1. Filïpus markachö juk congregacion patsakänampaqqa, ¿pikunataq yanapakuyarqan

RÖMA nacion nunakuna täräyanqan Filïpus markaman Pablu, Sïlas, Lücas y Timoteu chäyänampaqqa, Diospa Gobiernupita willakïkunata wiyakïta munaq mëtsikaq nunakunatam tariyarqan. Gänas gänaslla yachatsikoq tsë chuskun cristiänukunam, tsë markachö juk congregacion patsakänampaq yanapakuyarqan. Tsë creikoq qallëkoqkunaqa, ëllukarmi qallëkuyarqan, itsapis alläpa kuyakoq Lidia jutiyoq cristiänapa wayinchö (Hëch. 16:40).

2. ¿Ima problëmakunapataq Filïpus markachö congregacion pasar qallëkurqan?

² Tsë tsëllaraq patsakäreq congregacionqa, mëtsika problëmakunapam pasar qallëkurqan. Tsë chuskun cristiänukuna yachatsikur mana sïguiyänampaqmi, rasumpa kaq yachatsikïta chikeqkunata Satanas utilizar qallëkurqan alläpa chikirnin contrankuna churakäyänampaq. Autoridäkunaqa Pablutawan Sïlastam tsariyarqan, shukshukunawan wiluyarqan y tsëpitanam carcelariyarqan. Waränin junaqnam, carcelpita jorqariyarqan. Libri tikrarirqa, ¿imatataq rurayarqan? Creikur qallëkushqa cristiänukunatam watukayarqan y mas kallpayoq kayänampaq yanapayarqan. Tsëpitanam Pablu, Sïlas y Timoteuqa, tsë markapita ëwakuyarqan, peru Lücasqa itsa tsëchö quedakurqan. Y, ¿tsëllaraq creikur qallëkushqa kaqkunaqa imatataq rurayarqan? Santu espïritupa yanapakïninwanmi Jehoväta sirwir sïguiyarqan (Filip. 2:12). Tsërëkurmi apostol Pabluqa alläpa kushikurqan.

3. Filipensis 1:9 a 11 textuchö ninqannöpis, ¿imatataq Diosman mañakunqanchö Pablu mañakurqan?

³ Chunka watakuna pasariptinnam, tsë cristiänukunapaq juk cartata Pablu escribirqan. Tsë carta ninqanta leyirirqa,  rasllam cuentata qokurintsik tsë cristiänukunata alläpa kuyanqanta. Pëkunata alläpa llakinqanta y Cristu Jesusnö shonqupita patsë llapankunata kuyanqantam nirqan (Filip. 1:8). Jina pëkunarëkur Diosman mañakunqantapis nirqanmi. Jehovätam mañakoq pëkunapa kuyakïninkuna mas y mas miranampaq, mas precisaq cösaskunapita segurakuyänampaq, llapanchö alli kayänampaq, pitapis mana ishkitsiyänampaq y llapan alli kaq rurëkunawan junta kayänampaq. Tsë cartachö Pablu escribinqankuna kanan witsankunapis yanapamänapaq kaqtaqa, segürum këkantsik (leyi Filipensis 1:9-11). Kë yachatsikïchöqa, tsë asuntukunapaq Pablu escribinqampitam yachakushun.

4. (1) 1 Juan 4:9 y 10 textu ninqannöpis, ¿imanötaq Jehovä rikätsimarquntsik kuyamanqantsikta? (2) ¿Mëyaqtaq Diosnintsikta kuyashwan?

⁴ Jutsantsikrëkur wanunampaq tsurinta kë patsaman mandamurmi, Jehoväqa alläpa kuyamanqantsikta rikätsimarquntsik (leyi 1 Juan 4:9, 10). Imatapis mana shuyarashpa kuyamanqantsikmi, noqantsiktapis yanapamantsik pëta mas kuyanapaq (Rom. 5:8). ¿Mëyaqtaq Diosnintsikta kuyashwan? Tsë tapukïtaqa Jesus contestarqan juk fariseuta kënö ninqanchömi: “Jehovä Diosnikitam llapan shonqïkiwan, llapan kawënikiwan y llapan yarpënikiwan kuyanëki” (Mat. 22:36, 37). Jehovätaqa manam janan shonqullaqa kuyashwantsu. Sinöqa, cada junaqmi shonqupita patsë masraq kuyëta tïranantsik. Pabluqa, Filïpus markachö creikoqkunatam ‘kuyakïninkuna mas y mas miranampaq’ nirqan. ¿Imatataq rurashwan Diosta shonqupita patsë masraq kuyanapaq?

5. ¿Imatataq ruranantsik shonqupita patsë Diosta mas kuyanapaq?

