1. ¿Imatataq mëtsikaq wawqi panikuna rurëkäyan Jehoväta mas sirwiyänampaq?

 IMËKA mana allikunapa ushakëninqa këllachönam këkan, tsëmi imëka rurëyoq kantsik (Mat. 24:14; Lüc. 10:2; 1 Pëd. 5:2). Jehovätaqa, llapan puëdinqantsikmannömi sirwita procurantsik. Mëtsikaqmi juk rurëkunachöpis yanapakuykäyan, wakinnam precursor këta munayan, wakinkunanam Betelchö yanapakuyta o Diosta adorana wayikunata rurarnin yanapakuyta munayan. Y mëtsikaq wawqikunam, creikoqkunata rikaqkunapa yanapaqnin o creikoqkunata rikaq kayänampaq kallpachakuykäyan (1 Tim. 3:1, 8). Jehoväqa sirweqninkuna imëkata rurarnin kallpachakoqta rikarqa, alläpachi kushikun (Sal. 110:3; Is. 6:8).

2. ¿Imataq pasakunman munanqantsiknö Diosta sirwita mana puëdishqaqa?

² Peru atska tiempuna pasarishqa kaptin y rurëta munanqantsikta manaraq lograshqa karqa, itsapis llakikushwan. O itsapis edänintsikrëkur o imarëkurpis Jehoväta sirwinqantsikchö masta rurëta mana puëdinqantsikpita llakikuntsik (Prov. 13:12). Tsëmi pani Melïssata pasarqan, * pëqa Betelchö yanapakuyta o Diospa Gobiernumpita Yachatsikoqkunapaq Escuëlaman ëwëtam munan. Pëmi kënö nin: “Edänïrëkurmi tsëchö yanapakunäpaq mañakuytaqa puëdïnatsu, tsëmi höraqa llakikü”.

3. Ima carguchöpis yanapakuyta munaq wawqikunaqa, ¿imatataq itsapis rurayänanraq?

³ Wakinqa jövin y alli saloryoqmi kayan. Tsënö kaptimpis,  Diosta sirwiyanqanchö y pë munanqannö kawayänampaqmi alliraq kallpachakuyänan. Itsa yachaq kayan y imatapis raslla rurëta munayan, peru pacienciakoq, respetakoq y trabäjunkunata shumaq rurëchöqa pishipäyanraq. Tsëkunachö y maskunachö alliyäyänampaq kallpachakuyaptinqa, itsa mana pensayanqan höra ima cargutapis chaskiriyanman. Nick jutiyoq wawqita ima pasanqanta rikärishun. 20 watayoq këkaptin creikoqkunata rikaqkunapa yanapaqnin kanampaq mana churayaptinmi, alläpa llakikurqan. Pëmi kënö yarpan: “Imatapis mana alli rurëkanqätam pensarqä”. Peru manam llakikurtsu qelanäkurirqan. Tsëpa rantinqa, congregacionchö mas yanapakunampaq y Diospita mas yachatsikunampaqmi kallpachakurqan. Kananqa juk wawqikunawanmi Sucursalta rikarnin yanapakun.

4. ¿Imatataq këchö yachakushun?

⁴ ¿Munanqantsiknö Jehoväta mana sirwirku llakikuntsik? Tsëqa, imanö këkanqantsikta Jehoväta willashun (Sal. 37:5-7). Diosta unëpana sirweq wawqi panikunata imachö pishipëkanqantsikta tapushun y imanö alliyänapaq nimanqantsiknö ruranapaq kallpachakushun. Tsëta rurashqaqa, itsapis yanapakuyta munanqantsikchö yanapakunapaq nimashwan. Peru panintsik Melïssanö kar kanan witsankuna mas yanapakuyta mana puëdirqa, ¿imatataq ruranantsik kushishqalla kanantsikpaq? Tsë tapukuypita yachakunapaqqa, këchömi kimata yachakushun. Juk, ¿imata rurartaq kushishqa kashun? Ishkë, kushishqa kanapaqqa, ¿imatataq ruranantsik? Y kima, mas kushishqa kanapaqqa, ¿imakunata ruranapaqtan churapakänantsik?

