1, 2. Salmus 34:8 ninqannö, ¿imatataq rurashwan Jehovä alläpa alli kanqanta musyanapaq?

KËLLAMAN PENSARISHUN: itsa pillapis imëpis mana mikunqantsik mikuyta qararamashwan. Mishkeq o kachiyoq kanqantaqa musyashun rikarnin, muskirnin, imanö rurashqa kayanqanta tapukurnin o gustanqanta o mana gustanqanta pitapis tapurninmi. Peru noqantsikta gustamanqantsiktaqa musyashun, kikintsik llamirnin o yawarninran.

² Tsë cuentallam, Jehovä alli kanqantaqa, Bibliata y publicacionnintsikkunata leyirnin, y wakinkunata Jehovä bendicinqanta wiyarnin yachakuntsik. Peru alläpa alli kanqantaqa musyashun, yanapamanqantsikta rikarninraqmi (leyi Salmus 34:8, TNM). * Këllaman pensarishun: llapan tiempuntsikwan Jehoväta sirwita munashwan, peru tsëpaqqa, wallkallawanna sirwinapaq churapakänantsikraq kanman. Itsa Diospa Gobiernunta puntaman churashqa, llapan wananqantsikta Jehovä procuramunampaq kaqta Jesus änimanqantsikta atska kuti leyishqa karquntsik. Peru tsënö änikunqan noqantsikchö cumplikaqtaqa manaran rikarquntsiktsu (Mat. 6:33). Tsënö kaptimpis, Jesus änikunqanman markäkurnin o yärakurninmi, mas wallkallawanna kawanapaq patsätsintsik y Diospita mas yachatsikurnin qallëkuntsik. Y tsëta rurashqa, Jehovä imanö cuidamanqantsikta rikashwan. Tsënöpam, Jehovä alläpa alli kanqanta kikintsik musyarintsik.

3. Salmus 16:1 y 2 ninqannö, ¿pikunatan Jehoväpa alli këninta rikäyan?

³ Jehoväqa, “pïmëpaqpis allitam ruran”, hasta pëta mana reqeqkunapaqpis (Sal. 145:9; Mat. 5:45). Peru Pëta kuyaqkunata  y llapan puëdiyanqannö sirweqninkunatam masqa bendicin (leyi Salmus 16:1, 2, TNM). * Noqantsikpaq imëka allikunata Jehovä ruramunqampita wakinllata rikärishun.

4. ¿Imanötan alli kanqanta Jehovä rikätsin pëpita yachakur qallaqkunata?

⁴ Jehoväpita yachakunqantsiknö rurashqaqa, mas alli kawakunqantsiktam rikantsik. Pëpita mas yachakurnin y mas kuyarninmi, pëpita rakikashqa katsimaqnintsik pensëkunata y portakuyta dejarqantsik (Col. 1:21). Y Pëllatana sirwinapaq änikurir bautizakurishqam, alli concienciayoq y alli amïgun kanapaq permitimanqantsikchö masraq alli kanqanta rikarqantsik (1 Pëd. 3:21).

5. Diospita yachatsikunqantsikchöqa, ¿imanötan alli kanqanta Jehovä rikätsimarquntsik?

⁵ Jehovä alli kanqantaqa, pëpita yachatsikunqantsikchömi rikantsik. ¿Mantsakoqku kanki? Jehoväta sirweqkunaqa mëtsikaqmi tsënö kayan. Itsa Diospita manaraq yachakurqa, ni ichikllapis pensarqëkitsu mana reqinqëkikunapa punkunta takakur Diospita yachatsinëkipaq kaqtaqa. Peru kananqa, seguïdum tsëta ruranki. Y manam tsëllatsu, Jehovä yanapashuptikim kushishqa yachatsikunki. Jina juknöpapis Jehovä yanapashunqëkitaqa rikarqunkim. Këllaman pensari: itsapis Diospita yachatsikunqëkichö mana alli tratayäshurqëki, y mana cölerakunëkipaqqa Jehovä yanapashunqëkita rikarqëki. Tsënöllam, Bibliapita yachakuyta munaq nunata parlapaptikipis, Biblia ninqanta yarpätsishurqëki. Y yachatsikunqëki markachö mana wiyayäshuptikipis, Jehoväqa yachatsikur sïguinëkipaqmi yanapashurqunki (Jer. 20:7-9).

