1. ¿Imatataq Jehoväpa testïgunkuna rurayänan kawëman chätsikoq carrërata ushayanqanyaq ëqiyänampaq?

JEHOVÄPA testïgunkunaqa juk carrërachömi këkantsik, y chaskinapaq premiuqa imëyaqpis kawakïmi. Tsë carrërachö ëqirnin o cörrirnin tsëllaraq qallashqa kar o mëtsika watapana ëqikarpis, tsë carrërata ushanqantsikyaqmi ëqir sïguinantsik. Filïpuschö këkaq cristiänukunata apostol Pablu consejanqanmi, noqantsiktapis yanapamäshun tsë carrërata ushanqantsikyaq ëqinapaq. Tsë cartata chaskiyanqan witsanqa, tsë congregacionchö punta cristiänukunaqa mëtsika watapanam Jehoväta sirwirnin këkäyarqan. Alli ëqirnin këkäyashqa kayaptimpis, Pabluqa alli tsarakur ëqir sïguiyänampaqmi yarpätsirqan. ‘Premiuta chaskinampaq’ pë ëqikanqannölla ëqiyänantam munarqan (Filip. 3:14).

2. ¿Imanirtaq Filïpus congregacionchö këkaq cristiänukunata Pablu consejanqanqa alläpa precïsu tiempuchö karqan?

² Pablupa tsë consëjunkunaqa alläpa precïsu tiempuchömi karqan. Qallanqampita patsëmi nunakunaqa Filïpus congregacionpa contran churakäyarqan. Tsë llapanqa qallarqan J. sh. 50 watamampam, tsë witsanmi Macedoniaman ëwayänampaq Dios ninqanta wiyakur Pabluwan Sïlas tsë markaman chäriyarqan (Hëch. 16:9). Tsëchömi alläpa shumaq wiyakoq Lidia jutiyoq warmita taririyarqan. Y Jehovämi alli willakïkunata wiyakunampaq “shonqunta chipyëpa kicharapurqan” (Hëch. 16:14). Tsëpita wallka tiempullatanam, pë y wayinchö llapan täraqkuna bautizakuriyarqan. Peru Diabluqa manam tsë llapanta rikarëkartsu quedakurqan. Tsë markachö wakin nunakunam, Pablutawan Sïlasta mas precisaq kaq autoridäkunaman qaracharkur apayarqan, y nunakunapa yamë këninkunata ushakëkätsiyanqanta nirmi acusayarqan. Tsërëkurmi Pablutawan Sïlasta alli buënu maqayarqan, carcelman llawitsiyarqan y tsë markapita ëwakuyänampaq niyarqan (Hëch. 16:16-40). ¿Pëkunaqa qelanäkuriyarqanku? Manam. ¿Y tsëllaraq patsakäreq congregacionchö wawqikuna y panikunaqa? Pëkunapis tsarakurmi sïguiyarqan. Pabluwan Sïlas imanö tsarakuyanqanta rikëmi, pëkunata alläpa yanaparqan.

3. ¿Imatataq Pablu musyarqan y ima tapukïkunapitataq yachakushun?

 ³ Pabluqa tsarakïta imëpis mana jaqinampaqmi decidïdu këkarqan (2 Cor. 4:16). Tsënö karpis, tsë carrërata ushananyaq ëqinampaqqa, premiuta chaskinampaq kaqmanmi yarparänan karqan. ¿Imatataq pëpita yachakuntsik? ¿Kanan witsan cristiänu mayintsikkuna imakunapa pasayanqantaq yanapamantsik noqantsikpis tsarakur sïguinapaq? Y shamoq tiempupaq shuyäkïnintsikqa, ¿imanötaq yanapamantsik tsarakïta mana jaqirinapaq?

4. ¿Imatataq Pablu rurarqan mana allikunapa pasëkarpis?

⁴ Filïpus markachö congregacionman cartakunqan witsan Pablu imakunapa pasëkanqanta y tsënö karpis imakunata rurar kallpachakunqanta rikärishun. Röma nacionchö alquilanqan wayichömi prësurëkarqan, tsëmi Diospita yachatsikoqqa yarqïta puëdeqtsu. Tsënö karpis, watukaqninkunata Diospita yachatsirnin y congregacionkunaman cartakunata escribirmi ocupädu këkarqan. Kanan witsankunapis, wayinkunapita yarqïta mana puëdeq mëtsika cristiänukunam watukaqninkunata Diospita yachatsiyan. Jina watukëta mana puëdiyanqan nunakunapaqmi alläpa yanapakoq cartakunata escribiyan.

