1. ¿Imatataq Kamamaqnintsikpita yachakurqunki?

¿JEHOVÄPA TESTÏGUN kayanqan familiachöku winarqëki? Tsëqa wamra kanqëkipitachi Jehoväpita yachakurqëki. Pë kamamanqantsikta, imanö kanqanta y Shumaq Patsachö nunakuna kawakuyänanta munanqantam yachakurqëki (Gen. 1:1; Hëch. 17:24-27).

2. Imatapis Diosnintsik kamashqa kanqanta creeqkunapaqqa, ¿imatataq wakin nunakuna niyan?

² Mëtsikaq nunakunam Dios kanqanta o imatapis kamanqanta creiyantsu. Imapis kikinlla yurinqanta y ichik kurukunapita mas jatusaq animalkunaman tikrayanqantam pensayan. Tsëta creeq wakin nunakunaqa, alli estudiashqam kayan. Itsa imëkata estudiashqa nunakuna Bibliachö ninqan mana rasumpa kanqanta niyanman. Y Diosnintsik imatapis kamanqanta upakuna, mana yachaqkuna y mana estudiashqa kaqkunalla creiyanqantam niyan.

3. Diosman mas markäkunapaqqa, ¿imanirtan cada ünu mas kallpachakunantsik?

³ ¿Tsë yachaq nunakuna niyanqanta creishwanku? ¿Kuyakoq kamamaqnintsik Jehovä imatapis mana kamanqantatsuraq creir qallëkushun? Tsëqa Diosnintsik llapanta kamanqanta imanir creinqantsikpitam kanqa. ¿Tsënö kanqanta nimashqallaku tsëta creintsik? ¿O tsënö kanqanta kikintsik estudianqantsikpitaku? (1 Cor. 3:12-15). Ëka watapana Jehoväta sirwikashqapis, llapantsikmi pëman mas markäkunapaq o yärakunapaq kallpachakunantsik. Tsëta rurashqaqa, nunakunapa “yachatsikïninkunawan y mana imapaqpis sirweq engäñukunawan” Bibliachö ninqan mana rasumpa kanqanta neqkunata creishuntsu (Col. 2:8; Heb. 11:6). Tsëpaqqa, Diosnintsik llapanta kamanqanta imanir wakin nunakuna  mana creiyanqanta, kamamaqnintsik Jehoväman imanö mas markäkunapaq kaqta y alli markäkoq kanantsikpaq imakuna yanapamänantsikpaq kaqtam këchö yachakushun.

4. Hebrëus 11:1 ninqannö, ¿imarëkurtan nunakuna Diosman markäkuyan?

⁴ Wakin nunakunaqa pensayan, markäkoq nunakunaqa imapis mana rikätsikuykaptin markäkuyanqantam. Peru Bibliachöqa, tsënö nunakuna mana markäkoq kayanqantam nin (leyi Hebrëus 11:1). Bibliachöqa Jehoväman, Jesusman y Diospa Gobiernunman markäkunqantsikqa mana rikakoq kaqkuna rasumpa kanqanta alli cläru rikanqantsikpita markäkunqantsiktam nin (Heb. 11:3). Kawëkaqkuna imanö rurashqa kayanqanta estudiaq wawqim kënö nin: “Diosmanqa manam llutallatsu markäkuntsik, ni yachaq nunakuna tariyanqankunata mana kaqpaq churantsiktsu”.

5. ¿Imanirtan mëtsikaq nunakunaqa imëkatapis Dios kamanqanta creiyantsu?

⁵ Tsëqa juk Kamakoq kanqanta y imëka pruëbakuna rikätsikuykaptinqa, ¿imanirtan mëtsikaq nunakunaqa llapanta Dios mana kamashqa kanqanta creiyan? Imëkatapis Dios kamanqanta kikinkuna mana estudiashqa karmi. Jehoväpa testïgun këman chashqa Robertmi kënö nin: “Imëkatapis Dios kamashqanta escuëlachö mana yachatsikuyaptinmi, tsëmanqa creirqätsu. Peru 22 watäta cumpliriptïmi, imëka pruëbakunawan y Biblia ninqanwan llapantapis Dios kamashqanta rikätsiyämarqan”. *  (Rikäri “ Teytakuna cuentaman churayänampaq willakuy” neqta).