6. Nunakunata parlapänapaq yachatsimanqantsikchöqa, ¿imanötan Jehovä kuyakoq kanqanta rikantsik?

⁶ Jina Jehoväqa, pëpita yachatsikunapaq yachatsimarnintsikmi alli kanqanta rikätsimarquntsik (Juan 6:45). Semänachö kaq reunionchömi, nunakunata Diospita imanö parlapänapaq yachakuntsik. Itsa juknöpa yachatsikunapaq nimashqaqa, qallananllachöqa mantsakuntsik. Peru nimanqantsiknölla markantsikchö yachatsikurqa, mas alli kanqantam rikantsik. Jina reunionkuna y asamblëakunachöqa, imëpis mana yachatsikunqantsiknö yachatsikunapaqmi nimantsik. Y tsëqa yachakashqana kanqantsikpitam juknöpana ruranantsik. Peru yachatsimanqantsiknölla rurashqaqa, Jehoväqa ruranqantsikta bendicimunqam. Kananqa, imanö këkashqapis Jehoväta mas sirwinapaq imakunata rurëta puëdinqantsikta rikärishun. Tsëpitanam, ruranapaq churapakanqantsikkunata imanö logranapaq kaqta rikäshun.

7. Diosta mas sirwinapaq kallpachakurqa, ¿ima bendiciontataq chaskintsik?

⁷ Jehoväwanmi mas alli amïgu tikrantsik. Creikoqkunata rikar yanapakoq wawqi Samuelwan * warminmi, Colombia nacionchö yanapakuyan. Pëkuna imata rurayanqanta rikärishun. Pëkunaqa precursor karmi congregacionninkunachö kushishqa yanapakuyaq, peru mas yanapakuyta munarmi, Diospita yachatsikoqkunata wanayanqan congregacionman ëwakuyarqan. Tsëchö yanapakuyänampaqqa, imëkankunatam dejayarqan. Samuelmi kënö nin: “Mateu 6:33 ninqanta yarparmi, mana wanayanqäkunataqa  rantiyarqänatsu. Peru mas sasaqa karqan, munayanqänö ruratsiyanqä wayïkunata dejëmi”. Yanapakoq ëwayanqan sitiuchöqa, puntata ganayanqampita mas wallkallawan kawakuyta puëdiyanqantam rikäyarqan. Jina Samuelqa kënöpis ninmi: “Patsätsiyanqäkunachö Jehovä yanapayämanqanta y mañakuyanqäta contestamunqantam rikäyarqö. Imëpis mana pasayämanqannömi, pëpa rikëninchö alli kayanqäta y kuyayämanqanta rikäyarqö”. Jehoväta sirwinqëkichö, ¿qampis juknöpa yanapakuyta puëdinkimantsuraq? Tsëta ruraptikiqa, Jehoväwanmi mas amïgu kayanki y cuidashunqëkitam rikanki (Sal. 18:25).

8. ¿Imatataq yachakunki Ivanwan Viktoria cuentakuyanqampita?

⁸ Jehoväta sirwirmi kushishqa kantsik. Wawqi Ivanwan warmin Viktoriam, precursor kayan y Kirguistan nacionchö yanapakuyan, pëkuna cuentakuyanqanman pensarishun. Imachöpis mas yanapakuyänampaq o Diosta adoranapaq wayikunata rurëchö yanapakuyänampaqmi, mas wallkallawanna kawakuyänampaq churapakäyarqan. Ivanmi kënö nin: “Cada obrachömi llapan puëdiyanqämannö trabajayaq kayä. Juk junaq trabäjükunata usharirnin alläpa utishqa o pishipashqa këkarpis, Diospa Gobiernumpaq trabajashqa karninmi kushishqa kayaq kayä. Wawqi panikunawan amïgu këman chäyanqä y imëka allikunata pasayanqätapis kushishqam yarpäyä” (Mar. 10:29, 30).

