1. Diosta sirwinqantsikchöqa, ¿imakunata ruranapaqtan churapakashwan?

 JEHOVÄTA rasumpa sirweqkunaqa alläpam kuyantsik y llapan puëdinqantsikmannömi sirwita munantsik. Peru tsëta logranapaqqa mas alliyänapaqmi churapakänantsik, itsa Dios munanqannö nuna kanapaq, imatapis rurëta yachakunapaq y wakinkunata imanöpapis yanapanapaq churapakashwan.

2. ¿Imanirtan Diosta mas sirwinapaq churapakänantsik y imanirtan tsëta logranapaq kallpachakunantsik?

² ¿Imanirtan Diosta sirwinqantsikchö masta ruranapaq churapakashwan, y imatataq rurashwan tsëta logranapaq? Masqa, kuyamaqnintsik Teytantsik Jehovä kushishqa kananta munarmi, imata ruranapaqpis churapakantsik. Pëqa, rurëta yachanqantsikkunawan sirwinqantsikpitam kushikun. Jina wawqi panintsikkunata yanapëta munarmi, Jehoväta sirwinqantsikchö mas alliyëta munantsik (1 Tes. 4:9, 10). Jehoväta ëka watapana sirwikarpis, mas alli sirwinapaqmi kallpachakur sïguinantsik. Tsëta imanö ruranapaq kaqta rikärishun.

3. 1 Timoteu 4:12 a 16 ninqanchöqa, ¿imakunatataq Timoteuta apostol Pablu consejarqan?

³ Timoteupa jutinta apaq punta kaq cartata Pablupita chaskinqan witsan jövinllaraq karpis, Timoteuqa unëpanam creikoqkunata rikarnin yanapakuykarqan. Tsënö kaptimpis, Diosta sirwinqanchö mas alli kanampaqmi Pabluqa consejarqan (leyi 1 Timoteu 4:12-16). Pablu qellqanqanman ichik yarpachakurishqaqa, ishkë rurëchö Timoteu alliyänanta Pablu munanqantam cuentata qokurishun. Puntataqa, këkunachö mas alliyänampaqmi nirqan: mas kuyakoq kanampaq, Diosman mas markäkunampaq o yärakunampaq, y panikunawan mas  alli portakunampaqmi. Jina këkuna rurëchöpis mas alliyänampaqmi nirqan: congregacionchö mas alli leyinampaq, pitapis shumaq consejanampaq y mas alli yachatsikunampaq. Këchöqa, Diosta mas alli sirwinantsikpaq churapakänapaq Timoteu ruranqankuna imanö yanapamanqantsiktam rikärishun. Y Diosta mas sirwinapaq imakunata rurëta puëdinapaq kaqtam yachakushun.

4. Filipensis 2:19 a 22 ninqannöpis, ¿imanirtan Jehoväqa mas yanapakunampaq Timoteuta permitirqan?

⁴ ¿Imanirtan Timoteu imëkachö yanapakunampaq Jehovä permitirqan? Pë munanqannö nuna kaptinmi (leyi Filipensis 2:19-22). Timoteupaq Pablu qellqanqanchömi, humildi, mana jaqikoq, alli trabajaq y confiakuypaq jövin kanqanta rikantsik. Wawqi panikunatam kuyëpa trataq y pëkunapaqmi yarpachakoq. Tsënö kaptinmi, Pabluqa Timoteuta alläpa kuyaq y fäcil mana kaptimpis mandanqankunata ruranampaq kaqmanmi confiakurqan (1Cor. 4:17). Munanqannö nuna kanapaq kallpachakushqaqa, Jehoväqa masmi kuyamäshun y congregacionchö mas yanapakunapaqmi permitimäshun (Sal. 25:9; 138:6).

5. (1) Imanö nuna kanqantsikchö imachö mas alliyänapaq kaqta musyanapaqqa, ¿imatataq rurashwan? (2) ¿Imatataq fötuchö këkaq pani rurëkan mas llakipäkoq kanqanta rikätsikunampaq?

⁵ Imachö alliyänapaq kaqta alli rikäshun. Imanö nuna kanqantsikchö, imakunachö alliyänapaq kaqta rikëkatsimänapaq Jehoväta mañakushun. Tsëpitana, imachöpis alliyänapaq kaqta jukta akrashun. ¿Wakinkunata mas llakipëchö, o yanapëta munënintsikchöku pishipëkantsik? ¿Masku kallpachakunantsik wakinkunawan yamë kawakunapaq o perdonanapaq? Tsëkunachö imanö këkanqantsikta allilla mana musyarqa, confiakunqantsik amïguntsiktam tapurishwan (Prov. 27:6).

