• “Qowä o runä jukwan engañëkämanqantanömi sientirqä”.

• “Alläpam penqakurqä, shumaqllam mana kanqäta ni imapaqpis mana välinqätam pensarqä”.

• “Piwampis parlëta mana puëdirmi, kikïlla alläpa llakikoq kä”.

• “Noqapaq Jehovä mana yarpachakunqantam pensar qallëkurqä”.

Tsënö niyanqanwanmi musyantsik juk ollqu pornografïata rikaptin warmin alläpa sufrinqanta. Atska killapa o mëtsika watapa pakëllapa pornografïata rikanqanta warmin musyarirqa, mananam qowanman confiakunqanatsu. Juk warmim kënö nin: “Qowäqa o runäqa mana reqinqä nunanönam tikrarirqan. Tsëmi, ‘¿ima mastaraq pakëllapa rurëkan?’ nir pensaq kä”.

¿Pornografïataku qowëki o runëki rikëkan? a Tsënö kaptinqa, kë yachatsikuymi yanapashunki. Këchömi yachakunki Bibliapa consëjunkuna imanö consolashunqëkita, Jehovä yanapashunqëkita rikänëkipaq, mas allina sientikunëkipaq y Diosta alli sirwinëkipaq yanapashunqëkita. b

Qowëki llapan ruranqankunataqa manam rikëta puëdinkitsu. Peru ¿imataraq rurankiman mas tranquïlu sientikunëkipaq? Wakinllata rikärishun.

Ama pensëtsu culpayoq kanqëkita. Qowan pornografïata rikaptinqa, warmi kaqmi culpayoq sientikunman. Këllaman pensarishun: Alice c jutiyoq warmim kikin culpayoq kanqanta pensar kënö tapukoq: “¿Imanirtan qowäqa noqata rikämänampa rantin, juk warmikunata rikarë gustan?”. Y wakin warmikunanam qowankunapa problëmanta musyarir cölerakuyan y cölerakuyanqanrëkur mas problëmakunaman chäyanqantam pensayan. Daniëlam kënö nin: “Alläpam cölerarqä qowä pornografïata rikar sïguiptin. Alläpa cölerakurmi casädu vïdäkunata noqa ushakëkätsinqäta pensarqä”.

Tsënö sientikurninqa yarpë, Jehoväqa manam qowëki ruranqampita qam culpayoq kanqëkitatsu pensan. Santiägu 1:14 textum kënö nin: “Cada ünum munënin tentaptin y shonqunman chaptin  pruëbata pasan” (Rom. 14:12; Filip. 2:12). Jehoväqa manam qam culpayoq kanqëkitatsu pensan. Tsëpa rantinqa, mana dejëpa sirwinqëkitam valoran (2 Crön. 16:9).

Qowëki pornografïata rikaräkunqanqa, manam qampa culpëkitsu. Tsëta entiendinqëkim yanapashunki. Yachaq nunakunam niyan, pornografïata rikaräkoq nunaqa imëpis oqllanakuyllaman yarparäkunqanta y warmiwan karirpis mana conformakunqanta.

Tsë problëmallamanqa yarparäkuytsu. Qowan pornografïata rikaräkuptinmi, Catherïneqa paqaspapis junaqpapis tsë problëmallaman yarparäkoq. Francesnam kënö nin: “Qowä mëchö këkanqanta mana musyarqa alläpam yarpachakü y manam ima rurëtapis puëdïtsu”. Wakin casäda warmikunapis, capazchi qowampa problëmanta musyaq wawqi panikunawan juntu kayanqan höra alläpa penqakuyanman. Y wakinkunanam pasëkäyanqanta ni pillapis mana entiendinqanta pensarnin japallankunalla sientikuyan.

Tsënö sientikunqëkiqa entiendipaqmi, peru tsë problëmallaman alläpa yarparäkurqa, masmi llakikunki. Tsëpa rantinqa Jehoväwan amïgu kanëkipaq kallpachakuy, tsëmi yanapashunki tsë problëmachö alli tsarakunëkipaq (Sal. 62:2; Efes. 6:10).

¿Imanötan Bibliata leyinqëki y leyinqëkiman pensanqëki yanapashunkiman? Bibliachöqa willakun, mana allikunapa pasarnin alläpa llakikoq warmikunapaqmi. Peru imanö këkäyanqanta Jehoväta willarirqa, mas tranquïlunam sientikuyarqan. Jehoväqa problëmankunata mana ushakätsirpis, tranquïluna sientikuyänampaqmi yanaparqan. Äna pasanqanman pensari, pëqa alläpa llakishqam këkarqan. Tsëmi “Jehovä Diosman [...] unëpa” mañakurqan, y ima pasakunampaq kaqta mana musyarpis tranquïlunam sientikurqan (1 Sam. 1:10, 12, 18; 2 Cor. 1:3, 4).

Anciänukunatam willanëki yanapayäshunëkipaq. Pëkunaqa, ‘fuerti vientupita y fuerti tamyapita tsapakoq machënömi kayan’ (Is. 32:2). Capazchi llapan pasëkanqëkita mana mantsakushpa willëta puëdinqëki panita niyanqa consolashunëkipaq (Prov. 17:17).

Capazchi pensëkanki pornografïa rikëta dejanampaq qowëkita imanö yanapanëkipaq  kaqman. Bibliachöqa nin problëmakunata altsayanqan höraqa, ‘japallankunalla kayanqampitaqa ishkaq kayanqan mas alli’ kanqantam (Ecl. 4:9-12). Yachaq nunakunam niyan, warmi kaq y ollqu kaq yanapanakuyanqanqa pornografïa rikëta dejayänampaq y majankunaman yapë confiakuyänampaq yanapakunqanta.