9. Mana allikunapa pasëkaq juk paniqa, ¿imatataq rurashqa Diosta mas sirwinampaq y imatataq lograshqa?

⁹ Mana allikunapa pasëkarpis, Jehoväta sirwirqa kushishqam kashun. Këllaman pensarishun: Africa Occidentalchö Mirreh jutiyoq ëdayashqana doctöra panim, jubilakurir precursöra tikrarqan. Artrïtis qeshyayoq karmi, wayin wayinqa juk höralla yachatsikuyta puëdin. Tsëmi mas nunakuna puriräyanqanchö carrïtukunawan yachatsikun. Mëtsikaqtam yapë watukan y atskaqtam Bibliapitapis estudiatsin, y wakintaqa telëfunullapam yachatsin. ¿Imanirtan Jehoväta mas sirwita munan? Pëmi kënö nin: “Jehovätawan Jesucristutam alläpa kuyä. Tsëmi llapan puëdinqämannö yachatsikunäpaq Jehoväta yanapëkamänampaq seguïdu mañakü” (Mat. 22:36, 37).

10. 1 Pëdru 5:10 ninqannöpis, ¿imanötan Jehoväqa yanapan pëta mas sirwita munaqkunata?

¹⁰ Jehoväqa mas yanapakunapaqmi yanapamantsik. Mauriciu islachö täraq Kenny jutiyoq precursor wawqim, tsënö kanqanta rikarqan. Diospita yachakur qallëkurmi universidächö estudiëta dejarirqan, tsëpita bautizakurirqan y tsëpita precursor regular tikrarirqan. Pëmi kënö nin: “Diospa willakoqnin Isaïasnö këtam procurä. Pëmi kënö nirqan: ‘Këchömi këkä, Teytallä. Noqallächi ëwashaq’” (Is. 6:8). Wawqi Kennyqa, Diosta adoranapaq wayikunata rurarnin, y parlanqan idiömaman publicacionkunata tumatsirmi yanapakushqa. Kënömi nin: “Yanapakunäpaq niyämanqanchö alli trabajanäpaqmi imëkata yachatsiyämarqan”. Peru manam trabäjunta imanö ruranampaq kaqllatatsu yachakurqan. Pëmi kënö nin: “Llapanta rurëta mana puëdinqäta y Jehoväta mas alli sirwinäpaq imanö kanäpaq kaqtam yachakurqä” (leyi 1 Pëdru 5:10). ¿Manatsuraq imanö këkanqëkita rikärir mas yanapakunëkipaq Jehovä yachatsishunëkita dejankiman?

11. Diospita mas yachatsikuyänanrëkur, ¿imatataq Corëa del Surchö wakin wawqi panikuna rurayarqan y imatataq tsëwan lograyashqa? (Jana qaranchö këkaq dibüjukunata rikäri).

¹¹ Mëtsika tiempupana Testïgu kaqkunapis,  juknöpa mas yanapakuyänampaq churapakäyaptinqa tsëta imanö rurayänampaqmi Jehovä yachatsin. CÖVID-19 muyakoq qeshya kanqan witsanmi, Corëa del Sur nacionchö juk congregacionpita creikoqkunata rikaqkuna kënö qellqayarqan: “Salorninkunarëkur Diospita mas yachatsikuyta mana puëdiyänampaq kaqta pensaq wawqi panikunam, kananqa Internetpa mas yachatsikuyan. Ochenta watapitapis masyoqna kima panikunam, Internet-ta manejëta yachakuyashqa y kananqa cäsi llapan junaqkunam yachatsikuyan” (Sal. 92:14, 15). ¿Manatsuraq Jehovä alläpa alli kanqanta rikänëkipaq pëta sirwinqëkichö masta rurëta munankiman? Qateqnin kaq pärrafuchö yachakunqantsikmi tsëpaq yanapashunki.

12. ¿Imatataq Jehovä änin pëman confiakoqkunataqa?