⁵ Diosta kuyanapaqqa, pëpitam mas yachakunantsik. Bibliachömi kënö nin: “Pipis mana kuyakoq kaqqa manam Diosta reqintsu, porqui Diosqa kuyakïmi” (1 Juan 4:8). Apostol Pabluqa, Jehoväta mas kuyanapaq pëpita ‘alli musyanantsik’ y imatapis imanö rikanqanta ‘alleq tantiyanantsik’ precisanqantam nirqan (Filip. 1:9). Bibliata estudiar qallëkurmi, Diospita mas yachakurqantsik, y tsë yachakunqantsikmi pëta kuyanapaq yanapamarqantsik. Peru pëpita y imanö kënimpita mas yachakunqantsikmannömi, masraq shonqupita patsë kuyar qallëkurqantsik. Tsëchi noqantsikpaqqa alläpa precisan Diospa Palabranta imëpis estudianantsik y yachakunqantsikman pensanantsik (Filip. 2:16).

6. 1 Juan 4:11, 20 y 21 textu ninqannöpis, ¿jina pikunatataq kuyanantsik mas kuyakoq kanapaq?

⁶ Cristiänu mayintsikkunata mas kuyanapaqqa, Diosta shonqupita patsë kuyanqantsikmi yanapamäshun (leyi 1 Juan 4:11, 20, 21). Itsapis Diosta kuyëqa kikinlla yurinampaq kaqta pensashwan. Imanö kaptimpis, Jehovätam sirwintsik y pë kanqannö këtam procurantsik. Jinamampis, alläpa kuyamarnintsik noqantsikrëkur wanunqampitam Jesusnö këta procurantsik. Peru rasumpa kaqchöqa, höraqa difïcilran juknintsik juknintsik kuyanakïqa. Filïpus congregacionchö ima pasakunqanta rikärishun.

7. ¿Imakunatataq yachakuntsik Evodiatawan Sintiquita Pablu consejanqampita?

⁷ Evodiawan Sintiqui panikunaqa, apostol Pabluwanmi juntu gänas gänaslla yachatsikur puriyarqan. Peru itsachi jukläya jukläya pensayanqan ishkanta rakikäratsirqan. Pabluqa, këkäyanqan congregacionman cartakunqanchömi ishkampaq parlarqan y alli consejarqan. “Juk pensëyoqlla” kayänampaqmi nirqan (Filip. 4:2, 3). Jina apostol Pabluqa tsë congregacionchö llapan këkaqkunatam kënö nirqan: “Wasata mana rimarlla y mana  pleyturlla imëkatapis rurarnin sïguiyë” (Filip. 2:14). Tsënö consejakunqanqa, Diosta mana jaqipa sirweq tsë ishkan panikunata y tsë congregacionchö këkaqkunataqa alläpachi yanaparqan.

8. ¿Imataq yanapakuntsu wawqi panintsikkunata kuyanapaq, y imatataq ruranantsik tsë problëmata ushakätsinapaq?

⁸ Evodiatawan Sintiquita pasanqannömi, cristiänu mayintsikkuna pantayanqankunaman yarparäkushqaqa, pëkunata kuyëta jaqirishun. Llapantsikmi cada junaq imallachöpis pantarintsik. Wakinkuna pantayanqankunaman yarparäkushqaqa, pëkunata kuyëtam jaqirishun. Këllaman pensarishun. Yachatsikuna Wayita pitsanapaq yanapamënintsikta juk wawqi qonqarinman y tsërëkur pëwan piñakurkushwan. Tsënö pasakuptinqa llapan pantanqankunata yarpar qallëkunqantsikmi masraq piñatsimäshun y mananam kuyarnin sïguishunnatsu. ¿Tsënöpaku pasëkantsik? Tsëqa këta yarpäshun, Jehoväqa noqantsik y wawqintsik pantanqantam rikan y tsënö kaptimpis pëqa kuyamarnintsikmi sïguin. Tsëmi, Jehovänö kuyakoq kanantsik y wakinkuna allita rurayanqanman yarpänantsik. Cristiänu mayintsikkunata mas kuyarqa, masran pëkunawan juknölla kashun (Filip. 2:1, 2).

9. Filïpus congregacionman Pablu cartakunqanchöqa, ¿imataq wakin ‘mas precisaq cösaskunaqa’ kayarqan?

⁹ Diospa santu espïritun yanapaptinmi, Filïpus congregacionchö këkaqkunata y llapan cristiänukunata ‘mas precisaq cösaskunapita segurakuyänampaq’ Pablu mandarqan (Filip. 1:10). Y tsë precisaq cösaskunaqa kayan: Diospa jutin alläpa respëtuwan rikashqa kanan, voluntänin cumplikänan y congregacionchö yamë kë y juknölla kawakïmi (Mat. 6:9, 10; Juan 13:35). Tsëkunata kawënintsikchö mas precisaqpaq churashqaqa, Jehoväta kuyanqantsiktam rikätsikuntsik.