Qowëki pornografïata manana rikänampaq decidïdu kanqanta y rasumpa kallpachakunqantam musyanëki. ¿Musyankiku yanapëkunampaq Jehoväman rogakunqanta y anciänukunata willashqa kanqanta? (2 Cor. 4:7; Sant. 5:14, 15). ¿Imatataq qowëki rurashqa pornografïata manana rikänampaq? ¿Churapakashqaku celularta o tablet-ta mana alläpa utilizänampaq? ¿Imakunatataq rurëta dejashqa pornografïa rikëman mana ishkinampaq? (Prov. 27:12). ¿Yanapanëkita permitishunkiku y rasun kaqtaku imatapis willashunki? Tsënö kaptinqa, capaz yanapëta puëdinki.

Felicia pasanqanta rikärishun. Pëqa Ethan jutiyoq nunawanmi casädu. Ethanqa wamra kanqampitam pornografïata rikaräkoq. Tsëmi pornografïata rikëta munanqan höraqa, warmin Feliciata willan, y pëmi yanapan pornografïata mana rikänampaq. Ethanmi kënö nin: “Warmïtaqa mana penqakushpam llapanta willä. Pëqa mana cölerakushpam parlapäman y tsë tentacionman mana ishkinäpaqmi yanapaman. Y seguïdum tapurëkäman imanö këkanqäta. Y Internet-ta utilizaptïpis pornografïa rikëman mana ishkinäpaqmi yanapaman”. Tsënö yanaparpis, Feliciaqa alläpam llakikun qowan pornografïa rikëllaman yarparäkuptin. Feliciam kënö nin: “Cölerashqa y llakishqalla kanqäqa, manam qowäta yanapanqatsu tsë viciuta dejanampaq. Pasëkanqampita Ethanwan parlariyaptïqa, pëpis mas listunam këkan noqata consolamänampaq”.

Tsënö parlayanqanmi qowa o runa kaqtaqa yanapanqa pornografïata manana rikänampaq. Y warmi kaqtapis qowanman mas confiakunampaqmi yanapanqa. Juk ollqu imata munanqanta, mëchö kanqanta o imata ruranqanta llapanta willaptinqa, warminqa qowanman confiakurmi qallëkunqa.

¿Qamqa qowëkita yanapëta puëdinkimantsuraq? Tsënö kaptinqa, allichi kanman ishkëki kë yachatsikuyta estudiayänëki. Y qowëkiqa, ¿imatataq logrëta munanman? Pornografïata manana rikëta y pëman yapë confiakunëkitam. Tsë problëmapaq parlayaptikiqa manam cölerakunantsu, sinöqa imanö sientikunqëkitam cuentachö katsinan. Y qamqa, ¿imataraq rurankiman? Qowëki pornografïata manana rikänampaqmi yanapanëki y pëman yapë confiakunqëkitam rikätsinëki. Ishkëkim alli musyayänëki pornografïata rikëman nunakuna  imanir ishkiyanqanta y tsë viciuta venciyänëkipaq imata rurayänëkipaq kaqta. d

Tsë problëmapaq parlayanqëki höra cölerakurqa allichi kanman ishkëki confiakuyanqëki anciänuta yanapayäshunëkipaq niriyanqëkiqa. Peru qowëki pornografïata manana rikaptimpis, capaz pëman confiakunëkipaqqa tiempuraq pasanqa. Tsënö kaptinqa, ama llakinëtsu. Casädu vïdëkikunachö ichikllapis mas alli kayanqëkitaqa valorë. Y pacienciakuptikiqa, tiempuwanqa casädu vïdëkikunachö mas allim kawakuyanki (Ecl. 7:8; 1 Cor. 13:4).

Qowëki pornografïata yapë rikaptinqa, ¿mana arrepentikushqa kanqantaku o pornografïa rikëta dejëta manana puëdinqantaku rikätsikun? Höraqa manam. Tsë viciuta vencinampaqqa, imëpis kallpachakurmi këkänan. Mëtsika watakunana pornografïata mana rikëkarpis, capaz yapë rikärinman. Tsënö pasakuptinqa, kikinmi ni imanöpapis mana rikänampaq imata karpis ruranan, y tsë viciuta dejashqana kanqanta pensarpis allim cuidakunan (Prov. 28:14; Mat. 5:29; 1 Cor. 10:12). Jukläyana pensanampaqmi kallpachakunan y mana alli kaqtam melanänan. Y mana allikunaqa kayan, pornografïa y partinkunata kupë o yatëmi (Efes. 4:23; Sal. 97:10; Rom. 12:9). ¿Tsë llapanta ruranampaq kallpachakuykanku? Tsënö kaptinqa, tsë viciuta vencita puëdinqam. e

¿Qowëki tsë viciuta dejanampaq imatapis mana ruraptinqa? Tsënö pasakuptinqa capazchi llakikunki, cölerakunki y traicionashunqëkita sientinki. Tsë pasanqantaqa Jehovätam willanëki y dejarinëkim, pëmi yanapashunki tranquïla sientikunëkipaq (1 Pëd. 5:7). Jehoväwan amïgu kanëkipaq Palabranta estudië, pëman mañakuy y estudianqëkiman pensë. “Teyta Jehoväqa alläpa llakishqa këkaqkunapa lädunchömi këkan” y yapë kushishqa kanëkitam munan (Salmus 34:18). Diosta mas alli sirwinëkipaq kallpachakuy, mañakuy anciänukunata yanapayäshunëkipaq y tiempuwan qowëki cambianampaq kaqta shuyarë (Rom. 2:4; 2 Pëd. 3:9).