MËXICU markachö, 1932 wata noviembri killachö këkanqantsikman pensarishun. Kë markachöqa, juk millonpitapis mas nunakunam kayan y alläpam büllapis kan. Y tsëllaraqmi semäforukunatapis churashqa kayarqan. Kanan witsanqa, semäforukunapaq willakïkunataqa manam precisaqpaqnatsu churayan. Periodistakunaqa tsë semänachö ima pasakunampaq kaqtam, alkäbulla këkäyan. Trenkuna chäyänan sitiuchömi, cämarankunawan juk precisaq nunata shuyarëkäyan. Pëqa Sociedad Watch Tower nishqampa presidentinmi karqan, y jutinqa Joseph F. Rutherfordmi. Tsë markapita Jehovä testïgunkunapis, wawqi Rutherfordtaqa shumaq chaskiyänampaqmi shuyarëkäyan. Porqui pëqa kima junaq asamblëamanmi chämunan.

The Golden Age (kananqa ¡Despertad! nishpam reqikan) revistam kënö nirqan: “Rasumpa kaqchöqa, Mëxicu nacionchö yachatsikï më tsëman chänampaq yanapakunqantanömi, kë asamblëataqa yarpäyanqa”. Peru ¿imanirtaq kë asamblëaqa alläpa precisaq karqan 150 nunakunalla ëwashqa këkäyaptinqa?

Manaraq kë asamblëa kaptinqa, Diospa Gobiernumpita willakïtaqa tsë nacionchö wallkaq nunakunallam chaskikuyashqa kayarqan. 1919 watapita patsë asamblëakunata rurashqa këkäyaptimpis, qateqnin watakunachöqa mas wallkallanam congregacionkuna karqan. 1929 watachömi, Mëxicu markachö juk sucursalta rurayarqan. Tsëqa yanapakunampaq kaqtam pensayarqan, peru manam tsënötsu karqan. Këllaman pensarishun, Diospita yachatsikïtawan negociukunata mana takuyänampaq mandakï kariptinmi, juk colportornö yanapakoq wawqi alläpa piñakurnin Diospa markanta jaqirirqan, y juk grüpunmi patsäratsirqan Bibliata estudiayänampaq. Jina tsë witsanllam sucursalta rikaqnö yanapakoq wawqitapis cambiariyarqan, porqui pëqa jutsallakushqam karqan. Tsërëkurmi, Mëxicuchö Diosta mana jaqipa sirweq Testïgukunaqa imallapis yanapananta wanayarqan.

Wawqi Rutherfordpa visïtanqa, tsë markachö cristiänukunata alläpam yanaparqan. Asamblëachöqa ishkë alläpa yanapakoq discursukunatam qorqan y radiupanam pitsqa discursukunata. Mëxicu nacionchöqa, tsë witsanllaran Diospa Gobiernumpita yachatsikïta radiuman churayarqan. Asamblëa ushariptinqa, sucursalta rikarnin yanapakoq wawqinam tsë nacionchö imakuna rurakänampaq kaqta patsätsirqan. Tsëpita witsëpaqa, cristiänukunaqa Jehovä bendicikanqantam rikäyarqan y kushishqallam sirwirnin sïguiyarqan.

Qateqnin wataqa ishkë asamblëatam tsë nacionchö rurayarqan, Veracruz markachö y Mëxicu markachö. Cristiänu mayintsikkuna Diospita yachatsikuyanqanqa, mas kayänampaqmi yanapakurqan. 1931 watapaqqa 82 publicadorkunallam kayarqan, peru chunka wata pasariptinqa cäsi waranqanam kayarqan. Y Mëxicu markachö 1941 wata Asamblëa Teocrätica nishqanmanqa, waranqa nunakunanömi ëwayarqan.

Jehoväpa testïgunkunaqa “Nación Libre” nishqan asamblëaman invïtakuyänampaqmi, 1943 watachö letrërunkunawan  cällikunaman yarquyarqan.Y tsë asamblëaqa 12 markakunachömi rurakänan karqan. * Tsë ishkë letrërukunataqa, puntankunachö y qepankunachö warkurëkaqtam puritsiyaq. Testïgukunaqa 1936 watapitanam tsënö yachatsikïkäyarqan.

La Nación nishqan revistam, Mëxicu markachö letrërunkuna ponchushqa Testïgukuna yachatsikuyanqanqa alli yarqushqa kanqanta kënö willakurqan: “Qallanan junaqqa mas nunakunata invitayänampaqmi niyarqan. Y waräninqa localpis pasëpa tinkushqanam karqan”. Catölicukunaqa alläpam piñakuyarqan Testïgukuna rurayanqan alli yarqushqa kanqampita, tsëmi pëkunapa contran imëkata rurar qallëkuyarqan. Tsënö rurëkäyaptimpis, cristiänu mayintsikkunaqa mana mantsakushpam cällikunachö yachatsikïkäyarqan. Jinamampis, Testïgukunaqa letrërunkuna ponchushqanö purikaqta nunakuna rikäyanqantam tsë revistaqa willakurqan. Tsë revistachöqa, Mëxicupa cällinkunachö cristiänukuna yachatsikuyanqan fötukunapis karqanmi. Y tsë fötupa ura kuchunchömi kënö neq: “Cällikuna juntam puriyarqan”.

Tsë witsankunachöqa, cäsi llapan Testïgukunam imëkata rurayarqan asamblëaman ëwayänampaq. Mëtsikaqmi, Mëxicu markapita karuchö täräyarqan, y tsëmanqa manam trenkuna ni cärrukunapis chaqtsu. Tsëmi juk congregacionpita cristiänukuna kënö qellqayarqan: “Këmanqa manam trenkunapis chämuntsu”. Tsërëkurmi, trenkuna kaqyaq chäyänampaqqa mulawan y chakiparaq ëwayaq; tsënöram asamblëata rurayanqan markaman chäyaq.

Tsë cristiänukunapaqa, ëwayänanllapaqmi pasäjinkuna kayäpurqan. Mëtsikaqmi asamblëa rurayanqan sitiupa amänunchö täraq Testïgukunawan quedakuyarqan y shumaqmi chaskiyarqan. Wakinkunanam, Yachatsikuyänan Wayikunachö quedakuyarqan. Juk kutichönam, 90 wawqikuna Betelchö quedakuyarqan y atska cartonta qopïkurninmi, fïlëpa punuyarqan. Juk Anuariom willakurqan alläpa agradecïdu karnin, wawqikuna kënö niyanqanta: “Patsachö punïpitaqa mas alli y qoñu qoñum punuyarqä”.

Kë wawqikunaqa asamblëapita alläpa agradecïdu karninmi, imëkata rurayarqan ëwayänampaq. Kanan witsampis, Mëxicu nacionchö cäsi juk millonnö Testïgukunaqa tsënöllam rurëkäyan. * 1949 watachömi, Mëxicuchö këkaq Betelpita kënö niyämurqan: “Tiempu pasanqanmannöpis, cristiänukunaqa gänas gänasllam Diospita yachatsikïkäyan. Cada asamblëa ushariptinmi, pasakunqampita parlayan; y kënömi tapukuyan: ‘¿Imëtaq tsënö asamblëantsikqa yapë kapamäshun?’”. Kanan witsampis, Betelpita niyämunqanqa rikakunmi. (De nuestros archivos en la sucursal de Centroamérica).