5. Kushishqa këta munarqa, ¿imamantan yarpänantsik? (Eclesiastes 6:9).

⁵ Kushishqa këta munarqa Eclesiastes 6:9 (leyi) ninqantam rurashwan. Imampis kapunqanllawan “conformakoq nunaqa”, kushishqam kawakunqa. Tsëqa rurëta puëdinqankunapis kanmanmi. Peru “kënï waknï kanman” nir pureq nunaqa, manam kapunqanwampis kushishqatsu kanqa. ¿Imatataq këpita yachakuntsik? Kapamanqantsikwanmi conformakunantsik, y manam tarita mana puëdinqantsiktaqa ashishwantsu.

6. ¿Ima igualatsikuytataq rikäshun y imapitataq yachakushun?

⁶ Tiempu pasanqanmannömi llapantsikpis, juk rurëkunata rurëta munantsik. Tsëqa, ¿kapamanqantsikwan conformakushwantsuraq? Awmi. Y tsëpitapis masqa, tsëkunawan kushishqa këta puëdintsikmi. ¿Imanötan tsëtaqa rurashwan? Tsëpaqqa, Mateu 25:14 a 30 ninqanchö talentu qellëkunapaq parlar Jesus yachatsikunqampita yachakurishun. Kushishqa kanapaq o imanö këkanqantsikwan mas kushishqa kanapaqmi yachakushun.

7. Talentukuna qellëpaq parlar Jesus yachatsikunqampita wallkallachö willakaramuy.

⁷ Juk igualatsikuywan Jesus yachatsikunqanchöqa, karu markata juk nuna ëwakunqampaqmi parlarqan. Manaraq ëwakurmi, sirweqninkunata qayëkur negociuta rurayänampaq talentu qellëninkuna qorqan. * Rurëta yachayanqanmannömi juk sirweqninta pitsqa talentuta, juknintam, ishkë talentuta y juknintanam, juk talentuta qorqan. Puntata chaskeq ishkë sirweqninkunaqa, alli trabajarninmi tsë qellëta miratsiyarqan. Peru kima kaq sirwipakoqqa manam imatapis rurarqantsu, tsëmi patronninqa qarqurirqan.

8. Tsë igualatsikuychö punta kaq sirwipakoqqa, ¿imanirtan kushikurqan?

 ⁸ Itsachi pitsqa talentukunata chaskeq sirwipakoqqa alläpa kushikurqan. Tsëqa, mëtsika qellëmi karqan y pëman patronnin confiakunqantam rikätsikoq. ¿Y ishkë kaq sirwipakoqqa? Itsachi punta kaq sirwipakoqtanö talentu qellëkunata mana qoyashqa kaptin llakikunman karqan. Peru ¿imatataq rurarqan?

9. Jesus parlanqan igualatsikuychöqa, ¿imatataq ishkë kaq sirwipakoqpaq nirqantsu? (Mateu 25:22, 23).

⁹ (Leyi Mateu 25:22, 23). Jesusqa ishkë talentu qellëllata chaskeq sirwipakoq piñakunqanta o sientikunqantaqa manam nirqantsu. Jina manam nirqantsu: “¿Tsëllataku confiakamanqa? ¡Noqaqa pitsqa talentukunata chaskeqnötaq alli yachaq kä! Patronnï cuentapaq mana churamaptinqa, kë ishkan talentukunata pampëkur kikïpa rurënïkunata rurakushaq” nir parlashqa kanqantaqa.

10. Ishkë talentu chaskeq sirwipakoqqa, ¿imatataq rurarqan?

¹⁰ Punta kaq sirwipakoqnöllam, ishkë kaq sirwipakoqpis patronnin encarganqan trabäjutaqa alli rurarqan. Tsënö alli trabajanqampitam, ishkë talentu masta ganarqan. Tsënö ruranqampitam, patronninqa alläpa kushikurqan y maskunachö yanapakunampaqmi nirqan.

11. ¿Imata ruranqantsiktan mas kushishqa kanapaq yanapamäshun?

¹¹ Tsënöllam noqantsikpis, Jehoväta sirwinqantsik rurënintsikkunachö puëdinqantsikmannö  kallpachakushqaqa mas kushishqa kashun. Llapan puëdinqantsikmannö Diospita yachatsikushun y congregacionchö yanapakushun (Hëch. 18:5; Heb. 10:24, 25). Reunionkunachö parlakunqantsikwan wakinkunata yanapanapaq alli preparakushun. Semänachö kaq reunionnintsikchö imallachöpis yanapakunapaq nimashqaqa, alli alistakushun. Congregacionchö ima trabäjuta ruranapaqpis nimashqaqa, tempränu chäshun y confiakuypaq kashun. Ama ima trabäjutapis pöcu cäsupaq churashuntsu. Imatapis mas alli ruranapaq kallpachakushun (Prov. 22:29). Imëka rurëyoq kashqa y chaskinqantsik carguta alli cumplinapaq kallpachakushqaqa, masmi yachakushun y kushishqam kashun (Gäl. 6:4). Y chaskita munanqantsik carguta jukkuna chaskiyaptimpis, mas fäcilmi kanqa pëkunawan kushikunantsikpaq (Rom. 12:15; Gäl. 5:26).

