WAWQI George Youngmi ocëanu Atlanticu nishqampa juk barcuwan Euröpata ëwëkan y lamarqa alläpam laqcheqsëkan. Brasil nacionchö Diospaq ruranqantam kushishqa yarpëkan. * Peru barcu avanzanqanmannömi Espäñachö y Portugalchö ruranampaq kaqkunamanna pensar qallëkun, tsë nacionkunachöqa manam pipis Diospita yachatsikushqaraqtsu. Jina chärirninllam wawqi Joseph F. Rutherford juk discursuta ruranampaq patsätsipakunan y 300.000 tratädukunatam nunakunata entreganan.

Wawqi Youngqa 1925 watam Lisböa markaman (Portugal) chärirqan. Tsë witsankunaqa Portugal nacionqa mana allikunapam pasëkarqan. Nunakuna contran sharkushqa kayaptinmi 1910 watapita patsëqa reykuna gobernayarqannatsu. Iglesia Catölicapis manam alläpa respetashqanatsu karqan. Jina nunakunapis maskunatanam rurëta puëdiyaq, peru tsëpis manam conformitsu këkäyarqan.

Wawqi Rutherfordpa discursumpaq wawqi George Young patsätsipakur usharinqanchömi, golpe de estäduta rurëta munayanqanta musyarir presidentiqa toque de quëda kanampaq mandakurqa. Tsëmi Sociedad Bíblica Británica y Extranjera sociedäpa secretariun wawqi Youngta, “nunakunaqa contrëkim churakäyanqa” nirqan. Tsënö këkaptimpis, Camões escuëlapa directornintam ejerciciuta rurayänan salonninta utilizäyänampaq permïsuta mañakurqan, y directorqa änirqanmi.

Tsë discursuqa 13 de mäyum rurakarqan, y mëtsikaqmi alkäbu këkäyarqan. Tsë discursupa tïtulunqa, “¿imanötaq imëyaqpis kawakïta puëdishwan?” neqmi, y letrërukunawan y periödicupam tsëpaq willakushqa kayarqan. Religiösukunaqa, “uli profëtakunam” chäkarayämushqa nishpam periödicupa ras jorqarayämurqan. Jina ejerciciuta rurayänan salonpa yëkunanchömi, mëtsika follëtukunata qarakuyarqan, y tsëchöqa wawqi Rutherford yachatsikunqampa contranmi parlaq.

Tsënö kaptimpis 2 milnö nunakunam juntakäyarqan, y cäsi tsë cantidä nunakunam mana yëkïta puëdirnin waqtachö quedakuyarqan. Wakinkunaqa imapita parlanampaq kaqta musyëta munarmi waskapita escalërakunaman y ejerciciuta rurayänan mäquinakunapa jananman täkuyarqan.

Imëkam pasakurqan. Contranchö kaqkunam büllata rurar y sïllakunata limpu pakir qallëkuyarqan. Peru wawqi Rutherfordqa tranquïlum këkarqan y mësa jananman lloqarkurmi yachatsikur sïguirqan. Tsë reunionqa pullan paqasnömi usharqan, y 1200 nunakunapitapis masmi publicacionkunata wayinkunaman apapuyänampaq, jutinkunata y direccionninkunata jaqiyarqan. Waränin junaqnam O Século nishqan periödicuchö wawqipa discursumpaq juk willakï yarqamurqan.

1925 wata septiembri killam Portugal nacionchö portugues idiömachö La Torre del Vigía revistata imprimir qallëkuyarqan (kananqa Täpakoq nirmi  reqintsik). Brasilchöqa mas unëpitanam imprimir qallayarqan. Tsëpinmi Brasilchö täraq Virgiliu Ferguson wawqintsik, Diospa kaqchö yanapakïta munarnin Portugalta ëwanampaq alistapakur qallëkurqan. Pëwan wawqi George Youngqa Bibliata Estudiaqkunapa Brasilchö sucursalninchömi juntu trabajashqa kayarqan. Wawqi Youngwan yapë topëta munarmi Virgiliuwan warmin Lizzieqa barcuwan Portugalta viajayarqan. Y allipaqmi karqan, porqui tsëpita ichik tiempullatam wawqi Youngtaqa Union Soviëtica ëwëpa mandariyarqan.

Tsëpitam golpe de estädu karirqan y carguta chaskishqa nunaqa munanqantam ruraq. Y nunakunaqa contrantsik churakarmi qallëkuyarqan. Peru wawqi Fergusonqa valientim karqan, y cristiänu mayinkunatam cuidarqan y Diospa kaqkunata rurar sïguiyänampaqmi yanaparqan. Jina reunionkuna wayinchö rurakänampaqmi permïsuta mañakurqan. Y 1927 wata octubri killam autoridäkunaqa permïsuta qoriyarqan.

Tsë witsankunaqa 450 nunakunanömi apuntakuyarqan La Torre del Vigía revistata wayinkunaman apapuyänampaq. Jina tratädukunata y follëtukunata utilizarmi Portugalchö mas karu markakunayaq alli willakïkunata chätsiyarqan: Angölaman, Azöresman, Cäbu Verdiman, Göa (India) markaman, Madeiraman, Mozambïquiman y Timor Oriental markaman.

1929 watam Portugalchö huertakunata altsar trabajaq wawqintsik Manuel da Silva Jordão Lisböaman chärirqan. Pëqa Brasilchö këkarmi wawqi Youngpa discursunta wiyarqan, y rasumpa kaqta yachatsikunqantam cuentata qokurirqan, y mas nunakunam alli willakïkunata chätsirmi wawqi Fergusonta yanapëta munarqan. Tsëmi Manuelqa colportornö yanapakurqan (unëqa precursorkunatam tsënö reqiyaq). Publicacionta imprimiyänampaq y më tsëman chätsiyänampaq shumaq patsätsishqa kayaptinmi, Lisböachö congregacionkunaqa ras mirar qallëkuyarqan.

1934 watam wawqi Fergusonwan warminqa Brasilta kutikuyarqan. Tsënö kaptimpis Portugalchö nunakunaqa alli willakïkunata wiyashqanam kayarqan. Tsëmi Espäñachö kikinkunapura guërrata rurëkäyaptin y Ishkë kaq Jatun Guërra këkaptimpis, cristiänu mayintsikkunaqa Diospa kaqchömi alli tsarakuyarqan. Tsë witsankunaqa wallkaqllam kayarqan, peru Galaad escuëlapita 1947 watachö John Cooke misionëru wawqintsik chäriptinqa rasmi publicadorkuna mirar qallëkurqan, y 1962 watayaqmi tsënö mirar sïguirqan. Tsë watam autoridäkunaqa yachatsikuyänanta prohibiriyarqan, peru 1974 watam yachatsikur sïguiyänampaq permïsuta qoriyarqan. Tsë witsampaqqa 13 milpitapis mas publicadorkunanam Portugalchö kayarqan.

Kanan witsanqa 50 milpitapis mas publicadorkunam, Portugalchö y portugues idiömata parlayanqan Azöres, Madeira y mas islakunachö alli willakïkunata willakuyan. Tsë grüpupita wakinkunaqa 1925 wata wawqi Rutherfordpa discursunta wiyaqkunapa familiankunam kayan.

Jehoväta y imëka muroq cuenta tsë witsankunachö mana mantsakushpa alli willakunata willakur qallaq wawqikunatam alläpa agradecikuntsik. Porqui pëkunaqa Pablu ninqannömi ‘Cristu Jesuspa sirweqninnö juk nacionkunata alli willakïkunata willayashqa’ (Rom. 15:15, 16). (Unë imanö kanqantsik Portugal nacionchö).