10. ¿Imatataq ruranantsik jutsannaqtanö Jehovä rikämänapaq?

¹⁰ Jina Pabluqa, “llapanchö alli këkäyanki” nirmi consejakurqan. Tsëqa manam ni imachöpis mana pantanapaq kaqta ninantsu. Jehovänö jutsannaq këtaqa manam puëdintsiktsu. Peru llapan shonquntsikwan masraq kuyashqa y mas precisaq cösaskunapita segurakushqaqa, jutsannaqtam rikämäshun. Juknöpaqa kuyakoq kanqantsiktaqa rikätsikuntsik, pitapis mana ishkitsinapaq kallpachakurninmi.

11. ¿Imanirtaq cuidädu kanantsik wakinkunata mana ishkitsinapaq?

¹¹ ‘Pitapis ama ishkitsiyankitsu’ neq consëjuta mana wiyakïqa jutsam kanman. Kushikunapaq ruranqantsikkuna, imanö vistikunqantsik o imachö trabajanqantsikmi wakinta ishkiratsinman. Itsapis mana allitaqa rurëkantsiktsu, peru alläpa jutsam kanman imatapis decidinqantsikwan wakinta ishkitsishqaqa. Jesusmi kënö nirqan: “Mëqanllatapis ishkitseq kaqpaqqa, mas allim kanqa ashnu tumatsinqan mulinu rumita kunkanman warkurkur, lamarpa chowpinman jitarpuyanqan” (Mat. 18:6).

12. ¿Imatataq yachakuntsik juk casädu precursorkunapita?

¹² ‘Pitapis ama ishkitsiyankitsu’ neq consëjuta cäsukuyänampaq, juk wawqi y warmin imata rurayanqanta rikärishun, pëkunaqa precursormi kayan. Congregacionninkunachömi tsëllaraq bautizakushqa juk wawqiwan warmin kayarqan y pëkunaqa jukläya wätashqam kayarqan. Tsëmi pëkunaqa pensayaq Testïgukunaqa cïniman pelïculata rikaq ëwëta ni alli pelïculallatapis rikëta mana puëdiyanqanta. Tsëmi tsë precursorwan warmin cïnichö  juk pelïculata rikäyashqa kayanqanta musyarir, alläpa espantakuyarqan. Tsëta musyarirmi, tsë precursorkunaqa tsë mushoq cristiänukuna Diospa kaqchö mas poquyanqanyaq, cïniman pelïculata rikaq mana ëwayänampaq decidiyarqan (Heb. 5:14). Tsënömi rikätsikuyarqan shimillapa kuyakoq mana kayanqanta, sinöqa rurëninkunawampis (Rom. 14:19-21; 1 Juan 3:18).

13. ¿Imanötaq wakinkunata jutsaman ishkiratsishwan?

¹³ Jina inkitarninmi pitapis jutsaman ishkiratsishwan. ¿Imanötaq tsëtaqa rurëkushwan? Këllaman pensarishun. Bibliata estudiëkaq juk nuna alläpa kallpachakur y unëtaraq washku upyëta dejarishqa kanman. Y tsëman yapë mana ishkinampaq, ni ichikllatapis mana upunampaq kaqta cuentata qokurinman. Tsëpitana wallka tiempullachö cambiukunata rurarinman y bautizakurinman. Tsënö këkaptin, pëta y juk cristiänukunata wayinman juk wawqi invitarinman. Y jutsaman ishkitsinampaq kaqta mana pensarlla, washkuta invitarinman y kënö nirinman: “Bautizakushqanam kanki y Jehoväpa poderninqa yanapëkäshunkinam. Y yarpë, Diospa poderninqa peqata tsarëta yachanapaqmi yanapamantsik. Dominakïta yacharqa, manam alläpataqa upunkitsu”. Tsë mana alli consëjuta tsë wawqi cäsukuptinqa, yapëchi washkuta upyakïman ishkirinman.

14. Filipensis 1:10 textuchö këkaq consëjukunata wiyakunapaqqa, ¿imanötaq reunionkunachö yanapamantsik?

¹⁴ Filipensis 1:10 textuchö këkaq consëjukunata wiyakunapaqqa, reunionkunachömi tukïnöpa yanapamantsik. Puntataqa, imakunata mas precisaqpaq Jehovä churanqantam  yarpätsimantsik. Ishkë kaqchöqa, yachakunqantsikmannö kawar llapanchö alli kanapaqmi yachatsimantsik. Y kima kaqchönam, kuyakoq kanapaq y alli kaqta ruranapaq yanapamantsik (Heb. 10:24, 25). Cristiänu mayintsikkuna mas kallpayoq kanapaq yanapamashqaqa, masmi pëkunata y Diosnintsikta kuyashun. Jehoväta y cristiänu mayintsikkunata llapan shonquntsikwan kuyashqaqa, llapan puëdinqantsikmannömi creikoq mayintsikta mana ishkitsinapaq kallpachakushun.

