¿CONGREGACIONCHÖ kanan witsankuna cumplita mana puëdinqantsik carguyoq këta munantsikku? Itsapis juk wawqipa cargunta munantsik o Diospa markanchö puntata yanapakunqantsiknö yanapakïta munantsik. Peru itsa edäna kashqa, qeshyashqa, qellëta pishipakushqa o familiantsikta mas atiendinantsik kaptin, munanqantsiknö manana yanapakïta puëdintsiktsu. O itsa Diospa markanchö cambiukuna kanqanrëkur, mëtsika watapana yanapakunqantsik carguta dejarquntsik. Imanö kashqa kaptimpis, itsa Jehoväpaq llapan rurëta munanqantsikta mana rurëkanqantsikta pensashwan. Tsëkunapa pasarqa, llakikunqantsikqa manam mana allitsu. Peru llakikur, piñakur o resentikurlla mana kanapaqqa, ¿imatataq rurashwan? ¿Y imataq yanapamäshun kushishqalla kanapaq?

Tsë asuntuchöqa Bautizakoq Juan ruranqampitam yachakïta puëdintsik. Pëqa Diosta sirwinqanchömi alläpa precisaq cargukunata chaskirqan. Peru sagrädu rurëninta ruranqampitapis carcelchö mas watakuna llawiränampaq kaqtaqa, manam ichikllapis pensarqantsu. Tsënö karpis, kushishqallam kawakurqan. ¿Imataq yanaparqan? ¿Imatataq rurashwan imapis pensanqantsiknö mana rurakaptin?

Jesus shamushqanchöna 29 wata abril killa witsanmi, Jehovä mandanqannölla Akrashqan chänampaq kaqta nunakunata Juan willarqan. Kënömi willakoq: “Arrepentikuyë, porqui ciëluchö Gobiernuqa këllachönam këkan” (Mat. 3:2; Lüc. 1:12-17). Mëtsikaqmi shumaq wiyakuyarqan. Awmi, alläpa karu markakunapitam willakunqanta wiyakoq ëwayarqan, y atskaqmi arrepentikuyarqan y bautizakuyarqan. Y pushakoq religiösukunatam mana mantsashpa cläru willarqan, mana arrepentikuyaptinqa ima castïguta chaskiyänampaq kaqta (Mat. 3:5-12). Jesus shamushqanchöna 29 wata octubri killa witsanmi, sagrädu rurëninta ruranqanchö Jesusta bautizarqan y tsëqa pëpaq alläpam precisarqan. Tsëpita patsëmi nunakunata nirqan Diospa Akrashqan Jesusta qatiyänampaq (Juan 1:32-37).

Juanpa sagrädu rurënin alläpa precisanqampaq parlarmi, Jesus pëpaq kënö nirqan: “Warmipita yurishqakunapitaqa manam ni pipis Bautizakoq Juanpita mas precisaqqa sharkushqatsu” (Mat. 11:11). Jehoväta sirwirnin llapan puëdinqanmannö ruranqantaqa, Juanqa alläpa precisaqpaqchi churarqan y imëka bendicionkunata chaskishqa  kanqampitachi kushikurqan. Kanan witsampis, shonqupita patsë Jehoväta sirwiyanqampitam mëtsikaq cristiänukuna Juannölla shumaq bendicionkunata chaskiyashqa. Cincuenta watapitapis masna Diospa kaqchö llapan tiempuwan yanapakoq wawqi Terry y warmin Sandraqa, tsënö bendicionkunatam chaskiyashqa. Pëmi kënö willakun: “Diospa markanchöqa imëkachömi yanapakurqö. Precursor regular, betelïta, precursor especial, congregacionkunata watukaq y congregacionkunata watukaqkunata watukaqmi karqö, y kananqa yapëmi precursor especial kä”. Diospa markanchö llapan tiempuntsikwan yanapakunapaq nimashqaqa alläpam kushikuntsik. Peru Bautizakoq Juanpitaqa yachakuntsik, imëpis kushishqalla kanapaqqa kallpachakunantsik alläpa precisanqantam, y tsënö kushishqaqa kashun manam juk carguyoq kanqantsikpitatsu.

