1. ¿Familiantsikkuna imata rurayänantataq munantsik?

PAULINE * jutiyoq panim kënö nin: “Bibliapita yachakur qallanqäpitam, llapan familiäwan Mushoq Patsachö këta munarqä. Masqa qowä Wayne y pishillaraq wamrä Jehoväta sirwiyänantam munarqä”. Jehoväta llapan familiantsik manaraq sirwiptin y kuyaptinqa, Paulinenöchi noqantsikpis sientikuntsik.

2. ¿Ima tapukïkunapitataq kë yachatsikïchö yachakushun?

² Manam familiantsikkunata Bibliapita yachakuyänampaq obliguëta puëdintsiktsu. Peru Biblia yachatsikunqanta wiyakïta mas munayänampaqqa yanapëta puëdintsikmi (2 Tim. 3:14, 15). ¿Imanirtaq Biblia yachatsikunqampita kastantsikkunata parlapashwan? ¿Imanirtaq wakinkuna imanö sientikuyanqanta entiendita procuranantsik? ¿Imatataq rurashwan noqantsiknölla Jehoväta kuyayänampaq? ¿Y imanötaq congregacionchö cristiänu mayintsikkuna yanapamashwan?

3. 2 Pëdru 3:9 textu ninqannöpis, ¿imanirtaq familiantsikkunata Bibliapita parlapänantsik?

³ Jehoväqa ichikllachönam Satanaspa mundunta ushakäratsinqa. Y ‘imëyaqpis kawakïta chaskiyänampaq kallpachakïkaqkunallam’ salvakuyanqa (Hëch. 13:48). Markantsikchö nunakunata Diospita parlapänapaqqa, atska tiemputam rakintsik, tsëqa masraqchi familiantsikkuna Jehoväta sirwiyänampaqqa yanapëta munantsik. Alläpa kuyakoq Teytantsikqa, “manam munantsu pipis ushakänanta; tsëpa rantinqa,  llapankuna arrepentikuyänantam munan” (leyi 2 Pëdru 3:9).

4. Familiantsikta Diospita yachatsirqa, ¿imatataq rurëkushwan?

⁴ Këta cuentaman churashun, salvakuyänampaq willakïpitaqa, allipa o mana allimampapis parlapëta puëdintsikmi. Itsa mana reqinqantsik nunataqa Diospita yachëllapa parlapantsik, peru familiantsikta parlaparqa, itsa imatapis defrenti nintsik.

5. ¿Imatataq cuentachö katsinantsik familiantsikkunata Diospita parlaparnin?

⁵ Qallananllachö familiantsikta Diospita parlapanqantsikta yarparninqa, itsa imanö parlapanqantsikpita pësakuntsik y juknöpa parlapänantsikpaq mas alli kashqa kanqanman pensantsik. Apostol Pablum cristiänu mayinkunata kënö consejarqan: “Parlakïnikikuna imëpis shumaq katsun, kachiwan kachitashqanö, tsënöpa cada nunata imanö contestëta yachayänëkipaq” (Col. 4:5, 6). Familiantsikkunawan parlarnin tsë consëjuta cuentachö katsinqantsikqa alläpa allim kanqa. Tsëta mana rurashqaqa, itsa Diospita yachakï munëninkunata ushakäratsishwan.

6, 7. Casädu kaqkuna mana Testïgu majankuna imanö sientikuyanqanta cuentaman churayänan alläpa precisanqampita willakaramï.

⁶ Imanö sientikuyanqanta entiendita procurashun. Qallananchö parlanqantsikpaq Pauline panim kënö nin: “Bibliapita yachakur qallanqä witsanqa, Diospa kaqllapitam qowäwan parlëta munaq kä”. Peru qowan Wayneqa, wallkallatam Bibliapita yachaq y manam parlapanqanta entiendeqtsu. Tsëmi pëqa warmin Pauline religionninllaman yarparäkunqanta pensaq. Y juk religionpita rakikäreq mana alli grüpuchö këkanqanta y engañëkäyanqantam pensaq.

