1, 2. ¿Ima ninantan jutsapa chaninta pagakuy, y imanirtan necesitarqantsik?

ADAN jutsallakunqanrëkurmi pë y wamrankunaqa, mana wanushpa manana kawayänannatsu karqan. Adanqa musyëkarmi jutsallakurqan, tsëmi wanunan karqan. Peru, ¿y wamrankunaqa? Pëkunaqa manam Adanwantsu jutsallakuyarqan (Rom. 5:12, 14). Adannö wanuyänampaq kaqpitaqa, ¿salvakuyanmantsuraq karqan? Awmi. Jehoväqa, Adan jutsallakurinqanllachömi mëtsika millon mirëninkunata jutsapita y wanuypita imanö salvanampaq kaqta musyatsikur qallëkurqan (Gen. 3:15). “Kawëninwan chaninta pagakur mëtsikaqta libranampaqmi”, Jehoväqa dispuninqan tiempuchö Tsurinta Patsaman mandamurqan (Mar. 10:45; Juan 6:51).

² ¿Ima ninantan jutsapa chaninta pagakuyqa? Griëgu idiömachö Diospa Palabranta qellqayanqanchöqa, tsë palabraqa yurin Adan perdinqanta nunakuna yapë chaskiyänampaq wanuyninwan Jesus pagakunqampaq parlarninmi (1 Cor. 15:22). ¿Imanirtan wanunanraq karqan? Pitapis wanutsiyaptin, pëtapis wanutsiyänampaq Jehoväpa leyninchö niptinmi (Ex. 21:23, 24). Adanqa jutsannaq kawënintam perdirqan. Tsëmi Jehoväpa leynin cumplikänampaqqa, jutsannaq karnin Jesus wanunan karqan (Rom. 5:17). Tsënöpam, pë wanunqanman markäkoqkunapaqqa imëyaqpis Teytan këman chan (Is. 9:6; Rom. 3:23, 24).

3. Juan 14:31 y 15:13 ninqannö, ¿imanirtan Jesusqa nunakunarëkur wanunampaq listu këkarqan?

³ Jesusqa Teytanta y noqantsikta kuyamarnintsikmi, wanunampaq listu këkarqan (leyi Juan 14:31; 15:13). Tsënö kuyakoq kanqanmi yanaparqan, wanunqanyaq alli  tsarakunampaq y Teytampa voluntäninta ruranampaq. Tsëta ruranqanrëkurmi, qallanampita nunakunapaq Jehovä munanqan cumplikanqa. Këchömi yachakushun, alläpa sufrirnin Jesus wanunanta Dios imanir permitinqanta. Jina nunakunarëkur Jesus wanunqampita apostol Juan alläpa agradecikunqampitam yachakushun. Y ushanapaqnam, Jehoväwan Jesus noqantsikrëkur rurayanqampita imanö agradecikunapaq kaqta yachakushun.

4. Jesus imanö wanunqanta willakaramuy.

⁴ Kë Patsachö Jesus ultimu junaq kanqanman pensashun. Yanapayänampaq mëtsika angelkunata mañakuyta puëdikarpis, Röma nacion soldädukuna prësuyänanta y maqayänantam permitirqan (Mat. 26:52-54; Juan 18:3; 19:1). Astayanqan chikutiqa waqta qarantam rachirqan. Tsëpitanam, waqtan yawartsëkaptimpis, wanutsiyanqan sitiuyaq juk lasaq qeruta apanampaq obligayarqan. Peru apëta mana puëdiptinmi, Röma nacion soldädukunaqa juk nunata obligayarqan pëpa rantin apanampaq (Mat. 27:32). Wanutsiyänampaq sitiuman chäriyaptinnam, wanutseqninkunaqa qeruman chakinta y makinta clavayarqan. Y clavarëkanqan qeruta sharkatsiyaptinqa, masraqchi makinkuna y chakinkuna rachikärirqan. Amïgunkuna y mamänin sufrikaptimpis, judïukunata gobernaqkunaqa Jesuspitam burlakuykäyarqan (Lüc. 23:32-38; Juan 19:25). Tsënöqa, atska hörakunam warkurarqan. Tsëmi shütanampaqpis * alläpa nanatsikoq. Ushananyaq alli tsarakushqa kanqanta musyarmi, juk kuti masllana shütarkur, Jehoväman mañakurir wanurqan (Mar. 15:37; Lüc. 23:46; Juan 10:17, 18; 19:30). ¡Alläpa sufrirmi wanurqan!

