IMAPAQPIS alläpa yarpachakushqaqa, imëka nitimaqnintsik lasaq qepinömi kanman (Prov. 12:25). ¿Imëllapis tsënöpa pasarqunkiku? ¿Höraqa manana aguantanëkipaq kaqtaku pensanki? Manam qamllatsu tsënöpaqa pasanki. Mëtsikaqmi pitapis cuidëkantsik, wanupakurquntsik, juk desgraciapa pasarquntsik o imapis pasamarquntsik. Y tsëkunaqa, yarpakachätsimarquntsik y llakitsimarquntsikmi. ¿Imatan yanapamäshun alläpa mana yarpachakunapaq? a

Rey David imakunapa pasanqanta yachakunqantsikmi, alläpa mana yarpachakunapaq yanapamäshun. Pëqa, imëka mana allikunapam pasarqan y vïdampis peligruchömi këkarqan (1 Sam. 17:34, 35; 18:10, 11). ¿Imatataq David rurarqan alläpa mana yarpachakunampaq? ¿Y imatataq rurashwan Davidnölla ruranapaq?

Davidqa, jananman jananmanmi imëka problëmakunapa pasarqan. Rey Saul wanutsita munaptin qeshpir ëwakunqanchö juk kuti imapa pasanqanta rikärishun. Davidwan yanapaqnin nunakuna juk guërraman ëwayanqanyaqmi, chikeqninkunaqa wayinkunata kayëkuyarqan y cösasninkunatawan familiankunata apakuyarqan. ¿Imatataq David rurarqan? Bibliachömi kënö nin: “Mana tarïkurmi yanapaqninkunawan David utiyanqanyaq alläpa waqayarqan”. Y manam tsëllatsu karqan, ‘yanapaqnin nunakunaqa alläpa piñarmi Davidta tsampita munayarqan’ (1 Sam. 30:1-6). Tsëmi Davidpa familianqa peligruchö këkarqan, yanapaqnin nunakuna pëta wanutsita munayarqan y rey Saulmi wanutsinampaq ashikarqan. Pensari, Davidqa alläpa yarpachakurchi këkarqan.

¿Imatataq rurarqan? Jinan höram Davidqa, “alläpa llakikur TEYTA DIOSTA mañakurqan”. Davidqa yanapëkunampaqmi Jehoväta imëpis mañakoq y puntakunata imanö yanapashqa kanqanmanmi yarpachakoq (1 Sam. 17:37; Sal. 18:2, 6). Jina Davidqa musyaqmi, Jehovä diriginampaq kaqta wananqanta, tsëmi imata ruranampaqpis Diosta tapukurqan. Jehovä contestariptinqa, jinan höram ninqannö rurarqan. Tsëta rurayanqampitam Davidta y yanapaqnin nunakunata Jehovä bendicirqan, y chikeqninkuna apakuyanqan familiankunata y cösasninkunatam kutitsiyarqan (1 Sam. 30:7-9, 18, 19). ¿Cuentata qokurqunkiku David imata rurashqa kanqanta? Yanapëkunampaqmi Jehoväta mañakurqan, unë witsankuna imanö yanapashqa kanqanmanmi yarparqan y Jehovä ninqannömi rurarqan. ¿Imanötan noqantsikpis Davidnölla rurashwan? Kimallata rikärishun.

1. Diosman mañakushun. Imapaqpis alläpa yarpachakurqa, tsëkunachö imata ruranapaq kaqta musyanapaqmi, Jehoväta yanapëkamänapaq mañakuyta puëdintsik. Imapaqpis yarpachakunqantsikta shumaq willashqaqa, mas ankashmi sientikushun. O këkanqantsikchö tsënö mañakuyta mana puëdirqa, shonquntsikllachö y raslla mañakuytapis puëdintsikmi. Yanapëkamänapaq Jehoväta cada mañakunqantsikchömi, Davidnö pëman confiakunqantsikta rikätsikuntsik. Pëmi kënö nirqan: “TEYTA DIOSQA tsapämaq qaqam këkan. Pëqa ratakunämi y salvamaqnïmi këkan. Pëqa japallan Diosnïmi këkan. Ratakunä qaqam këkan” (Sal. 18:2). Diosta mañakunqantsikqa, ¿rasumpaku yanapakun? Kahlia jutiyoq precursöram kënö nin: “Diosman mañakurirqa, mas tranquïlum kä. Mañakunqäqa, Jehovä pensanqannö pensanäpaq y pëman mas confiakunäpaqmi yanapaman”.  Jehoväman mañakuyta puëdinqantsikqa juk qarë cuentam, tsëmi alläpa yarpachakunqantsik höra yanapamantsik.

2. Unë pasanqantsikkunaman yarpäshun. Pasaq watakunaman yarparninqa, Jehovä mana yanapashushqa kashuptiki, ¿mana tsarakunëkipaq kaqkunata yarpankiku? Unë witsan sirweqninkunata y noqantsikta Jehovä yanapamanqantsikman yarpashqaqa, pëman mas confiakunapaq y mas tranquïlu kanapaqmi yanapamantsik (Sal. 18:17-19). Creikoqkunata rikaqkunapita Joshua jutiyoq wawqim kënö nirqan: “Mañakunqäta Jehovä contestamunqantam juk listachö apuntarätsï. Tsëmi yanapaman imatapis cläru mañanqäta y wananqämannö contestamanqanta yarpänäpaq”. Awmi, Jehovä imanö yanapamanqantsikta yarparqa, alläpa mana yarpachakunapaqmi kallpata tarintsik.

3. Imata ruranapaqpis churapakäshun. Imapis pasamanqantsikchö imatapis ruranapaq manaraq decidirmi, Bibliachö këkaq consëjukunata rikärishwan (Sal. 19:7, 11). Mëtsikaqmi, Bibliapa juk versïculunta maslla estudiar, tsëchö këkaq consëju ninqanmannö imanö kawayänampaq kaqta maslla entiendiyanqanta, cuentata qokuyashqa. Creikoqkunata rikaqkunapita Jarrod jutiyoq wawqim kënö nin: “Juk versïculupita masllata yachakunqäqa, mas alli entiendinäpaqmi yanapaman. Tsënöpam, Jehovä imata nimëta munanqanta maslla entiendï, nimanqankunam shonqüyaq chärin y pë munanqannö kawanäpaqmi kallpachakü”. Jehoväpa consëjunkunata Bibliachö ashishqa y mandakunqankunata wiyakushqaqa, imapis pasamanqantsikman alläpa mana yarpachakunapaqmi yanapamantsik.

Davidqa, pasëkanqankunachö alläpa mana yarpachakunampaq, Jehovä yanapananta wananqantam alli musyarqan. Y Pë yanapanqampita alläpa agradecikurmi kënö nirqan: “Markapa tumariq perqan altu kaptinpis achpëpam yëkushaq”. Jina kënöpis nirqanmi: “Teyta Dios kikinmi kallpatapis qoman” (Sal. 18:29, 32). Itsa problëmantsikkunata altsë, o tsëkunachö tsarakuyqa alläpa sasanö o ajanö kanman, peru Jehovä yanapamashqaqa vencishunmi. Yanapamänapaq Jehoväta mañakushqa, unë witsan pasanqantsikkunachö imanö yanapamanqantsikta yarpashqa y pë munanqannö imatapis rurashqaqa, mana allikunapa pasar alläpa mana yarpachakunapaqmi, kallpayoqta y tsëkunachö imakunata ruranapaq kaqta musyatsimänapaq següru kashun.