6. Imanö nuna kanqantsikchöqa, ¿imanötan imachöpis alliyashwan?

⁶ Churapakanqantsikta logranapaq kallpachakushun. ¿Imanötan tsëtaqa rurashwan? Imanö kënintsikchö mas alliyëta munanqantsikpaqmi, publicacionkunachö y Bibliachö ima ninqankunata ashishwan. Këllaman pensarishun: itsa perdonakoq këchö mas alliyëta munantsik. Tsëqa allichi kanman, ofendeqninkunata perdonashqan y mana perdonashqan nunakunapaq Bibliachö willakunqanta leyinantsik y tsëman pensanantsik. Jesus ruranqanman pensarishun.  Pëqa, wakinkunata perdonanampaqmi listu këkarqan (Lüc. 7:47, 48). Pëqa imachö pishipäyanqanta rikänampa rantinmi, alliyar imanö kayänampaq kaqman pensaq. Peru fariseukunaqa, ‘wakin kaqkunatam mana kaqpaq churayaq’ (Lüc. 18:9). Tsëpitaqa, kë tapukuykunaman pensashun: “¿Wakin imanö kayanqantataq rikä? ¿Imakunarëkur alli nuna kayanqantaqa rikäku?”. Pitapis perdonanantsik fäcil mana kaptinqa, imakunarëkur alli nuna kanqanta juk listaman churëkurmi, kë tapukuykunaman pensashwan: “¿Imanötan pëta Jesus rikan? ¿Perdonanmantsuraq?”. Tsëkunata ruranapaq kallpachakushqaqa, tsë wawqita o panita imanö rikanqantsikmi cambiarinqa. Pipis mana allita ruramashqaqa, itsa qallananllachö perdonanantsikpaqqa fäciltsu kanqa. Peru tsëchö alliyänapaq kallpachakushqaqa, wakinkunata perdonëchömi alliyäshun.

7. Proverbius 22:29 ninqannö, ¿imatapis rurëta yachaqkunata imata rurayänampaqtan Jehovä permitin?

⁷ Juk rurëkunata yachakunapaqpis churapakashwanmi. Betel wayikunata, asamblëakunapaq localkunata, y Diospita Yachatsikuna wayikunata rurëchö yanapakoqkunaman pensari. Mëtsikaqmi yachaq wawqikunawan trabajarnin yachakuyarqan. Fötukunachö rikanqantsiknömi, asamblëakunapaq localkunata y Diospita Yachatsikuna wayikunata altsapäyänampaqmi, ollqukuna y warmikuna yachakuykäyan. “Imëpita imëyaqpis” Rey Jehovä y “mandakoqkunapa Reynin” Jesusmi, tsënö yanapakoq nunakunawan imëkata rurayashqa (1 Tim. 1:17; 6:15; leyi Proverbius 22:29). Jehoväta alabanapaqmi, imata rurëta yachanqantsikchö alli trabajanapaq kallpachakuyta munantsik (Juan 8:54).

8. ¿Imatataq ruranantsik imachö alliyänapaq kaqta cläru musyanapaq?

⁸ Imachö alliyänapaq kaqta alli rikäshun. ¿Imata ruranapaqtan churapakashwan? Imachö alliyänapaq kaqta nimänapaq, creikoqkunata rikaqkunawan o congregacionta watukaqwan parlarishun. Këllaman pensarishun: yachatsikur imanö parlanqantsikchö o Diospita imanö yachatsikunqantsikchö alliyänapaq nimashqaqa, ima asuntuchö pishipanqantsikta cläru nimänapaqmi tapushwan. Tsëpitaqa, nimanqantsikchö alliyänapaq kallpachakushun. ¿Imanötan tsëtaqa rurashwan?

9. ¿Imatataq rurashwan imatapis yachakuyta munarqa?

⁹ Churapakanqantsikta logranapaq kallpachakushun. Alli yachatsikoq këta munanqantsikman pensarishun. Tsëqa, Mas alli leyinapaq y yachatsikunapaq neq follëtutam alli estudiashwan. Y semänachö kaq reunionchö yachatsikunantsik kaptinqa, allim kanman tsë junaq manaraq chämuptin, alli yachatsikuyta yachaq wawqita wiyamänapaq y imachö alliyänapaq kaqta nimänapaq nirishwan. Yachatsikunapaq kaqta tiempuwan alli preparakushqaqa, mas alli yachatsikoqmi kashun y wakinkunapis alli trabajaq y confiakuypaq nuna kanqantsiktam rikäyanqa (Prov. 21:5; 2 Cor. 8:22).

10. Pishipanqantsikchö alliyänapaq imata ruranapaq kaqta willakaramuy.

¹⁰ ¿Imatataq rurashwan mana alli kanqantsikchö alliyëta munarqa? ¡Ama llakikur qelanäkurishuntsu! Alli leyita mana puëdeq Garry jutiyoq wawqipita parlarishun. Pëqa reunionkunachö leyitash alläpa mantsakoq. Tsënö kaptimpis, manash qelanäkurinaqtsu, mas alliyänampaqshi kallpachakunaq. Publicacionkunachö consëjukunata tarinqan y wakin wawqikuna yanapayanqampitam kananqa, reunionkunachö, juk junaq asamblëakunachö  y jatun kaq asamblëakunachö yachatsikurnin yanapakun.