 ⁷ Paulineqa, tardikunapa y semäna ushëkuna wawqikunawan y panikunawan reunionkunachö, Diospita yachatsikurnin, pëkunawan imallatapis rurarnin mas tiempu pasashqa kanqantam nin. Kënömi willakun: “Höraqa, qowä Wayne wayiman chärirqa, manam pitapis tareqtsu, tsëmi japallan sientikoq”. Pï mëta pasanqannöpis, warmintawan wamrantam llakeq. Manam warmin y wamran pikunawan juntakïkanqantaqa musyaqtsu, tsëmi mushoq amïgunkunata pëpitapis mas precisaqpaq warmin churanqanta pensarqan. Tsërëkurmi, tsënö sïguiptinqa papelta rurëkur rakikäkuriyänan mas alli kanqanta warminta nirqan. ¿Manatsuraq mas alli kanman karqan qowan imanö sientikunqanta Pauline entiendita procuranan?

8. 1 Pëdru 3:1 y 2 textu ninqannöpis, ¿imataraq familiantsikqa noqantsikpita mas rikanqa?

⁸ Imanö portakunqantsikta rikäyätsun. Familiantsikkunaqa, imata ninqantsikpitapis imanö portakunqantsiktam masqa rikäyan (leyi 1 Pëdru 3:1, 2). Tsëtam Paulineqa tiempuwan cuentata qokurirqan. Kënömi willakun: “Qowä Wayne kuyayämanqanta y rakikäkurita mana munanqantaqa musyaqmi kä. Peru papelta rurëkur rakikäyänäpaq nimanqanmi Jehovä munanqannö imatapis ruranäpaq kaqta yarpäratsimarqan. Bibliallapita parlapänäpa rantin alli portakunä mas precisanqantam cuentata qokurirqä”. Tsëmi Paulineqa Bibliapita parlayänampaq qowanta exigeqnatsu, sinöqa cada junaqchö imanö kashqa kayanqampitam parlayaq. Wayneqa, warmin mas yachanëpaq y wamrampis mas alli portakoq tikrëkanqantam cuentata qokurirqan (Prov. 31:18, 27, 28). Bibliapita yachakïkäyanqan pëkunata cambiëkätsinqantam cuentata qokurirqan, tsëmi pëpis Biblia yachatsikunqanta maslla wiyëta munarirqan (1 Cor. 7:12-14, 16).

9. ¿Imanirtaq familiantsikta Diospita parlapëta jaqishwantsu?

 ⁹ Ama Diospita parlapëta jaqishuntsu. Tsë asuntuchöqa Jehoväpitam yachakïta puëdintsik. Pëqa kutin kutinmi alli willakïkunata wiyakuyänampaq y imëyaqpis kawakïta chaskiyänampaq nunakunata yanapëta tïran (Jer. 44:4). Apostol Pablupis ‘tsëkunata rurëchö imëpis kallpachakunampaqmi’ Timoteuta nirqan, tsëta rurarmi kikinta y wiyaqninkunatapis salvanan karqan (1 Tim. 4:16). Familiantsikta alläpa kuyarmi, pëkunapis Bibliapita yachakuyänanta alläpa munantsik. Paulinepa familiantaqa, imanö parlakunqan y imanö portakunqanmi alläpa yanaparqan. Kananqa Jehoväta sirwir qowan anciänu kaptin y ishkampis precursor kayaptinmi alläpa kushishqa sientikun.

10. ¿Imanirtaq pacienciakoq kanantsik?

¹⁰ Pacienciakoq kashun. Bibliapita yachakunqantsikmannö kawar qallëkushqaqa, itsa familiantsikpaqqa sasa kanman jukläya creinqantsikkunawan y juknöpa kawakunqantsikwan yachakäyänan. Puntataqa cuentata qokuriyan, pëkunawan fiestakunata manana celebranqantsikta y polïtica asuntukunaman mana mëtikunqantsiktam. Itsa qallananllachöqa noqantsikwan piñakuyanqa (Mat. 10:35, 36). Peru manam mana cambiayänampaq kaqtaqa pensashwantsu. Imanir jukläya creenciayoqna kanqantsikta entienditsita mana sïguishqaqa, imëyaqpis kawakïta mana chaskiyänampaq kaqtanönam churarishwan. Peru Jehoväqa manam noqantsiktatsu tsëta decidinapaq churamarquntsik, sinöqa Jesustam (Juan 5:22). Pacienciakoq kashqaqa, itsa tiempuwanqa familiantsikkunaqa Bibliapita wiyakïta munayanqa (Rikäri “ Internetchö päginantsikta alli utilizäshun” neq recuadruta).

