¿Imanirtan Jesusqa manaraq wanurnin Salmus 22:1 ninqanchö David qellqanqanta parlarqan?

Mateu 27:46 ninqannömi manaraq wanurnin Jesus kënö nirqan: “Diosllä, Diosllä, ¿imanirtaq jaqiramarqunki?”. Tsëpinmi, Salmus 22:1 ninqanchö David qellqanqanta Jesus cumpliratsirqan (Mar. 15:34). Jesusqa manam llakikurtsu o Diosman manana markäkurtsu o yärakurtsu tsëtaqa nirqan. Pëqa musyarqanmi imanir wanunampaq kaqta y tsëta ruranampaqqa listum këkarqan (Mat. 16:21; 20:28). Jina qeruchö wanunqan höra, Jehovä mana tsapanampaq kaqtaqa musyarqanmi (Job 1:10). Tsënömi Jehoväqa, sufrir wanunqanchö Jesus alli tsarakunqanta pï më musyananta permitirqan (Mar. 14:35, 36).

Tsëqa, ¿imanirtan Jesus tsëta parlarqan? Manam segürutsu kantsik. Peru itsa imanir nishqa kanqanta rikärishun. *

Itsa tsënö ninqanwanqa, wanutsiyänampaq kaqpita Jehovä mana tsapänampaq kaqta Jesusqa rikätsikuykarqan. Jutsantsikrëkur wanunqampitaqa, manam Jehovä tsaparqantsu. Pëqa noqantsiknö nunam karqan y llapantsikpaqmi wanurqan (Heb. 2:9).

Itsa Jesusqa, Salmus 22 ninqampita juk ishkë palabrakunata nirqan, nunakuna tsë llapan salmuta yarpäyänampaq.  Tsë witsan judïukunaqa, atska salmukunatam dememoria yarpäyaq. Tsëmi juk versïculullata niriyaptin, llapan salmuta yarpäriyaq. Tsëta logrëta munar Jesus nishqa kaptinqa, judïu qateqninkunaqa wanunampaq tsë salmuchö Dios llapan musyatsikunqanta yarpäyarqanchi (Sal. 22:7, 8, 15, 16, 18, 24). Jina tsë salmupa ushananchöqa, Teyta Dioslla më tsë nacionkunachöpis gobernanampaq kaqtam rikätsikun (Sal. 22:27-31).

David qellqanqanta parlarqa, itsa Jesusqa jutsannaq kanqanta nikarqan. Manaraq wanutsirqa, Diospa contran churakashqa kanqanta nirmi condenayarqan (Mat. 26:65, 66). Manam leykuna ninqannötsu, paqaspa y rasllam juzgayarqan (Mat. 26:59; Mar. 14:56-59). Itsa tsë palabrakunata tapukoqnö parlarqa, mana allita mana ruranqampita castiguëkäyanqanta cläru rikätsikuykarqan.

Itsa Jesusqa wakinkunata yarpëkätsirqan, kë salmuta qellqaq David sufrikanqanqa, Jehovä dejashqa kanqanta mana rikätsikunqanta. Davidqa Jehoväman markäkur o yärakurmi sïguirqan. Tsëmi tsënö tapukurpis, Jehovä Dios sirweqninkunata yanapanampaq kaqmanqa confiakurqan. Y Jehovämi bendicirnin sïguirqan (Sal. 22:23, 24, 27). Tsënöllam, ‘Davidpa Tsurin’ Jesus qeruchö sufrir warkurëkanqanqa, Jehoväpa rikëninchö mana alli kanqantaqa rikätsikuntsu (Mat. 21:9).

Jina tsënö ninqanwanqa itsa rikätsikuykarqan, Jehovällata sirwinqanta rikätsikunampaq pë manana tsapanqampita llakikunqanta. Adanwan Ëva Diospa contran churakäyanqanrëkurmi, Jesusqa sufrinan y wanunan karqan. Peru Jehoväqa manam qallananllapitatsu tsëta patsätsishqa karqan. Jesusqa jutsata mana rurashqa këkarpis, sufrirnin wanunan karqan, Satanas ulikoq o llullakoq kanqanta rikätsikunampaq y nunakunapa jutsankunarëkur wanurnin imëyaqpis kawakuyta chaskiyänampaqmi (Mar. 8:31; 1 Pëd. 2:21-24). Tsëtaqa rurëta puëdirqan, tsë kutichö Jehovä manana tsapashqa kaptinmi.

O itsa Jesusqa tsëta nikarqan, imanir tsënö wanunampaq Jehovä permitinqanta qateqninkuna entiendiyänampaq. * Jesusqa musyaqmi, qeruchö wanunqampita qateqnin këta mëtsikaq dejariyänampaq kaqta (1 Cor. 1:23). Imanir wanunqanman qateqninkuna pensarqa, imarëkur wanushqa kanqantam entiendiyanman karqan (Gäl. 3:13, 14). Tsëta rurarqa, manam mana allita ruraqtanötsu rikäyanman karqan, sinöqa salvaqnintanömi.

Tsë palabrakunata Jesus imanir nishqa kaptimpis, qeruchö wanurnin Jehoväpa voluntäninta rurëkanqantaqa musyarqanmi. Tsë palabrakunata parlarirmi, kënö nirqan: “¡Cumplikärishqam!” (Juan 19:30; Lüc. 22:37). Awmi, Patsata shamur llapan ruranampaq kaqkunata cumplinampaqmi, tsë kutichöqa Jehovä manana tsaparqannatsu. Tsëta ruranqanwanmi, “Moises qellqanqan Leychö, Diospa Willakoqninkuna Qellqayanqanchö y Salmukunachö” pëpaq llapan qellqarëkaqkuna cumplikarqan (Lüc. 24:44).