqi panintsikkuna yanapamänantsikta? Diosta alli sirwikaq wawqita o panita imapa pasëkanqantsikta willanqantsikqa, manam ima rurëta mana yachanqantsiktatsu rikätsikun, willakunqantsikqa yanapamashwanmi. Pitsqa kaq pärrafuchö Jamespaq parlanqantsikman pensarishun, pëmi kënö nin: “Diosta alli sirweqkunawan amïgu këqa yanapamashqam. Imapaqpis mana sirwinqäta pensaptïmi, tsë kuyashqa amïgükunaqa shumaq wiyayäman y kuyayämanqanta yarpätsiyäman. Tsëchömi, Jehovä kuyamanqanta y noqapaq yarpachakunqanta rikä”. Congregacionchö alli amïgukunayoq këqa, ¡alläpam yanapamantsik!

17, 18. ¿Pitatan wiyakunantsik y imanir?

¹⁷ Satanasqa, qelanärinantsikta y mana allita ruranantsiktam munan. Jehovä mana kuyamanqantsikta y salvakunapaqnö mana kanqantsikta pensanatam munan. Peru yachakunqantsiknöpis tsëqa manam rasumpatsu.

¹⁸ Cada sirweqninkunatam Jehoväqa kuyan. Mandamanqantsikkunata cäsukushqaqa, Jesusnöllam kuyakuyninchö imëpis kashun (Juan 15:10). Tsëqa, ama Jehovä mana kuyamanqantsikta pensashuntsu ni Satanasta cäsushuntsu. Tsëpa rantinqa, noqantsikchö alli kaqkunata rikaq Jehovä Diosnintsikta cäsukushun. Kuyashqan nunakunata y noqantsikta rikämarnintsik Teyta Diosnintsik kushikunqantaqa, ama qonqashuntsu.