1. ¿Imanirtan llapantsikpis kushikuntsik?

LLAPANTSIKMI kushikuntsik Jehoväpa markanchö kanqantsikpitaqa. Kanan witsampis Jehoväta sirwirqa yamë y kushishqam kawakushun. Teyta Diospa sirweqninkunaqa, ¿imanötan yanapanakushwan?

2. Apostol Pabluqa, ¿imapitatan cartankunachö parlan?

² Imanö rurashqa kanqantsikwanmi apostol Pabluqa cartankunachö yachatsimantsik. Tsënömi Teyta Diosta sirweqkunapis, më tsëpita karpis juknölla yanapanakur kantsik (Rom. 12:4-8; 1 Cor. 12:12-27; Efes. 4:16).

3. ¿Imakunapitatan yachakushun?

³ Kananqa Apostol Pablu yachatsikunqampitam yachakushun. Puntataqa yachakushun, wawqi panintsikkunawan yanapanakuyta puëdinqantsiktam. * Tsëpitanam wawqi panintsikkunata imanö yanapanapaq. Y usharinapaqnam Jehoväpa voluntäninta imanir ruranapaq kaqta.

4. Romänus 12:4, 5 ninqampitaqa, ¿imatatan yachakuntsik?

⁴ Jehoväqa kushikunmi kikintsikpura yanapanakushqa,  tsëtam apostol Pabluqa kënö yachatsikur qallarqan: “Imanömi juk cuerpullachö imëkantsik kapamantsik, peru tsë imëkantsikkunaqa mana llapantsu juk rurëllata rurayan, tsënöllam noqantsikpis mëtsikaq karpis, Cristuwan juntu juk cuerpulla kantsik, peru cada ünuqa juknintsik juknintsiktam wananakuntsik” (Rom. 12:4, 5). Awmi, wawqi panintsikkunawan jukläya karnimpis yanapanakuytaqa puëdintsikmi.

5. ¿Pikunatatan Jehoväqa yanapamänapaq “qarëtanö” churamushqa?

⁵ Wawqi panintsikkunata yanapanapaq parlarqa, ama pensashuntsu carguyoq kaqkunalla yanapakuy puëdiyanqantaqa (1 Tes. 5:12; Heb. 13:17). Rasunmi, Jehoväqa Jesustam yanapan “nunakunata qarëtanö” noqantsikpaq churamunampaq (Efes. 4:8). Tsë nunakunaqa kayan: Jehoväpa testïgunkunata pushaqkunawan yanapaqninkuna, Betel wayita rikaqkuna, congregacionkunata watukaqkuna, creikoqkunata rikaqkuna y yanapaqninkunam. Kushishqa sirwinapaqmi Jehoväqa pëkunata churamushqa yanapamänapaq (1 Pëd. 5:2, 3).

6. 1 Tesalonicensis 2:6-8 ninqannö, ¿imanötan Jehovä churanqan wawqikuna yanapamantsik?

⁶ Carguyoq wawqikunataqa kikin Jehovämi churamushqa imëkachö yanapakuyänampaq. Imanömi makintsik, chakintsik y wakin kapamaqnintsikkunapis imëkata ruranapaq yanapamantsik, tsënöllam pëkunapis imëkata rurayan yanapamänantsikpaq. Kë wawqikunaqa manam wakin alabayänantatsu munayan, tsëpa rantinqa Jehovä Diosta kushishqa sirwinapaqmi tukuynöpa yanapamantsik (leyi 1 Tesalonicensis 2:6-8). Carguyoq wawqikuna rurëninkunatapis dejëkur yanapamanqantsikpitam Jehoväta agradecikuntsik.

7. Llapan tiempunkunawan yachatsikoqkunaqa, ¿ima bendicionkunatatan chaskiyashqa?

⁷ Itsa Teyta Diospita yachakunapaq juntakanqantsik wayichöqa, llapan tiempunkunawan yachatsikoqkuna kayan. Tsënöllam entëru Patsachöpis llapan tiempunkunawan yachatsikoq wawqi panikuna, Jehovä Diospita mëtsikaq nunakuna bautizakuyänampaqmi yachatsir yanapayashqa. Kë wawqi panikunaqa imëkayoq mana karpis, Jehovä bendicishqa kaptinmi kushishqa kawakuyan (Mar. 10:29, 30). Llapan tiempunkunawan yachatsikoq wawqi panintsikkunawan juntu kanqantsikpitaqa agradecikuntsikmi.

8. ¿Imanirtan Jehoväqa yanapanakunata munan?

⁸ Tsënö kaptinqa, ¿carguyoq wawqikunallaku y llapan tiempunkunawan yachatsikoqkunallaku yanapakuyta puëdiyan? Manam. Noqantsik yanapakunantsiktapis Jehoväqa munanmi, y wawqi panintsikkunapis pëkunata yanapashqaqa kushikuyanmi (Rom. 10:15; 1 Cor. 3:6-9). Jehoväqa, Jesuspa qateqnin tikrayänampaq urgenti yachatsikunatam munan (Mat. 28:19, 20; 1 Tim. 2:4). Tsëmi bautizakushqana kar o manaraq bautizakurpis, imëkata dejëkurnin yachatsikunantsik (Mat. 24:14).