¹² Jehoväman confiakuyta yachakuy. Pëqa, pëman confiakushqa y puëdinqantsikmannö sirwishqaqa, bendicimänapaq kaqtam änimantsik (Mal. 3:10). Colombia nacionchö täraq Fabiöla panim, änikunqanta Jehovä cumpleqta rikarqan. Pëqa bautizakurirllam precursöra këta munarqan, peru qowampaq y kiman wamrankunapaqqa, pë trabajanqanwanraqmi tinkupakuyaq. Tsëmi jubilakunampaq papelninkunata alistarirqa, yanapëkunampaq Jehoväta rogakurqan. Pëmi kënö willakun: “Pipapis jubilacionnin yarqunampaqqa, atska tiempuran  demoran, peru noqapaqa juk killallachömi yarqaramurqan. Juk milagru cuentam karqan”. Tsëpita ishkë killa pasarinqanllachömi, precursöra tikrarirqan. Kananqa, 70 watapitapis masyoqnam, y 20 watapitapis masmi precursöra regularnö yanapakun. Y tsë watakunachömi, bautizakuyänampaq öchu nunakunata yanapashqa. Pëmi kënö nin: “Höra höra kallpannaq kaptïpis, Jehovämi höräkunata cumplinäpaq yanapaman”.

13, 14. ¿Pikunapaq leyinqantsiktan Jehoväman mas confiakunapaq y pëta sirwinqantsikchö masta ruranapaq yanapamäshun?

¹³ Jehoväman confiakushqa kaqkunapita yachakuy. Llapan puëdiyanqanmannö Diosta sirweqkunapaqqa, Bibliachöqa mëtsikaqpaqmi willakun. Pëkunapita mëtsikaqqa, Jehovä manaraq bendiciptinmi imëkata rurashqa kayarqan. Këllata yarpärishun: “mëta ëwanampaq kaqta mana musyëkarpis” yarquptinraqmi, Jehoväqa Abrahanta bendicirqan (Heb. 11:8). Jacobnam juk angelwan tsaränakunqampitaraq, juk bendicionta chaskirqan (Gen. 32:24-30). Y israelïtakunaqa, Jordan mayuman sacerdötikuna yëkur qallëkuyaptinran Dios Äninqan Patsaman tsimpëta puëdiyarqan (Jos. 3:14-16).

¹⁴ Jina Jehoväman confiakur pëta mas sirwiyänampaq kanan witsan kallpachakoq Testïgukunapitapis yachakuytam puëdinki. Këllaman pensarishun: wawqi Paytonwan warmin Diänaqa, revistakunachö “kushishqam yanapakoq ëwayashqa” * neqchö Jehoväta mas sirwiyänampaq churapakaq wawqi panikuna cuentakuyanqantam leyiyaq. Paytonmi kënö cuentakun: “Pasayanqankunata leyirqa, mishki mikuyta mikupakuykaqtanömi rikäyaq kayä. Noqakunapis tsënö yanapakuyta y Jehovä alläpa alli kanqanta rikëtam munayaq kayä”. Tiempuwanqa, pëkunapis juk lädutam yanapakoq ëwakuyarqan. ¿Tsënö yanapakoqkunapaq yarqamoq willakuykunata leyirqunkiku? ¿Y Predicación en lugares apartados: Australia y Predicación en lugares apartados: Irlanda, ninqan videukunata jw.org päginachö rikarqunkiku? Tsëkunam, Diosta imanö mas sirwinëkipaq yanapashunki.

15. ¿Imanö amïgukunatan Diosta mas sirwinapaq yanapamäshun?

¹⁵ Diosta mas sirwinapaq yanapakoq amïgukunata ashishun. Juk mikuykunata gustaq amïgukunawan juntu kashqaqa, noqantsiktapis tsë mikuy gustamäshunmi. Tsë cuentallam, Jehoväta mas sirweqkunawan juntu karqa, noqantsikpis pëta mas sirwinapaq churapakäshun. Tsëmi Kentwan Verönicata pasarqan. Pëmi kënö nin: “Amïgükuna y familiäkunaqa Diosta mas sirwiyänäpaqmi niyämaq. Diospa Gobiernunta puntaman churaqkunawan juntakuyanqämi, Diosta mas sirwiyänäpaq yanapayämashqa”. Kananqa, ishkankunam Serbia nacionchö precursor especial kayan.