11-13. ¿Imatataq yachakuntsik teytankunata Alice imanö tratanqampita?

¹¹ Shumaq tratakoq kashun peru decidinqantsikkunachö alli tsarakushun (Prov. 15:2). Aliceta pasanqanta rikärishun. Bibliapitaqa yachakur qallëkurqan, teytankunapita karuchö këkarmi. Pëkunaqa manam Dios kanqanman creiyaqtsu y polïtica asuntuchömi kayaq. Imëka allikunata yachakïkanqampita mas tiempu manaraq pasaptin pëkunata willanan precisanqantam cuentata qokurirqan. Pëmi kënö nin: “Imanir jukläya creenciayoq y jukläya costumbrikunayoqna kanqëkita willanëkipaq alläpa shuyaraptikiqa, familiëkiqa masmi piñakunqa”. Tsëmi teytankuna wiyëta munayänampaqnö, kuyanakï asuntupaqnöpis, Biblia imata yachatsikunqanta imanö rikäyanqanta tapurnin pëkunaman cartakoq (1 Cor. 13:1-13). Shumaq wätayanqanta y alli cuidayanqampita agradecikurmi cartakoq y qarëninkunapis apatseq. Y pëkunata watukaq ëwarqa, llapan puëdinqannömi mamäninta wayichö yanapaq. Tsënö karpis, qallananllachöqa, jukläya creenciayoq imanir kanqanta willaptinmi teytankunaqa piñakuyarqan.

¹² Teytankunapa wayinchö kanqan witsanqa, llapan junaqkunam Biblianta leyeq. Aliceqa nin, tsëta ruraqta rikanqanshi mamäninta yanaparqan pëpaq Diospa Palabran alläpa precisanqanta cuentata qokunampaq. Jina teytampis Bibliapita ichik mas yachakïtam munarqan, tsënöpa wamran imata creinqanta entiendinampaq y imachö pantashqa këkanqanta tarinampaq. Alicem kënö willakun: “Juk Biblianmi qararqä, y juk höjanchömi shumaq palabrakunata pëpaq escribirqä”. ¿Imataq pasakurqan? Teytanqa manam imachöpis pantashqa këkanqantaqa tarirqantsu; tsëpa rantinqa leyir tarinqankunapitam alläpa espantakurqan.

¹³ Shumaq tratakoqmi kanantsik, peru tukï  problëmakunapa pasanantsik kaptimpis decidinqantsikkunachömi alli tsarakunantsik (1 Cor. 4:12b). Këllata rikärishun: Aliceqa mamänin contranman churakanqantam aguantarqan. Pëmi kënö willakun: “Bautizakuriptïmi, mamänïqa mana alli wamra kanqäta nimarqan”. ¿Imatataq Alice rurarqan? Kikinmi kënö willakun: “Tsë asuntupita mana parlanäpa rantinmi, shumaq respëtuwan Jehoväpa testïgun këta imanir decidinqäta entienditsita tïrarqä, jina decidinqäta mana cambianapaq kaqtam cläru nirqä. Pëta alläpa kuyanqätam nirqä. Ishkämi waqayarqä, y gustanqan mikïtam rurapurqä. Tsëpita patsëmi mamänïqa cuentata qokurirqan mas alli warmi kanäpaq Biblia yanapamashqa kanqanta”.