9. ¿Imanirtan panintsikkunapita agradecikuntsik?

 ⁹ Teyta Jehoväqa panintsikkunatapis kuyanmi. Pëqa casäda warmikuna, mamakuna, viudakuna y soltërakuna rurayanqampitam kushikun. Tsëmi Jehoväqa Bibliachöpis qellqatsirqan yachaq, markäkoq o yärakoq, imatapis gänaslla ruraq, valienti, shonqupita qarakoq y yanapakoq warmikunapaq. Kë warmikunaqa Diosnintsik munanqanta rurarmi kushitsiyarqan (Lüc. 8:2, 3; Hëch. 16:14, 15; Rom. 16:3, 6; Filip. 4:3; Heb. 11:11, 31, 35). Kanan witsampis tsënö panikuna kayanqampitaqa, Jehovätam agradecikuntsik.

10. ¿Imanirtan edäyashqana wawqi panikunata kuyantsik?

¹⁰ Tsënöllam kushikuntsik awkinna o chakwanna wawqi panintsikkunawan këkanqantsikpita. Wakinqa atska watapanam Jehovä Diosta sirwikäyan y wakinnam tsëraq sirwir qallëkäyan. Pëkunaqa edäna y qeshyapäkurninmi unënöqa yachatsikuyta ni yanapakuyta puëdiyannatsu. Tsënö karpis puëdiyanqannömi Jehoväpita yachatsikuyan, llakishqakunata shumaq parlapar yanapayan y yachakuyanqankunatam wakinta yachatsiyan. ¡Imëkatam pëkunapita yachakuntsik! Pëkunataqa Jehovä y noqantsikpis kuyantsikmi (Prov. 16:31).

11, 12. Jövinkuna rurayanqanqa, ¿imanötan yanapashunki?

¹¹ Jövinkuna rurayanqanqa kushikuypaqmi. Kë Patsata Diablu gobernaptinmi pëkunapaqqa fäciltsu Jehovä munanqannö kawayänan (1 Juan 5:19). Tsënö kaptimpis pëkunaqa reunionkunachömi parlakayämun, yachatsikoq yarquyan y allim tsarakuyan. Tsënö kayanqanta rikarmi kushikuntsik. Tsëmi jövinkunaqa Jehoväpa markanchö imëka rurëta puëdiyan (Sal. 8:2).

 ¹² Tsënö yanapakuykarpis wakin wawqi panintsikkunaqa mana yanapakuyanqantam pensayan. Tsënö pensarqa yarpäshun, Jehoväqa kushikunmi ruranqantsikpita. ¿Imatan yanapamäshun tsëta yarpänapaq?

13, 14. ¿Imanirtan mana väleqnö sientikushwan?

¹³ Wawqi panikuna, ¿rurayanqëkikuna mana välinqantaku pensayanki? Tsënö pensayaptikiqa apostol Pablu qellqanqanmi yanapayäshunki. Kënömi nirqan: “Sitsun chaki kënö ninman: ‘Maki mana karmi, cuerpupa imantsu kä’, manam tsërëkurtsu cuerpupa imampis këta jaqirin. Y sitsun rinri kënö ninman: ‘Nawi mana karmi, cuerpupa imantsu kä’, manam tsërëkurtsu cuerpupa imampis këta jaqirin” (1 Cor. 12:15, 16). Këpitaqa imëkatam yachakuntsik.

¹⁴ Ruranqantsikta jukkuna rurayanqanwan igualatsirqa mana väleqnömi sientikushwan. Wakin wawqikunaqa alli yachatsikoqmi kayan, wakinnam imatapis shumaq patsätsiyan y wakinnam kuyëllapa yanapakoq kayan. Tsëta rikarqa pëkunanö mana kanqantsiktachi pensashwan. Tsënö pensanqantsikqa humildi kanqantsiktam rikätsikun (Filip. 2:3). Tsënö kaptimpis, jukkunawan igualakurqa mana väleqnö sientikurmi yanapakuyta munashunnatsu. Tsënö sientikushqaqa apostol Pablu ninqanmi yanapamäshun.

15. 1 Corintius 12:4-11 ninqannö, ¿imatatan qonqanantsiktsu?

¹⁵ Punta cristiänukunapa tiempunchö pasakunqanta yarpäshun. Jehovä Diosqa imëkata rurayänampaqmi wakin cristiänukunata yanaparqan (leyi 1 Corintius 12:4-11). Tsënöllam kanampis puëdinqantsikmannö pëpaq ruranqantsikpita Jehoväqa kushikun.

16. ¿Apostol Pablu ima ninqantatan cäsukunantsik?

 ¹⁶ Apostol Pabluqa kënömi nirqan: “Cada ünu alleq rikätsun kikimpa rurëninkunata, tsëqa kikin ruranqankunapitam kushikunqa, y manam juk nunawan igualatsikunqampitatsu” (Gäl. 6:4). Jukkunawan igualakunantsikpa rantin apostol Pablu ninqanta cäsukushun.