12. ¿Imatataq Melïssawan Nickqa rurayarqan mas kushishqa kayänampaq?

¹² Ishkë kaq pärrafuchömi, panintsik Melïssapaq parlarqantsik. Pëmi Betelchö yanapakuyta o Diospa Gobiernumpita Yachatsikoqkunapaq Escuëlaman ëwëta munarqan. Tsëkunachö yanapakuyta mana puëdirpis, pëmi kënö nin: “Llapan puëdinqämannömi precursöra kënïchö rurä y imëkanöpa Diospita yachatsikunäpaqmi kallpachakü. Tsënö ruranqämi kushishqa kanäpaq yanapamashqa”. Y kima kaq pärrafuchömi Nick jutiyoq wawqipaq parlarqantsik. ¿Imatataq pëqa rurarqan creikoqkunata rikaqkunapa yanapaqnin kanampaq mana churayaptin? Pëmi këta yarpan: “Diospita mas yachatsikunäpaq y reunionkunachö shumaq parlakunäpaqmi kallpachakurqä. Jina Betelchö yanapakunäpaqmi juk solicitudta apatsirqä y juk wata pasarinqanchömi tsëchö yanapakunäpaq niyämarqan”.

13. Kanan rurënintsikkunachö puëdinqantsikmannö kallpachakushqaqa, ¿imatan pasakunqa? (Eclesiastes 2:24).

¹³ Tsëqa, kanan ruranqantsikkunachö alli kallpachakushqaqa, ¿shamoq tiempuchö mas yanapakunapaqtsuraq nimäshun? Itsapis, wawqi Nickta pasanqannöpis. Peru tsënö mana kaptimpis, Melïssata pasanqannöpis ruranqantsikchö mas kallpachakushqaqa alli y kushishqam kashun (leyi Eclesiastes 2:24). Jina kallpachakunqantsikta rikarnin, señornintsik Jesucristu kushikunqanta musyarmi masraq kushikushun.

14. Jehoväta sirwir maskunachö yanapakuyta munarqa, ¿imatataq yarpänantsik?

¹⁴ Llapan puëdinqantsikmannöna Jehovä Diosta sirwikashqaqa, ¿mananatsuraq masta ruranapaq pensashwan? Tsënöqa manam pensashwantsu. Diospita nunakunata mas shumaq parlapänapaq, Bibliata alli yachatsikunapaq y wawqi panintsikkunata alli yanapanapaqmi churapakänantsik. Tsëtaqa lograshun, llapanta rurëta mana puëdinqantsikta yarparnin y kikintsikllaman yarparäkunapa rantin, wakinkunata yanapanapaq kallpachakurninmi (Prov. 11:2; Hëch. 20:35).

15. ¿Imakunata ruranantsikpaq churapakanqantsiktan mas kushishqa kanapaq yanapamäshun?

¹⁵ ¿Imakunata ruranapaqtan churapakashwan? Imanö këkanqantsikchö, imata rurëta puëdinapaq kaqta Jehovä rikätsimänapaq mañakushun (Prov. 16:3; Sant. 1:5). ¿Manatsuraq  qallanan pärrafuchö rikanqantsiknö, Diosta mas sirwinapaq churapakashwan. Itsa precursor auxiliar o regular, Betelchö o Diosta adorayänan wayikunata rurëchö yanapakunapaq churapakashwan? ¿Manatsuraq mas nunakunata yachatsinapaq,  o Diospita yachatsikoqkunata wanayanqan sitiuchö yachatsikunapaq juk idiömata yachakushwan? Tsënö mas yanapakuyta munarqa, Organizados para hacer la voluntad de Jehová neq librupa 10 kaq capïtulunta leyirishun. O manaqa congregacionta rikaq wawqikunawan parlarishun. * Churapakanqantsikkunata logranqantsikmannömi, mas kushishqa kashun, y wakinkunapis kallpachakuykanqantsiktam rikäyanqa.

