Juk diccionariuchömi kënö nin: jurëqa “Diosta testïgutanö churëkur imatapis parlanqantsik o änikunqantsik rasumpa kanqanta rikätsikuymi” (Diccionario de uso del español, de María Moliner). Parlarnin o qellqarnimpis jurëtaqa puëdintsikmi.

Wakinqa, Jesus kënö ninqampitam juramentukunata rurë mana alli kanqanta niyan: “Ama ni imanöpapis jurayëtsu […]. ‘Awmi’ ninqëkiqa, awmi katsun, y ‘Manam’ ninqëkiqa, manam katsun; porqui parlarir mana cumpliqa, Satanaspitam shamun” (Mat. 5:33-37). Awmi, Jesusqa musyarqanmi Moises qellqanqan leychöqa israelïtakuna juk kutikunachö jurayänampaq ley exigikunqantaqa y Diosta wakin sirweqkunapis jurashqa kayanqanta (Gen. 14:22, 23; Ex. 22:10, 11). Jina musyarqanmi Jehoväpis juramentukunata rurashqa kanqanta (Heb. 6:13-17). Tsëmi Jesusqa mana juranapaq kaqtaqa nikarqantsu. Tsëpa rantinqa, imarëkurllapis jurëpita cuidakunapaqmi parlëkarqan. Parlanqantsiktaqa imëpis cumplinantsikmi, y Jehoväqa tsëta ruranatam shuyaran.

Tsëqa, ¿imatataq rurankiman juranëkipaq niyäshuptikiqa? Puntataqa, cumplinëkipaq kaqtam següru kanëki. Peru mana següru karqa, ama jurëtsu. Diospa Palabranchömi kë consëju këkan: “Mana cumplinëkipaq kaptinqa ama imatapis änikunkitsu” (Ecl. 5:5). Tsëpitaqa, juranëki kaqpaq Bibliachö ima ninqanta alli rikë y Bibliachö yachakunqëkimannölla rurë. ¿Bibliachö ima ninqankunatataq cuentaman churanëki?

Wakin juramentukunaqa Dios munanqannömi kayan. Këllaman pensarishun: Jehoväpa testïgunkuna juk warmiwan ollqu casakuyaptinqa, Diospa y ishkë testïgukunapa rikëninchömi, juntu kawayanqanyaqqa kuyanakuyänampaq, cuidanakuyänampaq y respetanakuyänampaq äninakuyan. Tsëqa juk juramentu cuentam. (Itsa wakin casakoqkunaqa tsënö niyantsu, tsënö karpis, Diospa rikëninchö juntu kayänampaqmi äninakuyan). Tsëpitanam casäduna kayanqanta willakarayämun y imëyaqpis juntu kayänantam pïmëpis shuyaran (Gen. 2:24; 1 Cor. 7:39). Casakur äninakuyanqanqa Dios munanqannömi këkan.

Wakin juramentukunaqa, manam Dios munanqannötsu kayan. Këllaman pensarishun: Diosta sirweqkunaqa, nacionninkunata armakunawan defendiyänampaq o Diospa contran churakäyänampaqqa manam jurayantsu. Tsëta rurarninqa, manachi Dios mandakunqanta wiyakuykäyanmantsu. Diosta sirweqkunaqa “mana cäsukoq nunakunanö” mana karmi, pipa contrampis shäriyantsu ni guërrakunamampis ëwayantsu (Juan 15:19; Is. 2:4; Sant. 1:27).

Wakin asuntukunachö jurëtaqa cada ünum rikänan. Imapaqpis manaraq jurarmi, Diosta sirweqqa Jesus kënö ninqanta alliraq rikänan: “Römata  gobernaqtaqa, Römata gobernaqpa kaqta pagayë, peru Diostaqa, Diospa kaqta” (Lüc. 20:25).

Këllaman pensarishun: itsa juk wawqi o juk pani juk nacionchö täränampaq o juk nacionta ëwanampaq papelninkuna qoyänampaq juranampaq kaqtaraq musyarinman. Tsëpaq juranampaq kaq Diospa leynimpa contran kaptinqa, Bibliapita yachakunqanmannömi mana juranmantsu. Itsa autoridäkunaqa concienciampa contran tsë juramentu mana kanampaq cambiananta permitiyanman.

Juknöpa juranampaq permitiyanqanqa, Romänus 13:1 textuchö ninqanmannömi këkanman: “Llapan nunakuna autoridäkunata respetakur cäsukuyätsun”. Tsëmi juk wawqi o paniqa, autoridäkunata wiyakunampaq Dios mandanqanta wiyakurnin, juranqanta mana alli kanqantaqa itsapis pensanman.

Jina cada ünum decidinan imatapis rikëkur juranampaq kaqta niyaptinqa. Unë witsan Röma y escïta nunakunaqa, espädankunarëkurmi jurayaq. Guërrakunachö yanapaq diosninkunapa jutinchömi, parlayanqankuna rasumpa kanqanta niyaq. Grecia nunakunanam, ciëluman makinkunata pallarirkur jurayaq. Tsënömi rikätsikuyaq niyanqanta y rurayanqanta Dios rikëkanqanta y pëta cuentata qoyänampaq kaqta.

Peru këmi cläru këkan: Jehoväta sirweqqa, manam nacionkuna imatapis adorayanqampa jutinchö y tsëkunata rikëkur juranmantsu. Peru ¿cortiman ëwaptin Bibliaman makinta churëkur rasumpa kaqta parlanampaq jurananta niyaptinqa? Tsënö kaptinqa, itsa juranampaq decidinman. Y itsa tsënöqa ruranman, imatapis cuentaman churëkur Diosta unë witsan sirweq nunakuna jurashqa kayanqanta Bibliachö niptinmi (Gen. 24:2, 3, 9; 47:29-31). Tsëta decidirqa, Diospa rikëninchö rasumpa kaqta parlanantsikpaq kaqta jurëkanqantsiktam yarpänantsik. Tsëmi imata tapumashqapis rasumpa kaqllata parlakunantsik.

Jehoväwan amïgu kënintsikta alläpa valorarmi, imapaqpis manaraq jurarnin pëman mañakunantsik y alliraq pensanantsik. Bibliachö ninqampa y concienciantsikpa contran mana kanampaqmi segurakunantsik. Y imapaqpis jurarqa, cumplinapaq kallpachakushun (1 Pëd. 2:12).