Chaskinqan cargukunapita alläpa agradecikunqanmi Bautizakoq Juanta yanaparqan, imëpis kushishqalla kanampaq. Këllata yarpärishun: Jesus bautizakunqampitam Juanpa qateqninkunaqa wallkayar qallëkuyarqan, peru Jesuspaqa mas mirarmi qallëkuyarqan. Tsënö pasakunqampitam, Juanpa qateqninkunaqa yarpachakurnin kënö niyarqan: “Rikë, pëmi bauticëkan, y llapan nunakunam pë kaqman ëwëkäyan” (Juan 3:26). Tsënam Juanqa kënö nirqan: “Novium noviata katseqqa. Peru noviupa amïgunqa, tsëkunachö shëkar noviuta wiyarirqa, alläpam kushikun noviu parlaqta wiyar. Tsënömi noqapis chipyëpa kushikü” (Juan 3:29). Juanqa manam Jesusta chikiparqantsu, jina manam Jesus mas precisaq kaptintsu rurëninkuna mana välinqanta pensarqan. Tsëpa rantinqa, ‘noviupa amïgun’ karninmi kushishqalla karqan.

Cargun cumplinan difïcil kaptimpis, tsënö pensanqanmi Juanta yanaparqan kushishqalla kanampaq. Këllata yarpärishun, yurikunqampita patsë Diosta sirwinampaq rakishqa karninmi, vïnu upïta puëdeqtsu (Lüc. 1:15). Tsënö kawanqampaq parlarmi Jesus kënö nirqan: ‘Juanqa mana mikur ni upurmi shamurqan’. Peru Jesuswan qateqninkunaqa, vïnuta upïta y juk mikïkuna mikïta puëdiyaqmi (Mat. 11:18, 19). Jina Juanqa manam milagrukunata rurëta puëdeqtsu, peru Jesuspa qateqninkuna y pëta unë qateqkunaqa milagrukunata rurëta puëdiyanqantaqa musyaqmi (Mat. 10:1; Juan 10:41). Tsënö kaptimpis, Juanqa manam tsëkunamantsu yarparäkoq, sinöqa Jehovä churanqan carguta cumplinampaqmi masqa yarparaq.

Diospa kaqchö rurënintsikta precisaqpaq churarqa, imëpis kushishqallam kashun. Qepachö parlanqantsikpaq Terry jutiyoq wawqim kënö nin: “Imachö yanapakunäpaq cada niyämanqanchömi llapan puëdinqämannö yanapakurqä”. Diospa kaqchö llapan tiempunwan yanapakunqampaq yarparmi kënö nin: “Manam imapitapis pësakütsu. Alläpa shumaqta pasanqäkunallatam yarpä”.

Imachö yanapakushqa o ima carguyoq kashqapis, ‘Diospa minkankuna’ kanqantsikman yarpanqantsikmi kushishqa kanapaq yanapamäshun (1 Cor. 3:9). Këllaman pensarishun. Familiantsikpa juk shumaq adornunta limpiapar katsishqaqa, atska watakuna pasaptimpis, mushoqnöllam chipapëkanqa. Tsënöllam, Diosta sirwinqantsik alläpa shumaq kaqanman pensashqaqa, ima yarpachakïkunapis tsë kushikïnintsikta ushakätsinqatsu. Manam juk kuchuman churanqantsikkunata, wakinkuna juk kuchuman churayanqantawan igualatsishwantsu, jina wakinkuna chaskiyanqan cargukuna noqantsik chaskinqantsik cargupita mas precisaq kanqantaqa pensashuntsu (Gäl. 6:4).