6. ¿Imanirtan wakin nunakunaqa Dios kanqanta creiyantsu?

⁶ Wakin nunakunaqa, imatapis rikäyanqanllaman creirmi Dios mana kanqanta niyan. Peru rasumpa kaqchöqa, mana rikäyanqankunamampis creiyanmi. Këllaman pensarishun: mana rikëkarpis imatapis patsallachö katseq o patsaman shikwatseq kallpamanqa creiyanmi. Bibliachö markäkïpaq parlarqa, ‘mana rikakoq kaqkuna rasumpa kanqanta, alleq cläru rikätsikoq pruëbakunapaqmi’ parlëkan (Heb. 11:1, nöta). Tsë pruëbakuna ima kanqanta musyanapaqqa, tiempuntsiktam rakinantsik y yachakunapaqmi kallpachakunantsik. Peru mëtsikaq nunakunam tsëta rurëtaqa munayantsu, tsëmi Dios mana kanqanta niyan.

7. Wakin estudiösu nunakuna Dios imëkatapis kamanqanta creiyanqantaqa, ¿imanötan musyantsik?

⁷ Wakin estudiösu nunakunaqa, imëka  pruëbakunata rikarninmi llapanta Dios kamanqanta kananqa creiyanna. * Pitsqa kaq pärrafuchö Robertpaq parlanqantsiknöpis, itsa wakin nunakunaqa universidäkunachö mana yachatsikuyaptin, imatapis Dios kamashqa kanqanman creiyantsu. Peru mëtsikaq estudiösu nunakunam, Jehoväpita yachakuyashqa y kananqa pëta kuyayan. Imata yachatsimashqantsik kayaptimpis, tsë nunakuna rurayanqannöllam Diosman mas markäkunapaqqa kikintsik kallpachakunantsik.

8, 9. (1) ¿Ima tapukuypitataq yachakushun? (2) Dios kamanqankunapita yachakunqantsikqa, ¿imanötan yanapamäshun?

⁸ ¿Imanötan Kamamaqnintsikmanqa mas markäkushwan? Chuskullata yachakurishun.

⁹ Dios kamanqankunapita yachakushun. Kamamaqnintsikmanqa mas markäkushun animalkunata, plantakunata y estrëllakunata rikarninmi (Sal. 19:1; Is. 40:26). Tsëkunapita mas yachakurninqa, Jehovä kamamanqantsikpitam mas següru kashun. Wakin publicacionnintsikkunaqa, Diosnintsik kamanqankunapaqmi masllata yachatsikun. Fäcil entiendinan mana kaptimpis, leyinapaq kallpachakushun y yachakuyta procurashun. Diosnintsik imëkata kamanqanta rikätsikoq videukunata jatun asamblëantsikchö rikanqantsiktapis yapëmi rikärishwan. Tsëkunataqa, jw.org päginantsikchömi tarishun.

10. Kamakoq Dios kanqanta rikätsikoqkunapita jukllëllata willakaramuy (Romänus 1:20).

¹⁰ Rikanqantsikkunapita yachakurqa, Kamamaqnintsikpita imata yachatsimanqantsikta yarpäshun (leyi Romänus 1:20). Këllaman pensarishun: Intipita o Rupaypitaqa manam Patsamanqa aktsi o qoñïllatsu chämun. Alläpa dañakoq rayos ultravioleta niyanqan aktsipis chämunmi. ¿Imatan tsë aktsipitaqa tsapämantsik? Azulyarëkaq ciëlum, tsëtam capa de ozono nir reqiyan. Tsë dañakoq aktsi mas atsikyämuptinmi, azulyaraq ciëluqa mas raktayan. ¿Manaku tsëqa alläpa yachaq y kuyakoq Kamamaqnintsik kanqanta rikätsimantsik?

11. Diosnintsik kamamaqnintsik kanqanman mas markäkunapaqqa, ¿mëchötan maslla yachakushun? (Rikäri “ Kamamaqnintsikman mas markäkunapaq yanapamänantsikpaq kaqkuna” neqta).

