1. ¿Imata rurartan kushishqa kantsik?

 JEHOVÄQA kushishqa kanatam munan. Y tsëtaqa musyantsik, santu espïritunwan kushishqa kanapaq yanapamanqantsikpitam (Gäl. 5:22). Y Bibliachö ninqannömi, wakinkunata yanaparmi mas kushishqaqa kantsik. Tsëmi Diospita yachatsikunapaq y wawqi panintsikkunata yanapanapaq kallpachakuntsik (Hëch. 20:35).

2, 3. (1) Gälatas 6:4 ninqanta cuentaman churëkur, ¿imatan yanapamäshun kushishqalla kanapaq? (2) ¿Imatataq këchö yachakushun?

² ¿Imatan yanapamäshun kushishqalla kanantsikpaq? Apostol Pabluqa, Gälatas 6:4 (leyi) ninqanchömi, kushishqalla kanapaq imakunata ruranapaq kaqta nirqan. Juk: Jehovätaqa, llapan puëdinqantsikmannömi sirwinantsik. Y tsëtaqa, llapantsikmi ruranantsik (Mat. 22:36-38). Y ishkë: manam wakinkunawan igualatsikunantsiktsu. Salornintsik alli kaptin, Diosta sirwinqantsikchö mas yanapakunapaq yachatsimashqantsik kayaptin o imatapis rurëta yachanqantsikwan alli kaqta rurashqaqa, Jehoväta agradecikushun, pëmi imata ruranapaqpis yanapamantsik. Y Diosta sirwinqantsikchö mëqan wawqi panintsikpis noqantsikpita mas allita ruraptinqa, rurëta yachanqankunata kikin mana alabakunampaq o provëchumpaq utilizänampa rantin Jehoväta alabanampaq utilizanqampitam kushikushun. Pëkunapita mas allita rurëta procuranantsikpa rantinqa, pëkunapita yachakushun.

³ Këchömi, Diosta sirwinqantsikchö munanqantsiknö yanapakuyta mana puëdir, mana qelanäkurinapaq ima yanapamänapaq kaqta rikäshun. Jina rurëta yachanqantsikkunata imanö utilizänapaq kaqta y wakinkunapita imata yachakuyta puëdinapaq kaqtam yachakushun.

4. ¿Imatan llakitsimarnintsik qelanäratsimashwan? Cärol pasanqanta willakaramuy.

⁴ Wakin wawqi panikunaqa, edäninkunarëkur o salorninkunarëkurmi, munayanqannöqa Jehoväta sirwita puëdiyantsu. Tsëmi, Diospita yachatsikoqkunata wanayanqan sitiuchö yanapakoq pani Cärolta pasarqan. Treinta y cincu nunakunatam Bibliata estudiatsirqan y atskaqtam bautizakuyanqanyaq yachatsishqa karqan. ¡Allim yarqapakuykarqan! Peru tsënö këkarmi, qeshyakurkurqan y wayimpita yarqunanllapaqpis manam fäciltsu kaq. Pëmi kënö willakun: “Salornïrëkur wakinkunanö rurëta mana puëdinqäta musyarpis, pëkunanö Jehovällapaq mana kanqätam pensä. Llapan munanqäta rurëta mana puëdirmi llakikü”. Cärolqa, llapan puëdinqanmannömi Jehoväta sirwinampaq kallpachakun, y tsëqa alläpa allim. Diosnintsikqa alläpa llakipäkoqmi, tsëmi musyantsik Cärol ruranqanta alläpa valoranqanta.

5. (1) Llapan munanqantsikta rurëta mana puëdinqantsikpita llakikurqa, ¿imatataq yarpänantsik? (2) Fötukunachö rikanqantsiknö, ¿imanötan kë wawqiqa llapan puëdinqanmannö Jehoväta sirwishqa?

