1. ¿Imanirtan pacienciayoq nunakunataqa yachanantsik?

 LLAPANTSIKMI pacienciayoq nunakunataqa yachanantsik. Këllaman pensarishun: imatapis mana cölerëpa shuyaranqampita y imachö pantarishqapis mana cöleranqampitam pitapis respetantsik y valorantsik. Bibliapita yachatsimaqnintsiktapis alläpam agradecikuntsik mana entiendinqantsikta o yachakunqantsiknö mana rurashqa pacienciawan yanapamanqantsikpita. Y masqa, ¡Jehovä Diosnintsiktam agradecikuntsik noqantsikwan pacienciayoq kanqampita! (Rom. 2:4).

2. ¿Imakuna pasakuptintan pacienciayoq këqa fäciltsu kanman?

² Wakinkuna pacienciayoq kayaptinqa kushikuntsikmi. Peru kikintsikpaqqa manam pacienciayoq këqa fäciltsu. Këllaman pensarishun: capaz carretërapa ëwëkashqa mëtsika cärru kaptin pasëta mana puëdirnin y tardiyarninqa cölerakushwan. O capaz pillapis ofendiramashqa cölerakushwan. Y Jehovä änimanqantsik Shumaq Patsa raslla o saslla mana chämuptimpis shuyarëta qelanärishwanmi. Rikanqantsiknöpis, pacienciayoq këqa manam fäciltsu. Peru ¿gustamashwantsuraq pacienciayoq kë? Këchömi yachakushun, pacienciayoq kë imanö kanqanta y imanir precisanqanta. Tsënöllam yachakushun, pacienciayoq kanapaq imakuna yanapamanqantsikta.

3. Pacienciayoq nunaqa, ¿imatataq ruran ofendiyaptin?

³ Pacienciayoq nuna imanö kanqanta chuskullata rikärishun. Juk, pacienciayoq nunaqa ofendiyaptimpis manam rasllaqa o sasllaqa cölerakuntsu. Imata exigiyaptimpis tranquïlullam këkan y ofendiyaptimpis manam pëkunanö mana alli kutitsintsu. Jehovä Diosnintsikpis tsënö pacienciayoqmi. Palabran Bibliachömi kënö nin: “Noqa Jehovä Diosnikikunaqa ankupäkoq, llakipäkoq, pacienciakoq y alläpa kuyakoqmi kä, y rasumpa kaqllatam parlä” (Ex. 34:6).

4. Imatapis unëpa shuyaränan kaptinqa, ¿imatataq pacienciayoq nunaqa ruran?

 ⁴ Ishkë, pacienciayoq nunaqa imatapis tranquïlum shuyaran. Imapis munanqannö mana yarquptinqa, manam cölerakuntsu (Ecl 7:8). Tsëmi imëkachö pacienciayoq kanantsik. Këllaman pensarishun: pillapis pasëkanqankunata willamashqaqa, pacienciawanmi wiyanantsik y parlëkämuptinqa manam parlanantsiktsu (Job 36:2). Tsënöllam pacienciayoq kanantsik, Bibliapita yachëkätsinqantsikta mana entiendiyaptin shumaq entienditsinapaq o mana alli costumbrinkunata dejëta mana puëdiyaptin yanapanantsikpaq.

5. ¿Imanö mastan pacienciayoq kanqantsikta rikätsikuntsik?

⁵ Kima, pacienciayoq nunaqa manam imatapis mana pensarqa rurantsu. Awmi, höraqa ras o sas ruranantsikmi precisanqa. Peru imatapis precisaqta ruranan kaptinqa, pacienciayoq nunaqa manam jinan höratsu rurar qallëkun, ni manam ushëta munar rasllaqa o sasllaqa rurantsu. Tsëpa rantinqa, imanö ruranampaqmi alliraq pensan y tsëpitam pacienciawan allita ruran.