16. ¿Imatataq rurashwan rurëta munanqantsikchö kanan witsan yanapakuyta mana puëdirqa?

¹⁶ Peru këchö yachakunqantsiknö, ¿Diosta mas sirwinapaq kanan witsankuna yanapakuyta mana puëdirqa? Rurëta puëdinapaq kaqkunachö yanapakunapaq churapakäshun. Këkunaman pensarishun.

17. 1 Timoteu 4:13 y 15 ninqannö, ¿imatataq juk wawqi ruranan alli yachatsikoq kanampaq?

¹⁷ (Leyi 1 Timoteu 4:13, 15). Bautizakushqa wawqi karqa, mas alli y shumaq yachatsikoq kanëkipaqmi kallpachakunkiman. ¿Imanir? Sitsun mana pantashpa leyinëkipaq, alli y shumaq yachatsikunëkipaq kallpachakunki, tsëqa wiyashoqnikikunatam alläpa yanapanki. Mas alli leyinapaq y alli yachatsikunapaq follëtu ninqannö ruranëkipaq churapakë. Tsëchö këkaqkunata, cada ünuta estudië, wayikichö alli yachakuy y yachatsikunqëki höra tsë follëtupita yachakunqëkinölla rurë. Yachatsikamoqkunata consejaq wawqita, * o ‘parlarnin y yachatsikurnin sinchi trabajaq’ creikoqkunata  rikaqkuna imallachöpis alliyänëkipaq pishinqanta tapuri (1 Tim. 5:17). Ama tsë follëtu ninqannölla ruranëkipaq yarpëtsu, sinöqa wiyakuykaqkuna Diosman mas markäkuyänampaq y yachakuyanqanmannö rurayänampaq yanapëta procurë. Tsënö ruraptikiqa, kikikim kushikunki y wiyayäshoqnikikunapis kushikuyanqam.

18. Diospita mas alli yachatsikunapaq churapakanqantsikchöqa, ¿imakunatan yanapamäshun?

¹⁸ Diosta sirweqkunaqa, llapantsikmi nunakunata Diospita parlapänantsik y bautizakuyänampaq yanapanantsik (Mat. 28:19, 20; Rom. 10:14). ¿Manaku tsëkunachö mas alliyëta munantsik? Tsëta ruranapaqqa Yachatsikunapaq neq follëtutam alli estudianantsik. Y tsëchö yachakunqantsiknö ruranapaqmi churapakänantsik. Jina Cristiänunö Kawakunapaq y Yachatsikunapaq reunionchö yachakunapaq höjapita y semänachö kaq reunionchö nunakunata imanö parlapänapaq rikanqantsik videukunapitapis yachakushwanmi. Y tsëkunapita markantsikchö mëqan mas yanapamänapaq kaqta rikäshun. Tsëkunachö yachakunqantsiknö rurashqaqa, mas alli yachatsikoq tikranqantsikpitam alläpa kushikushun (2 Tim. 4:5).

19. ¿Imatan yanapamäshun Dios munanqannö nuna kanapaq?

¹⁹ Ama qonqashuntsu, Dios munanqannö nuna kanapaqmi masqa kallpachakunantsik (Gäl. 5:22, 23; Col. 3:12; 2 Pëd. 1:5-8). ¿Imanötan tsëtaqa lograshun? Këllaman pensarishun: itsa Diosman mas markäkïta munantsik, tsëqa allichi kanman tsëpaq parlaq publicacionkunata leyinqantsik. Jina imëka mana allikunapa pasëkarnin, Diosman markäkuyanqanta rikätsikoq wawqi panikunapaq JW Broadcastingchö yarqamoqtam rikashwan. Tsëpitana pëkunanö imanö ruranantsikpaq kaqman pensashun.

20. ¿Imatataq ruranantsik mas kushishqa kanapaqqa?

²⁰ Llapantsikpis, Jehoväta sirwinqantsikchö kanan ruranqantsikpitapis masta rurëtam munantsik. Dios änimanqantsik Shumaq Patsachöqa, llapan munanqantsikmannömi Diosta sirwishun. Tsë junaq chämunqanyaq rurëta puëdinqantsikmannö yanapakushqaqa, mas kushishqam kashun. Y tsëpitapis masqa, kushishqa këkaq Diosnintsik Jehovätam respetashun y alabashun (1 Tim. 1:11). Tsëqa, Jehoväpaq rurëta puëdinqantsikpita kushikushun.