⁵ Llapan munanqantsikta rurëta mana puëdir llakikushqaqa, kënö tapukushun: “¿Imatataq noqapita Jehovä shuyaran?”. Pëqa, imanöpis këkanqantsikchö llapan puëdinqantsikmannö sirwinantsiktam shuyaran. Këllaman pensari: ochenta watayoqna juk panim, cuarenta watayoq këkarnin Jehoväta sirwinqannö sirwita manana puëdir llakishqa këkan. Llapan puëdinqanmannö sirwikarpis, Jehovä mana kushishqa këkanqantam pensan. Peru ¿tsëqa rasumpaku? Rikärishun. Cuarenta watayoq këkarnin, y kanan ochenta watayoqna këkarnin llapan puëdinqanmannö Jehoväta sirwikarqa, llapan puëdinqanmannö Jehoväta sirwitaqa manam dejashqatsu. Ruranqantsikpita Jehovä mana kushikunqanta pensarqa, yarpäshun, Jehovämi decidin ruranqantsikpita kushikunampaq o mana kushikunampaqpis. Llapan puëdinqantsikmannö rurashqaqa, Pëqa kënömi nimäshun: “Allitam rurarqunki” (Mateu 25:20-23 ninqantawan igualaratsi).

6. ¿Imatataq Marïa ruranqampita yachakuyta puëdintsik?

⁶ Kushishqalla kanapaqqa, rurëta puëdinqantsikkunamanmi pensanantsik y manam rurëta mana puëdinqantsikkunamanqa. Qeshyanqanrëkur Diosta sirwinqanchö alläpata mana rurëta puëdeq pani Marïaman pensarishun. Qallananllachöqa alläpam llakikoq y imapaqpis mana välinqantam pensaq. Tsënö këkarmi, congregacionninchö juk pani qeshyarnin cämachö këkanqanta musyarirqan. Tsëmi, imanöpis yanapanampaq kaqman pensarqan. Marïam kënö willakun: “Telëfunupa y cartapa Diospita yachatsikuyänäpaqmi, wayinman ëwanäpaq patsätsirqä. Nanäta yanapashqa kanqäpitam wayïman imëpis kushishqa kuteq kä”. Rurëta puëdinqantsikllaman pensashqaqa, noqantsikpis kushishqam kashun. ¿Peru masta rurëta puëdishqa o Diospita yachatsikunqantsikchö imallachöpis mas alli kashqaqa?

7. ¿Imatataq cristiänu mayinkunata apostol Pëdru consejarqan?

⁷ Dios yanapaptin punta kaq cartanta apostol Pëdru qellqanqanchöqa, rurëta yachayanqanwan wawqi paninkunata yanapayänampaqmi nirqan. Kënömi qellqarqan: “Alläpa alli kënimpita Dios qokunqan tukïläya qarëkunata shumaq rikaq mayuralkuna kayanqëkimannö, imatapis rurëta yachayänëkipaq chaskiyanqëki qarëta, jukniki juknikikuna sirwinakuyanqëkichö inshiyë” (1 Pëd. 4:10). Imatapis rurëta yachanqantsiktaqa, manam wawqi panintsikkuna envidiamänapaq kaqta o llakikurnin  qelanäkuriyänampaq kaqman pensartsu rurëta dejarinantsik. Tsëta rurarqa, manam llapan puëdinqantsikmannötsu Jehoväta sirwikashwan.

8. 1 Corintius 4:6 y 7 ninqannö, ¿imanirtan rurëta yachanqantsikpitaqa alabakushwantsu?