6. Mana allikunapa pasarninqa, ¿imatataq ruran pacienciayoq nunaqa?

⁶ Chusku, pacienciayoq nunaqa mana allikunapa pasarpis manam quejakuntsu y tranquïlullam aguantan. Y tsëpaqqa pacienciayoq kanqan y aguantëta yachanqanmi yanapan. Mana allikunapa pasarnin imanö sientikunqantsikta confiakunqantsik amïguntsikkunata willanqantsikqa allillam. Tsënö kaptimpis, pacienciayoq karninqa, pasëkanqantsik problëmakuna altsakänampaq kaqtam pensashun y Jehovä Diosnintsiktam kushishqalla sirwir sïguishun (Col. 1:11). Cristiänukunaqa tsë llapankunachömi pacienciayoq kanantsik. ¿Imanir? Wakinllata rikärishun.

7. Santiägu 5:7 y 8 ninqannö, ¿imanirtan pacienciayoq kanantsik? (Rikäri dibüjukunata).

⁷ Pacienciayoq kanqantsikqa salvakunapaqmi yanapamäshun. Jehoväpa unë sirweqninkunanömi Diosnintsik änikunqankunata cumplimunanta pacienciakur shuyaränantsik (Heb. 6:11, 12). Tsëmi Bibliaqa juk murukoq nunatawan igualatsimantsik (leyi Santiägu 5:7, 8). Juk murukoq nunaqa mururnin y regarninmi alli trabajan, peru manam musyantsu tsë murunqan imë poqunampaq kaqta. Tsënö kaptimpis, pacienciawanmi cosëcha witsanta shuyaran. Tsënöllam cristiänukunapis Jesus imë “chämunampaq kaqta” mana musyarpis, Jehoväta sirwirnin ocupädu këkantsik (Mat. 24:42). Änikunqankunata tiempunchö Jehovä cumplimunampaq kaqta musyarmi pacienciawan shuyarantsik. Mana pacienciayoq karqa, shuyarëtam utirishun o ajayärishun y Jehovätapis ichikllapa ichikllapam sirwita dejarishun. Tsënöllam ichik tiempullapa kushikunantsikpaq rurëkunachö tiempuntsikta ushar qallëkushwan. Peru pacienciayoq karqa, ushananyaqmi alli aguantashun y salvakushunmi (Miq. 7:7; Mat. 24:13).

8. ¿Imanötan pacienciayoq kanqantsikqa yanapamantsik wakinkunawan alli kanapaq? (Colosensis 3:12, 13).

⁸ Pacienciayoq kanqantsikqa wakinkunawan alli kawakunapaqmi yanapamantsik. Pacienciayoq karqa, wakinkuna parlayanqantam shumaq wiyashun (Sant. 1:19). Tsënöllam wakinkunawan alli kawakunapaq kallpachakushun. Imëka rurëyoq ocupädu këkarpis, manam llutaqa parlashuntsu ni wakinkunata llakitsïpaqa imatapis nishuntsu. Y pillapis ofendimashqaqa, manam mana allipaqa kutitsishuntsu ni cölerakushuntsu. Tsëpa rantinqa, juknintsik juknintsikmi aguantanakushun y perdonanakushun (leyi Colosensis 3:12, 13).

9. ¿Imanötan pacienciayoq kanqantsikqa imatapis alli decidinapaq yanapamantsik? (Proverbius 21:5).

⁹ Pacienciayoq karqa, imatapis allitam decidishun. Imatapis jinan höra o mana pensëpa decidinantsikpa rantinmi, pacienciayoq karqa alliraq pensashun ruranantsikpaq kaq alli o mana alli kanqanta (leyi Proverbius 21:5). Këllaman pensarishun: capaz trabäjuta ashikashqa, juk trabäjuta äniramashwan y ichik shuyärita mana munarqa capaz tsë trabäjuman yëkurishwan, peru capaz tiempuntsik tinkunqatsu reunionkunaman ëwanapaq y yachatsikoq yarqunapaq. ¿Imataraq rurashun pacienciayoq karqa? Tsë trabäju alli o mana alli kanqanmanmi alliraq pensashun. Y pensashunmi ëka höra trabajanapaq kaqta, familiantsikwan kanapaq y Jehovä Diosnintsikta sirwinapaq tiempu tinkunampaq kaqta o mana tinkunampaq kaqta. Pacienciayoq karqa, imatapis mana alli decidirqa manam llakikushuntsu.

10. ¿Imatataq rurashwan pacienciayoq këta yachakunapaq?