17. Apostol Pablu nimanqantsikta casukuyqa, ¿imanöraq yanapamäshun?

¹⁷ Ruranqantsikta cuentachö katsirqa, kikintsik rurëta puëdinqantsiktam cuentata qokurishun. Pensashun creikoqkunata rikaq wawqillaman: reunionkunachö yachatsikuyta puëdinmantsu, peru bautizakuyänampaq nunakunata yanapëtaqa puëdinman. O imatapis rurayänampaq shumaq patsätsitaqa puëdiyanmantsu, peru wawqi panikunata Bibliawan shumaq yanaparita, imallatapis qararita y posadatsitaqa puëdinmanmi (Heb. 13:2, 16). Rurëta yachanqantsikwan yanapakurqa kushikushunmi y manam wakinkunata chikishuntsu.   

18. ¿Imanötan alli yachatsikoq kashwan?

¹⁸ Jehovä Diosqa alli yachatsikoq kanapaqmi cada semäna reunionkunachö yachatsimantsik. Tsëmi ima rurëta yacharpis Diosnintsikpita alli yachatsikunapaq masqa kallpachakunantsik.

19. Ishkë killa duraq escuëlaman ëwanapaqqa, ¿imatatan ruranantsik?

¹⁹ Alli yachatsikoq kanapaqmi Jehovä Diosqa ishkë killa duraq escuëlata patsätsishqa. Tsë escuëlamanqa 23 a 65 watayoq llapan tiempunkunawan yachatsikoq wawqi panikunam ëwëta puëdiyan. ¿Tsë escuëlaman ëwëta mana puëdinqantsiktaku pensantsik? Ëwëtaqa puëdintsikmi. Tsëmi imanir ëwëta mana puëdinapaq kaqman pensanantsikpa rantin, imanir ëwëta munanqantsikman pensanantsik. Tsëpitanam tsë escuëlaman ëwanapaq kallpachakunantsik. Tsënö rurashqam Jehoväqa yanapamäshun.

20. Romänus 12:6-8 ninqampitaqa, ¿imatatan yachakuntsik?

²⁰ Romänus 12:6-8 (leyi) apostol Pabluqa nirqan llapantsikpis imëka rurëta yachanqantsikta. Tsëmi rurëta yachanqantsikkunawan wawqi panintsikkunata alli tsarakuyänampaq tukuynöpa yanapanantsik.

21, 22. Robertuwan Felïci pasayanqampitaqa, ¿imatatan yachakuntsik?

²¹ Creikoqkunata rikaq wawqi Robertu * pasanqanta rikäshun. Pëtaqa atska watapa juk nacionchö yanapakuykaptinmi, Betel wayichö yanapakunampaq nacionninman qayatsiyarqan. Betelchö yanapakuykarpis Robertuqa kënömi sientikurqan: “Atska killapam mana alli rurashqa kanqäta y manana sirwinqäta pensarqä. Hörataqa Betel wayipitapis ëwakuytam munarqä”. ¿Imatan yanaparqan tsënö mana pensanampaq? Creikoqkunata rikaq wawqim nirqan unëna yachakunqankuna, kanan rurëkanqankunata mas alli ruranampaq yanapanqanta. Tsëmi  Robertuta yanaparqan, llakikunampa rantin kanan rurëkanqankunawan kushishqa kanampaq.

²² Tsënöllam wawqi Felïci Episcoputapis pasarqan. Pëwan warminqa 1956 watachömi Galaad escuëlapita yarqayämurqan y Bolivia nacionchömi congregacionkunata watukar yanapakuyarqan. Peru 1964 watachömi juk wamran yurirqan. Tsëtam Felïciqa nin: “Yanapakuyanqächöqa kushishqam këkäyarqä y manam dejëta munayarqätsu. Y juk watam llakikurlla kakurqä. Tsënö kaptimpis Jehovä yanapamaptinmi juknöpana pensar qallëkurqä, y alli teyta kanäpaqmi kallpachakurqä”. ¿Noqantsikpis Robertunö o Felïcinöku llakikur këkantsik? Itsa puntatanöna yanapakuyta mana puëdirnin llakishqa këkantsik. Tsënö kaptinqa, kanan rurëta puëdinqantsikman yarparninmi Jehovä Diosnintsikta sirwinantsik y wawqi panintsikkunata yanapanantsik. Imëkata rurëta yachanqantsikwan wakinkunata yanaparninmi ocupädu këkänantsik. Tsënöpam puntatanö kushishqa kashun.

23. (1) ¿Imamantan alli pensanantsik? (2) ¿Imapitatan qateqninchö yachakushun?

²³ Jehoväqa ruranqantsikpitam kuyamantsik y familian kanantsiktam munan. Tsëmi wawqi panikunata imanöpis yanapëta puëdinqantsikman alli pensanantsik, tsëta rurarqa cuentatam qokushun noqantsikpis yanapakuyta puëdinqantsikta. Peru, ¿wakinkunataqa respetantsikku? Y ¿rurayanqanta cuentaman churantsikku? Kë tapukuykunapitaqa qateqninchönam yachakushun.