Itsa Juanqa sagrädu rurënin wallka tiempulla kanampaq kaqta musyarqan, peru illaqpita prësuriyänampaq kaqtaqa manam musyarqantsu (Juan 3:30). Jesusta bautizarinqampita joqta killanö pasarinqanchömi, Rey Herödisqa Juanta carcelman llawitsiyänampaq J. sh. 30 watachö mandakurqan. Tsënö karpis, Diospita willakurninqa sïguirqanmi (Mar. 6:17-20). ¿Imataq yanaparqan tsëkuna pasakuptimpis kushishqa kanampaq? Diospa kaqchö rurëninkunaman yarparanqanmi.

Carcelchö këkarqa, sagrädu rurëninchö Jesus llapan rurëkanqantam wiyarqan (Mat. 11:2; Lüc. 7:18). Diospa akrashqan Jesus kanqantaqa segürum karqan, peru itsachi musyëta munarqan Diospa Palabranchö pëpaq llapan escribirëkanqanta  cumplinampaq kaqta o manapis. Jukqa rey kanampaq kaqmi karqan, peru ¿gobernarnatsuraq qallëkunman karqan? ¿Carcelpitatsuraq jorqarinman karqan? Juanqa Jesus imakunata ruranampaq kaqtam masta musyëta munarqan, tsëmi ishkaq qateqninkunata mandarqan pëta kënö tapuyänampaq: “¿Qamku Shamoqpaq Kaq kanki, o juk mastaraqku shuyäyäshaq?” (Lüc. 7:19). Qateqninkuna kutiriyaptinqa, qeshyëkaqkunata Jesus kachakëkätsinqanta willayanqantaqa shumaqchi wiyakurqan, jina Jesusta tapupäyaptin kënö ninqantapis wiyarqanchi: “Wiskukunam kananqa rikäyan, cöjukunam puriyan, lepra qeshyayoqkunam kachakäyan, sordukunam wiyayan, wanushqakunam kawariyan y waktsakunam alli willakïkunata wiyëkäyan” (Lüc. 7:20-22).

Tsë noticiakunaqa alläpachi Juanta kushitsirqan. Diospa Akrashqampaq willakïkuna pëchö cumplikëkanqantam cuenta qokurirqan. Carcelpita Jesus mana jorqanampaq kaptimpis, Juanqa musyarqanmi ruranqankunaqa envänu mana kashqa kanqanta. Mana allikunapa pasëkarnimpis, tsëkunata musyanqanmi kushitsirqan.

Juannö rurashqa y Diospa kaqchö rurëkunaman yarparashqaqa, kushishqa y pacienciawanmi ima kaptimpis tsarakushun (Col. 1:9-11). Bibliata leyi y leyinqantsikman pensanqantsikmi, kushishqa kanapaq yanapamäshun, y tsëqa Diosta sirwinqantsik mana envänu kanqantam yarpätsimäshun (1 Cor. 15:58). Puntata parlanqantsikpaq Sandra jutiyoq panim kënö nin: “Bibliapita juk capïtuluta cada junaq leyinqämi, Jehoväman mas witinäpaq y rurëkanqankunaman mas yarparänapaq yanapamashqa”. Jina Diospita yachatsikïchö imëkata logrëkanqantsiktapis rikashwanmi. Tsëta rurashqaqa, manam pasanqantsikllamantsu yarparäkushun, sinöqa Jehovä imakunata logrëkanqanmanmi yarparäshun. Jina Sandraqa kënömi nin: “Cada killa yarqamoq JW Broadcastingchö^® progrämakunata rikëmi, Diospa markanwan juknölla kayänäpaq y yanapakïkäyanqächö kushishqa kayänäpaq yanapayämashqa”.

Bautizakoq Juanqa sagrädu rurëninkunata rurarqan “Elïaspa empëñunwan y poderninwanmi”. Y Elïasnömi, ‘noqantsiknö sentimientuyoq nuna karqan’ (Lüc. 1:17; Sant. 5:17). Agradecikoq kashqa y Juannö kaqpis Diospa kaqchö rurëkunaman yarparashqaqa, ima pasakuptimpis Diosta sirwinqantsikchöqa kushishqallam këkäshun.