1. ¿Imanirtan Jehoväqa imëkata kamarqan?

MANARAQ imapis kaptinmi Jehoväqa karqanna, tsënö kaptimpis manam japallantsu sientikoq. Pëqa kushishqa karmi imatapis wanarqantsu, peru kuyakoq karmi imëkata kamar qallëkurqan (Sal. 36:9; 1 Juan 4:19).

2. Jehovä llapan kamanqankunata rikarqa, ¿imanötan sientikuyarqan Jesuswan angelkuna?

² Puntataqa, tsurin Jesustam Jehovä kamarqan. Tsëpitanam Jesuspa yanapakuyninwan llapan rikanqantsikta y angelkunatapis kamarqan (Col. 1:16). Awmi, Jesusqa kushishqam Teytanta yanaparqan (Prov. 8:30). Jehoväwan Jesus ciëlutawan Patsata kamayaptinqa, ¿imanöraq angelkuna sientikuyarqan? “Alläpa kushikuyarqan” ninmi Bibliaqa. Tsënö kushishqaqa kayarqan nunakunata y imëkata Teyta Dios kamar ushanqanyaqchi (Job 38:7; Prov. 8:31). Jehovä llapan kamanqankunachömi kuyakoq y yachaq kanqantaqa rikantsik (Sal. 104:24; Rom. 1:20).

3. 1 Corintius 15:21, 22 ninqannö, ¿imanötan Jesus wanunqan yanapamantsik?

³ Jehoväqa munarqan, shumaq patsa kamanqanchö nunakuna mana wanushpa kushishqa kawayänantam. Peru Jehovä ninqanta Adanwan Ëva mana wiyakur  jutsaman ishkirmi, wanuyman chäyarqan (Rom. 5:12). Tsënö pasakuptinmi, imanö altsanampaq kaqta Jehovä musyatsikurqan (Gen. 3:15). Tsëmi nunakunapa jutsankunarëkur tsurin Jesus wanunanta permitirqan. Tsënöpam Jehoväta sirwiyänampaq y mana wanushpa kawakuyänampaqqa kikinkuna akrakuyänan karqan (Juan 3:16; Rom. 6:23; leyi 1 Corintius 15:21, 22).

4. ¿Imakunapitatan yachakushun?

⁴ Wanushqakunata Teyta Dios kawaritsimunampaq änimanqantsikqa kë tapukuykunamanmi pensatsimantsik: ¿imanöraq wanushqakuna kawariyämunqa?, ¿familiantsikkuna kawariyämuptinqa reqishuntsuraq?, wanushqakuna kawariyämunqanqa, ¿imanirtan alläpa kushikuypaq kanqa? y ¿imanötan agradecikushwan Jehovä kuyakoq, yachaq y pacienciayoq kanqampita?

5. Llapan nunakuna juk junaqllachö mana kawariyämunampaq kaqtaqa, ¿imanirtan nintsik?

⁵ Tsurin wanunqanrëkurmi Jehoväqa mëtsikaq nunakunata kawaritsimunqa. Itsa pëkunata shumaq yanapanapaq, Jehoväqa wallka wallkalla wanushqakunata kawaritsimunqa. Tsënömi Jehoväqa rikätsikun imatapis shumaq patsëkatsir ruraq Dios kanqanta (1 Cor. 14:33). Jehoväqa yachaq y pacienciayoq kanqantaqa rikätsikurqan, tsurin Jesuswan kë Patsata nunakunapaq rurayanqanchömi. Y Jesuspis  ushakë junaqta kawëkar pasaqkunatam yanapanqa, wanushqakunata chaskir shumaq atiendiyänampaq.