15. ¿Ima ninantaq ‘llapan alli kaq rurëkunawan junta këqa’?

¹⁵ Filïpuschö këkaq cristiänukuna ‘llapan alli kaq rurëkunawan junta kayanampaqmi’ Pabluqa Jehoväta mañakurqan (Filip. 1:11). Tsë alli kaq rurëkunachöqa, Jehoväta y markanta kuyëpis këkarqanmi. Jina Jesusman markäkuyanqanta y shamoq tiempupaq shuyaräyanqampita wakinkunata parlapäyanqampis. Y apostol Pabluqa kë munduchö ‘imëka aktsi cuenta atsikyäyanqantam’ nirqan (Filip. 2:15). Tsë igualatsikïqa alläpa allim karqan, Jesuspis qateqninkunatam kënö nishqa karqan: “Qamkunaqa nunakunapa aktsinmi kayanki” (Mat. 5:14-16). Jina ‘qateqninkuna tikrayänampaq nunakunata yachatsiyänampaq’ y “patsapa mas karu kuchunyaq” yachatsikuyänampaqmi mandarqan (Hëch. 1:8; Mat. 28:18-20). ‘Llapan alli kaq rurëkunawanqa junta kantsik’, tsë precisaq rurëman imëpis yarpararninmi.

16. Filipensis 1:12 a14 textu rikätsikunqannö, ¿imanötaq imëkapa pasëkarnimpis imëka chipapaq aktsinö këta puëdintsik? (Rikäri jana qaranchö këkaq dibüjuta).

¹⁶ Imapa pasëkarnimpis, imëka chipapaq aktsinömi këta puëdintsik. Höraqa, Diospita yachatsikunapaq michäkoqnö problëmakunaqa, yachatsikunapaqmi yanaparamashwan. Tsëmi apostol Pabluta pasarqan. Filïpus markachö creikoqkunaman cartakurqa, Römachö  alquilanqan wayichömi prësurëkarqan. Peru prësurëkarpis, täpaqnin guardiakunata y watukaqninkunatam gänas gänaslla Diospita yachatsirqan. Tsënö ruranqanmi wakin cristiänukunata yanaparqan “Diospa palabrampita mana mantsakushpa parlayänampaq” (leyi Filipensis 1:12-14; 4:22).

17. Problëmakunapa pasëkarpis alli kaq rurëkunawan junta këta puëdinqantsikta kanan witsan pasakunqanwan willakaramï.

¹⁷ Mëtsikaq cristiänukunam Pablunö kaqpis valienti kayanqanta rikätsikïta puëdiyan. Cällikunachö ni wayin wayin yachatsikïta mana puëdiyanqan nacionkunachömi täräyan, tsëmi pitapis mana mäkatsishllapa yachatsikuyan (Mat. 10:16-20). Tsënö michäkuyanqan juk nacionchömi, congregacionkunata watukaq juk wawqi llapan publicadorkunata nirqan kastankunata, vecïnunkunata, estudiaq y trabajaq mayinkunata y wakin reqiyanqan nunakunata yachatsiyänampaq. Tsënö rurayanqampitam, tsë wawqi watukanqan congregacionkunaqa ishkë watallachö mas mirariyarqan. Itsa noqantsikqa Diospita libri yachatsikïta puëdintsik. Tsënö kaptimpis tsë cristiänukunapitaqa yachakuntsik, ima problëma kaptimpis alli tsarakunapaq Jehovä yanapamänapaq kaqman confiakurnin, llapan puëdinqantsikmannö Diospita yachatsikur sïguinapaq kaqtam (Filip. 2:13).

18. ¿Imata ruranapaqtaq churapakänantsik?

¹⁸ Kë alläpa precisaq junaqkunachöqa, Filïpus congregacionchö këkaq cristiänukunaman cartakunqanchö Pablu consejakunqanmannö kawëta tïrashun. Mas precisaq cösaskuna ima kanqanta segurakushun, llapanchö alli kanapaq kallpachakushun, ama pitapis ishkitsishuntsu y llapan alli kaq rurëkunawan junta kashun. Tsëta rurashqaqa, mas kuyakoqmi kashun y alläpa kuyakoq Teytantsik Jehovätam precisaqpaq churar respetashun.