5. ¿Imata nir wanutsiyanqampitatan Jesusqa alläpa llakikurqan?

⁵ Jesusqa manam imanö wanutsiyanqampitatsu llakikurqan, sinöqa imata nir acusarnin wanutsiyanqampitam. Diosta mana respetanqantam niyarqan (Mat. 26:64-66). Diosta mana respetanqanta nir wanutsiyänan kaptinmi, Jesusqa Teytanta mañakurqan tsëpita salvëkunampaq (Mat. 26:38, 39, 42). ¿Imanirtan Jehoväqa kuyashqa Tsurin sufrinanta y wanunanta permitirqan? Kimallata yachakurishun.

6. ¿Imanirtan Jesusta qeruman warkuyänan karqan?

⁶ Juk: Jesusqa qeruchö wanunan karqan, maldecishqa kayanqampita judïukuna libri kayänampaqmi (Gäl. 3:10, 13). Diospa leyninkunata wiyakuyänampaq änikushqa këkar mana wiyakushqa kayaptinmi, maldecishqa kayarqan. Y manam tsëllatsu, Adanpa jutsantapis chaskishqam kayarqan (Rom. 5:12). Israelïtakuna Diospita chaskiyanqan leychöqa neq, wanuyman chätsikoq jutsata juk nuna ruraptinqa, wanutsiyänampaq kaqtam. Y wanuratsirqa, wakin nunakunataqa juk qerumanmi warkuyaq (Deut. 21:22, 23; 27:26). * Tsëmi qeruchö Jesus wanunqanqa, chaskiyanqan maldicionpita judïukuna libri kayänampaq yanapakurqan.

7. ¿Imanir mastan Tsurin sufrinanta Dios permitirqan?

⁷ Ishkë: Mandakoq kaq Sacerdöti kanampaqmi Diosqa Tsurin tsënö sufrinanta permitirqan. Alläpa sufritsikoq pruëbakunapa pasar Diosta wiyakuy mana fäcil kanqantam Jesusqa yachakurqan. Alläpa yarpachakurmi ‘sinchipa qayakur y waqar’  Teytanman mañakurqan. Tsëläyä sufritsikoq pruëbakunapa pasashqa karmi, Jesusqa “pruëbaman churashqa këkaqkunata yanapëta puëdin”. Alläpam Jehovä Diosta agradecikuntsik, pishipanqantsikchö ankupäkuyta yachaq Mandakoq kaq Sacerdötintsik churamushqa kanqampita (Heb. 2:17, 18; 4:14-16; 5:7-10).

8. ¿Imanir mastan wanunqanyaq Jesus probashqa kananta Dios permitirqan?

⁸ Kima: Jehoväqa Jesus tsëläya sufrinantaqa permitirqan, kë tapukuypa respuestan musyakänampaqmi, ¿alläpa sufrikarnimpis puëdiyanmanku nunakuna Jehovällata sirwita? Satanasqa imatapis chaskinqantsikrëkurlla Diosta sirwinqantsiktam nin. Y Jehoväta Adannö mana kuyanqantsiktam nin (Job 1:9-11; 2:4, 5). Tsurin alli tsarakunampaq kaqta musyarmi, Jehoväqa wanunqanyaq probashqa kanampaq permitirqan. Tsënö alli tsarakurmi, Satanas ulikoq o llullakoq kanqanta Jesus rikätsikurqan.

9. ¿Imatatan apostol Juanpita yachakuntsik?