5. Filipensis 3:12 a 14 textuchö ninqannöpis, ¿imataq Pabluta yanaparqan carrërata ushanqanyaq ëqir sïguinampaq?

⁵ Manaraq cristiänu karnin imakunata logranqankuna y mana allikunata ruranqankuna qelanäratsinantaqa, Pabluqa manam permitirqantsu. Sinöqa “qepachö këkaq cösaskunata qonqëkur y puntachö këkaq cösaskunaman ëqir” carrërata ushananyaq ëqinan alläpa precisanqantam nirqan (leyi Filipensis 3:12-14). ¿Imaraq juk cösaskunaman yarpäratsinman karqan? Puntataqa, judaismu religionchö këkarnin imëkata logranqankunaman yarpanqanmi karqan. Peru pëqa “imëka mëtsika poqitanömi [o basüratanömi]” tsëkunata rikaq (Filip. 3:3-8). Ishkë kaqqa, cristiänukunata sufritsir qatikachashqa kanqanman yarparanqanmi karqan. Peru tsëkunaman yarpanqan qelanäratsinantaqa manam permitirqantsu. Y kima kaqqa, cristiänuna këkar imëkata lograshqa kanqanmi karqan. Carcelman llawitsishqa kayaptin, maqar ushashqa y rumiwan tsampishqa kayaptin, viajanqan barcukuna lamarman hundikashqa kaptin y höra höra mikïninnaq y röpapita pishipashqa kaptimpis imëka allikunatam lograshqa karqan. Tsënö karpis, llapantana lograshqa kanqantaqa manam pensarqantsu (2 Cor. 11:23-27). Imëkata lograshqa këkaptin y imëka sufrimientukunapa pasashqa këkaptimpis, Diosta sirwir sïguinan alläpa precisanqantaqa musyarqanmi. Y noqantsikpis tsënöllam ruranantsik.

6. ¿Imakunaraq kanman “qepachö këkaq cösaskunata” qonqanapaq kaqkunaqa?

⁶ ¿Imanötaq Pablunöpis ‘qepachö këkaq cösaskunata qonqashwan’? Itsa wakinnintsikqa unë witsankuna jutsata rurashqa kanqantsikman yarparäkushwan. Tsënö kaptinqa, allim kanman noqantsikrëkur Jesus wanunqampita maslla yachakunantsik. Tsëta estudianqantsik, yachakunqantsikman pensanqantsik y mañakunqantsikqa, unë ruranqantsik jutsakunaman alläpa mana yarparäkunapaq y Jehovä perdonamashqana kanqantsikta creinapaqmi yanapamäshun. ¿Ima mastataq Pablupita yachakuntsik? Wakin cristiänukunaqa Diospa kaqchö mas yanapakïta munarmi, alli pagayanqan trabäjunkunata jaqiyashqa. Noqantsik tsëta rurashqa karqa, qepachö këkaq cösaskunata qonqanapaqqa manam tsë trabäjuwan imëkata logrëta puëdishqa kanqantsikman yarparäkushwantsu (Nüm. 11:4-6; Ecl. 7:10). Jina ‘qepachö këkaq cösaskunachöqa’, Jehoväta sirwinqantsikchö imëkata ruranqantsikkuna y imëka pruëbakunata pasanqantsikkunam këkanman. Rasumpa  kaqchöqa, ciëluchö Teytantsik imanö bendicimashqa kanqantsikman y imanö yanapamashqa kanqantsikman yarpanqantsikqa, masmi pëman wititsimantsik. Tsënö kaptimpis, manam makintsikta choqparkurqa punukïkushwantsu ni llapan puëdinqantsiktana rurashqa kanqantsikta pensashwantsu (1 Cor. 15:58).

7. 1 Corintius 9:24 a 27 textu ninqannöpis, ¿imatataq ruranantsik kawëman chätsikoq carrërata gananapaq? Juk igualatsikïwan willakaramï.