11. Timoteuta pasanqannöpis, ¿imatan yanapamäshun mas cargukunachö yanapakunapaq?

¹¹ ¿Timoteuqa yachatsikurnin alli parlakoq këman y alli yachatsikoq këmanqa charqanku? Bibliachöqa manam nintsu, peru Pablu consejakunqanta wiyakunqantaqa musyantsikmi. Tsëqa, ichikllapa ichikllapachi alliyarqan y cargunkunatapis mas allichi cumplirqan (2 Tim. 3:10). Timoteunö rurashqaqa, mas cargukunata chaskinapaqmi listu këkäshun.

12. ¿Imanötan qamta wakinkuna yanapayäshurqunki?

¹² ¡Wakinkuna yanapamashqaqa alläpam kushikuntsik! Këllaman pensarishun: qeshyëkashqa Hospitalchö Yawarta Mana Churamänapaq Yanapakoq wawqikuna o Hospitalchö Qeshyëkaqkunata Watukaq wawqikuna chärayämuptinqa, alläpam kushikuntsik. O mana allikunapa pasëkashqa wiyamänapaq y shoqamänapaq creikoqkunata rikaqkunapita wawqikuna tiempunkunata rakiyanqampitam agradecikuntsik. Y juk nunata Bibliata estudiatsinapaq yanapamänata wanashqaqa, alläpam agradecikuntsik unëpana precursor wawqintsik o panintsik yanaqämashqa y imachö mas alliyänapaq nimashqa. Jesusmi kënö nirqan: “Imatapis qokïmi imata chaskipitapis mas kushikïtaqa apamun” (Hëch. 20:35). Tsë llapan wawqi panintsikkunam, yanapamarnintsik kushishqa kayan. Y pëkunanö rurashqaqa, noqantsikpis kushishqam kashun. Tsëkunata o jukkunata rurarnin Jehoväta mas sirwinapaq churapakanqantsiktaqa, ¿imanötan lograshun?

13. Imata ruranapaqpis churapakarqa, ¿imatataq cuentachö katsinantsik?

¹³ Imata ruranapaq o imanö kënintsikchö imachöpis mas alliyänapaq kaqta cläru katsishun. Ama kënöqa pensashuntsu: “Congregacionchö mas yanapakuytam munä”. Peru mëpa qallanapaq kaqta y churapakanqantsikta lograshqa kanqantsikta musyanapaqqa, manam fäciltsu kanman. Tsëmi mas alliqa kanqa, imata logrëta munanqantsikta musyanantsik. Itsa tsëpaqqa, mëchöpis apuntanqantsik y logranapaq imata ruranapaq kaqta qellqanqantsik yanapamäshun.

14. Imata ruranapaqpis churapakarqa, ¿imapaqtan listu këkänantsik?

¹⁴ Imatapis ruranapaq churapakarqa, imata  cambianapaqpis listum këkänantsik. ¿Imanir? Imapis pasakunqankunata llapanta controlëta mana puëdirmi. Këllaman pensarishun: Tesalönica markachö juk congregacion patsakänampaqmi, apostol Pablu yanapakurqan. Y tsëchö mushoq wawqi panikunata yanapanampaqmi, juk tiempupa quedakïta munarqan. Peru chikeqninkunarëkurmi tsë markapita qeshpir ëwakurqan (Hëch. 17:1-5, 10). Tsëchö quedakurqa, congregacionchö kaqkunatam peligruman churanman karqan. Peru Pabluqa, manam tsëkunapa pasarnin qelanäkurirqantsu. Tsëpa rantinqa, mas tiempu pasariptinmi, tsë wawqi panikunata yanapanampaq Timoteuta mandarqan (1 Tes. 3:1-3). Tesalönicachö wawqi panikunaqa, yanapakoqkunata wanayanqanman ëwanampaq Timoteu listu këkanqampitachi kushikuyarqan.

15. Kawënintsikchö imapis cambiariptin munanqantsikkunata rurëta manana puëdishqaqa, ¿imatataq rurashwan? Juk wawqitawan warminta pasanqanwan entienditsikaramuy.