6. Hëchus 24:15 ninqannö, ¿pikuna mastan kawariyämunqa?

⁶ Ushakë junaqta kawëkar pasaqkunaqa, kawarimoq kaqkunatam Diospa Gobiernumpita y mandakuyninkunata yachatsiyanqa. ¿Imanir? Tsënöqa yachatsikushun Teyta Diosta mana reqeqkunapis kawariyämuptinmi. Mëtsikaq kawarimoqkunata yachatsinapaqqa alliraqchi kallpachakushun (leyi Hëchus 24:15). Pëkunapis mana wanushpa kawëta munarqa, Jesus wanunqanman markäkur o yärakurmi mana alli rurëninkunata dejayänan. Cada nunata Bibliapita yachatsinqantsiknötsuraq, ¿shamoq tiempuchöpis yachatsishun? ¿Kanannötsuraq Diospa wayinchö juntakäshun? Tsëpitaqa, ¿kawarimoqkunata yachatsiyänampaqtsuraq yachatsishun? Tsëtaqa manam musyantsiktsu. Peru allim musyantsik, waranqa watapa Jesuspa mandakuynin ushanqanchö “TEYTA DIOSTA reqiqkunapis kë patsachö” atska kayänampaq kaqtaqa (Is. 11:9). Tsë waranqa watakunaqa, ¡imanö kushikuypaqraq kanqa!

7. Jehovä Diospa sirweqninkunaqa, ¿imanötan kawarimoqkunata yachatsiyanqa?

⁷ Waranqa watapam Jehoväta sirweqkunaqa, rurëninkunawan kuyayanqanta o mana kuyayanqanta rikätsikuyanqa. Tsëmi Jehoväta manaraq reqeqkuna kawariyämuptinqa yachatsinantsik jutsata mana rurashllapana kawakuyänampaq (1 Pëd. 3:8). Tsëmi Teyta Diospa sirweqninkuna humildi kayänampaq kallpachakoqta rikarninqa, kawarimoqkunapis Jehovä Dios sirwita munayanqa (Filip. 2:12).

8. Wanushqakuna kawariyämuptinqa, ¿imanirtan nintsik familiankuna reqiyänampaq kaqta?

⁸ Wanushqakuna kawariyämuptinqa, ¿imanöraq familiankuna reqiyanqa? Itsa manaraq wanur imanö kayanqantanö, Jehoväqa llapan nunakunata kawaritsimunqa. Y Jesusqa nirqan wanushqakuna punuykaqnö këkäyanqanta y kawarimoqkunapis punuyanqampita riyamoqnö kayanqantam. Awmi, Biblia ninqannömi wanushqakunaqa kawariyämunqa (Mat. 9:18, 24; Juan 11:11-13). Pillapis pununqampita riyamuptinqa parlakuynin, yarpënin y imanö kënimpis kaqllam. Pensarishun Läzaruta pasanqanman. Chusku junaq wanushqana kaptinchi ayanqa asyëkarqanna, tsënö kaptimpis Jesusqa kawaritsimurqanmi. Turin Läzaruta rikëkurqa, paninkunaqa rasllam reqiriyarqan y tsënöllachi Läzarupis raslla reqirirqan (Juan 11:38-44; 12:1, 2).

9. Wanushqakunaqa, ¿jutsannaqnatsuraq kawariyämunqa?

⁹ Jehovä änikunqannömi, tsurin Jesucristupa Gobiernunchöqa ni pï nunapis “qeshyëkämi” ninqanatsu (Is. 33:24; Rom. 6:7). Awmi, Teyta Diosqa sänutanam wanushqakunata kawaritsimunqa. Peru manam tsërëkurtsu jutsannaq këmanqa raslla chäriyanqa.  Tsënö kaptinqa, itsachi kastankunaqa reqiyanmantsu. Waranqa watapa Jesucristu gobernamuptinran ichikllapa ichikllapa qeshyëkuna y mana allikunapis ushakanqa. Y tsë Gobiernu llapan nunakunata yanapariptinnam, Jesusqa Teytanta kutïkatsinqa (1 Cor. 15:24-28; Rev. 20:1-3).