14. Decidinqantsikpita jukta ruranapaq familiantsik nimashqaqa, ¿imanirtaq alli tsarakunantsik?

¹⁴ Itsa familiantsikkunaqa rasllatsu entiendiyanqa Jehoväta sirwinqantsikta imanir alläpa precisaqpaq churanqantsikta. Tsëmi Aliceta pasarqan. Teytankuna akrayäpunqan profesionta estudianampa rantin precursöra tikrariptinmi, mamäninqa yapë waqar qallëkurqan. Peru Aliceqa decidinqanchö allim tsarakurqan. Kënömi willakun: “Imatapis decidinqëkichö mana tsarakuptikiqa, juk asuntukunachöpis jukta ruranëkipaqmi familiëkiqa obligashunki. Peru shumaq tratakur y decidinqëkichö alli tsarakuptikiqa, itsa wakinqa wiyayäshunkiman”. Tsënömi Aliceta pasarqan. Kananqa teytankunaqa precursormi kayan y teytanqa anciänum.

15. Mateu 5:14 a 16 y 1 Pëdru 2:12 textukuna ninqannöpis, ¿imanötaq cristiänu mayintsikkunapa ‘alli rurëninkuna’ familiantsikkunata yanapanman?

¹⁵ Jehoväqa, sirweqninkunapa ‘alli rurëninkunatam’ utilizan markanman nunakunata  wititsimunampaq (leyi Mateu 5:14-16; 1 Pëdru 2:12). Majëki Testïgu mana kaptinqa, ¿reqinku congregacionchö wawqikunata y panikunata? Qallanan pärrafukunachö Paulinepaq parlanqantsik paniqa, congregacionpita wawqikunata y panikunatam qowan Wayneta reqiyänampaq wayinman invitaq. Qowanmi yarpan juk wawqi mana alli pensëninta imanö cambiatsinqanta. Kënömi willakun: “Trabäjumpitam permïsukamurqan televisionchö pukllaqkunata noqawan rikänampaq. Tsëchömi cuentata qokurirqä wakin nunakunanölla kanqanta”.

16. ¿Imanirtaq familiantsikkunata reunionkunaman invitanantsik?

¹⁶ Juknöpaqa yanapashwan, familiantsikkunata reunionkunaman invitarninmi (1 Cor. 14:24, 25). Punta reunionman Wayne ëwanqanqa, Jesus Wanunqanta Yarpäna reunionmi karqan, tsëtaqa ëwarqan trabäjumpita yarqunqan höra kaptin y wallka tiempulla duraptinmi. Pëmi kënö willakun: “Manam llapan yachatsikayämunqantaqa entiendirqätsu, peru imanö tratayämanqantam sïqa yarpä. Noqamanmi witiyämurqan y shumaqmi saludayämarqan. Shonqupita patsë tsëta rurayanqantam cuentata qokurirqä”. Tsë congregacionchö juk panim, reunionchö y Diospita yachatsikur puriyanqanchö Paulineta alläpa yanaparqan wamranta cuidarnin. Tsëmi Wayneqa cuentata qokurirqan warmin Pauline imata creinqanta mas reqir qallanampaq kaqta, y tsë yanapaqnin panipa qowantam Bibliapita yachatsinampaq mañakurqan.

17. ¿Familiantsikkuna Jehoväta mana sirwiyaptinqa, ¿imanirtaq llakikushwantsu y imanirtaq yanapëta jaqishwantsu?

¹⁷ Llapan familiantsikkuna Jehoväta sirwiyänan junaq chämunantaqa alläpam munantsik. Peru llapan puëdinqantsikmannö yanapashqapis, itsa Diospitaqa yachakïta munayanqatsu. Tsënö kaptinqa, ama llakikushuntsu. Musyanqantsiknöpis, creinqantsikkunaman creiyänampaqqa manam pitapis obliguëta puëdintsiktsu. Tsënö kaptimpis, ama qonqashuntsu Jehoväta sirwir kushishqa kawakunqantsikta rikar, pëkunata yanapëta puëdinqanta. Pëkunapaq Diosman mañakushun, yachëllapa Diospita parlapäshun y imëpis yanapar sïguikäshun (Hëch. 20:20). Familiantsikta yanapanapaq kallpachakunqantsikta Jehovä bendicimunampaq kaqtaqa segürum këkantsik. Y familiantsikkuna wiyamashqaqa, pëkunapis salvakuyanqam.