⁸ Rurëta yachanqantsiktaqa, puëdinqantsikmannömi utilizänantsik, peru tsëkunarëkur alabakuypitam cuidakunantsik (leyi 1 Corintius 4:6, 7). Këllaman pensarishun: itsa qamqa piwampis Bibliata raslla estudiar qallëkunki, tsëqa allim, y tsënö rurarmi sïguinëki. Rurëta yachanqantsikmannö yanapakuyqa allim, peru rurëta yachanqantsikpita allish tukuyqa mana allim kanman. Pensari: itsa Diospita yachatsikuykar juk nunawan Bibliata estudiar tsëllaraq qallëkuyarqunki. Y itsa grüpuykichö këkaq wawqi panikunata willarita munanki. Peru tsëta willakunëkipaq këkaptiki, juk nunata revistan dejapunqanta juk pani willakuykanman. Pëqa, juk nunatam revistan jaqipushqa, peru qamqa juk nunata Bibliata estudiatsirmi qallëkurqunki. ¿Imatataq ruranki? Yachatsikuykar pasanqëki grüpïkichö këkaqkunata yanapanampaq kaqtaqa musyankim, peru revistata qarakunqampita kushishqa këkaq pani mana llakikunampaq juk kutichö willakunëkipaq kaqta decidirinki. Tsëta ruranqëkiqa, ¡kuyakoq kanqëkitam rikätsikun! Tsënö kaptimpis, nunakunata Bibliata estudiatsita qallëtaqa ama dejëtsu. Tsëta rurëta yachanqëkiqa, juk qarë cuentam.

9. ¿Imanötan rurëta yachanqantsikkunata utilizashwan?

⁹ Yarpäshun, ima rurëta yachaqtapis Jehovämi kamamarquntsik. Tsëqa, congregacionchö wawqi panintsikkunata yanapanapaq utilizäshun y ama gälakunapaqqa (Filip. 2:3). Diospa voluntäninta ruranapaq kallpantsikta y rurëta yachanqantsikta utilizashqaqa, imëkarëkurmi kushikushun. ¿Imanir? Llapan kapamanqantsikta Jehoväta alabanapaq utilizashqam y manam gälakunapaqtsu ni wakinkunapita mas alli kanqantsikta ninapaqtsu.

10. ¿Imanirtan wakinkunawan igualatsikuyqa upa kë cuenta kanman?

¹⁰ Mana cuidakushqaqa, itsa wakinkunata rurëta mana yachayanqanwan, rurëta yachanqantsikkunata igualatsir qallëkushwan. Këllaman pensarishun: itsa juk wawqi, semäna ushë reunionkunachö discursukunawan shumaq yachatsikunman. Tsëta rurëtaqa allim yachan. Peru shonqunchöqa, pënö yachatsikuyta mana puëdeq wawqipita mas alli kanqanta pensanman. Tsënö kaptimpis, juknin kaq wawqiqa posadatsikoq, wamrankunata shumaq wätaq y Diospita gänas gänas yachatsikoq wawqi kanman. Mëtsikaq wawqi panikuna rurëta yachayanqanwan  Jehoväta sirwiyanqampita y wakinkunata yanapayanqampitam alläpa agradecikuntsik.

11. ¿Imanirtan Jesus ruranqannö ruranapaq kallpachakunantsik?

¹¹ Wakinkunawan igualatsikuy mana alli kaptimpis, Jehoväta sirwiyanqanchö rurayanqampitaqa yachakuyta puëdintsikmi. Jesuspita imata yachakunqantsikllaman pensarishun. Imanö kanqampita y imatapis imanö ruranqampitaqa, yachakuyta puëdintsikmi (1 Pëd. 2:21). Pë ruranqannö ruranapaq llapan puëdinqantsikmannö kallpachakushqaqa, Jehovätam mas alli sirwishun y pëpita yachatsikunqantsikchömi mas alli yarqapakushun.

12, 13. ¿Imatataq rey Davidpita yachakuntsik?

¹² Bibliachö willakunqan wakin nunakunapitaqa, pantareq kashqa kayaptimpis yachakuyta puëdintsikmi (Heb. 6:12). Jukqa rey Davidmi karqan. Pëpaqmi Jehovä kënö nirqan: “Davidtam shonqüpaqtanö tarirqö” (Hëch. 13:22). Peru Davidqa pantareq nunam karqan. Rasumpa kaqchöqa, alläpa jatun jutsakunatam rurarqan. Tsënö kaptimpis, pëpitaqa yachakuyta puëdintsikmi. Jutsata ruranqampita corregiyaptinqa, manam tsapäkurqantsu. Tsëpa rantinqa, consejayanqantam wiyakurqan y shonqupita patsëmi jutsankunapita arrepentikurqan. Tsëmi Jehoväqa perdonarqan (Sal. 51:3, 4, 10-12).