¹⁵ Tesalönica markachö këkaptin, Pablu imata pasanqampitaqa yachakuyta puëdintsikmi. Itsa Jehoväta sirwinqantsikchö mas yanapakïta munëkashqa, imapis cambiarinman y munanqantsiknöqa yanapakuyta puëdishunnatsu (Ecl. 9:11). ¿Imatataq rurashwan? Rurëta puëdinqantsikta ruranapaqmi churapakashwan. Tsëtam Ted jutiyoq wawqi y Hiedi jutiyoq warmin rurayarqan. Salorninkunarëkurmi Betelchö yanapakuyta dejariyarqan. Peru, Jehoväta alläpa kuyarmi, juknöpa yanapakuyänampaq churapakäyarqan. Puntataqa, precursor regularmi kayarqan y tsëpitanam precursor especial kayänampaq niyarqan. Tsëpitanam wawqi Tedta, congregacionkunata watukaqkunata rantimpänampaq yachatsiyarqan. Y tsënö yanapakuykäyaptinmi, congregacionta watukaq wawqikuna ëka edäyaqllana tsënö yanapakuyänampaq kaq cambiarirqan y Tedwan Hiediqa, mananam congregacionkunata watukarnin yanapakuyta puëdiyarqannatsu. Qallananllachö llakikurpis, Jehovätaqa juknöpapis sirwita puëdiyanqantam pensayarqan. Tedmi kënö nin: “Jehoväta sirwiyanqächöqa, juknöpapis yanapakuyta puëdiyanqätam yachakuyarqö”.

16. ¿Imatataq Gälatas 6:4 ninqampita yachakuntsik?

¹⁶ Kawënintsikchö imapis pasakunqantaqa, manam llapanta controlëta puëdintsiktsu. Tsëmi këta yarpänantsik: Jehoväqa manam ima cargukunata chaskinqantsikpitatsu kuyamantsik. Jina munanqantsik cargukunata wakinkuna chaskiyaptinqa, manam llakikushwantsu. Hiedim kënö nin: “Wakinkunawan igualatsikurqa, manam yamëtsu kawakushun” (leyi Gälatas 6:4). Tsëmi Jehoväta mas sirwinapaq  y wawqi panintsikkunata mas imanö yanapanapaq kaqman yarpachakushwan. b

17. ¿Imatataq rurashwan mas cargukunata chaskita munarqa?

¹⁷ Wananqantsikllawan kawakushqa y jaqa këman chëpita cuidakushqaqa, Diosta sirwinqantsikchömi mas cargukunachö yanapakuyta puëdishun. Shamoq tiempuchö rurëta munanqantsikta logranapaq yanapamänapaq kaqkunata, kanan ruranapaq churapakäshun. Këllaman pensarishun: precursor regular këta munarqa, ¿manatsuraq juk tiempupa precursor auxiliar kashwan? O creikoqkunata rikaqkunapa yanapaqnin këta munarqa, ¿manatsuraq Diospita maslla yachatsikunëkipaq o edäna y qeshyëkaq wawqi panikunata watukanëkipaq tiempuykita patsätsinkiman? Kanan tiempuchö imatapis yachakunqëkim, shamoq tiempuchö juk cargukunata chaskinëkipaq yanapashunki. Imanö kaptimpis, llapan puëdinqëkimannö Jehoväta mas sirwinëkipaq kallpachakuy (Rom. 12:11).

18. ¿Imatataq Beverley ruranqampita yachakuntsik? (Fötutapis rikäri)

¹⁸ Diosta mas sirwinapaq churapakëtaqa, manam edäna kanqantsikrëkurtsu dejarishwan. Tsëtam, setenta y cincu watayoq Beverley jutiyoq panintsik pasanqan rikätsikun. Salorninrëkurmi puritaqa allillaqa puëdeqtsu, tsënö kaptimpis, Jesus Wanunqanta Yarpäna reunionman nunakunata invitëchöqa yanapakuytam munarqan. ¿Imatataq rurarqan? Rurëta puëdinqankunata ruranampaqmi churapakarqan y tsëkunata lograrqa, alläpam kushikurqan. Tsënö kallpachakunqanta rikarmi, wakinkunapis Diosta sirwiyanqanchö masta rurayänampaq churapakäyarqan. Jehoväqa, puëdiyanqanmannö kallpachakuyanqampitam edäna wawqi panikunata kuyan (Sal. 71:17, 18).

19. Diosta sirwinqantsikchö mas yanapakuyta munarqa, ¿imakunata ruranapaqtan churapakashwan?

¹⁹ Rurëta puëdinapaq kaqkunata ruranapaq churapakäshun. Jehovä munanqannö nuna kanapaq kallpachakushun. Diosnintsik y pëta sirweqkunata dirigeqkuna imachöpis yanapakunata permitimänantsikpaq imatapis yachakushun. Wawqi panintsikkunata mas yanapanapaq tiempuntsikta patsätsishun. c Tsëkunata rurashqaqa, Jehoväqa bendicimäshunmi, y Timoteutanöpis poqu cristiänu tikrëkanqantsiktam llapankuna rikäyanqa (1 Tim. 4:15).