⁷ Pabluqa, alleqmi entiendeq Jesus kënö nishqa kanqanta: “Llapan puëdiyanqëkimannö kallpachakuyë” (Lüc. 13:23, 24). Pabluqa cuentachömi katseq Jesusnölla hasta ushanqanyaq tsarakunan alläpa precisanqanta. Tsëmi cristiänukunata juk carrërachö ëqeqkunatawan igualatsirqan (leyi 1 Corintius 9:24-27). Juk carrërachö ëqeqkunaqa, carrërata ushayanqanyaq ëqiyänampaqmi yarparäyan y manam jaqiyantsu imapis pantatsiyänanta. Këllaman pensarishun, cällikunachö rurayanqan carrërakunachöqa, ëqeqkunaqa tukïläya negociukunapa y pantatsikoq juk cösaskunapa nöpampam pasayan. Manachi ni mëqan ëqeqkunapis tsë tiendakunachö kanqankunata rikaparninqa quedakuyanmantsu, ¿aw? Tsë carrërata ganëta munarqa, manachi tsëtaqa rurëkuyanmantsu. Tsë cuentallam kawëman chätsikoq carrërachöpis imapis pantatsimänataqa jaqinantsiktsu. Premiuta chaskinapaq kaqman yarparar y Pablunö llapan puëdinqantsikmannö kallpachakurqa, premiuta chaskishunmi.

8. ¿Ima kima cösaskunapitataq yachakushun?

⁸ Kananqa rikärishun ima kima cösaskuna qelanäratsimënintsikta puëdinampaq kaqta. Jukqa, shuyaranqantsikkuna pensanqantsiknö mana cumplikanqanmi, juknam cuerpuntsikchö kallpannaq tikranqantsik, y jukninnam, mëtsika tiempupa pruëbakunapa pasanqantsik. Tsëkunapa pasar wakin cristiänukuna imakunata rurar tsarakuyanqanmi yanapamäshun (Filip. 3:17).

9. Shuyaranqantsikkuna pensanqantsiknö mana cumplikaptinqa, ¿imaraq pasaramashwan?

⁹ Shuyaranqantsikkuna pensanqantsiknö mana cumplikaptin. Dios änikunqankunata cumplikänantana rikëta munanqantsikqa allillam. Diospa willakoqnin Habacucqa, Judä markachö imëka mana alli rurëkuna ushakänantanam  rikëta munarqan, tsëmi Jehoväqa, “mäkoq mäkoqlla rikachakurnin këkë” nirqan (Hab. 2:3). Tsënö kaptimpis, shuyaranqantsikkuna pensanqantsiknö mana cumplikaptinqa, qelanarmi qallëkushwan. Hörachöqa chipyëpam qelanärishwan (Prov. 13:12). Tsëmi pasakurqan 1914 wata qallanan witsankuna. Tsë witsanqa, ciëlupaq akrashqa cristiänukunam 1914 watachö ciëluta ëwakuyänampaq kaqta pensayarqan. Peru shuyaräyanqan mana cumplikaqta rikarqa, ¿imatataq Diosman markäkoq kaqkunaqa rurayarqan?

10. ¿Imatataq juk casädu cristiänukuna rurayarqan shuyaräyanqankuna pensayanqannö mana cumplikaptin?

¹⁰ Royal Spatz jutiyoq wawqita y warmin Pearlta imakuna pasanqanta rikärishun. Wawqi Royalqa 20 watayoq këkarmi 1908 watachö bautizakurqan. Ichikllachöna premiunta chaskinampaq kaqtam següru këkarqan. Tsëmi 1911 watachö Pearlta casakuyänampaq parlaparnin kënö nirqan: “Musyankinam 1914 watachö ima pasakunampaq kaqta. Tsëqa, jukllana casakïkushun”. Pëkunaqa 1914 watachö shuyaräyanqan mana cumplikaptin, ¿kawëman chätsikoq carrërachö ëqita jaqiriyarqanku? Manam, pëkunaqa Diosta mana jaqipa sirwimanmi masqa yarparäyarqan, y manam premiuta chaskiyänampaq kaqmantsu. Carrërachö alli tsarakurnin sïguiyänampaqmi decidïdu këkäyarqan. Y tsënömi rurayarqan. Pëkunaqa mëtsika watakunapam hasta kë Patsachö kawayanqanyaq Diosta mana jaqipa sirwirnin tsarakuyarqan. Llapantsikmi munantsik jutinta y Ciëluchö y Patsachö Autoridäyoq këninta Jehovä respetatsinanta rikëta y llapan änikunqanta cumplimunanta. Segürum këkätsin tsë llapantaqa patsätsinqan tiempuchö ruramunampaq kaqtaqa. Tsë tiempu chämunqanyaqqa, Diosta imëpis sirwirnin sïguikäshun y shuyaranqantsikkuna pensanqantsiknö mana cumplikaqta rikarqa, ama qelanäkurishuntsu o Diosta sirwinqantsikchö mas wallkallatana rurashuntsu.