⁹ Noqantsikrëkur Jesus wanunqanta musyanqantsikqa, mëtsikaq cristiänukunatam yanapashqa. Chikir contrankuna churakëkäyaptimpis, Diospita yachatsikurmi sïguiyashqa y kawëninkunachöqa imëka pruëbakunachömi alli tsarakuyashqa. Apostol Juanpita maslla yachakurishun. Jesucristupita y nunakunarëkur wanunqampitam, itsa 60 watakunapitapis mas, mana dejëpa yachatsikurqan. Röma gobiernu chikirnin Patmus islaman carcelayänampaq mandakunqanchöqa, 100 watayoqnönam karqan. ¿Imatatan rurashqa karqan? Diospita parlanqampita y Jesucristupita musyatsikunqampitam tsë islaman carcelayarqan (Rev. 1:9). Diosman markäkunqampita y alli tsarakunqampitaqa, ¡imëkatam Juanpita yachakuyta puëdintsik!

10. Qellqanqan librukunachöqa, ¿imanötan noqantsikrëkur Jesus wanunqampita Juan agradecikunqanta rikätsikurqan?

¹⁰ Bibliachö këkaq librukunata qellqanqanchömi, Jesusta kuyanqanta y nunakunarëkur wanunqampita alläpa agradecikunqanta Juan rikätsikun. Qellqanqan librukunachöqa, 100 kutipitapis masmi nunakunarëkur wanunqampita y Jesus tsëta ruranqan imanö yanapamanqantsikpaq parlan. Këta qellqanqanllaman pensarishun: “Sitsun pipis jutsata ruranqa, tsëqa Teytawan këkaq juk yanapakoqmi kapamantsik, Jesucristu, pëqa alli kaqta ruraqmi” (1 Juan 2:1, 2). Jina Jesuspita imanir musyatsikunapaqmi qellqarqan (Rev. 19:10). Tsëkunam cläru rikätsikun, noqantsikrëkur Jesus wanunqampita Juan alläpa agradecikunqanta. ¿Imanötan noqantsikpis agradecikunqantsikta rikätsikushwan?

11. ¿Imatan jutsaman mana ishkinapaq yanapamäshun?

¹¹ Jutsata mana ruranapaq alli tsarakushun. Noqantsikrëkur Jesus wanunqampita agradecikurqa, manam kënö pensashuntsu: “Jutsa rurëman mana ishkinapaqqa manam tsarakümantsu. Jutsataqa rurarïmanmi, peru tsëpitaqa perdontam mañakurïman”. Tsëpa rantinqa, jutsa rurëta munarqa, kënömi nishwan: “¡Manam rurashaqtsu! ¿Imanirtan Jehoväwan Jesus noqapaq imëkata rurashqa këkäyaptinqa këta rurëküman?”. Jina Jehovä yanapamänapaqmi kënö mañakushwan: “Ama tentacionman ishkiyänäta jaqiyämëtsu” (Mat. 6:13).

12. 1 Juan 3:16 a 18 ninqantaqa, ¿imanötan rurashwan?

 ¹² Wawqi panintsikkunata kuyashun. Tsëta rurarqa, noqantsikrëkur Jesus wanunqampitam agradecikuntsik. Musyanqantsiknöpis Jesusqa manam noqantsikrëkurllatsu wanurqan, sinöqa wawqi panintsikkunarëkurpis wanurqanmi. Pëkunata alläpa kuyarmi pëkunarëkurpis wanurqan (leyi 1 Juan 3:16-18). Pëkunata imanö tratanqantsikchömi, kuyanqantsik o mana kuyanqantsikpis rikakun (Efes. 4:29, 31–5:2). Qeshyayaptin o ima mana allipapis pasayaptin yanapanapaqmi listu këkantsik. Peru juk wawqintsik o panintsik ruranqanwan o ninqanwan ofendimashqaqa, ¿imatatan rurashwan?

13. ¿Imanirtan wawqi panintsikkunata perdonashwan?

¹³ ¿Ofendimanqantsikmanku yarparäkuntsik? (Lev. 19:18). Tsënö kaptinqa, kë consëjuta yarpäshun: “Jukniki juknikikuna aguantanakurnin sïguiyë, y ofendinakurpis jukniki juknikikuna perdonanakuyë. Imanöllam qamkunata Jehovä perdonayäshurqunki, jina tsënöllam qamkunapis rurayänëki” (Col. 3:13). Wawqi panintsikkunata cada perdonarmi, noqantsikrëkur Jesus wanunqampita Teytantsik Jehoväta agradecikuntsik. ¿Imanö mastan Jesus wanunqampita Diosta agradecikushwan?