¹³ David imapa pasanqanmi, kë tapukuykunaman pensashqa yanapamäshun: “Pipis consejamaptin, ¿imanötan contestä? ¿Jinan höraku pantashqa kanqäta nï o tsapäküku? ¿Tapupämar qallëkuyaptinku jukta tumpä? ¿Pantanqäman yapë mana ishkinäpaqku kallpachakü?”. Jehoväta sirweq ollqukunapaq y warmikunapaq Bibliachö willakunqanta leyirqa, tsë tapukuykunaman pensashun. ¿Noqantsik pasëkanqantsikpaku pasayarqan? ¿Imanö kayanqantataq rikätsikuyarqan? Cada nunapita yachakurnin, kënö tapukushun: “Jehoväta mana dejëpa sirweq tsë nunanö kanäpaqqa, ¿imatataq ruräman?”.

14. ¿Imanötan yanapamantsik wakinkuna rurayanqanta rikanqantsik?

¹⁴ Jina jövin o edäna wawqi panintsikkunapitapis yachakuyta puëdintsikmi. Itsa congregacionnintsikchö mëqan wawqi panintsikpis, Jehoväta sirwinqanchö pruëbakunapa pasëkan. Itsapis jövin mayinkuna llutakunata ruranampaq inkitëkäyan, Diosta sirwinanta familiankuna michäyan o qeshyëkan. Tsë wawqi o pani tsëchö tsarakunampaq, ¿imata ruranqampita yachakuyta puëdintsikku? Pëkuna imata  rurayanqanta rikashqaqa, mana allikunapa pasashqam pëkunapita yachakunqantsik tsarakunapaq yanapamäshun. Jehoväman tsënö markäkuyanqampita o yärakuyanqampitam, tsë wawqi panintsikkunata valorantsik y tsërëkurmi alläpa kushikuntsik (Heb. 13:7; Sant. 1:2, 3).

15. Jehoväta kushishqa sirwir sïguinapaqqa, ¿Pablu imata consejakunqantaq yanapamäshun?

¹⁵ Jehoväta llapan puëdinqantsikmannö sirwishqaqa, congregacionchömi yamë y juknölla kawakushun. Tsëtam punta kaq cristiänukuna rurayarqan. Cada ünum tukuy rurëta yachayaq y cargukunayoq kayaq (1 Cor. 12:4, 7-11). Peru manam tsërëkurtsu gananakuyta procurayaq ni grüpu grüpu rakikäyaq. Tsëpa rantinqa, Ëfesu markachö cristiänukunaman cartakurmi, Pabluqa puëdiyanqanmannö “Cristupa cuerpun kaqkunata sinchiyätsiyänampaq” nirqan. Jina kënöpis nirqanmi: “Cuerpuchö llapan këkaqkuna rurayänampaq kaqta cada ünu rurarqa, cuerpu winanampaqmi yanapakuyan, tsënöpa entëru cuerpu kuyakïchö sinchiyätsishqa kanampaq” (Efes. 4:1-3, 11, 12, 16). Kanan witsan congregacionkunachö rikanqantsiknöpis, tsë consëjukunata wiyakoqkunaqa, yamë y juknölla kawakuyänampaqmi yanapakuyarqan.

16. ¿Imata ruranëkipaqtan churapakankiman? (Hebrëus 6:10).

¹⁶ Wakinkunawan mana igualatsikunëkipaq churapakë. Tsëpa rantinqa, Jesuspita yachakuy y pënö kanëkipaq kallpachakuy. Diosman unë y kanan witsan markäkoq nunakunapita yachakuy. Llapan puëdinqëkimannö Jehoväta sirwirnin sïgui, y yarpë, “Diosqa manam mana alli kaqta ruraqtsu” y ruranqëkikunata qonqareqtsu (leyi Hebrëus 6:10). Kushishqa kanampaq kallpachakunqëkita valoranqanta yarpar, Jehoväta kushishqa sirwirnin sïgui.