11, 12. Cuerpuntsikchö kallpannaqna tikrëkashqapis, ¿imanirtaq tsarakurnin sïguintsik? Juk igualatsikïwan willakaramï.

¹¹ Cuerpuntsikchö kallpannaq tikranqantsik. Juk carrërachö ëqir sïguiyänampaqqa alläpam precisan alli kallpayoq kayänan, peru kawëman chätsikoq carrërachö tsarakur sïguinapaqqa tsëqa manam precisantsu. Wakin cristiänukunapaqa mananam unënönatsu kallpankuna kayäpun, tsënö karpis Diospa kaqchö poqur sïguiyänampaqqa kallpachakurmi sïguiyan (2 Cor. 4:16). Wawqi Arthur Secord * imakunapa pasanqanta rikärishun. Juk kutim 55 watapana Betelchö yanapakïkaptin y 88 watayoqna këkaptin, juk enfermëra pani kuyëpa kënö nirqan: “Turi Secord, kë cuerpïkitaqa Jehoväta sirwirmi ushakätsirqunki”. Peru wawqi Secordqa rurashqana kanqanman yarparäkurtsu manam kawarqan. Tsëmi tsë panita asillapa rikärir, kënö nirqan: “Awmi, tsëqa rasunmi. Peru masqa  precisan, kanampita witsëpa imata ruranqantsikmi y manam rurashqana kanqantsiktsu”.

¹² ¿Mëtsika watapanaku Jehoväta sirwishqa kantsik y kananqa mananaku unëkunanö ruranapaq salornintsik yanapamantsik? Tsënöpa pasëkarqa, ama qelanäkurishuntsu. Unë witsankuna llapan ruranqantsikta Jehovä yarparanqantaqa segürum këkantsik (Heb. 6:10). Y yarpäshun, manam kanan witsan pëta sirwirnin ëkata ruranqantsiktsu Jehoväta alläpa kuyanqantsiktaqa rikätsikun. Tsëpa rantinqa, pëta kuyanqantsiktaqa rikätsikuntsik, mana qelanäkurinqantsikwan y llapan puëdinqantsikmannö pëta sirwirninmi (Col. 3:23). Pëqa musyanmi mëyaqlla imatapis rurëta puëdinqantsikta y manam mana puëdinqantsiktaqa mañamantsiktsu (Mar. 12:43, 44).

13. ¿Imataq pasarqan Anatölytawan warmin Lidiyata? Y alli tsarakuyanqanqa, ¿imanötaq yanapamantsik atska tiempupa tukï problëmakunapa pasashqapis?

¹³ Mëtsika tiempupa pruëbakunapa pasanqantsik. Jehoväpa wakin sirweqninkunaqa unëpam pruëbakunapa pasayashqa y chikirmi sufritsiyashqa. Moldavia nacionpita Anatöly Melnik * wawqi imapa pasanqanta rikärishun. Pëqa 12 watayoqllaran karqan teytanta autoridäkuna tsarirkur carcelman llawiyanqan y Siberia nacionman prësu apakuyanqan witsanqa. Familianpita alläpa karutam apakuyarqan. Tsëpita juk wata pasarinqanllachömi Anatölyta, mamanta y awilunkunatapis Siberia nacionman apakuyarqan. Tiempuwanqa reunionman ëwëta puëdiyarqanmi, peru reunionkunaman chäyänampaqqa rashta janampam alläpa alalëchö 6 hörakunanö chakipa ëwayaq. Tsëpita tiempuwanqa, warmin Lidiyapita y juk watayoq warmi wamrampita karuchömi wawqi Anatölyqa kima watapa prësurarqan. Mëtsika watakunapa mana allikunapa pasashqa karpis, wawqi Anatöly y familianqa ichikllapis mana qelanärishpam Jehoväta sirwirnin sïguiyashqa. Kanan witsanqa, wawqi Anatölyqa 82 watayoqnam y Asia centralchömi juk nacionchö sucursalta rikaqkunachö yanapakïkan. Anatöly y Lidiyanö kaqpis, llapan puëdinqantsikmannö Jehoväta sirwirnin sïguishun y unë witsankuna ruranqantsiknölla tsarakurnin sïguishun (Gäl. 6:9).