¹¹ Kamanqankunapita yachakurnin Diosman mas markäkunapaqqa, Índice de las publicaciones Watch Tower libruchö y jw.org päginachömi mëtsikata tarishun. Itsa, “¿kikinllaku rurakashqa o pipis rurashqaku?” o “¿Lo diseñó alguien?” ninqanchö qellqarëkaqta leyirnin y videukunata rikarnin qallëkushwan. Tsëchöqa, animalkunapaq y plantakunapaqmi wallkallachö entienditsikun. Jina tsëkunata rikëkur yachaq nunakuna imatapis rurëta munayanqampaqmi willakun.

12. Bibliata estudiarqa, ¿imakunatataq alli rikänantsik?

¹² Bibliata estudiashun. Chusku kaq pärrafuchömi parlarqantsik, kawëkaqkuna imanö rurashqa kayanqanta estudiaq nunapita. Pëqa Dios Kamakoq kanqanta manam creeqtsu, peru tiempuwanqa, creirmi qallëkurqan. Pëmi kënö nin: “Diosmanqa creï, manam imëka kawëkaqkunata  estudianqällapitatsu, sinöqa Bibliata alli estudianqäpitawanmi”. Itsa noqantsikqa Bibliachö ima ninqanta allina reqintsik. Tsënö kaptimpis, Kamamaqnintsikman mas markäkunapaqmi estudiarnin sïguinantsik (Jos. 1:8; Sal. 119:97). Unë tiempu pasakunqankunata y shamoq tiempuchö pasakunampaq kaqta cläru willakunqanta y mana contranakunqanta alli rikäshun. Tsëta rurashqaqa, alli yachaq y kuyakoq Kamamaqnintsikman y Bibliata Pë qellqatsinqanmanmi mas markäkushun (2 Tim. 3:14; 2 Pëd. 1:21). *

13. Bibliachö këkaq consëjukuna alli kanqampita jukllëllapita parlakaramuy.

¹³ Diospa Palabranta estudiarqa, tsëchö këkaq consëjukuna alläpa yanapakunqanta rikäshun. Këllaman yarpärishun: Bibliaqa unëpita patsënam, qellëta kuyë mana alli kanqanta ‘y imëka nanatsikïkunaman’ chätsikunqanta nirqan (1 Tim. 6:9, 10; Prov. 28:20; Mat. 6:24). Kanan witsankunaqa, ¿tsë consëju yanapakunku? Awmi. La epidemia del narcisismo neq libru ima ninqanta rikärishun: “Qellëta kuyaqkunaqa cäsi llapankunam kushishqa kayänampaq rantin, llakishqalla kawakuyan. Masta ganëta munaq nunakunapis, manam kushishqatsu kayan y qeshyapäkuyanmi”. Clärum këkan, qellëta mana kuyanapaq Bibliachö consëjakunqanqa kananyaqmi yanapamantsik. ¿Yarpantsikku Bibliachö këkaq juk consëjukuna yanapamanqantsikta? Bibliachö këkaq consëjukunata wiyakurqa, masmi kuyakoq Kamamaqnintsik consëjamanqantsikman markäkushun (Sant. 1:5). Tsëta rurashqaqa, mas kushishqam kawakushun (Is. 48:17, 18).

14. ¿Imatataq Bibliata estudiarnin Jehoväpita yachakushun?

¹⁴ Bibliataqa Jehoväta mas reqinantsikpaq estudiashun (Juan 17:3). Estudianqantsikmannömi Jehovä imanö kanqanta musyashun. Y tsëqa llapan kamanqankunachömi rikakan. Tsëkunata estudianqantsikqa, Jehovä rasumpa kanqanta musyanapaqmi yanapamäshun (Ex. 34:6, 7; Sal. 145:8, 9). Jehoväpita mas yachakunqantsikmannömi, pëman mas markäkushun, mas kuyashun y mas alli amïgun kashun.

15. ¿Imanötan Diosman markäkunqantsikta juk nunawan parlanqantsik yanapamäshun?

¹⁵ Diospita yachakunqantsikta wakin nunakunawan parlashun. Tsëta rurashqaqa, kikintsikmi Diosman mas markäkushun. Peru ¿Dios kanqampaq o mana kanqampaq contestëta mana puëdinqantsikta tapumashqaqa? Tsëqa Bibliapita jorqashqa publicacionkunata ashikur, tsë nunawan parlashun (1 Pëd. 3:15). Jina alli yachaq wawqitam yanaparamänapaq mañakurishwan. Parlapanqantsik nuna Biblia ninqanta chaskikuptin o mana chaskikuptimpis, tsë asuntupita mas estudianqantsikqa Diosman mas markäkunapaqmi yanapamäshun. Y tsëqa, estudiashqa y alli yachaq nunakuna Kamakoq Dios mana kanqanta niyanqantaqa manam creishuntsu.