14. ¿Imatan yanapamäshun noqantsikrëkur Jesus wanunqampita mas agradecikunapaq?

¹⁴ Jesus wanunqampita Jehoväta agradecikushun. 83 watayoq India nacionchö täraq Joanna panim kënö nin: “Jehoväman cada junaq mañakunqächö noqantsikrëkur Jesus wanunqampita parlë y tsëpita Jehoväta agradecikuyqa, noqapaqqa alläpa allim”. Jehoväta cada junaq mañakunqantsikchöqa, mana allikunata ruranqantsikpita perdonëkamänapaq mañakushun. Kikintsikpaq mañakunqantsik höra, tsë junaq imakunachö pantanqantsikman yarpäshun y Jehoväta perdonëkamänapaq mañakushun. Y alläpa jutsallakushqa karqa, itsa creikoqkunata rikaqkuna yanapamänantsikpaqpis mañakunantsikraq. Pëkunaqa shumaqmi wiyamäshun y kuyëllapam Bibliawan consejamäshun. Jina noqantsikwanmi mañakuyanqa y Jehoväwan amïgu karnin sïguinapaqmi, noqantsikrëkur Jesus wanunqampita perdonëkamänapaq mañakuyanqa (Sant. 5:14-16).

15. ¿Imanirtan noqantsikrëkur Jesus wanunqanta leyinapaq y leyinqantsikman pensanapaq tiempuntsikta patsätsintsiktsu?

 ¹⁵ Noqantsikrëkur Jesus wanunqanman pensashun. 73 watayoq Rajamäni jutiyoq panintsikmi kënö nin: “Jesus imëkata sufrinqanta leyirqa, nawïmampis weqï juntarinmi”. Diospa Tsurin imëkata sufrinqanman pensarqa, noqantsikpis llakikuntsikmi. Peru noqantsikrëkur wanunqanman mas pensarqa, masmi pëta y Teytanta kuyashun. Tsëqa, ¿imanirtan japallantsik estudianqantsikchö tsëpaq maslla yachakuntsiktsu?

16. Noqantsikrëkur Jesus wanunqampita nunakunata yachatsinqantsikqa, ¿imanötan yanapamantsik? (Jana qaranchö këkaq dibüjuta rikäri).

¹⁶ Noqantsikrëkur Jesus wanunqanta juk nunakunata yachatsishun. Noqantsikrëkur Jesus wanunqanta nunakunawan parlarqa, masmi agradecikushun. Y Jesus imanir wanunqanta yachatsikunapaqqa, imëkam yanapamänapaq kan. Itsa këkunata utilizashwan: Diospa alli willakïninkuna follëtupa 4 kaq yachatsikuyninta, tsëpa tïtulunmi, “¿Pitaq Jesucristu?” nin. O ¿Imakunatataq Biblia yachatsimantsik? neq librupa 5 kaq capïtulunta, tsëpa tïtulunmi, “Salvamänantsikpaqmi Jesusqa wanurqan” nin. Y Jesus Wanunqanta Yarpäna reunionman cada wata ëwar y tsëman wakinkunata invitarninmi, noqantsikrëkur Jesus wanunqampita mas agradecikunqantsikta rikätsikuntsik. Jehoväqa Tsurimpita nunakunata yachatsinatam permitimarquntsik.

17. ¿Imanirtan noqantsikrëkur Jesus wanunqanqa, Diospa mas alli kaq qarënin?

¹⁷ Noqantsikrëkur Jesus wanunqampita agradecikur sïguinapaqqa, imëkam kan. Pë wanunqampitam, imachö pantareq karnimpis Jehoväwan alli amïgu kantsik. Jesus wanushqa kaptinmi, Diablu llapan ruranqankuna ushakärinqa (1 Juan 3:8). Y qallananllachö munanqannömi, Patsaqa Shumaq Huertaman tikranqa y tsëchö täraqkunaqa llapanmi Diosta kuyayanqa y sirwiyanqa. Tsëqa noqantsikrëkur Diospa mas alli kaq qarënin kaptinmi, cada junaq agradecikunqantsikta rikätsikunantsik.