14. Carrërata ushanampaqqa, ¿imata ruranampaq kaqtataq Pabluqa musyarqan?

¹⁴ Pabluqa segürum karqan carrërata ushanqanyaq y premiuta chaskinqanyaq tsarakunampaq kaqta. Ciëlupaq akrashqa karmi, ‘Diospita qayatsishqa kë premiuta chaskinampaq’ kaqta shuyararqan. Peru tsëta chaskinampaqqa, tsarakurnin sïguinampaq kaqtaqa musyarqanmi (Filip. 3:14). Filïpus congregacionchö këkaq  cristiänukuna carrërachö tsarakur sïguiyänampaqmi, Pabluqa juk igualatsikïwan yachatsirqan.

15. ¿Imaman yarpätsirtaq Pabluqa Filïpuschö cristiänukunata yanaparqan?

¹⁵ Apostol Pabluqa ciëluchö markankuna këkanqantam Filïpus congregacionchö cristiänukunata yarpätsirqan (Filip. 3:20). ¿Imanirtaq precisarqan tsëta yarpäyänan? Tsë witsankunaqa, Röma nacion nunakunanö derëchuyoq këtaqa alläpa valeqtanömi rikäyaq. * Tsënö kaptimpis, ciëluchö markankuna kanan kaptinmi, cristiänu kaqkunaqa tsëpitapis mas väleq derëchuyoq kayarqan. Tsëtawan igualätsiyaptinqa, manam Röma nacion nuna këqa ni ichikllapis igualaqtsu. Tsëmi, Filïpus congregacionchö këkaq cristiänukunata kënö nirqan: “Cristupita alli willakïkunamannö patsan nunakunanö portakuyë” (Filip. 1:27, nöta). Ciëlupaq akrashqa kanan witsan cristiänukunapitapis imëkatam yachakïta puëdintsik. Ciëluchö kawayänampaq premiuta chaskiyänampaqmi pëkunapis kallpachakurnin sïguikäyan.

16. Filipensis 4:6 y 7 textuchö ninqannöpis, ¿imatataq ruranantsik ciëluchö o Patsachö kawanapaq kaqta shuyararpis?

¹⁶ Ciëluchö kar o Patsachö kar imëyaqpis kawanapaq premiuta chaskinapaqqa, tsarakurmi sïguinantsik. Imapa pasëkashqapis, jaqinqantsik cösaskunamanqa ama yarparäkushuntsu ni Diospa kaqchö poqurnin sïguinata imapis michämänata jaqishuntsu (Filip. 3:16). Itsapis shuyaranqantsikkuna pensanqantsik tiempuchö cumplikashqatsu o cuerpuntsikchö kallpannaqna tikrëkantsik. Jina itsa mëtsika tiempupana pruëbakunapa tsarakushqantsik y chikimarnintsikpis sufritsimarquntsik. Imanö kashqa kaptimpis, ‘ama imapaqpis yarpachakur kashuntsu’ sinöqa, ‘imëkachöpis mañakurnin y rogakurnin yarpachakïnintsikkunata Diosta musyatsishun’. Tsëta rurashqaqa, ‘imëka yarpachakïkuna janampa këkaq yamë kënintam’ chaskishun (leyi Filipensis 4:6, 7).

17. ¿Imatataq qateqnin kaq yachatsikïchö yachakushun?

¹⁷ Imanömi juk carrërata ushanampaqna këkar juk cörreq nuna kallpachakun, tsënölla noqantsikpis kawëman chätsikoq carrërata ushanqantsikyaq ëqinapaq kallpachakushun. Kallpantsik kanqanmannö y puëdinqantsikmannö poqurnin sïguinapaq y alläpa shumaq bendicionkunata chaskinapaq llapan puëdinqantsikmannö kallpachakur sïguishun. ¿Imatataq rurashwan puëdinqantsikmannö carrërachö ëqir sïguinapaq? Qateqnin yachatsikïmi yanapamäshun, imakunata cuentachö katsinapaq kaqta y ‘mas precisaq cösaskunapita segurakunapaq’ kaqta (Filip. 1:9, 10).