16. ¿Imachöraq ushashwan Diosman mas markäkunapaq mana kallpachakurqa?

¹⁶ Mëtsika tiempupana Jehoväta sirwikashqapis, pëman mas markäkunapaqmi kallpachakur sïguinantsik. ¿Imanir? Tsëta mana rurarqa, Diosman markäkïtam jaqirishun. Yarpäshun Diosmanqa markäkuntsik, mana rikäkoq kaqkuna rasumpa kanqanta alli cläru rikätsikoq pruëbakunata  rikarninmi. Y mana rikanqantsikkunataqa rasllam qonqarintsik. Tsëmi apostol Pabluqa Diosman mana markäkïqa raslla “wankuramaqnintsik” jutsa kanqanta nirqan (Heb. 12:1). Tsëqa, ¿imatataq ruranantsik Diosnintsikman mas markäkunapaq? (2 Tes. 1:3).

17. ¿Imatan yanapamäshun Diosnintsikman mas markäkunapaq?

¹⁷ Puntataqa, santu espïritunwan Jehovä yanapëkamänapaq mañakushun. Tsë poderninwan yanapamashqallam pëmanqa markäkushun (Gäl. 5:22, 23). Tsënö mana yanapamashqaqa, manam Kamamaqnintsikman markäkïta puëdishuntsu. Tsëqa, Jehovä poderninwan yanapamänapaq mañakurnin sïguishun (Lüc. 11:13). Kënömi nishwan: “Mas markäkuyänäpaq yanapëkayämë” (Lüc. 17:5).

18. Salmus 1:2 y 3 ninqannö, ¿imatataq cäsi llapantsik katsintsik?

¹⁸ Jina, Diospa Palabranta seguïdu estudiashun (leyi Salmus 1:2, 3). Tsë salmuta qellqayanqan witsanqa, wallka israelïtakunallam Diospa Leyninta katsiyaq. Peru reykuna y sacerdötikunaqa, tarita puëdiyaqmi. Y cada qanchis watatam ollqukuna, warmikuna, wamrakuna y forastërukuna Diospa Leynin ninqanta wiyayänampaq juntakäyaq (Deut. 31:10-12). Jesus kawanqan witsanqa, wallkaq nunakunallam qellqashqa Leykunata katsiyaq. Y cäsi llapanmi Diosta adorayänan wayichö guardaräyaq. Peru kanan witsankunaqa, cäsi llapantsikmi llapanta o pullanta Bibliata katsintsik. Bibliata katsinqantsikpita agradecïdu kanqantsiktaqa, ¿imanötan rikätsikushwan?

19. ¿Imatataq ruranantsik Diosnintsikman mas markäkunapaq?

¹⁹ Bibliata katsinqantsiktaqa agradecikushwan, llapan junaqkuna leyirninmi. Manam tiempuntsik kanqan hörallatsu Bibliataqa estudianantsik. Cada semäna estudianapaq patsätsishqaqa, masmi Diosnintsikman markäkushun.

20. ¿Imata ruranantsikpaqtan churapakänantsik?

²⁰ Kë munduchö ‘yachëyoq y alläpa musyaq nunakunapitaqa’, noqantsikqa Bibliata estudianqantsikpitam Diosnintsikman markäkuntsik (Mat. 11:25, 26). Tsëqa Diosman mas markäkunapaq y Kamamaqnintsikman wakinkuna markäkuyänampaq yanapanantsikpaq churapakäshun (1 Tim. 2:3, 4). Y alläpa kushishqa shuyaräshun Patsachö llapan kawaqkuna Jehoväta alabayänanta, y Revelacion 4:11 ninqannö niyänanta: “Diosnïkuna Jehovä, qamllam derëchuyoq kanki alläpa precisaqpaq churayäshunëkipaq, [...] qampa munënikirëkurmi yuriyarqan y kamashqa kayarqan”.