16. Lücas 12:16 a 21 ninqanchö willakunqannöpis, ¿imanirtan Diosta mas sirwinapaq imantsiktapis dejanantsik?

¹⁶ Jehoväta mas sirwinapaq imatapis dejanapaq listu këkäshun. Ruranqantsikwan Jehovä kushikunampaqqa, manam llapannintsiktaraqtsu dejanantsik (Ecl. 5:19, 20). Peru Diosta mas sirwinapaq kapamanqantsikkunata dejëta mana munarqa, kapunqanllaman yarparäkoq nunapita Jesus willakunqannömi tikrakurishwan (leyi Lücas 12:16-21). Francia nacionchö täraq wawqi Christianmi kënö nin: “Manam llapan tiempüwantsu familiäpaq yarpachakoq  kä ni Jehoväta sirweq kä”. Pëwan warminqa precursor kayänampaqmi churapakäyarqan, peru tsëpaqqa trabäjunkunatam dejayänan karqan. Y mantenikuyänampaqqa, wayikunata limpiapakurmi trabajar qallëkuyarqan. ¿Allipaqku tsë cambiukunata rurayarqan? Wawqim kënö nin: “Mas kushishqam yachatsikuyaq kayä y Bibliata estudiëkaqkuna y yapë watukayanqä nunakuna Jehoväpita mas yachakoqtam rikäyarqä”.

17. ¿Imanirtan wakinkunaqa juknöpa yachatsikuyta munayantsu?

¹⁷ Diosta juknöpa sirwinëkipaq churapakë (Hëch. 17:16, 17; 20:20, 21). Estädus Unïduschö Shirley jutiyoq precursöram, CÖVID-19 muyakoq qeshya kanqan witsan juknöpa yachatsikunampaq patsätsirqan. Qallananllachöqa, telëfunupa yachatsikuytaqa mantsaqmi. Peru congregacionninman congregacionkunata watukaq chärirmi, tsëta imanö rurayänampaq kaqta yachatsikurqan. Tsëpitaqa, seguïdunam telëfunupa yachatsikur qallëkurqan. Pëmi kënö nin: “Puntataqa mantsakurqämi, peru kananqa kushishqam yachatsikü. Wayin wayin ëwayanqäpitapis, mas nunakunawanmi parlayä”.

18. Diosta mas sirwinapaq michämaqnintsik problëmachöqa, ¿imata ruranqantsiktan yanapamäshun?

¹⁸ Masta ruranëkipaq churapakë y tsëta logranëkipaq kallpachakuy. Mana allikunapa pasarqa, Jehovämanmi mañakuntsik y imata ruranapaq kaqtam shumaq pensantsik (Prov. 3:21). Euröpachö precursöra regular pani Soniam, romanï idiömata parlaq grüpuchö yanapakun. Pëmi kënö nin: “Imata ruranäpaqpis churapakarqa, qellqarkurmi rikänä sitiuman churä. Mësä jananchömi, juk crüci nänita dibujashqata churarätsï. Imata ruranäpaqpis churapakarqa, tsë dibüjutam rikäri y imaman chätsimänampaq kaqtam pensä”. Y, mana allikunapa pasarqa, altsakänampaq kaqmanmi Soniaqa yarpan. Pëmi kënö nin: “Imapapis pasanqätaqa, rurëta munanqäta michämaq perqatanö o logranapaq yanapamaqnï tsakatanömi rikä. Tsënöqa, pasakunqankunata imanöpis rikanqäpitam”.

19. Imëka alli ruramunqampita, ¿imanötan Jehoväta agradecikushwan?

¹⁹ Jehoväqa tukuynöpam bendicimantsik. Llapan puëdinqantsikmannö churapakarmi, agradecikunqantsikta rikätsikushun (Heb. 13:15). Y tsëtaqa rikätsikushun, Diosta juknöpapis mas sirwinapaq churapakarninmi. Tsëta rurashqaqa, Jehoväqa masran bendicimäshun. Tsëqa, Jehovä alläpa alli kanqanta, imachöpis cada junaq rikëta procurashun. Tsëta rurarqa, Jesus ninqannöllam noqantsikpis nishun: “Mikïnïqa kachamaqnïpa munëninta rurëmi, y ruranäpaq nimanqanta ushëmi” (Juan 4:34).