10. Wanushqa kastantsikkuna kawariyämuptinqa, ¿imanötan sientikushun?

¹⁰ Wanushqa kastantsikkuna kawariyämuptinqa, ¿kushikushuntsuraq? ¿Kushikuypitatsuraq waqashun? Tsë kushikuypitatsuraq, ¿Jehoväta cantar alabashun? Imanö kaptimpis Teytantsik Jehoväta y tsurin Jesustam alläpa agradecikushun wanushqa kastantsikkuna kawariyämunqampita.

11. Juan 5:28, 29 ninqannö, ¿imanö kawakuytatan kawarimoqkuna chaskiyanqa?

¹¹ Wanushqakuna kawariramurqa, alläpachi kushikuyanqa unënöna mana kayanqanta musyarnin y Jehovä Dios munanqannö kawakurnin. Kawarimoqkuna imanö këninkunata cambiarninqa “kawayänampaqmi kawariyämunqa”, peru Jehoväpa contran kaqkunaqa ushakäyanqam (leyi Juan 5:28, 29; Is. 65:20).

12. ¿Imanötan Jehoväqa llapan kawarimoqkunata bendicinqa?

¹² Proverbius 10:22 kënö nin: “Teyta Diospa bendicionninwanqa imëkantsikpis kanmi. Bendicionninta chaskiqkunaqa kushikuntsikmi”. Y tsëtam Teyta Diospa Gobiernunchöqa llapan sirweqninkuna rikäyanqa. Tsë witsanchö Jehovä Dios yanapaptinmi jutsannaqna kayanqa (Juan 13:15-17; Efes. 4:23, 24). ¡Alläpachi kushikuyanqa shumaq y allina kawakurninqa! (Job 33:25). Kuyashqa kastantsikkuna kawariyämunampaq kaqta musyanqantsikqa, ¿yanapamantsikku?

13. Salmus 139:1-4 ninqanqa, ¿imatatan Jehoväpita yachatsimantsik?

¹³ Nunakuna manaraq wanurnin imanö kayanqantanöllam Jehovä Diosqa kawaritsimunqa. Kuyamarnintsikmi Jehoväqa imata yarpanqantsikta, imanö kanqantsikta, imata ninqantsikta y imata ruranqantsiktapis musyan. Tsënö reqimarnintsikmi unë kanqantsiktanölla kawaritsimäshun. Tsëtam Diospa sirweqnin Davidpis alli musyarqan (leyi Salmus 139:1-4 *). Tsëta musyanqantsikqa kushitsimantsikmi.

14. Jehovä reqimanqantsikqa, ¿imanötan yanapamantsik?

¹⁴ Teyta Jehoväqa alli reqimarnintsikmi, jukläya jukläya kashqapis llapantsikta kuyamantsik. Pëqa imanö winashqa kanqantsiktapis musyanmi. Këkunata musyanqantsikqa yamë kanapaqmi yanapamantsik. Awmi, Teyta Jehovä yanapamashqam japallantsik karpis llakikushuntsu (2 Crön. 16:9).

15. ¿Imachötan Teyta Diospa yachaq kënin rikakan?

¹⁵ Diablupa munëninta ruraqkunaqa nunakuna wanuyta mantsayanqanrëkurmi amïgunkunata y creiyanqankunata dejatsiyan. Peru Jehovä yanapamashqam tsëkunataqa mantsantsiktsu. Wanutsimashqapis Jehoväqa yapëmi kawaritsimäshun (Rev. 2:10). Tsëmi imata rurarpis Teyta Diospitaqa rakimënintsikta puëdiyanqatsu (Rom. 8:35-39). Tsëchömi rikantsik Teyta Jehovä alläpa yachaq kanqanta, tsënöpam Diabluqa nunakunata engañëta puëdinqanatsu. Y wanuytapis manam mantsashunnatsu.

16. ¿Imakunatatan tapukunantsik?