¹⁰ Pacienciayoq kanapaq Jehoväta mañakushun. Santu espïritu yanapamashqallam pacienciayoq këtaqa yachakushun (Gäl. 5:22, 23). Tsëmi pacienciayoq kanapaq santu espïritunta Jehoväta mañakunantsik. Mana allikunapa pasarnin pacienciayoq kë mana fäcil kaptinqa, Jehoväta seguïdu mañakushun santu espïritunwan yanapamänapaq (Lüc. 11:9, 13). Pë rikanqannö imatapis rikëta puëdinapaqmi mañakunantsik. Y tsënö mañakurirnam, pacienciayoq kanapaq alli kallpachakunantsik. Jehoväta yanapëkamänapaq  seguïdu mañakurnin y pacienciayoq kanapaq kallpachakurninqa, ichikllapa ichikllapam mas pacienciayoq tikrashun.

11, 12. ¿Imanötan Jehoväqa pacienciayoq kanqanta rikätsikushqa?

¹¹ Pacienciayoq kanapaqqa Bibliachö willakunqan nunakunapitam yachakunantsik. Pacienciayoq atskaq nunakunapaqmi Bibliaqa willakun. Pëkuna pacienciayoq kayanqanman alli pensarninqa, noqantsikpis pacienciayoqmi kashun. Tsë nunakunapita manaraq yachakurnin, puntata yachakurishun Jehovä pacienciayoq kanqantaraq.

¹² Eden huertachömi Satanasqa Jehovä Diospa jutimpaq mana allita parlarqan y “mana alli gobernantim y manam kuyakuntsu” nirmi acusarqan. Peru Jehoväqa pacienciayoq karmi jinan höra tsë ulikoqta o llullakoqta ushakäratsinampa rantin, shuyararqan pï alli gobernanti kanqanta rikätsikunampaq. Y tsë shuyaranqan tiempuchöqa jutimpaq mana allita parlayanqantam aguantëkan. Peru pacienciayoq kanqanqa, mëtsikaq nunakunatam yanapashqa Pëta reqiyänampaq y mana wanuypa kawëta puëdiyänampaq (2 Pëd. 3:9, 15). Jehovä pacienciayoq kanqan imanö yanapamanqantsikman alli pensarqa, ushakë chämunantaqa pacienciawanmi shuyaräshun.

13. ¿Imanötan Jesusqa kë Patsachö këkar Teytannölla pacienciayoq kanqanta rikätsikurqan? (Rikäri fötuta).

¹³ Jesuspis Teytannömi pacienciayoq karqan, y tsënö kanqanqa musyakarqan kë Patsachö këkaptinmi. Ley qellqaqkunawan y fariseukunawan pacienciayoq kananqa manachi fäciltsu karqan, pëkunaqa alläpa mana allim kayarqan (Juan 8:25-27). Peru Jesusqa Teytannö pacienciayoq karmi rasllaqa o sasllaqa cölerakoqtsu. Manam chikeqninkuna  insultayaptin y abusayaptimpis, mana alli palabrakunawanqa contestarqantsu (1 Pëd. 2:23). Tsëpa rantinqa, imëka pruëbapa pasarpis pacienciawanmi aguantarqan y manam quejakurqantsu. Tsëchi Diospa Palabranqa Jesuspaq kënö nin: “Pëqa jutsasapa nunakuna contran shäriyaptimpis Teyta Dios munashqannömi imëpis kawarqan” (Heb. 12:2, 3, TDW). Noqantsikpis Jehovä yanapamashqaqa, imëka pruëbakunapa pasarpis pacienciawanmi aguantashun.

14. ¿Imatataq yachakuntsik Abrahan pacienciayoq kanqampita? (Hebrëus 6:15; rikäri fötutawan dibüjuta).

