Tsënö pasakuptinqa, punta kaq majanwan casädu kanqan manana välinqanta y kanan casakunqan välinqantam congregacionchö kaqkunaqa niyanqa. Tsënö imanir pensayanqanta musyanapaq, divorciakuypaq y yapë casakuypaq Jesus ima ninqanta rikärishun.

Mateu 19:9 ninqanchömi, imarëkurlla pipis majampita divorciakuyta puëdinampaq kaqta Jesus rikätsikurqan. Tsëchömi kënö nin: “Pipis majan rakcha rurëman mana ishkishqa këkaptin warmimpita divorciakurir jukwan casakoq kaqqa, mana majanwan oqllanakïmanmi ishkishqa”. Jesus ninqampitaqa këkunatam yachakuntsik: 1) pipis divorciakuytaqa puëdin, majan piwampis oqllanakuy jutsaman ishkishqa kaptinllam y 2) Bibliachö ninqannö libri mana këkar divorciakurir jukwan casakoqqa, mana majanwan oqllanakuy jutsatam ruran. a

Tsëqa, ¿ima nitataq Jesusqa munëkarqan? ¿Mana majanwan oqllanakuy jutsata rurarir jukwan casakunampaq Bibliachö ninqannö libri këkanqantaku? Manam llapan cäsukunachötsu. Pipis casädu këkar mana majanwan oqllanakuy jutsata ruraptinqa, jutsannaq kaqmi perdonanampaq o mana perdonanampaqpis decidinqa. Perdonëta mana munar divorciakuriptinqa, divorciu papelninkuna yarqaramuptinmi, libri këkäyanqa piwampis casakuyänampaq.

Tsënö kaptimpis, itsa warmi kaqqa qowanwan sïguita munar perdonëta munanman. Peru ¿imaraq kanman warmin perdonëta munëkaptimpis kikinlla papelkunata ruraratsir divorciakuriptinqa? Warmin perdonëta munëkaptinmi, Diospa rikënimpaqqa, ollqu kaqqa yapë casakunampaq libritsu këkanman. Tsënö mana libri këkar jukwan casakurqa, yapëmi mana majanwan oqllanakuy jutsata ruran. Tsëqa, congregacionchö creikoqkunata rikaqkunaqa kimaq o mas wawqikunam, tsë wawqiwan yapë juntakäyanqa tsë jutsata ruranqampita juzgayänampaq (1 Cor. 5:1, 2; 6:9, 10).

Diospa rikëninchö libri mana këkar juk wawqi yapë casakuptinqa, ¿imanötan congregacionchö wawqi panikuna punta casakunqanta y tsëllaraq casakunqanta rikäyan? Diospaqqa, ¿puntata casakushqa kanqan välinllaraqku? ¿Puëdinmanraqku traicionaqnin qowanta juk warmi perdonanampaq o mana perdonanampaq decidita? ¿Jutsachöku këkan tsë wawqi yapë casakurqa?

Kananyaqqa, tsë asuntuta kënömi rikaq kantsik: punta kaq warmin kawëkaptinraq, manaraq casakushqa kaptin y mana majanwan oqllanakuy jutsata mana rurashqa kaptinqa, tsë ollqu divorciakurir jukwan casakunqantaqa, kanan kaq majanwan jutsachö këkäyanqantam neq kantsik. Peru divorciakuypaq y yapë casakuypaq parlarqa, Jesusqa manam jutsaman mana ishkishqa kaqpaqqa parlëkarqantsu. Tsëpa rantinqa, Bibliachö ninqannö libri mana këkar divorciakurir jukwan casakoq nuna, mana majanwan oqllanakuy jutsata ruranqantam entienditsikurqan. Tsënö kaptinqa,  divorciakur y yapë casakur punta casädu këninta tsë nuna ushakätsishqa kanqantam Jesusqa rikätsikurqan.

Pipis divorciakurir jukwan casakuptinqa, mananam punta kaq majan perdonanampaq o mana perdonanampaq decidita puëdinnatsu. Tsëmi pëqa, imata decidinampaqpis manana yarpachakunannatsu. Y congregacionchö kaqkunaqa, manam niyanmantsu punta kaq majan wanukuptinraq, jukwan casakuptinraq o piwampis oqllanakuy jutsa rurëman chaptinraq, jutsallakushqa majan yapë casakunqan välinqanta. b

Qallananchö juk wawqiwan juk pani casädu këkäyanqampaq parlanqantsikchöqa, ollqu kaqmi mana majanwan oqllanakuy jutsaman ishkishqa karqan y divorciakurqan. Peru ¿imaraq kanman jukwan mana oqllanakushqa këkar divorciakurir yapë casakuptinqa? O ¿imaraq pasakunman manaraq divorciakurnin jukwan oqllanakuy jutsata mana rurashqa kaptin, sinöqa divorciakurirna tsë jutsaman ishkiriptin y warmin perdonëta munëkaptimpis jukwan yapë casakuptinqa? Imanö kashqa kaptimpis, divorciakurir yapë casakurqa, jukwan oqllanakuy jutsatam rurashqa, tsëmi punta kaq warminwan casädu kanqanqa välinnatsu. Leychö ninqannö y autoridäkunapaqqa, tsë nuna yapë casakunqanqa välinmi. 1980 wata 15 de febrëru killa La Atalaya revistapa 30 kaq päginanchömi, kënö entienditsikurqan: “Kananqa, yapënam casädu këkan, tsëmi divorciakurir puntata casakunqan warmiwanqa kutita puëdinnatsu; punta kaq warmiwan casädu kanqanqa, pëpita divorciakunqanwan, mana majanwan oqllanakuy jutsata ruranqanwan y yapë casakunqanwanmi ushakashqana”.

Tsë asuntuta kanan tsënöna entiendinqantsikqa, manam casädu këta ni mana majanwan oqllanakuy jutsata pöcu cäsupaqtsu churarin. Bibliachö ninqannö libri mana këkar juk nuna warmimpita divorciakurir jukwan casakuptinqa, creikoqkunata rikaqkunapita kimaq o mas wawqikunam pëta juzgayänampaq juntakäyanqa. (Kanan kaq warmin Testïgu kaptinqa, pëpis mana majanwan oqllanakuy jutsaman ishkishqa kaptinmi, creikoqkunata rikaqkunapita kimaq o mas wawqikunam pëta juzgayänampaq juntakäyanqa). Yapë casakunqan jutsachö mana këkaptimpis, tsë nuna ima carguchöpis congregacionchö yanapakunampaqqa, mëtsika watakunaran pasanqa. Mana allita ruranqanta nunakuna qonqayänantaran, creikoqkunata rikaqkunaqa shuyaräyänan. Jina itsapis puntallapitana pensëkur traicionanqan punta kaq warmin y dejanqan pishi wamrankuna imanö këkäyanqantam cuentaman churayänan (Mal. 2:14-16).

Mana kaqpita divorciakuy y libri mana këkar yapë casakuy llakikuykunaman chätsikunqanta cuentaman churarmi, Jehoväta sirweqkunaqa, casädu kawakuyta pë rikanqannö rikäyänampaq kallpachakuyan (Ecl. 5:4, 5; Heb. 13:4).