¹⁶ Chikimaqnintsikkuna wanutsimashqapis Jehovä kawaritsimänapaq kaqmanmi markäkuntsik o yärakuntsik. Tsëpaqqa kënö tapukushun: cada junaq akranqäkunaqa, ¿Jehoväman markäkunqätaku rikätsikun? (Lüc. 16:10). Jehovä munanqanta ruraptïqa, ¿wananqäkunachö yanapamänampaq kaqmanku markäkü? (Mat. 6:31-33). Tsënö kaptinqa, ima pasamashqapis Jehovä yanapamänapaq kaqmanmi markäkushun (Prov. 3:5, 6).

17. (1) Wanushqakunata kawaritsimunqanqa, ¿imanötan Jehovä pacienciayoq kanqanta rikätsikun? (2) Jehovä pacienciayoq kanqampitaqa, ¿imanötan agradecikushwan?

¹⁷ Jehoväqa patsätsishqanam mana allikunata imë ushakätsinampaq kaqta (Mat. 24:36). Wanushqakunata kawaritsimunampaqqa, pacienciawanmi tsë hörata shuyëkan (Job 14:14, 15). Tsëmi tsë tiemputaqa kushishqa shuyarëkan (Juan 5:28). Pacienciayoq kanqanqa manam noqantsikllatatsu yanapamantsik, sinöqa wakin nunakunatapis jutsankunapita arrepentikuyänampaqmi yanapan (2 Pëd. 3:9). Jehoväqa llapan nunakuna kawayänantam munan. Tsëmi agradecikoq kanqantsikta rikätsikuntsik “imëyaqpis kawakïta” munaqkunata yachatsirnin, tsënöpa Teyta Jehoväta kuyarnin sirwiyänampaq (Hëch. 13:48). Awmi,  pacienciayoq kanqanqa nunakunatapis yanapanmi.

18. ¿Imanirtan wakinkunawan pacienciayoq kanantsik?

¹⁸ Waranqa watakuna pasariptinran jutsannaqqa kashun, tsëyaqqa pacienciawanmi Jehovä perdonamäshun. Tsëmi noqantsikpis pënölla wawqi panintsikkunata rikänantsik y pacienciayoq pëkunawan kanantsik. Juk pani pasanqankunata rikärishun, tsë panipa qowanqa llakikuy qeshyëwan karninmi reunionkunamampis ëwarqannatsu. Tsëtam pë cuentakun: “Kë pasakunqankunaqa alläpam llakitsimaq. Imëkata rurayänäpaq parlayanqanqa ushakäreqnömi karqan”. Tsëkunapa pasëkarpis qowantaqa pacienciawan y kuyëllapam rikarqan. Jehoväman markäkurmi imapis qelanätsinanta dejarqantsu. Paniqa Jehovänö kaqmi qowan alli ruranqankunata rikarqan. Tsëtam kënö nin: “Qowaqa alli nunam, y alliyänampaqmi imëkata rurëkan”. Noqantsikpis familiantsikkuna y wawqi panintsikkuna mana allikunapa pasayaptinqa pacienciayoqmi pëkunawan kanantsik.

19. ¿Imata ruranapaqtan cada junaq kallpachakunantsik?

¹⁹ Kë Patsata Jehovä kamaptinmi Jesuswan angelkunaqa alläpa kushikuyarqan. Y tsënöllachi kushikuyanqa kë Patsachö llapan nunakuna jutsannaqna karnin Jehovällata sirwiyaptin. Ciëluchö Jesuswan gobernamoqkunaqa tukuynöpam yanapamäshun, y yanapamanqantsik allipaq kanqanta rikarninmi pëkunapis kushikuyanqa (Rev. 4:4, 9-11; 5:9, 10). Manana qeshyarnin, manana llakikurnin y manana wanurninqa imanö shumaqraq kawakushun (Rev. 21:4). Tsëqa cada junaq Teyta Diosnintsiknö kuyakoq, yachaq y pacienciayoq kanapaq kallpachakushun. Tsënö rurarqa mana allikunapa pasarpis kushishqallam këkäshun (Sant. 1:2-4). Awmi, wanushqakunata Jehovä kawaritsimunampaq änikunqampitam agradecikuntsik (Hëch. 24:15).