¹⁴ ¿Imatan yanapamäshun ushakë junaqta pacienciawan shuyaränapaq? Capazchi kënö pensashwan: “Ushakë junaqtaqa mëtsika tiempunam shuyararqö y capazchi rikäshaqnatsu”. Peru këllaman pensarishun: Jehovämi Abrahanta, “jatun nacionmanmi tikratsishqëki” nir änirqan. Tsë tiempupaqqa, Abrahanqa 75 watayoqnam karqan y manam tsurimpis karqantsu (Gen. 12:1-4). Peru ¿Abrahanqa Jehovä äninqanta rikarqanku? Manam llapantatsu. Eufratis mayuta tsimpanqampitam 25 wata pasariptinran Jehovä permitiptin wamran Isaac yurirqan. Y 60 watakuna pasariptinran willkankuna Esaü y Jacob yuriyarqan (leyi Hebrëus 6:15). Peru Abrahanqa manam rikarqantsu kastankuna juk nacionman tikrayanqanta ni Dios Äninqan Patsata chaskiyanqanta. Tsënö kaptimpis, Abrahanqa Diosnintsikwanmi imëpis amïgu karqan (Sant. 2:23). Abrahanqa kawariramur alläpachi kushikunqa pë markäkunqanrëkur o yärakunqanrëkur y pacienciakunqanrëkur mëtsika nunakuna atska bendicionta chaskiyanqanta musyarir (Gen. 22:18). ¿Imatataq yachakuntsik? Capaz kanan tiempu Jehovä  llapan änimanqantsikta cumplikanqantaqa rikäshuntsu. Peru Abrahannö pacienciayoq karqa, segürum këkäshun kanan witsan y Shumaq Patsachö Jehovä bendicimänapaq kaqta (Mar. 10:29, 30).

15. Japallantsik Bibliata estudianqantsik höraqa, ¿imakunapitataq yachakushwan?

¹⁵ Bibliachöqa tarintsik mëtsika nunakuna pacienciayoq kayanqantam (Sant. 5:10). Allichi kanman pacienciayoq nunakunapita yachakunqëkiqa. b Këllaman pensarishun: Davidtaqa jövinllaraq këkaptinmi Israelpa gobernantin kanampaq Diosnintsik akrarqan, peru gobernanampaqqa atska watakunaran shuyararqan. Tsënöllam Jehoväta mana dejëpa sirweq Simeonwan Änapis Jehovä Akranqan Mesïasta reqiyänampaq shuyaräyänan karqan (Lüc. 2:25, 36-38). Pacienciayoq nunakunapita yachakurqa, kënö tapukuy: “¿Imatan yanaparqan tsë nunata o warmita pacienciayoq kanampaq? Pacienciayoq karqa, ¿imatataq lograrqan? Pacienciayoq kanqampitaqa, ¿imatataq yachakü?”. Y mana pacienciayoq nunakunapitapis yachakuyta puëdinkim (1 Sam. 13:8-14). Capaz kënö tapukunkiman: “¿Imanirtan pacienciankuna karqantsu? Pacienciayoq mana kayanqampitaqa, ¿imachötan ushayarqan?”.

16. Pacienciayoq kanqantsikqa, ¿imanötan yanapamantsik?

¹⁶ Pacienciayoq këqa imëkachömi yanapamantsik. Pacienciayoq kanqantsikqa yanapamantsik tranquïlu y kushishqa kanapaqmi. Y manam qeshyashuntsu, ni alläpaqa yarpachakushuntsu. Tsënöllam yanapamantsik wakinkunawan alli kanapaq y congregacionchö wawqi panikunawan unïdu kanantsikpaq. Pillapis cöleratsimashqa ras o sas mana cölerakurqa, manam mas problëmakunaman chäshuntsu (Sal. 37:8; Prov. 14:29). Pacienciayoq karqa, Teytantsik Jehovänömi pacienciayoq kashun y alli amïgunmi kashun.

17. ¿Imata ruranapaqtan decidïdu këkänantsik?

¹⁷ Yachakurinqantsiknömi, pacienciayoq këqa imëkachö yanapamantsik. Höraqa manam fäciltsu pacienciayoq këqa, tsënö kaptimpis Jehovämi yanapamäshun pacienciayoq kanapaq. Y pacienciawan Shumaq Patsata shuyaranqantsikyaqqa, segürum këkänantsik Jehoväqa alläpa kuyakoq karnin, ‘shuyarëkaqkunata rikëkanqanta y respetaqkunata salvanqanta’ (Sal. 33:18). Llapantsikmi decidïdu këkänantsik mas pacienciayoq kanantsikpaq.